TA MAYË nmëguˈukˈäjtëm diˈib tëëyëp ojts nyëjkxnëdë wiink paˈis parë tpäädäˈändë meeny sentääbë, per tyam të jyëmbijnëdë mä yˈit lyugäär. ¿Tiko duˈun të ttundë? Yëˈko ttsoktë Jyobaa etsë jäˈäy. Tyäˈädë nmëguˈukˈäjtëm, ta net të nyëjkxtë mä mas niˈigyë tyëgoyˈatyë naybyudëkë (Mat. 22:37-39). Duˈun të ttundë nmëguˈukˈäjtëm jap Camerún, tuˈugë paˈis diˈib África. ¿Tijaty të tˈëxmatstë, ets wiˈixë Jyobaa të kyunuˈkxëdë? Min nˈokˈijxëm.

Tuˈugë nmëguˈukˈäjtëm diˈib xyëwˈäjtypy Onésime, ja tsyoˈony Camerún mä jëmëjt 1998, ta ojts nyijkxy wiink paˈis ets ja jap yˈijty mäjmäjkts jëmëjt. Per tëgok, mä tyunyëtyë reunyonk, ta tuˈugë nmëguˈukˈäjtëm ojts tˈijxkijpxyë ko nˈëwäˈkx ngäjpxwäˈkxëm extëm ko jäˈäy yˈäjkxmatsy. Duˈun jyënany: “Nˈokwinmäˈäyëm ko yˈäjkxmatstë nimajtskë jäˈäy diˈib naymyaayëdëp, jeˈeyë ko ak wiink lugäär yajpäättë. Tuˈuk, nëgooyë ja may äjkx tmäjtsnë, per jatuˈuk kyaj nëgoo tii tmatsy. Ja diˈib kyaj nëgoo yˈäjkxmatsy, ¿ti kyajëdaa nyëjkxët mä ja myëguˈuk diˈib nëgooyë yˈäjkxmäjtsnë?”.

Ko duˈunë Onésime tmëdooy, ta ttuknibëjtakë jyëmbitäˈäny Camerún, pes jap nëgooyë netyë jäˈäy yˈëxpëkanëdë. Per myëmääy myëdäj ko kyanekyyujët mä ja pyaˈis, pes kanäk jëmëjtë nety të yˈijnë wiinktsoo. Per ta ojts nyijkxy tëdujk poˈo parë tˈijxmatsäˈäny, ets mä jëmëjt 2012, ta ojts jyëmbijnë Camerún.

Onésime tnimaytyaˈaky: “Kuanë kots ojts nmëyujˈyë ambë ets wiˈix jap ja jukyˈäjtënë nyaxy. Ets mä salonk, kuanëts ko jatëgok ojts nmëyujy ndukˈuˈunyëdë kepy pyuˈuy”. Onésime xikp xikp jyënaˈany: “Kots mas niˈigyë nmëdoowˈijty tijaty näjxp reunyonk, tats kyaj nëgoo nekyjyamyejtsy ja unyaaybyajnë yuˈunkpënoonëbë”.

Mä jëmëjt 2013, ta Onésime pyejky mëdë Géraldine, diˈibë nety nanduˈun të tsyëënë taxtujk jëmëjt Francia, ets të jyëmbijnë Camerún. ¿Wiˈix ojts yajkunuˈkxtë ko jëjpˈam tpëjtaktë Diosë tyuunk? Onésime jyënaˈany: “Ojtstëts mä Eskuelë parë pënaty kyäjpxwäˈkxtëbë Diosë Kyutujkën ets tuundëts Betel. Mä tuˈukpë jëmëjt ja nyëbajttë 20 jäˈäy mäts nduˈukmuktë. Tyam, duˈunëts nnayjyawëty ko jats nyajpääty mä ja lugäärë mas oybyë mäts mbäät nˈäjkxmatsy” (Mar. 1:17, 18). Géraldine yˈakjënaˈany: “Ninäˈäts ngawinmääy nˈaxäjëdëts mëjwiin kajaa kunuˈkxën”.

