CINGI ca vamuanetu va sile vifuti viavo omo lia vuhutu na ku nungulukila ku vifuti vieka, ve ku hilukamo. Kaha ve ku nungulukila kuze ku tondeka vakua ku ambulula, omo lia cilemo cavo kuli Yehova na ku vantu. (Mat. 22:37-39) Kapandi kaka ve ku lihakela kaha na vivezikiso vika ve ku tambula? Linga tu uane vikumbululo tu talenu vimo vimona via ku Camarões.

Mu 1998, umo muanetu ua lizina Onésime ua tundile ku Camarões ku cifuti ceni ca cisemua na ku ka yoyela ku cifuti ceka. Kaha ua ka keleko miaka 14. Tangua limo ku ciuano, ua vuile cimo cimueso ku tuala ha cipanga ca ku ambulula. Mukua ku hana cimpande ua handekele ngueni, “singaniekenu nga vavusamba vavali va nayi mu ku lovela, kaha umo na uana ha citoko ca cili mukuavo co kuahi, uze ali haze ka hesi vantsi, nkuma ka ka nungulukila haze ha ali mukuavo linga neni a uaneko kamo ni?”

Cize cimueso, ca lingisile muanetu Onésime ku singanieka ku hiluka ku Camarões muomu ua tantekeyele ngecize cifuti caco ca puile citoko ca mu lutsilielo. Vutuhu ngoco ua lisosomuene. Uomine mutima ngueni, vuno a ka hasa vene ku liyoyesa mu nima ya ku kala miaka ya ingi ku cifuti ceka ni? Linga a mone nga a ka hasa, muanetu Onésime ua hilukile ku Camarões na ku ka kalako vingonde vitanu na imo. Kaha mu 2012, ua nungulukile honi mu vutuntu.

Muanetu Onésime ngueni: “Ku vuputukilo nja pindile na ntuima na ku kaluua ca muono. Mu Ndzivo ya Vuangana nja pandele naua kuli izilisa ku tumama ha vituamo via mavaya.” Vunoni ua handekele na ndzolela ngueni: “Mu nja tualele mana ku viuano, nja putukile ku suva Vindzivo via Vuangana vikuavo via kala na vituamo via cili.”

Mu 2013, muanetu Onésime ua ambatele ndumbuetu Géraldine uze ua hilukile ku Camarões mu nima ya ku kala miaka 9 ku França. Vivezikiso vika va tambuile ava va yala na mpuevo mu ku tuameka vipanga via mu lutsilielo? Muanetu Onésime ngueni: “Mu nima ya ntsimbu, nange na mpueyange va tu laniene ku Sikola ya Vakua ku Ambulula Vuangana, mu nima yaco va tu lania ku pangela ha Mbetele. Kaha mu muaka umo vandongesi va ku pua 20 va mu cikungulukilo cetu va va mbatizile. Mua vusunga, nje ku livua nguange nja uana citoko ca mu lutsilielo.” (Mako 1:17, 18) Kaha ndumbuetu Géraldine ua vuezeleko ngueni: “Nja tambula vivezikiso via vingi cikuma vize ka nja lavelelele.”

Ndumbuetu Judith ua nungulukilile ku Estados Unidos, vunoni ua tondele ku vueza ku cipanga ceni ca ku ambulula. Ivene ngueni: “Mu nja kele na ku hiluka ku Camarões mu ku meneka vavusoko, nja kele na ku pangesa naua vukovelelo vuaco mu ku ambulula. Kaha nkala ntsimbu, i nja kele na ku hiluka ku Estados Unidos, nja kele na ku lila omo lia ku seza vantu va nja kele na ku lilongesa navo Mbimbiliya.” Vunoni ndumbuetu Judith, ua kele na ku likanuuela  ku hiluka ku Camarões. Muomu ua kele na cipanga ca cili, cize ca kele na ku mu kuasa ku sakesa vaise va kala ku Camarões. Vutuhu ngoco, ua kulahelele muli Yehova ngeci ua hilukile ku Camarões. Kaha ua litavelele ngueni, ua kele na ku ivua vusona vua muono ua cili ua kele nauo ku Estados Unidos. Ngeci ua vundilile kuli Yehova linga a mu kuase ku litombuesa lueka naua ku muono ua mu Camarões, kaha Yehova ua mu hanene vukuasi vuaco ku hitila mu ku kaniamesa ca umo kaniungi ua ku zinguluka na mpueyeni.

