AINA na ya nkazi aingi aakukile uku mpanga zyuze mu kulonda impiya ndakai yaswilila ukumwao. Pa mulandu wakuti yatemwa Yeova na antu yauze, yakuukila uku ncende ukukalondekwa sana ya kasimikila. (Mate. 22:37-39) I vyani vino yaipeelesya ukucita, nupya Yeova wayapaala uli? Pakuti tumanye, lekini tulande pa mpanga ya Cameroon.

Umu 1998 umwina uwi zina lyakuti Onésime wakuusile ukufuma uku mpanga ya Cameroon ino wakulileko. Wikazile uku mpanga yuze pa myaka 14. Wanda umwi pa kulongana uvwile icilangililo icalandanga pa mulimo wa kusimikila. Kalanda walanzile ukuti: “Ndi cakuti ya cuza yaili yakulema inswi uku ncende izipusanepusane nupya wenga akulema inswi izingi ukucila umuze, uzye wino asikulema inswi zingi atange akuukile uku ncende kuno umuze akalema inswi zingi?”

Icilangililo cici calenzile ukuti ya Onésime yaelenganya pa kuswilila uku Cameroon kuno antu aingi yalondanga ukusambilila Baibo nu mu kwazwa ya kasimikila aaku mpanga iya. Nomba yasakamile. Uzye yali nu kuyaelezya ukuyaikala uku mpanga ino yavyalilweko pa cisila ca kuyaikala uku mpanga yuze pa myaka iingi? Pa kulola ndi cakuti yangakwanisya ukuyaikalako, ya Onésime yatazile yaswilila uku Cameroon pa myezi 6. Lyene umu 2012, yaswilile umu kwikala.

Ya Onésime yalanzile ukuti: “Nali nu kwelezya mikaalile ni miceele ya kuuku pano kwakaya. Nupya nali nu kwelezya ukwikala pa vilimba ivikome umu Ng’anda ya Wene, nomba nganikisyako sana mano uku kulongana ala natandika nu kwilila ivilimba ivisuma vino nikalangapo.”

Umu 2013, ya Onésime yatwazile ya Géraldine, aswilile uku Cameroon pa cisila ca kwikala uku France pa myaka 9. Uzye Yeova wayapaazile uli pa mulandu wakuti yakoleezyanga ukulonda kwakwe umu umi wao? Ya Onésime yalanzile ukuti: “Twazanyilwe ukwi Sukulu Lyakwe ya Kakosoola ya Wene nu kuombelako pa Betele. Umwaka uwafumako, asambi ya Baibo 20 yabatiziwe umu cilongano citu. Lyene nkayuvwa ukuti naya umu ncende isuma ‘iyakulemamo inswi.’” (Mako 1:17, 18) Ya Géraldine nayo yatile: “Napokeelela amapalo aingi ukucila vino nelenganyanga.”

Ya Judith yakuukile uku United States, nomba yalondanga ukuombela sana Yeova. Yalanzile ukuti: “Lyonsi lino nafuma umu kutandala uku Cameroon, nalilanga sana pano nasyanga antu aingi yano natandike ukusambilila nayo Baibo.” Nanti ciye vivyo, ya Judith yasitokanga ukuswilila uku Cameroon. Yaombanga incito iyampomvu iyalenganga yakwanisya ukulipilila ya isi ivya ku cipatala. Nomba, ya Judith yataile sana Yeova nupya yaswilile uku Cameroon. Yalanzile nu kuti yakaluuka sana vino ikalanga ningo lino yali uku  United States. Yapefile kuli Yeova ukuti ayazwe ukusenuka nupya mwangalizi wa ciputulwa na mamakwe yayazwile nu kuyakomelezya.