Judith, jap ojts nyijkxy tsënaabyë Estados Unidos, per yajmëjwindëkëyaambyë nety mas niˈigyë Diosë tyuunk. Yëˈë tnimaytyaˈaky: “Tëgok tëgokëts ijty nëjkxy Camerún parëts nguˈixëyaˈanyë nfamilyë, jëëy yaxpëts njëmbijnë mët kots nˈëxmäjtsnë kanäägë jäˈäy diˈibëtsë nety mëët të nˈëxpëjktsondaˈagyë  Biiblyë”. Per kyaj tpëjtakyë wyinmäˈäny parë jyëmbitët mä pyaˈis, pes oyë nety yajmëjuy ets yëˈë nety kyujuupy mä ja tyeety tsyoybyety jap Camerún. Perë Judith tyukˈijxpajtë Jyobaa ets ta jyëmbijty. Yëˈë jyënaˈany ko nyasˈayoˈowë ja oybyë jukyˈäjtën diˈibë nety të dyajnëjkxy Estados Unidos. Per ta tˈanmääyë Jyobaa ets pyudëkëdët parë tˈijxwëˈëmët, etsë Jyobaa yëˈë yajtuun tuˈugë sirkuitë mëdë kyudëjk parë pyudëjkëdë.

¿Wiˈix wyimbëtsëëmy ko Judith jyëmbijty Camerún? Yëˈë jyënaˈany: “Ko nyajxy tëgëk jëmëjt, agujk jotkujkëts nnayjyäˈäwë kots nimäjtaxkë jäˈäy nbudëjkë parë nyëbattët”. Nan yajtuunkmooy prekursoora espesial. Ets tyam, ja tyundë sirkuitë mëdë myëmëjjäˈäy Sam-Castel. ¿Ets ja tyeety? Judith mëdë fyamilyë pyattë tuˈugë hospital wiink paˈis mä mbäät ja tyeety yajtsuky namayˈäjtën. Ets oy pyëtsëëmy mä yajtsujky.

Jatuˈugë nmëguˈukˈäjtëm diˈib xyëwˈäjtypy Víctor, jap ojts nyijkxy tsënaabyë Canadá. Ko ojts tkajpxy mä Diˈib Xytyukˈawäˈänëm tuˈugë artikulo mä yajmaytyaˈagyë unibersidad, ta twinmääy ja yˈëxpëjkën ets jyënany ko tmastuˈudäˈäny parë tˈaxäjëyaˈany tuˈugë kursë mä mbäät tjaty tuˈugë tuunk. Víctor jyënaˈany: “Kots duˈun nduuny, netyëts nbaty tuˈugë nduunk ets tats nduundëjkë prekursoor, pes yëˈëtsë nety xëmë të ndunäˈäny”. Ok, ta pyejky mëdë Caroline ets ta ojts nyëjkxtë Camerún. Ko nety jap yajpäättë, ta ojts nyëjkxtë Betel parë tˈixyˈatäˈändë, ets jap ta yaˈˈanmääytyë pën mbäät jyëmbittë Camerún parë jap Dios mëdundët. Víctor duˈun jyënaˈany: “Kyaj tikotsë nety njënäˈändët ko kyaj. Ets kom adëyëtsë nety ja njukyˈäjtën nyajnëjkxtë, tats ngupëjktë”. Caroline kyaj nety nëgoo oy mëk tyim yajpääty, per ndukniwijtsëdëts parëts nëjkxandë.

