BANA BABO RENA ba bantši le dikgaetšedi bao ba kilego ba hudugela dinageng tše dingwe gore ba yo šoma moo, ga bjale ba boetše dinageng tša gabo bona. Ka ge ba rata Jehofa le batho ba bangwe, ba hudugetše mafelong ao go nago le tlhokagalo ya bagoeledi. (Mat. 22:37-39) Ke dilo dife tšeo ba ilego ba di tlogela morago, gona Jehofa o ile a ba šegofatša bjang? E le gore re hwetše dikarabo, a re boleleng ka seo se diragetšego nageng ya Cameroon yeo e lego ka bodikela bja Afrika.

Ka 1998 ngwanabo rena Onésime o ile a tloga nageng ya gabo ya Cameroon. O ile a fetša mengwaga e 14 a dula nageng e nngwe. Ka letšatši le lengwe ge a le dibokeng o ile a kwa papišo ya go bolela ka modiro wa go botša ba bangwe ditaba tše dibotse. Seboledi se ile sa re: “Ge e ba bagwera ba babedi ba ka re ba rea dihlapi mafelong a go se swane ke moka yo mongwe a rea dihlapi tše dintši go feta yo mongwe, na yo a sa reego dihlapi tše dintši a ka se tloge a ya go mogwera wa gagwe moo a ka reago dihlapi tše dintši?”

Papišo yeo e ile ya dira gore Onésime a nagane ka go boela Cameroon go yo thuša bagoeledi ba moo ka ge batho ba bantši nageng yeo ba nyaka go ithuta Beibele. Eupša go be go na le dilo tšeo a tshwenyegilego ka tšona. Ka mohlala, na o be a tla boela a tlwaela go dula moo Cameroon ka morago ga gore a dule nageng e nngwe ka mengwaga e mentši? E le gore a bone ge e ba o tla kgona, Onésime o ile a etela Cameroon ka dikgwedi tše tshela. Ke moka ka 2012, o ile a boela morago go yo dula moo.

Onésime o re: “Ke ile ka swanelwa ke go tlwaelana le phišo ya moo le tsela ya go phela. Le gona ke ile ka swanelwa ke go tlwaela gape go dula dipankeng ka Holong ya Mmušo. O ile a bolela a semaela gore: “Eupša ge ke be ke theetša ka kelohloko ka dibokeng, ke be ke lebala ka ditulo tšeo o kgonago go dula go tšona wa iketla tša Holong ya Mmušo ya nageng yeo ke bego ke dula go yona.”

Ka 2013, Onésime o ile a nyala Géraldine yoo a bego a boetše Cameroon ka morago ga gore a dule France ka mengwaga e senyane. Jehofa o ile a šegofatša bjang banyalani ba ka ge ba be ba etiša pele go mo hlankela? Onésime o re: “Bobedi bja rena re ile ra ya Sekolong sa Baebangedi ba Mmušo e bile gona bjale re hlankela Bethele. Ge e le gabotse, ka ngwaga o tee feela phuthegong ya gabo rena go ile gwa kolobetšwa barutwana ba Beibele ba 20. Ga bjale ke a bona gore ke nageng e botse ya go dira batho barutiwa.” (Mar. 1:17, 18) Géraldine o okeditše ka gore: “Ke hweditše ditšhegofatšo tše dintši go feta kamoo ke bego ke nagana ka gona.”

Judith o be a hudugetše United States eupša a kganyoga go oketša nako yeo a e fetšago a hlankela Jehofa. O re: “Nako e nngwe le e nngwe ge ke be ke etetše gae Cameroon, ke be ke lla ge ke tloga ka gobane ke be ke tlogela batho ba mmalwa bao ke bego ke šetše ke thomile go ithuta Beibele le bona.” Eupša Judith o be a dikadika go boela Cameroon gape. O be a na le mošomo wo o patelago tšhelete e ntši woo o bego o mo thuša go patelela tatagwe tša kalafo kua Cameroon. Eupša Judith o ile a tshepa  Jehofa gomme a feleletša a boetše gae Cameroon. O re go na le dilo tše dingwe tšeo a di hlologelago ka bophelo bja manobonobo bjo a bego a bo phela kua United States. O ile a rapela Jehofa gore a mo thuše go tlwaelana le maemo a mafsa e bile a ba a thušwa ke kgothatšo yeo a ilego a e newa ke molebeledi wa tikologo le mosadi wa gagwe.

