MIAKEJ tokniuan otekipanotoj itech okse altepetl kanin okachi okintlaxtlauiayaj pero satepan omokopkej inmialtepe. Kitlasojtlaj Jehová uan oksekimej, ik non, tetlapouitiuij kanin okachi moneki (Mat. 22:37-39). ¿Ken omochijchikajkej kitechiuiliskej Jehová uan ken okinteochi? Ma tikitakan tlen opanok ompa Camerún tlen kajki África occidental.

Itech 1998 se tokni tlen itoka Onésime tlen oneski ompa Camerún otekipanoto catorce xiuitl itech okse altepetl. Se tonal kanin monechikoua okikak tokni tlen otlamachtijtoka okijto ken uelis okachi titetlapouiskej. Tokni okijto: “Ma tikijtokan ome tlakamej seseka omichkitskitoj, se tlakatl okachi okinmajsik michimej uan okse amo. Akin amo okachi okinmajsik xamo san niman oyajki kanin okatka okse tlakatl tlen okinmajsik okachi michimej”.

Ijkuak Onésime okikak non, opejki mokuayejyekoua kox uelis oksepa mokopaskia Camerún. Ompa uelis kinpaleuiskia tokniuan ma kinmachtikan nochtin akinmej kinekij kixmatiskej Jehová. Pero noijki omokuayejyeko kox ok uelis momatiskia ialtepe porque yokipiaya miak xiuitl amo ompa ochantiaya. Omokuayejyeko achto yaskia san chikuase metstli uan itech 2012 oyajki ialtepe.

Onésime okijto: “Oui onimomatki porque sapanoua tlatotonia uan noijki okatka oui okseki tlamantli. Kanin otimonechikouayaj otimotlaliayaj ipan bancos”. Ika pakilistli okijto: “Ijkuak okachi kuali onikkakiaya tlen otimomachtiayaj, okachi amo onikilnamikiaya yamankej sillas kanin onikatka”.

Itech 2013 Onésime omonamikti iuan se tokni tlen itoka Géraldine. Ye okatka chiknaui xiuitl Francia uan omokopki Camerún. ¿Ken okinteochi Jehová porque okachi okitechiuilijkej? Onésime okijto: “Otiajkej kanin otlamachtijkej para ma titetlapouikan itech Tekiuajkayotl uan axkan titlapaleuiaj ompa Betel. Kanin timonechikouaj yisexiuitl omoapolaktijkej 20. Nikmachilia ken oniajsito kanin onka miak michimej” (Mar. 1:17, 18). Géraldine okijto: “Amo keman onimokuayejyeko ken techteochiuaskia Jehová”.

Judith ochantito Estados Unidos pero okinekiaya okachi kitekichiuilis Jehová. Ye okijto: “Ijkuak oniaya Camerún uan onikinmitaya nofamilia, nochipa onichokaya ijkuak onimokopaya porque ayakmo nikinmitaskia akinmej opejki nikinmachtia ika Biblia”. Maski ijkon okipanouaya, amo okinekiaya oksepa  chantiti ialtepe porque kanin okatka kuali okitlaxtlauiayaj para kipajtis itajtsin tlen ochantiaya Camerún. Pero okineltokaya Jehová kipaleuiskia uan ochantito Camerún. Tokni okilnamikiaya nochi tlen okipiaya ompa Estados Unidos. Ik non, okilui Jehová ma kipaleui ma momati uan se tlayekanki itech circuito uan isiua okiyolchikajkej.

Judith okijto tlen opanok: “Itech eyi xiuitl onikinpaleui naui ma moapolaktikan”. Ye omochi precursora especial. Satepan omonamikti iuan se tokni tlen itoka Sam-Castel uan axkan kintlajpalouaj tlanechikolmej itech circuito. ¿Uan opajtik itajtsin? Judith uan ifamilia okipajtitoj itajtsin itech okse altepetl kanin okichiuilijkej se operación.

Se tokni tlen itoka Víctor ochantito Canadá. Ijkuak okitlajtolti se tlamachtil itech revista Akin Tetlapouijtok kanin kijtoua kox moneki sapanoua timomachtiskej, omokuayejyeko ayakmo momachtiskia universidad uan omomachti okse tlamantli tlen kipaleuiskia san niman ma kajsi tekitl. Ye okijto: “San niman onikajsik tekitl uan onimochi precursor ijkon ken oniknekiaya”. Satepan omonamikti iuan se tokni tlen itoka Caroline uan oyajkej Camerún. Satepan otlaixmatitoj Betel uan ompa tokniuan okinmiluijkej ma tlapaleuikan itech non altepetl. Víctor okijto: “Amitlaj otechtsakuiliaya uan ken amo miak tlamantli otikpiayaj, otikijtojkej uelis titlapaleuiskiaj”. Maski Caroline omokokouaya ompa omokajkej.

Víctor uan Caroline omochijkej precursores uan ijkon okinpaleuijkej miakej tlen okinekiayaj momachtiskej Biblia. Achto okipiayaj seki tomin, ik non, amo otekipanouayaj pero satepan otekipanotoj seki metstli Canadá para oksepa uelis mokopaskiaj Camerún. ¿Ken okinteochi Jehová? Oyajkej kanin otlamachtijkej para ma titetlapouikan itech Tekiuajkayotl uan axkan tlapaleuiaj kanin kinchijchiuaj kalmej kanin monechikouaj tokniuan. Víctor okijto: “Otikajtejkej nochi tlen otikpiayaj pero otikitakej ken otechpaleui Jehová”.

