ADDIBILA ni arogola owinjhiva yaatamele dhilabo dhoorela ehubuwela ohogolowela elabo ebaliwiwa. Mwaha odhivela enniwana ni Yehova vamodha ni mwanddamani, aliwa ehitamela mburo winahoweleya anamalaleya oomwene. (Mat. 22:37-39) Dhithu baani yeriliwana? Mareeliho baani yawakenliwa? Wihina noone kabeni noone dhopadduwa dha addibila oKamaroes, elabo ya oeste Wafirika.

Yaka ya 1998, ddibila Onésime okuma elabo yaye oKamaroes odhowa elabo emodhaya okalawo yaka dhowakwana 14. Nlabo nimodha agaali omutugumanoni, oliye wiwa yoladdaniha yawoga wodhela mabasa oolaleya. Namawoga mwaha wera: “Athu abili enna omeza mburo dhohiyana. Mmodha anna othabwa otavula oba, mbwenye mmodhaya anatavula vang’ono. Ole anatavula vang’ono enahoweleya ere ddi? Kiyafwanelele odhowa mburo mukwaye anatavuliyevo oba?”

Yoladdaniha ela yahimuthukulela Onésime wubuwela ohogolowela oKamaroes, mwaha elabo yaye mabasa owameza athu yofuneya vanlubale. Mbwenye oliye ahithuwathuwa. Mwaha omala mudhidhi wowinjhivene elabo emodhene, ere wanda ohogolowela elabo yaye ni okala wewule? Wihina oone akala ere wanda, Onésime odhowa elabo yoKamaroes okalawo mweri 6. Vano yaka ya 2012 oliye otamelawo.

Onésime anowoga egi: “Gohowela olemela oviha ni makalelo eegumi eelabo yaga. Gadhowa Nyumba Yomwene, gakiratela mpaddo dhatabwa.” Oliye anowoga ateyaga egi: “Gavuruwanaga pamadhene mutugumano gohiya wubuwela kadera ndhe dha sofa gakiratelimi elabo emodha.”

Yaka ya 2013, Onésime ni Géraldine otelana. Géraldine ahogolowele oKamaroes nuumala okala oFransa yaka dhowakwana 9. Aliwa wahela mabasa oomwene mburo wobajha mwigumini mwewa, Mareeliho baani yawakenliwa? Onésime anowoga: “Nahikanna gari yokursari Eskola Yanamalaleya Oomwene ni okavihera oBeteli. Yaka evirile, anamahudhera owakwana 20 a mulogo wehu ehibaddiziwa.” Vano miyo ginona wi giri mburo wapama wa ‘omeza.’ (Mar. 1:17, 18) Géraldine anowoga egi: “Miyo gihiwakela mareeliho gihinawubuweligimi.”

Judith atamele elabo yo Estados Unidos, mbwenye oofuna vanlubale wawenjhedhedha mabasa aye oolaleya. Oliye anowoga egi: “Malabo amatene gadhonwimi waapada amudhaga oKamaroes, gahogolowawo ginlaga. Kiyaali yokweya waddiwala anamahudhera aaga a Bibliya  gahilimi.” Naari dhigarive ndo Judith kanna ebaribari akala yaali yofwanelela oliye ohogolowela oKamaroes. Oliye owakela korowa yapamene wihina alivena murombwe babe ahoweliye elabo yoKamaroes. Amuroromelaga Yehova, Judith ohogolowela oKamaroes. Oliye anowoga egi ookanna munukwela mwaha dhithu anniyena elabo yo Estados Unidos. Oliye olobela wa Yehova wihina amukavihere olemela dhithu dha elabo yaye ni olibihiwa nnameddela mulogo vamodha ni mwariye.

Judith anowubuwela: “Muwari mwa yaka tharu gahihagalala mwaha wakavihera anamahudhera annayi okala anamahara a Yesu.” Judith othomiwa okala piyonera avayeka, peeno oliye vamodha ni mamune Sam-Castel, enakavihera ninga anameddelela mulogo. Ki babe Judith? Espitale ya elabo emodhaya yahiivelela wihina elive murombwe dhatedhene dhahoweleya. Mohagalalasa oliye ohuvulumuwa.

Ddibila dhaala anithaniwa Victor ahitamela elabo yo Kanada. Nuwileri muselu onafwanyeya mu A Sentinela enawoga wodhela ohudhera wa vadhulu, oliye obajha wubuwela ohudhera waye. Ohiya ohudhera wavadhulu, obajha ohudhera mwana mabasa vang’ono. Victor anawoga egi: “Eyo ehigikavihera wasayela mwana mabasa ni werana ethu gafunimi — olaba ninga piyonero amudhidhi watene.” Nuuvira mudhidhi, Victor ni Caroline otelana, aabilene odhowa opaada oKamaroes. Labo yaadhonwiwa opaada oBeteli aliwa okongomedhiwa wihina yubuwele okavihera elabo yoKamaroes. Victor anowoga egi: “Iyo kananna ethu yanikoddiha, woona egumi yehu yaali yojajalene iyo orumedha konviti ele.” Naarive Caroline aganna makathamiho mwigumini, aliwa otamela elabo yele.