Mue ku singanieka ha ku hiluka ceni, ndumbuetu Judith, ngueni: “Mu miaka itatu lika nja kele na ndzolela ya ku uana vana 4 va mu lutsilielo.” Ndumbuetu Judith ua putukile vupioneiro vua ku lifuila. Lelo lino, ua somboka kuli muanetu Sam-Castel kaha va kala mu cipanga ca vuniungi vua ku zinguluka. Ambaco iya ue ku niunga vaise? Ndumbuetu Judith na vavusoko vueni va hasele ku uana sipitali ya mu cifuti ceka ya tavele ku fuetela vaise linga va va tavule. Kaha vakua sipitali yaco va hasele ku va tavula ca ku hona vitanga na vimo viahi.

Muanetu Victor ua nungulukilile ku Kanada. Vunoni mu nima ya ku tanda cimo cilongesa ca mu Vutala ca handeka ha visikola via kama, ua hiluile ha vutumbe vua ku lilongesa ceni. Ngeci ua likelele ku lilongesela ku sikola ya kama na ku linga imo kurso ya ntsimbu ya indende. Ivene ngueni: “Ya nji kuasa ku uana vuasi vipanga na ku puisamo vutumbe vuange, vu nja kala navuo mu miaka ya ingi, ku pua pioneiro.” Mu nima ya ntsimbu, muanetu Victor ua ambatele ndumbuetu Caroline, kaha va hilukile ku Camarões mu ku meneka. Mu va ka heteleko va ka menekele Mbetele. Ngeci vamo vamuanetu va va kaniamesele ku hiluka mu Camarões nga citava. Muanetu Victor ngueni: “Ka tua muene na vimo viahi vie ku tu vindikile muomu na laza tele tu na asiuisa muono uetu, ngeci tua tavele ku hiluka.” Vutuhu ndumbuetu Caroline ua kele na vimo visoti via cihindu, vunoni va likuminyine vene ku nunguluka.

Vaze va yala na mpuevo va putukile vupioneiro vua ntsimbu yose, ku vuputukilo va hasele ku liyoyesa na vimbongo vi va tulikile. Mu nima yaco, va pangele mu vimo vingonde ngeci va uanene kamo kambongo ka va kuasele ku hiluka ku Camarões na ku tualelelaho ku pua vapioneiro. Vivezikiso vika va tambuile? Va va laniene ku Sikola ya Vakua ku Ambulula Vuangana, kaha va puile vapioneiro va ku lifuila, lelo lino, va pua vakua ku tunga vindzivo via lukungulukilo. Muanetu Victor, ngueni: “Ku tunda mua ku tontola ni nguetu ku seza muono ua cili na ku lihaka mu mavoko a Yehova, ca mu kuasele ku tambula vukuasi vua Yehova.”

Mu 2002, umo muanetu ua ka lilongeselele ku sikola ya kama ya ku Alemanha ua lizina Alain ua tandele tratadu Jovens​—Como Usarão Sua Vida? Via tandelemo via mu lingisile ku lihakela vizango via viha. Mu 2006, ua ile ku Sikola ya Treinamento Ministerial, kaha mu nima yaco va mu tumine ku ka pangela ku cifuti ceni ku Camarões.

Ku Camarões, muanetu Alain ua ka uanene cipanga ca mutamba ua ntsimbu. Kaha mu nima ya ntsimbu ua ka uanene cipanga ca cili, vunoni ua lisosomuene ngecize, cipanga caco halumo ci ka tepulula ku ku ambulula ceni. Ngeci mu va mu laniene ku pua pioneiro ua ku lifuila, ka talele ku nima. Mukuluntu ueni ku vipanga ua mu vuezele ku fueto, vunoni ambe ngoco, muanetu Alain kasi ua tualeleho na cihangula ceni. Mu nima ya ntsimbu, muanetu Alain ua ambatele ndumbuetu Stéphanie uze ua kele miaka ya ingi mu França. Visoti vika ua lihitile navio ndumbuetu Stéphanie ku Camarões?

