MIAKEJ tokniuan akin uejkaujya mokaltalitoj itech altepemej kampa okachi kitanij tomin mokepanij ininaltepeuj. Kemej semi kitasojtaj Jiova uan taltikpakneminij, mokaltalitoj kampa monekij okachi tanojnotsanij (Mat. 22:37-39). ¿Toni monekik kichiuaskej, uan keniuj kintatiochiuij Jiova? Maj ika titajtokan Camerún, se altepet tein moajsi África occidental.

Itech xiuit 1998, se tokniuj takat akin monotsa Onésime uan kayot Camerún mokaltalito itech okse altepet uan ompa nemik catorce xiujmej. Se tonal, itech se nechikol, se tokniuj takat kijtoj nejin neskayot keman ika tajtoj tanojnotsalis: “Maj tiknemilikan ke ome takamej akin kuali mouikaj kintemojtokej pescados. Kampa semej kintemojtok okachi onkakej ke kampa kintemojtok okse takat. ¿Melauj ke akin kintemojtok pescados kampa amo semi onkakej yaskia kampa yetok okse takat?”.

Keman kikakik nejin neskayot, Onésime kinemilij mokepas Camerún, kampa monekij okachi tanojnotsanij porin miakej kinekij momachtiskej Biblia. Sayoj ke kitekipachouaya amo momatisok porin miak xiujmejya nemia itech okse altepet. Kemej kinekia kiitas ox ueliskia momatis, nemito Camerún chikuasen metsti, uan itech xiuit 2012 kiixtalij ompa mokaltalitiuj.

Onésime kijtoua: “Semi tona uan monekik nikpatas kemej nimomattoya ninemis. Itech Kali kampa tiMosentiliaj monekik oksepa nimomatis nimotalis itech bancas tein semi takuaujkej”. Uan ixuetska keman kijtoua nejin okse taman: “Sayoj ke keman okachi nikakia tein motamachtijtoya, okachi amo nikelnamikiaok sillas tein kualtsin yemaxtikej”.

Itech xiuit 2013, Onésime monamiktij iuan Géraldine, akin mokepak Camerún satepan ke nemik Francia chiknaui xiuit. ¿Keniuj kintatiochiuij Jiova porin kitayekanaltijkej kitekitiliskej? Onésime kijtoua: “Tikselijkej Tamachtilis tein kiseliaj akin kiteixmatiltiaj iTekiuajyo Dios uan tietokej Betel. Uan yankuixtok, itech sayoj se xiuit, moauijkej 20 akin momachtijtoyaj Biblia itech tonechikol. Nikmachilia ke axkan nietok kampa okachi uelis nikinpaleuis oksekin maj mochiuakan itatojtokakauan Cristo” (Mar. 1:17, 18). Géraldine no kijtoua: “Amo keman niknemilij ke nikseliskia miak tatiochiualismej”.

Judith, akin mokaltalijka Estados Unidos, kinekia okachi tapaleuis itech tanojnotsalis. Kijtoua: “Nochipa keman nimokepayaya satepan ke nikinkalpanouaya nochankauan ompa Camerún, nichokaya porin monekia nikinkauas miakej akin peujka nikinmachtia ika Biblia”. Maski ijkon, ouij kikisaya kiixtalis mokepas ialtepeuj. Kipiaya se kuali tekit, tein  kipaleuiaya maj kiixtaua tapajtilis tein monekia kiselis ipopaj ompa Camerún. Sayoj ke takuaujtamatik iuan Jiova uan ompa mokaltalito. Judith kijtoua ke semi itech tanemiliaya seki taman tein kipiaya ompa Estados Unidos. Kitajtanij Jiova maj kipaleuiani maj momati, uan se tokniuj takalpanojkej uan inamik kiyolchikaujkej.

