SAAM-BIIS la saam-bi-pogs wʋsg sẽn da kẽng tẽn-zẽng n na n tɩ bao ligd lebg n kula b ba-yiyã. B sẽn nong a Zeova la b nong nebã yĩnga, b leba zĩis nins koe-moondb sẽn pa waoogẽ, n na n tɩ moone. (Mat. 22:37-39) Bõe la b sak n mong b mense, la bark-bʋs la b paam-yã? Sẽn na yɩl n bãng rẽ, bɩ d gom Kamerun sẽn yaa Afirik tẽng a ye wã yelle.

Yʋʋmd 1998 wã, saam-biig a ye yʋʋr sẽn boond t’a Onezɩm yii a ba-yirã Kamerun, n tɩ zĩnd nasaar-tẽnga. A maana yʋʋm 14 beenẽ. La daar a ye, tigsg sasa, saam-biig n da wɛgsd sõsga, n dɩk makr koɛɛgã mooneg wɛɛngẽ. A yeelame: “Ned ne a zoa sã n kẽng zĩm-yõgbo, tɩ ned fãa be a zĩigẽ, t’a ye paamd zĩm wʋsg n yɩɩd a to wã, rẽ yĩnga sẽn pa paamd-a zĩm wʋsgã kõn yi a sẽn beẽ wã n tɩ naag a to wã sɩda?”

Makrã kɩtame t’a Onezɩm tags n ges a sã n pa na n leb Kamerun sẽn yaa tẽng neb wʋsg sẽn dat n zãms Biiblã, n tɩ sõng n moon koɛɛgã. La a ra maanda yɩɩre. Sẽn mik t’a sẽn yi tẽn-kãng sẽn yaa a ba-yirã kaoosa yʋʋmã, a na n le tõog n minimã beenẽ vɩɩmã sɩda? Sẽn na yɩl n bãng rẽ, a Onezɩm leba Kamerun n tɩ zĩnd kiis a yoob nanda. La yʋʋmd 2012, a yikame n na n tolg n tɩ pa be.

A Onezɩm yeelame: “M da segd n modg n minima tʋʋlgã, la vɩɩmã sẽn yaa to-to be wã. M da segd n le minima goeels sẽn pa bʋgs zombg Rĩungã roogẽ.” A yõgemda a noor la a paas yaa: “La m sã n da maag m yĩng n kelgd sõssã, m yĩmda nasaar-tẽng Rĩungã roogẽ goeelsã sẽn bʋgsã yelle.”

Yʋʋmd 2013, a Onezɩm kẽe kãadem ne a Zeraldinn. Yẽ me ra zĩnda Fãrense n maan yʋʋm a wɛ, n da lebg n wa Kamerun. B sẽn lʋɩɩs a Zeova raabã maaneg taoor b vɩɩmã pʋgẽ wã, bark-bʋs la b paam-yã? Ad a Onezɩm sẽn yeele: “Tõnd paam n kẽnga Rĩungã koe-moondb lekolle, la d paam me n tʋmd Betɛllẽ wã. Rɩẽ, tõnd tigingã Biibl karen-biis bãmb 20 n deeg lisgu. Mam bãngame masã tɩ m bee zĩig koɛɛgã mooneg sẽn womd biis sõma n yɩɩda.” (Mark 1:17, 18) A Zeraldinn paasame: “Mam paama bark wʋsg n yɩɩd m sẽn da tẽedã.”

A Zidit me ra tɩ vɩɩ Etazĩni, n da rat ne a sũur fãa n moon koɛɛgã n paase. Ad a sẽn yeele: “Mam sã n da wa ges m zakã rãmb Kamerun n lebg n loogdẽ, m yãbdame, bala m da segd n loog n basa neb wʋsg m sẽn da sɩng-b Biiblã zãmsgo.” La a Zidit yamã ra yooda ne a lebg n wa zĩnd Kamerun. A ra tʋmda tʋʋmd sẽn yaood sõma, hal n da  toond a ba wã ligd t’a paamd n tɩpd a menga. Baa ne rẽ, a Zidit kell n teega a Zeova, n lebg n wa zĩnd Kamerun. A yeelame tɩ wakat ninga, nuurã vɩɩmã a sẽn da tar Etazĩni wã yamleoog mi n tar-a lame. A pʋʋsa a Zeova t’a sõng-a t’a tõog n minimi. La a paamame tɩ tigims sull yel-gɛt ne a pag keng a raood tɩ sõng-a sõma.