Víctor mëdë Caroline, ta tyuundëjkëdë prekursoor regulaar parë tpudëkëyandë niˈamukë jäˈäy diˈibë nety yˈëxpëkandëbë Biiblyë. Tim jawyiin, yëˈë naytyukˈijxëdë ja meeny diˈibë nety të tnikoombattë, per ok, ta ojts nyëjkxtë tuumbë tuk tiempaty Canadá parë jatëgok jyëmbitët Camerún ets duˈun tyuunˈadëtstë prekursoor. ¿Wiˈixë Jyobaa ojts kyunuˈkxëdë? Ojtstë mä Eskuelë parë pënaty kyäjpxwäˈkxtëbë Diosë Kyutujkën, tuundë prekursoor espesial ets tyam tyundë mä yajkojˈyë jëën tëjk mä nˈëxpëjkëm. Víctor jyënaˈany: “Kots ntsoˈondë mätsë nety oyë nxëëw njukyˈäjtën nyajnaxtë, tats nˈijxtë wiˈixëtsë Jyobaa xykyuentˈattë”.

Mä jëmëjt 2002, tuˈugë nmëguˈukˈäjtëm diˈib xyëwˈäjtypy Alain, japë nety yˈëxpëky Alemania mä tuˈugë unibersidad, ta ojts tkajpxyë trataadë, Joven, ¿qué harás con tu vida? Tyäˈädë yëˈë pudëjkë parë wyinmäˈäny tpëjtaky ets mas niˈigyë dyajmëjwindëkëyaˈanyë Diosë tyuunk. Mä jëmëjt 2006, ta yˈojtsy Mä tˈëxpëktë Biiblyë Yetyëjk diˈib Naytyuˈukˈäjttëp, ets jap yajkejxy Camerún mä nety tsyoony.

Jap, ta tpaty tuˈugë tyuunk mä kyaj tyimtsokyëty tyunët sëmäänˈabety. Ets ok, ta yaˈˈawäˈänë tuˈugë tuunk mä mas tsooxë yajmëjuyaˈany, per diˈib myëmääy myëdäj, yëˈë ko tkanekytyuunëdë Diosë tyuunk extëmë nety. Per ko yaˈˈanmääy parë tyunët prekursoor espesial, netyë tkupëjky. Ja wyintsën, ta yˈanmääyë ko yajpatanxëbë myëjuˈuny ko jap yˈakwëˈëmët, per kyaj tkupëjky. Ok, ta pyejky mëdë Stéphanie, diˈibë nety nanduˈun të tsyëënë Francia, ets ta ojts nyëjkxtë Camerún. ¿Tijaty jotmayëdaa pyatë Stéphanie?

Stéphanie tnimaytyaˈaky: “Päˈämbajtëts wanaty ets xypyäˈämduunëts tijaty (alergias), per  nbatëtsë nˈääy ntsooy ets tats oy nnayjyäˈäwë”. Jyobaa kyunuˈkxë tyäˈädë kasäädë jäˈäy ko myadaktë. Alain jyënaˈany: “Kots ojts nëjkxtë ëwäˈkx käjpxwäˈkxpë Katé, mä tuˈugë käjpnnuˈunk diˈib nidëkë, japëts nbattë niganäägë jäˈäy diˈib jyantsy yˈëxpëkandëbë Biiblyë. Nyaˈëxpëjktëts mä telefënë, ets nimajtskë tyäˈädë jäˈäy nëbajttë, ets ta nyaxkëdaky tuˈugë grupë”. Stéphanie yˈakjënaˈany: “Nitii duˈun xykyamoˈoyëmë jotkujkˈäjtën ko jäˈäy ndukˈixyˈäjtëmë Jyobaa ets ko net nyaytyukëdëkëdë. Yap Camerún kanäkˈokëts duˈun të njantsy nyayjyawëdë agujk jotkujk”. Tyam, sirkuitë tyundë Alain mëdë Stéphanie.

Gisèle, yëˈë nety nyiˈëxpëjkëbë tsooy jap Italia ko nyëbejty. Yëˈë yaˈëxpëjkë tuˈugë kasäädë jäˈäy diˈib tuundëp prekursoor. Gisèle monyˈijx monyjyäˈäwë ko tˈijxy wiˈix ja kasäädë jäˈäy adëyë jyukyˈattë. Ets yëˈë myëdunaambyë nety mas niˈigyë Jyobaa, pääty tyuundëjkë prekursoora regulaar mientrësë nety yˈëxpëky.