Nga ya Judith iusya vino ivintu vyali lino yaswilile uku Cameroon, yakalanda ukuti: “Nali sana nu luzango apa myaka itatu ino nazwile antu 4 ukubatiziwa.” Ya Judith yatandike ukuomba nga painiya muiyele. Ndakai yakaombela pamwi na ya iya, ya Sam-Castel, umu mulimo wa kutandalila ivilongano. Nomba i vyani ivyacitike kuli ya isi yakwe ya Judith? Yene na ya lupwa yao yalonzile icipatala uku mpanga yuze icaipeelisye ukulipilila ya isi ukuti yayalepule. Nupya vyonsi vyali ningo lino yayalepwile.

Umwina wizina lyakuti Victor wakuukile uku Canada. Pa cisila ca kubelenga icipande umu Lupungu Lwa Mulinzi icalandanga apa masambililo ya papela, welenginye pa masambililo yakwe. Watiile amasambililo yapa yunivesiti nu kutandika ukusambilila amasambililo apa nsita inono. Ya Victor yalanzile ukuti: “Calenzile ukuti ntandike zuwa incito nu kuombako vino nalondesyanga ukuomba kuli kuti upainiya.” Lino papisile insita, ya Victor yatwazile ya Caroline, nupya yaile iyatandala uku Cameroon. Lino yali kuuku, yatandalile iofesi lya musambo nupya aina yayakomelizye ukutandika ukwelenganya pa kuombela umu Cameroon. Ya Victor yalanzile ukuti: “Twazanyile ukuti kusi icingatulesya, nupya pa mulandu wakuti twangupizye mpiti uwikazi twazumile.” Nanti cakuti ya Caroline yalwalililanga, yasoolwilepo ukuukukila uku Cameroon.

Ya Victor na ya Caroline yatandike ukuomba upainiya wa nsita yonsi pakuti yaazwa antu yonsi yano yazana aakulonda ukusambilila Baibo. Yasunzileko ulupiya lumwi pakuti yataaya uku ncito. Lyene yaomvileko imyezi imwi uku Canada, calenzile ukuti yaswilile uku Cameroon nu kuya twalilila kuomba upainiya. A mapaalo ci yano yapokeliile? Yazanyilwe ukwi Sukulu Lyakwe ya Kakosoola ya Wene, yaomvileko upainiya uiyele, nupya ndakai yakaomba umu makuule. Ya Victor yatile: “Pa mulandu wakuti twasile imikalile itu isuma, twalinzile ukutaila sana Yeova nupya watwalilila ukutusakamala.”

Umu 2002 ya Alain, aali pa yunivesiti ya ku Germany yabelenzile kapepala ki landwe kakuti: Youths—What Will You Do With Your Life? Vino yabelenzile vyalenzile yasenule vino yalondanga ukucita umu umi. Umu 2006, yazanyilwe ukwi Sukulu Lya Mulimo Lyakwe ya Eluda na Aomvi Aakatumikila (MTS) nupya yayatumile umu kuombela uku Cameroon, impanga ino yavyalilweko.

Ya Alain yazanyile incito ya kuomba pa nsita inono uku Cameroon. Lino papisile insita, yazanyile incito isuma ino yafolanga impiya izingi, nomba yasakamalanga ukuti yatalaombesya umu mulimo wa kusimikila wakwe vino yaombesyanga mpiti. Fwandi lino yasonsilwe ukuomba upainiya uiyele, yazumile ukwaula nu kusitooka. Aingizye incito yayanenyile ukuti yamayafolesyanga ulupiya ulwingi, nomba ya Alain yakanyile nu kutandika upainiya uiyele. Lino papisile insita ya Alain yatwazile ya Stéphanie, aikazile uku France apa myaka iingi. Iintazi ci zino ya Stéphanie yakweti lino yakuukile uku Cameroon?