A Zidit tẽega bũmb ning sẽn maane, a sẽn leb Kamerunnã. A yeelame: “Yʋʋm a tãab pʋgẽ, mam tõog n zãmsa neb a naas Biiblã tɩ b wa reeg lisgu, tɩ kõ-m sũ-noogo.” A Zidit wa n lebga zall so-pakda. Masã, yẽ ne a sɩd a Sãmkastɛl gilgdame n kaagd tigimsã. La a Zidit ba wã maana wãna? A Zidit ne a zakã rãmb paama logtor tẽn-zẽnga, sẽn sak n na n wopeer a ba wã n pa reeg ligd ye. Woperasɩyõ wã yɩɩ sõma, hal tɩ b sũy yɩ noogo.

Saam-biig a ye yʋʋr sẽn boond t’a Viktoor yikame n tɩ zĩnd Kanada. A wa n karma Gũusg Gasgã sõsg a ye sẽn gomd karen-wogdã yelle, tɩ kɩt t’a maneg n tags a karengã yelle. A basa inivɛrsite wã karengo, n sɩng lekoll b sẽn zãmsd nebã nug-tʋʋmd tʋʋl-tʋʋlle. A yeelame: “Kɩtame tɩ m paam tʋʋmd tao-tao, la m tõog me n lebg so-pakda, wa m sẽn da sɩng n datã.” A Viktoor wa n kẽe kãadem ne a Karolinn tɩ b tũ taab n wa Kamerun. Daar a ye, b tɩ gilg n gesa filiyallã, tɩ saam-biisã yeel-b tɩ b tags n ges b sã n pa tõe n wa zĩnd Kamerun n moon koɛɛgã. Ad a Viktoor sẽn yeele: “D ra pa ne bũmb sẽn gɩdgd tõnd ye. Sẽn paase, d sẽn da pa gĩd d vɩɩmã ne bũmb wʋsgã, d ra tõe n yik n wa zĩnda be.” Baa ne a Karolinn laafɩ wã sẽn pa waoogã, b kell n yãka yam n na n wa zĩnd Kamerun.

A Viktoor ne a Karolinn lebga wakat fãa so-pakdba, n na n sõng neb wʋsg sẽn dat n zãms Biiblã. B tõog n gesa b mens yell ne ligd ning b sẽn da kẽgsã wakat bilf pʋgẽ. Rẽ poore, b leba Kanada n tɩ tʋm kiis a wãna, tɩ sõng-b tɩ b le tõog n wa Kamerun n na n kẽng taoor ne koɛɛgã moonego. Bark-bʋs la b paam-yã? B paamame n kẽng Rĩungã koe-moondb lekolle, n lebg zall so-pakdba. La masã b sõngdame n met siglgã roto. A Viktoor yeelame: “D sẽn sak n loog n bas d nuura vɩɩmã, d paamame t’a Zeova teel-do.”

Yʋʋmd 2002 wã, a Alẽ sẽn da yaa inivɛrsite karen-biig n be Alemayn wã karma seb-vãoog ning gom zug sẽn yaa: Jeunes gens—Qu’allez-vous faire de votre vie ? B sẽn yeel bũmb ning be wã kɩtame t’a yãk bũmb kẽer Wẽnnaam siglgã pʋgẽ, n na n modg n wa maane. Yʋʋmd 2006, a kẽnga Wẽnnaam tʋʋmdã zãmsg lekolle. La lekollã poore, b tʋm-a-la a ba-yirã Kamerun.

A Alẽ sẽn wa Kamerunnã, a paama tʋʋmd sẽn pa rɩkd a sẽkã wʋsgo. Rẽ poore, a paama tʋʋmd sẽn yaood sõma. La a ra yɛɛsda tʋʋm-kãng na n wa kɩt t’a pa le tar sẽk n moond koɛɛgã wa pĩndã ye. Rẽ wã, b sẽn wa n kos-a t’a lebg zall so-pakdã, a saka zĩig pʋgẽ. La a tʋʋmdã taoor soab yeel-a lame t’a na n paasa a kiuugã ligdi. Baa ne rẽ, a Alẽ basa tʋʋmdã, n lebg so-pakda. A wa n kẽe kãadem ne a Ɛstefani. A Ɛstefani ra zĩnda Fãrense, n kaoos yʋʋm wʋsgo. A sẽn yik n wa Kamerunnã, bõe n pa yɩ nana ne-a?

