Miakej toikniuaj katli yajtoyaj ipan seyok altepetl kampa tlatominpiaj, nama sampa tlakuepilijtokej ininaltepe. Pampa kiikneliaj Jehová uan maseualmej, yajtokej mochantiaj ipan sekinok altepemej kampa monekij tlajtolmoyauanij (Mat. 22:37-39). ¿Tlake monejki kichiuasej uan kenijkatsa Jehová kinteochijki? Ma tikitakaj tlake panok ipan Camerún, ipan África occidental.

Ipan 1998, se toikni tlen Camerún, katli itoka Onésime, yajki ipan seyok altepetl uan nopaya itstoya 14 xiuitl. Se tonali, ipan tlanechikoli se toikni kitekiuik ni neskayotl tlen tlajtolmoyaualistli: “Ximoiljui omej tlakamej katli kuali mouampojchijtokej michtlajtlamaj. Inijuantij amo sansejko itstokej, se kinitskia miakej michimej uan nopa seyok amo. ¿Timoiljuia katli amo tlauel michtlajtlama moneki yas kampa iuampo katli kinitskia miakej michimej?”.

Kema Onésime kikajki tlen toikni kiixtonki, moiljuik monekiyaya tlakuepilis Camerún, pampa nopaya toikniuaj monekiyaya ma kinpaleuikaj kinmachtisej miakej maseualmej. Onésime kitekipachouayaya amo momatis ipan ialtepe pampa tlauel miak xiuitl itstoya ipan seyok altepetl. Yeka, achtoui yajki chikuasej metstli ipan Camerún, uan ipan 2012 tlakuepilik uan nopaya mokajki.

Onésime kiijtok: “Monejki nimomatis kej nopaya itstoyaj uan nojkia pampa tlauel tlatotoniayaya. Ipan tlanechikoli monejki nimomatis nimoseuis san ipan uapali”. Uan kema kiijtoua ni, uetska: “Kema nimosentlaliyaya kuali nitlakaktos ipan tlanechikoli, amo nikilnamikiyaya sillas tlen tsotsoltik”.

Ipan 2013, Onésime mosiuajtik iuaya Géraldine, katli itstoya chiknaui xiuitl ipan Francia uan tlakuepilik Camerún. ¿Kenijkatsa kinteochijki Jehová pampa mosentlalijkej tlatekipanosej? Onésime kiijtok: “Sansejko tiajkej Kampa kinmachtiaj tlajtolmoyauanij uan titlatekipanojkej ipan Betel. Se xiuijtlaya, 20 katli tikinmachtiaj ika Biblia moatsonpoliuiltijkej. Nama, niitstok kampa maseualmej kinekij momachtisej” (Mar. 1:17, 18). Géraldine kiijtoua: “Amo kema nimoiljuijtoya nijseliskia miak tlateochiualistli”.

Judith, katli mochantito Estados Unidos, kinekiyaya nojua tlauel tlajtolmoyauas. Ya kiijtoua: “Kema nikinpaxalouayaya nochampoyouaj ipan Camerún, nochipa nimochokiliyaya kema nitlakuepiliyaya pampa maseualmej katli pejtoya momachtiaj Biblia ayokmo nikinmachtiskia”. Maske kiampa kiyolmatiyaya amo mosemakayaya tlakuepilis Camerún,  pampa kampa itstoya kuali kitlaxtlauiyayaj uan nopa kipaleuiyaya tlaxtlauas kampa mopajtiyaya itata, katli itstoya Camerún. ¿Tlake kichijki? Motemachik ipan Jehová uan mosentlalik yas tlatekipanoti. Maske ayokmo kipixtoya miak tlamantli kej ipan Estados Unidos, kiiljuik Jehová ma kipaleui momatis, uan toikni katli tepaxaloua chijchikuasej metstli iuaya isiua, tlauel kiyolchikajkej.