Ndumbuetu Stéphanie ngueni: “Nja kovelele imo fuakala-fuakala, kaha via vingi ka via kele na ku litombola na muvila uange, vunoni vie ku hita, omo lia tumo tuvikininu tu ve ku nji sonekela ku sipitali.”  Ava va yala na mpuevo, va tambuile vivezikiso via vingi omo lia ku kolesa cavo. Muanetu Alain ngueni: “Mu tua ka ambuluilile ku limo limbo lia ku lahako, li va luka nguavo Katé tua ka uanene vantu vavengi va kele na cizango ca ku lilongesa vusunga. Mu nima ya ntsimbu tua putukile ku endesela vilongesa viaco ku telefone. Kaha vavali ha kati kavo va va mbatizile, ngeci kuimbo liaco kua sokolokele civunga.” Ndumbuetu Stéphanie ua vuezeleko ngueni: “Ka kuesi ndzolela yeka ya hiana ku kuasa vantu va lihane kuli Yehova. Mu ku pangela kuno, tue ku ivua ndzolela yaco mu vintsimbu via vingi.” Lelo lino, muanetu Alain na mpueyeni va kala mu cipanga ca vuniungi vua ku zinguluka.

Ndumbuetu Gisèle va mu mbatizile tele a ci li ku sikola ya vundotolo ku Itália. Ua komokele muono ua uasi u va kele nauo va yala na mpuevo va mu longesele Mbimbiliya. Vamuanetu vaco va puile vapioneiro, ngeci neni ua tondele ku vueza ku cipanga ceni ca ku ambulula. Kaha ua putukile vupioneiro tele a lingila ku manesa sikola.

Ndumbuetu Gisèle ua tondele ku hiluka ku Camarões linga a ka pangele Yehova mu vutuntu, vunoni ua lisosomuene. Ivene ngueni: “Nja kele na liova lia ku zimbalesa lisesa liange lia ku yoyela mu Itália na ku seza vavusamba na vavusoko mu cifuti caco.” Vutuhu ngoco, mu Maio ya 2016 ndumbuetu Gisèle ua hilukile ku Camarões. Mu nima ya ntsimbu ua sombokele kuli muanetu Léonce, kaha Mbetele ya ku Camarões ya va lekele ku ka pangela ku mbonge ya Ayos, kua tondekele vakua ku ambulula.

Vati ua fuile muono uavo ku Ayos? Ndumbuetu Gisèle ngueni: “Tuhia tua vunengu tua kele na kuya mu visimano via vingi, kaha ka tua hasele ambe ku haka tuhia mu vitelefone. Ngeci vintsimbu via vingi, vitelefone vietu via puile via ku zima. Nja putukile ku lilongesa ku telekela ha vikuni, kaha tua kele na ku tekula mema ku vutsiki na vitetekeso, muomu mutana kua kele na ku sula cikuma, kaha mema aco tua kele na ku ambatela mu tungulu.” Vika via kuasele ava va yala na mpuevo ku kolesa? Ndumbuetu Gisèle ngueni: “Sipilitu ya Yehova, ku liambata na muntu ua cili, ku kaniamesa na vukuasi vu va kele na ku tu hana vavusoko na vavusamba, vikevio via tu kuasele ku kolesa.”

Vuno ndumbuetu Gisèle ua viukilila omo lia ku hiluka ku cifuti ceni ni? Ivene ngueni: “Eyo! ka nje ku liveya cipue kavundende. Ha katete tua pindile na vimo visoti na vusiua, vunoni mu tua vi vulile tua muene ngecize tua lingile vize vi tua pandele ku linga. Tua tsiliela muli Yehova na ku livua mu hiehi neni.” Mu nima ya ntsimbu, muanetu Léonce na mpueyeni va va laniene ku Sikola ya Vakua ku Ambulula Vuangana, kaha lelo lino va pua vapioneiro va ku lifuila va ntsimbu ya indende.

Vakua ku tsiha vantsi ve ku tava ku hita mu visoti via vingi linga va hase ku kuata vantsi. Ngeci muavo, vamuanetu ve ku tava ku hiluka ku vifuti via cisemua, navo ve ku tava ku hita mu visoti via vingi, linga va kuase vaze vali na cizango ca ku tantekeya vusunga. Mua vusunga, Yehova na limo litangua liahi a ka suva cilemo ci ve ku muesa ava vakua ku ambulula va ntuima ku lizina lieni. (Neh. 5:19; VaHe. 6:10) Nga mua kala mu cifuti ceka, kaha mu ivua ngecize mu cifuti cenu ca cisemua mu tondeka vakua ku ambulula vavengi, vuno mu hasa ku hiluka ni? Nga mu hasa ku lingamo, tantekeyenu ngecize vivezikiso via vingi via mi lavelela.—Visi. 10:22.