¿Uan toni panok? Judith kijtoua: “Semi niyolpakik porin itech eyi xiuit nikinpaleuij naui taltikpakneminij maj moauikan”. Uan no, kiixtalijkej kemej precursora especial. Axkan, inamik, Sam-Castel, uan yejua takalpanouaj itech nechikolmej. ¿Uan toni panok iuan ipopaj? Judith uan ichankauan kiajsikej itech okse altepet se tapajtiloyan kampa ueliskia kitekiskej ipopaj uan amo taxtauaskiaj. Uan nochi kuali kisak.

Se tokniuj takat akin monotsa Víctor mokaltalito Canadá. Satepan ke kiixtajtoltij se tamachtilis itech amaix Tanejmachtijkej tein ika tajtouaya se kiselis okachi ueyi tamachtilis, itech tanemilij nemachtil tein kiselijtoya uan kiixtalij kikauas universidad uan peuak momachtia keniuj kichiuas se taman tekit. Víctor kijtoua: “Nejon nechpaleuij maj niman nikajsini tekit uan uelik nikchiuak tein ipa niknekia nikchiuas: nimochiuas precursor”. Satepan monamiktij iuan Caroline uan takalpanotoj Camerún. Keman ompa yetoyaj, yajkej Betel, kampa kinyolchikaujkej maj kinemilianij ox ueliskiaj tapaleuitiuij Camerún. Víctor kijtoua: “Amo techtsakuiliaya nion teyi. Uan kemej amo tiktemouayaj tikpiaskej miak taman, uelik tikselijkej tayoleualis”. Maski Caroline tepitsin mokokouaya, amo kipatakej tein kiixtalijkaj.

Víctor uan Caroline peuak tapaleuiaj kemej precursores regulares ompa Camerún porin miakej kinekiaj momachtiskej Biblia. Seki metsti moixpanoltijkej ika tomin tein kisentilijkaj achto. Satepan tekititoj Canadá seki metsti uan nejon kinpaleuij maj mokepanij Camerún uan maj kisentokanij kemej precursores. ¿Keniuj kintatiochiuij Jiova? Kiselijkej Tamachtilis tein kiseliaj akin kiteixmatiltiaj iTekiuajyo Dios, katkaj precursores especiales uan axkan kiixyekanaj tekit tein mochiua keman mochijchiuaj kalmej kampa titaueyichiuaj. Víctor kijtoua: “Keman tikiskej kampa kualtsin tinemiaj uan tikaujkej tein tikpiayaj uelik tikitakej inepaleuil Jiova”.

Itech xiuit 2002, Alain, se tokniuj takat akin momachtijtoya universidad ompa Alemania, kiixtajtoltij tratado Joven, ¿qué harás con tu vida? Tein kiixtajtoltij kiolinij maj kipatani tein kiixtalijtoya kichiuas. Itech xiuit 2006, kiselij Tamachtilis tein kinpaleuia Tokniuan Takamej itech iTekiyo Dios uan kititankej maj tapaleuiti Camerún, kampa kayot.

Ompa kiajsik se tekit kampa sayoj tekitia seki tonalmej. Satepan kiajsik okse kampa okachi kitaxtauiayaj, sayoj ke kitekipachouaya maj amo semi ueliniok tanojnotsani. Yejua ika, keman kiyoleujkej maj mochiua precursor especial, niman tanankilij ke kemaj. Kemej akin kitekitiliaya amo kinekia maj yani, kiluij ke okachi kitaxtauiskia, sayoj ke Alain kiluij ke amo. Satepan monamiktij iuan Stéphanie, akin nemik Francia seki xiujmej. ¿Toni ouijkayomej kipiak Stéphanie keman mokaltalito Camerún?