¿Kenijkatsa kipaleuik? Ya kiijtok: “Ipan eyi xiuitl, nikinpaleuik nauij maseualmej ma moatsonpoliuiltikaj”. Nojkia, tosiuaikni tlatekipanok kej precursora especial. Nama, iuaya iueue, Sam-Castel, kinpaxalouaj tlanechikolmej. Nojkia, ya uan ichampoyouaj kipantijkej se hospital tlen seyok altepetl katli tlaxtlauaskia kema itata kitekiskiaj, uan kuali kitejkej.

Se toikni katli itoka Víctor mochantito Canadá. Kema kipojki se tlamachtili ipan Tlen Tematiltia kampa kamanalti tlen universidad, kipaleuik ayokmo yas ipan nopa escuela, uan momachtik ipan seyok escuela tlen kipaleuiskia nima kiasis tekitl. Ya kiijtoua: “Pampa kiampa nijchijki, nima nijpantik tekitl uan uelki nijchiua tlen nochipa nijnektoya nijchiuas: nitlatekipanos kej precursor”. Teipa mosiuajtik iuaya Caroline uan yajkej Camerún. Kema nopaya itstoyaj, yajkej Betel uan nopaya kiniljuijkej tlaj ueliskiaj tlatekipanosej ipan Camerún. Víctor kiijtok: “Amo tleno techtsakuiliyaya. Uan pampa amo tlauel titlapijpixtoyaj, nopaya titlatekipanotoj”. Maske Caroline kentsi mokokouayaya, amo kipatlakej tlen mosentlalijtoyaj kichiuasej.

Víctor uan Caroline pejkej sansejko tlatekipanouaj kej precursores regulares uan kiampa kinpaleuiskiaj katli kinekiyayaj momachtisej Biblia. Mopanoltiyayaj ika tomij tlen kiajoktoyaj, teipa monejki yasej Canadá tekititij se keski metstli uan sampa tlakuepilijkej Camerún, kiampa nojua tlatekipanojkej kej precursores. ¿Kenijkatsa kinteochijki Jehová? Yajkej Kampa kinmachtiaj tlajtolmoyauanij, tlatekipanojkej kej precursores especiales uan nama tlatekipanouaj kampa kichijchiuaj kali kampa titlaueyichiuaj. Víctor kiijtoua: “Pampa tikiskej kampa tiitstoyaj, nama tikitstokej kenijkatsa Jehová tlauel techpaleuijtok”.

Ipan 2002, se toikni Alain katli momachtiyaya universidad ipan Alemania, kipojki pilamatsi Joven, ¿qué harás con tu vida?, uan ni kipaleuik ma mosentlali tlatekipanos. Ipan 2006, yajki ipan Escuela de Entrenamiento Ministerial uan kititlankej Camerún, kampa ya eua.

Nopaya kiasik se tekitl kampa san se keski tonali tekitiyaya, uan teipa kiasik seyok kampa kuali kitlaxtlauiyayaj. Kitekipachouayaya ayokmo tlauel tlajtolmoyauas. Yeka, kema kiiljuijkej tlatekipanos kej precursor especial, nima kinejki kiampa kichiuas. Katli kitekimakatoya kiiljuik kitlaxtlauiskia achi miak pampa nojua kinekiyaya nopaya ma tekiti, Alain amo kinejki kiselis. Teipa, mosiuajtik iuaya Stéphanie, katli itstoya se keski xiuitl ipan Francia. ¿Tlake tlaouijkayotl kiixnamijki Stéphanie kema yajki Camerún?