Ya Stéphanie yalanzile ukuti: “Natandike ukulwalilila nupya kwali ivingi ivyandetelanga uwavya uku mwili, nomba nakwanisye ukulamwa umulembo nupya natandike ukuvwako ningo.” Atwalane yaa yapokelile amapaalo pali vino yazizimizye. Ya Alain yalanzile ukuti: “Lino twaile umu kusimikila umu muzi uno yakati Katé, twazanyile antu aingi alondanga ukusambilila Baibo.” Lino papisile  insita, twatandike ukusambilila nayo Baibo ukuomvya foni. Asambi ya Baibo yaili aonsi yabatiziwe nupya iumba lyakwe ya kasimikila lyapanzilwe.” Ya Stéphanie yalanzile nu kuti: “Kutaya uluzango ulwacila ulwaya umukwazwa yauze ukuipeela kuli Yeova. Ukuombela kuno, kwalenga twaya sana nu luzango insita zingi.” Ndakai, ya Alain na Stéphanie yakaomba umu mulimo wa kutandalila ivilongano.

Ya Gisèle yabatiziwe ala yakusambilila vyakwe udokota uku Italy. Yatemilwe vino ya painiya atwalane ayasambilizyanga Baibo yangupizye umi, nupya nayo yalondesyanga ukuombesya umu mulimo wa kusimikila. Fwandi ya Gisèle yatandike ukuomba upainiya wa nsita yonsi ala ya kumalila amasambililo yao.

Ya Gisèle yalondanga ukuswilila uku Cameroon pakuti akuno yakatwalilile ukuombesya umu mulimo wakwe Yeova, nomba yasakamalanga. Yalanzile ukuti: “Ntali nu kutwalilila ukuya umwina Italy nupya nali nu kuipatula uku vyuza na ya lupwa aakaikala uku Italy.” Nanti ciye vivyo, umu Mei 2016, ya Gisèle yaswilile uku Cameroon.

Lino papisile insita, yatwaline na ya Léonce, nupya iofesi lya musambo lyayazumilizye ukuya umu kuombela umwi tauni lya Ayos umukalondekwa ya kasimikila.

Uzye imikalile yali uli umu Ayos? Ya Gisèle yalanzile ukuti: “Ilingi kutayanga malaiti pa milungi iingi nupya mafoni yayanga azime. Fwandi insita izingi mafoni yataombanga. Nasambilile ukwelekela pa nkwi, nupya twayanga na matoci mukutapa manzi ala kwati kufita lino antu yacepa uku luzi.” I vyani vyazwile ya Gisèle na ya iya ukuzizimizya? Ya Gisèle yalanzile ukuti: “Umupasi wakwe Yeova, ya wane, kukomeleziwa nu kwazwiwa muli vino twalondekwanga ukufuma kuli yalupwa ni vyuza kwatwazwile sana.”

Uzye ya Gisèle yaya ni nsansa pa mulandu wakuti yaswilila uku mpanga ya kumwao? Ee! Ukwaula nu kutwisika. Yalanzile ukuti: “Kwayanga insita zimwi lino twakwatanga intazi nu kuvwa ukutoovoka, lino twacimvizye intazi zizyo, nemo na yawane twayuvwile ukuti twacisile ukulingana na vino twalinzile ukucita. Twataila sana Yeova nupya tukayuvwa ukuti twapalama sana kuli aliwe.” Ya Léonce na ya Gisèle yazanyilwe ukwi Sukulu Lyakwe ya Kakosoola ya Wene, nupya ndakai yakaomba upainiya uiyele pa nsita inono.

Wakwe vivi kwene vino mulondo wa nswi akaya umusipe asi mulandu ni ntazi zino angakwata pakuti sile aleme inswi zingi, avino na yayo yonsi aakaswilila ku mpanga zya kumwao yakaipeelesya pakuti yazwe yonsi aakalondesya ukuvwa ukwi landwe lya Wene. Ukwaula nu kutwisika, Yeova akaiusya ya kasimikila yonsi aakaombesya pa mulandu nu kutemwa kuno yakalanga ukwi zina lyakwe. (Neem. 5:19; Ayeb. 6:10) Ndi cakuti mukaikala uku mpanga yuze nupya uku mpanga kuno mwafumile kukalondekwa ya kasimikila ya Wene aingi, uzye mutanga mutemwe ukuswilila? Ndi cakuti mwacita vivyo, Yeova alamupaala wakwe cimwi.—Mapi. 10:22.