Ad a Ɛstefani sẽn yeele: “Mam wa n tara bã-bõones wʋsgo, la m paama tɩɩm n tɩpd m meng wakat fãa, tɩ são-são masã.” A Alẽ ne a pagã sẽn tõog toogã, b paama barka. A  Alẽ yeelame: “Tõnd wa n kẽnga Katé, sẽn yaa tẽn-bil sẽn be zĩ-zãrgẽ n tɩ moon koɛɛgã. D paama neb wʋsg sẽn da rat n zãms Biiblã. Rẽ poore, d wa n tũnugda ne telefõn n zãmsd-b Biiblã. B sʋkã neb a yiib n wa n deeg lisgu, la b lugla sull beenẽ tɩ koe-moondb a wãn be be n maand tigissã.” A Ɛstefani paasame: “Sũ-noog pa le be n yɩɩd f sẽn na n sõng ned t’a wa rɩk a meng n kõ a Zeova ye. D sẽn be ka wã, d paamda sũ-noog a woto naoor wʋsgo.” Masã, a Alẽ ne a Ɛstefani gilgdame n kaagd tigimsã.

A Zizɛll reega lisg a sẽn wa n karemd logtoeemd lekoll Itali. A sẽn yã tɩ pag ne a sɩd ning sẽn zãms-a Biiblã ra pa gĩd b vɩɩmã ne bũmb wʋsgã, a sũur yɩɩ noog wʋsgo, tɩ kɩt t’a ra rat n moon koɛɛgã n paase. Woto yĩnga, a lebga wakat fãa so-pakda, sẽn wa n ket bilf t’a lekollã sa wã.

A Zizɛll sẽn wa n be Kamerunnã, a ra rata ne a sũur fãa n moon koɛɛgã wʋsg n paase. La a ra maanda yɩɩre. A yeelame: “M da tara sor n na n vɩɩmd Itali. La m da segd n basa rẽ fãa, n loog n bas m zo-rãmbã la m zakã rãmb sẽn da be beenẽ wã.” Baa ne rẽ, yʋʋmd 2016 sig-noy kiuugã, a Zizɛll lebg n waa Kamerun. Rẽ poore, a kẽe kãadem ne a Leyõns, tɩ Kamerun filiyallã tʋm-b Ayos, sẽn yaa tẽng b sẽn dat koe-moondb n paasã.

Vɩɩmã ra yaa wãn to Ayos? Ad a Zizɛll sẽn yeele: “Kʋʋrã wã mi n kupame n maan semen-dãmba, tɩ d pa tõe n sarz d telefõn-dãmbã ye. Naoor wʋsgo, d telefõn-dãmbã mi n kii tamm. Mam zãmsa seglg ne raado, d ra kẽnda ne burwɛt-rãmb la tors-rãmb n yãkd koom ne yʋngo, nebã sẽn wat n pa waoog koomã zĩigẽ.” Bõe n sõng a Zizɛll ne a Leyõns tɩ b tõog toogo? A Zizɛll yeelame: “Yaa a Zeova vʋʋsem sõngã, ne m sɩdã sẽn sõngd-m wʋsgã, n paas m zakã rãmb la m zo-rãmbã sẽn kengd d raood la b mi n tool-d ligdã.”

A Zizɛll sũur nooma a sẽn lebg n wa a ba-yirã bɩ? Ad a sẽn yeele: “N-ye. M pa maand m bãngẽ baa bilfu. Sɩngrẽ wã, yɛl kẽer ra pa nana ne-do, tɩ d ra mi n dat n koms raood me. Maam ne m sɩdã tõog n maoo ne rẽ fãa, la d nee vẽeneg tɩ d maana d sẽn da segd n maanã bal kɛpɩ. Yaa a Zeova la d teeg-yã, n neẽ t’a yaa d zoa hakɩɩka.” A Leyõns ne a Zizɛll paam n kẽnga Rĩungã koe-moondb lekolle. La masã b yãk-b lame tɩ b na n yɩ zall so-pakdb kiis a wãna.

Neb nins sẽn lebgd n kuus b ba-yirã mongda b mens bũmb kẽer n na n sõng sũ-tɩrs rãmbã sẽn sakd n kelgd Rĩungã koɛɛgã. B yaa wa zĩm-yõgdb sẽn wõrd b mens sẽn na yɩl n paam zĩm wʋsg n yõge. Sãmbg kae t’a Zeova pa na n tol n yĩm koe-moondb kãensã sẽn tʋmd ne yẽesmã yelle, b sẽn nong a yʋʋrã yĩngã. (Nee. 5:19; Ebre. 6:10) Yãmb sã n bee tẽng a to, tɩ Rĩungã koe-moondb sõor yaool n pa waoog y ba-yirã, yãmb na n sak n lebg n kulame bɩ? Y sã n sak n maan woto, a Zeova na n ning-y-la bark wʋsgo.—Yel. 10:22.