Stéphanie kiijtoua: “Na amo tlauel nimokokouayaya. Uan kema niasiko Camerún pejki nimokokoua pampa nechtlanauiyaya se keski tlamantli. Jehová itlanechikol  nechpaleuijtok ma nijpia pajtli”. Jehová kinteochijki ni toikniuaj. Alain kiijtoua: “Kema tiajkej titlajtolmoyauaj Katé, tikinpantijkej miakej maseualmej katli kinekiyayaj momachtisej Biblia. Pampa uejka itstoyaj, pejkej tikinmachtiaj ika teléfono. Omej katli tikinmachtiyayaj moatsonpoliuiltijkej, kiampa pejkej itstokej tlajtolmoyauanij”. Stéphanie kiijtoua: “Tlauel tiyolpakis tikinpaleuis sekinok ma kiixmatikaj Jehová uan ma kitekipanokaj. Ipan Camerún kiampa tijyolmatij”. Nama, Alain uan Stéphanie kinpaxalouaj tlanechikolmej.

Gisèle moatsonpoliuiltik kema nojua momachtiyaya ipan Italia. Tlauel mosentlachiliyaya kema kinitayaya katli kimachtiyayaj Biblia amo tlauel tlapijpiayayaj, uan nojkia kinekiyaya tlauel tlajtolmoyauas. Yeka maske nojua momachtiyaya, kinejki tlatekipanos kej precursora.

Gisèle kinekiyaya tlakuepilis Camerún uan kiampa nojua tlauel tlatekipanos, maske kiampa kinekiyaya kichiuas, kitekipachouayaya se keski tlamantli. Kiijtoua: “Ayokmo ueliskia nimochantis Italia, ayokmo niitstoskia ininuaya nochampoyouaj yon ininuaya nouampoyouaj”. Maske kikajte nochi tlen kipixtoya, ipan mayo 2016 tlakuepilik Camerún. Teipa monamiktik iuaya Léonce, uan kali Betel kiniljuik ma tlatekipanotij altepetl Ayos, kampa monekiyayaj tlajtolmoyauanij.

¿Kenijkatsa itstoyaj ipan Ayos? Gisèle kiijtoua: “Miakpa amo onkayaya tlauili, yeka ajachika seuiyaya toteléfono. Nojkia, monejki nimomatis nitlakualchiuas ipan tlixiktli, uan tiatlakuiyayaj ika tlayoua pampa amo miakej yauiyayaj, tijuikayayaj carretillas uan totlauil”. Gisèle kiijtoua tlake kinpaleuik kiijiyouisej: “Uelkej titlatekipanouaj pampa Jehová itonal techpaleuik. Nojkia timosansejkopaleuijkej, toikniuaj uan touampoyouaj techyolchikauayayaj, uan tlauel techpaleuiyaya kema techmakayayaj se kentsi tomij”.

¿Yolpajki Gisèle pampa tlakuepilik kampa ya eua? Kena, ya kiijtoua: “Tlauel niyolpajki. Kema pejki titlatekipanouaj tijpixkej se keski tlaouijkayotl uan timokuesouayayaj. Uan kema timomatkej nopaya titlatekipanouaj, noueue uan na, tikitakej tijchijkej tlen monekiyaya tijchiuasej. Timotemachijkej ipan Jehová nopa techpaleuik nojua tlauel ma tijnechkauikaj”. Léonce uan Gisèle yajkej Kampa kinmachtiaj tlajtolmoyauanij uan nama tlatekipanouaj kej precursores especiales se keski xiuitl.

Kej michtlajtlamanij kichiuaj kampeka kinitskisej michimej maske kemantika ouij, toikniuaj katli tlakuepiliaj ininaltepe nojkia kichiuaj kampeka uan kikauaj se keski tlamantli, kiampa kinpaleuiaj sekinok katli kipiaj kuali ininyolo, ma momachtikaj Biblia. Jehová amo kema kiilkaua tlen kichiuaj toikniuaj uan nochipa kinteochiua pampa kiueyichiuaj itoka (Neh. 5:19; Heb. 6:10). Tlaj ta tiitstok ipan se ueyi altepetl, ¿nojkia ueliskia titlakuepilis moaltepe? Tlaj kiampa tijchiuas, Jehová tlauel mitsteochiuas (Prov. 10:22).