Mwaha wa athu owinjhiva yanna efunelo, wathukulela wambela mabasa oPiyonero a mudhidhi watene. Wahivira mudhidhene ejhaga dhithu yanniwana. Mbwenye wihina yaparegeve mabasa ewa elabo yoKamaroes yahidhowa elabo yo Kanada wihina yalabe mweri vang’onove. Mareeliho baani yawakenliwa? Aliwa ehikursari Eskola ya Anamalaleya Oomwene, ehikavihera ninga mapiyonero a vayeka vano enakavihera mabasa oomaga. Victor anowoga egi: “Mwaha ohiya elabo naalemelihu, nihoona nikavihero na Yehova.”

Yaka ya 2002 Alain, aali ofakulidade o Alemanya, ahileri folyetu nnawoga Jovens — Como Usarão Sua Vida? Folyetu nna nahimukavihera okanna dholuba. Yaka ya 2006, oliye okursari Escola de Treinamento Ministerial, vano othomeliwa elabo yoKamaroes, elabo yaye yobaliwa.

OKamaroes, Alain wafwanya mabasa a mudhidhi mung’onove, nuuvira mudhidhi oliye wafwanya mabasa mamodha aakeliye korowa yapamene. Mbwenye mabasa ala yomuthuwa-thuwiha mwaha oova enavunganyedhe mabasa aye oolaleya. Nuwindo, nuwithaniwa wihina akale piyonero avayeka, Alain kubuwele dila bili. Patarawu aye omwenjhedhedha korowa, mbwenye oliye odidelave yothomaye. Nuuvira mudhidhi Alain omutela Stéphanie, akanle elabo yo Fransa yaka dhowinjhivadhene. Makathamiho baani yaafwanyile mwaha otamela oKamaroes?

Stéphanie anowoga: “Miyo gahikanna makathamiho mmwiilini ni gooniniwa, mbwenye ofwanya murombwe ogikavihere vanlubale.” Yehova ahireeliha ovilela wa anamatelana ala. Alain anowoga egi: “Nlaleyaga murudda wolapela  onithaniwa katé, nahafwanya anamahudhera owinjhiva. Nuuvira mudhidhi iyo walaleyaga anamahudhera ala ni telefoni. Anamahudhera abili obaddiziwa vano okalawo nikuru nixa.” Stéphanie anowenjhedhedha egi: “Kaginona ohagalala wimodha onapitha wakavihera amodha wipeleka wa Yehova. Okavihera wuno ohunooniha ohagalala wula dila dhowinjhivadhene.” Peeno Alain ni Stéphanie enakavihera ninga anameddelela mulogo.

Gisèle abaddiziwe agaali ofakulidade elabo yo Witaliya. Oliye ahihudhera ni anamatelana yalaba ninga mapiyonero ni ootikina egumi yojajala yanniwana. Yotajhiha yewa yahimuthukulela wenjhedhedha mabasa aye oolaleya. Vano Gisèle amarihaga ohudhera waye era agari piyonera a mudhidhi wamutene.

Gisèle ohogolowela elabo yoKamaroes wihina enjhedhedhe mabasa a Yehova. Mbwenye dhihikala dhithu dhamuthuwathuwiha. Oliye anowoga egi: “Miyo gohowela odduwala elabo yo Witaliya, walapela amudhaga vamodha naakwaga yakala wengo.” Naari ni makathamiho yala Gisèle ohogolowela elabo yoKamaroes mweri wa Maio a 2016. Nuuvira mudhidhi Gisèle otelana ni Léonce. Addibila oBeteli oKamaroes opendda naaliwa wihina etamele murudda wo Ayos, wadhowela anamalaleya oOmwene.

Egumi yo Ayos yaari avi? Gisèle anowubuwela: “Mudhidhi wowinjhiva kuwakala enerjiya, kiyandeya newene wakaregari atelefoni ehu. Mudhidhi wowinjhivene nakalesa disligadu. Miyo ohudhera opiya ni kwini. Wihina nikanne manjhe naadhowela otxelani, mbwenye wodhaliwesa. Bumwahaya nadhowesa ni mahiyu nigamagelele lanterna.” Aliwa yandile addi owanana makathamiho ala? Gisèle anowoga: “Muzimu wa Yehova ohunikavihera wimela txithi. Miyo ni Léonce nnokaviherana. Nnolibihana, malabo mamodha nnokaviheriwa wi nikanne yojha naakwihu obe namudhihu.”

Gisèle anohagalala mwaha ohogolowela elabo yaye yobaliwa? Oliye anowaakula egi: “Hee! Kaginanganyedha! Vobajha, nahikanna makathamiho ni nokwerebeya, mbwenye iyo omuroromela Yehova ni wenjhedhedha wandana wehu nuliye. Nugonjhiha makathamiho ale, miyo ni Léonce woona wi nerilena ele nafwanelelihu werana.” Léonce ni Gisèle ehikursari Eskola ya Anamalaleya Oomwene, peeno enakavihera ninga mapiyonero avayeka a mudhidhi vang’onove.

Namameza anowakwaranya makathamiho wihina atavule oba. Emodhave enapadduwa ni ale enahogolowela elabo yewa yobaliwa, enowilibihera wihina “yameze” ale enafuna ovuruwana muthenga wa Omwene. Mwebaribarene Yehova kadha adduwala wilibihera wa anamalaleya ala ni ‘odhivela yonihiliwa ndina naye.’ (Nee. 5:19; Heb. 6:10) Akala we onakala elabo emodha mbwenye elabo yawo yobaliwa enowahowela anamalaleya, were wanda ohogolowela elabo yawo? Werana yeyo Yehova anere wureeliha vanlubale! — Pro. 10:22.