Gisèle jëmbitäämbë nety Camerún parë mas niˈigyë tmëdunäˈänyë Jyobaa, per tam diˈibë nety myëmaapy myëdajpy. Yëˈë jyënaˈany: “Nyajtëgoyaambyëtsë nety ja neky diˈib të yˈoˈoyënë parëts ntsëënët Italia, nikaˈagäˈänyëts ja nmëtnaymyaayëbëty etsëts ja nfamilyë”. Per mayë 2016, ta jyëmbijty Camerún. Ok, ta pyejky mëdë Léonce, ets ta Betel yˈanmääyëdë pën mbäät nëjkx tyundë Ayos, tuˈugë siudad mä nety tyëgoyˈatyë käjpxwäˈkxpë.

¿Wiˈixë nety japë jukyˈäjtënë nyaxy? Gisèle jyënaˈany: “Xëmë ijtyë jëën nyijkxy sëmäänˈam, ets kyajts mbäädë ndelefënë nekykyargarattë, päätyëts ijty kyaj nekyyajtundë. Njäjtëts nyajjënmëjët parëts ngaakyˈix ndojkxˈixët, ets kootsëts ijty nëjkxtë nëgoombë mëdë karretiyë mä kyaj nëgoo jäˈäy, etsëts nnaygyudëˈkxëdë mëdë lamprë”. ¿Ti pudëjkëdë parë myadaktë? Gisèle jyënaˈany: “Xypyudëjkëdëtsë espiritë santë, nnaybyudëjkëdëts nimajtsk, xymyëjääwmooytyëtsë nfamilyë etsëts ja nmëtnaymyaayëbëty, ets näˈäty, yajtukpudëjkëdëtsë meeny sentääbë”.

¿Jotkujk nyayjyawëtyë Gisèle ko jyëmbijty mä ja pyaˈis? Yëˈë jyënaˈany: “Tiko këdii, agujk jotkujkëts nnayjyawëty. Kots ndimjäjttë, ojtsëts xytsyiptakxëdë ets mon tukëts nayjyäˈäwëdë. Per kots njäˈäytyëgooytyaaytyë, tats nbëjktë kuentë ko yëˈëts të ndundë diˈibëtsë nety mbäät ndundë. Ndukˈijxpajttëbëtsë Jyobaa ets mas wingonëts mët nnayjyawëdë”. Léonce mëdë Gisèle të yˈotstë mä Eskuelë parë pënaty kyäjpxwäˈkxtëbë Diosë Kyutujkën, ets tyam, tuk tiempë tyundë prekursoor espesial.

Pënaty äjkxmäjtstëp, wyinguwäˈkëdëp kanäk pëkyë jotmay nëgooko tmatstë may äjkx, nanduˈun ja nmëguˈukˈäjtëm diˈib jëmbijnëdëp mä ja pyaˈis, wyinguwäˈkëdëp kanäk pëkyë jotmay parë tpudëkëdë pënaty winë ääw winë jot yˈaxäjëdëbë Diosë yˈayuk. Seguurë ko Jyobaa jyamyatsaampy ets kyunuˈkxaambyë tyäˈädë nmëguˈukˈäjtëm ko tyukˈixëdë nuˈunën tsyokëdë (Neh. 5:19; Eb. 6:10). Pën mijts mtsënaapy wiink paˈis ets mnijäˈäwëp ko mä mtsoony tëgoyˈäjtp mas niˈigyë nmëguˈukˈäjtëm diˈib ëwäˈkx käjpxwäˈkxëp, ¿mbäät mjëmbity? Pën mjëmbijtp, mbäät mˈity seguurë ko Jyobaa mgunuˈkxanëp (Prov. 10:22).