Itech 2002 se tokni tlen itoka Alain omomachtijtoka itech universidad ompa Alemania. Ijkuak okitlajtolti amatsintli tlen itoka Joven, ¿qué harás con tu vida?, okipaleui ma kita ken okachi kitekichiuilis Jehová. Itech 2006 oyajki itech Tlamachtil tlen kiseliaj tlayekankej uan siervos ministeriales uan okititlankej ialtepe tlen itoka Camerún.

Itech non altepetl san seki tonal okajsik tekitl. Satepan oksekan okitlakejkej kanin okachi okitlaxtlauiayaj pero okitak ayakmo majxiliskia para tetlapouis. Ik non, ijkuak tokniuan tlen tlapaleuiaj ompa Betel okiluijkej kox uelis mochiuaskia precursor especial, ye okiseli. Akin okitlake okilui okachi kitlaxtlauiskia pero Alain ayakmo okinek ompa tekipanojtos. Satepan omonamikti iuan se tokni tlen itoka Stéphanie, ye seki xiuitl ochantito Francia. ¿Tlen okixnamik Stéphanie ijkuak ochantito ompa Camerún?

Ye okijto: “Opejki nimokokoua pero onikajsik pajtli uan okachi kuali onimomachili”. Jehová okinteochi. Alain okijto: “Ijkuak otitetlapouitoj altepetsintli Katé, otikinmajsikej miakej tlen okinekiayaj momachtiskej. Otikinnotsayaj ika telefóno para tikinmachtiskej Biblia. Satepan ome omoapolaktijkej uan omochi se grupo”. Stéphanie okijto:  “Sapanoua tiyolpakij ijkuak tikinpaleuiaj oksekimej ma kixmatikan Jehová uan ma kitekichiuilikan”. Miakej yotikinpaleuijkej nikan Camerún. Axkan Alain uan Stéphanie kintlajpalouaj tlanechikolmej itech circuito.

Gisèle omoapolakti ompa Italia, ijkuak omomachtito ken tepajtiskia. Se tokni uan isiua tlen precursores okimachtiayaj. Gisèle omotlajtlachialti ijkuak okitak tokniuan amo okachi miak tlamantli okitemouayaj uan okitekichiuiliayaj Jehová. Ye okinekiaya kichiuas ken yejuan, ik non, omochi precursora regular ijkuak ok omomachtiaya ken tepajtis.

Gisèle okinekiaya mokopas ialtepe tlen itoka Camerún pero omomojtiaya. Okijto: “Ayakmo uelis nichantiskia ompa Italia uan ayakmo nikinmitaskia noyolikniuan nion nofamilia tlen ompa ochantiayaj”. Maski omomojtiaya omokopki Camerún itech mayo 2016. Satepan omonamikti iuan se tokni tlen itoka Léonce. Ijkuakon, tokniuan tlen otlapaleuiayaj Betel okinmiluijkej ma tlapaleuitij ompa Ayos porque omonekiaya okachi motetlapouis.

¿Uan ken otlakatka itech altepetl kanin okintitlankej? Gisèle okijto: “Miak semanas amo otikpiayaj luz, ik non, amo ueli otikintekitiltiayaj tocelulares. Onitlatlatiaya para nitlakualchiuas. Ijkuak otlayouaya otiatlakuiayaj ika carretillas uan otikuikayaj lámparas. Otiayaj ijkuak otlayouaya porque amo miakej oyayaj”. Gisèle okijto tlen okinpaleui ma tlaxikokan: “Jehová otechpaleui ika iespíritu uan nonamik uan ne noijki otimopaleuijkej. Tofamilia uan toyolikniuan otechyolchikauayaj uan ualeua otechtitlaniliayaj tomin”.

¿Yolpaki Gisèle ompa ialtepe? Ye okijto: “Kema, sapanoua niyolpaki. Achto tepitsin otitlajyouijkej uan otimoyolkokojkej. Pero satepan ayakmo otikilnamikiayaj tlen otechpanok uan otikajsikamatkej otikchijkej tlen omonekiaya tikchiuaskej. Otikneltokakej Jehová techpaleuiskia uan okachi kuali iuan otimouikakej”. Léonce uan Gisèle oyajkej kanin otlamachtijkej para ma titetlapouikan itech Tekiuajkayotl uan ualeua tlapaleuiaj ken precursores especiales.

Akinmej michkitskiaj ualeua tlajyouiaj para kinkitskiskej michimej, noijki ijkon tokniuan tlen mokopaj inmialtepe ualeua noijki tlajyouiaj para kintlapouiskej oksekimej tlen kichiuas iTekiuajkayo toTajtsin Dios. Jehová amo keman kinmilkauas nonmej tokniuan kitematiltiaj itoka uan ye kinteochiuas (Neh. 5:19; Heb. 6:10). Tla otichantito oksekan uan tikmati itech moaltepe okachi moneki motetlapouis, ¿uelis oksepa timokopas? Tla ijkon tikchiuas, Jehová mitsteochiuas (Prov. 10:22).