Stéphanie kijtoua: “Peuak tepitsin nimokokoua uan miak taman kichiuaya maj amo kuali nimomachili, sayoj ke nechmakakej  pajti tein nechpaleuij uan okachi kuali nimomachilij”. Jiova kintatiochiuij Alain uan Stéphanie porin taxikojkej. Alain kijtoua: “Keman titanojnotsatoj Katé, se xolal tein uejka moajsi, tikinajsikej miakej akin kinekiaj momachtiskej Biblia. Uelik tikinmachtijkej ika teléfono. Omen moauijkej uan peuak moajsij seki tokniuan tanojnotsanij”. Stéphanie no kijtoua: “Semi teyolpaktia se kinpaleuis taltikpakneminij maj kiixmatikan Jiova uan maj iuan motemaktikan. Nikan Camerún miakpa techpanouani nejon”. Axkan, Alain uan Stéphanie takalpanouaj itech nechikolmej.

Gisèle mochiuaskia tapajtijkej uan momachtijtoya ompa Italia keman moauij. Kiitaya ke precursores akin kimachtiayaj, se tokniuj takat uan inamik, amo kitemouayaj kipiaskej miak taman, uan yejua no kinekia okachi tanojnotsas. Yejua ika mochiuak precursora regular keman yajtoyaok kaltamachtiloyan.

Gisèle kinekia mokepas Camerún porin kinekia okachi tanojnotsas, sayoj ke kitekipachouaya seki taman. Kijtoua: “Amo ueliskia oksepa nimokaltalis Italia uan nikinkauaskia akin kuali iniuan nimouikaya uan nochankauan akin ompa nemij”. Maski ijkon, itech metsti mayo xiuit 2016 mokepak Camerún. Satepan monamiktij iuan Léonce, uan tokniuan akin tekitij Betel kinyolmajxitijkej maj tapaleuitij xolal Ayos, kampa monekiaj okachi tanojnotsanij.

¿Uan keniuj nemiaj itech xolal Ayos? Gisèle kijtoua: “Miakpa, miak semanas amo onkaya tit [oso tekol] uan amo uelia tiktenpilouayaj toteléfonos. Yejua ika amo nochipa uelia tikinkuiaj. Nimomachtij nitakualchiuas ika kouit, uan youak tiayaj ameyal tikuitij at ika carretillas uan lamparas porin ijkuak amo semi miakej yayaj”. Gisèle kijtoua toni kinpaleuij maj taxikouanij: “Titaxikojkej porin iespíritu Jiova techpaleuij, nonamik uan nejua nochipa timopaleuijkej, tochankauan uan akin kuali iniuan timouikaj techyolchikaujkej uan kemansa techpaleuijkej ika tomin”.

¿Yolpaki Gisèle porin mokepak kampa kayot? Yejua kijtoua: “Kemaj, senkis nikijtoua ke kemaj. Yekinika tikpiakej seki ouijkayomej uan tepitsin timotayokoltijkej. Sayoj ke keman amo itech titanemilijkejok nejon, nonamik uan nejua tikitakej ke tikchiujkej tein monekia tikchiuaskej. Titakuaujtamatkej iuan Jiova uan tikmachilijkej ke okachi kuali iuan timouikayaj”. Léonce uan Gisèle kiselijkej Tamachtilis tein kiseliaj akin kiteixmatiltiaj iTekiuajyo Dios uan axkan precursores especiales temporales.

Ijkon kemej akin kintemouaj pescados kixikouaj tein yeski ouijkayot porin kinekij kinajsiskej miakej, tokniuan akin mokepaj ininaltepeuj kikauaj miak taman porin kinekij kinpaleuiskej akin yekmelauj kinekij momachtiskej Biblia. Jiova kielnamikis netasojtalis tein kinextilianij nejin tokniuan uan kintatiochiuis (Neh. 5:19; Heb. 6:10). Komo tejuatsin tionnemi itech okse altepet uan tikonmati ke itech moaltepeuj monekij okachi tanojnotsanij, ¿ueliskia tionmokepas? Komo tionmokepa, uelis tiontakuaujtamatis ke Jiova semi mitsontatiochiuis (Prov. 10:22).