Ge Judith a lebelela morago o re: “Ka mengwaga e meraro feela ke ile ka kgona go thuša batho ba bane gore ba kolobetšwe.” Judith o ile a thoma go hlankela e le mmulamadibogo yo a kgethegilego. Gona bjale o šoma gotee le monna wa gagwe Sam-Castel, yo e lego molebeledi wa tikologo. Eupša go ile gwa direga’ng ka tatago Judith? Judith le ba gabo ba ile ba kgona go hwetša sepetlele nageng e nngwe seo se ilego sa dira tatagwe ophareišene le go e patelela. Sa go thabiša ke gore ophareišene yeo e ile ya sepela gabotse kudu.

Ngwanabo rena Victor o ile a hudugela Canada. Ka morago ga gore a bale sehlogo sa ka Morokaming seo se bego se bolela ka thuto e phagamego, o ile a naganišiša ka dithuto tša gagwe. O ile a tlogela go tsena yunibesithi ke moka a ithutela go dira mošomo o itšego. O re: “Seo se ile sa nthuša gore ke hwetše mošomo kapejana e bile sa nthuša le gore ke dire seo e bego e le kgale ke nyaka go se dira, e lego go ba mmulamadibogo.” Ka morago Victor o ile a nyala Caroline, ke moka ba etela Cameroon. Ge ba le moo ba ile ba etela ofising ya lekala gomme bana babo rena moo ba ba kgothaletša gore ba nagane ka go boa ba tlo hlankela moo Cameroon. Victor o re: “Re ile ra se hwetše lebaka la go gana, e bile ka ge re be re se na dilo tše dintši re ile ra amogela taletšo yeo.” Le ge Caroline a be a na le mathata a tša maphelo, ba ile ba no dira phetho ya gore ba boele Cameroon.

Victor le Caroline ba ile ba thoma go ba babulamadibogo ba ka mehla e le gore ba kgone go thuša batho ba bantši bao ba bego ba nyaka go ithuta Beibele. Ka ge ba be ba bolokile tšhelete e ntšinyana, mathomong go ile gwa se hlokagale gore ba šome. Ka morago ga moo ba ile ba boela Canada ba yo šoma dikgwedinyana ke moka ba tla ba boa gape Cameroon gore ba tšwele pele ka bobulamadibogo. Jehofa o ile a ba šegofatša bjang? Ba ile ba ya Sekolong sa Baebangedi ba Mmušo, ya ba babulamadibogo ba kgethegilego gomme gona bjale ke bahlanka ba go aga Diholo tša Mmušo le mafelo a mangwe. Victor o re: “Ka ge re ile ra tlogela bophelo bja manobonobo bjo re bego re bo phela, re ile ra swanelwa ke go ithekga ka Jehofa gomme o ile a re hlokomela.”

Ka 2002, ngwanabo rena Alain yoo a bego a tsena yunibesithi kua Germany o ile a bala pampišana yeo e rego Bafsa—Le tla Dira’ng ka Bophelo bja Lena? Seo a ilego a se bala se ile sa dira gore a fetoše seo a bego a nyaka go se dira ka bophelo bja gagwe. Ka 2006, o ile a ya Sekolong sa Tlwaetšo ya Bodiredi ke moka ka morago ga moo a abelwa go ya nageng ya gabo ya Cameroon.

Ge Alain a le Cameroon, o ile a hwetša mošomo wa nakwana moo. Ka morago ga moo o ile a hwetša mošomo o mongwe wo o bego o mo patela tšhelete e ntši, eupša o be a tshwenyegile ka gore mošomo woo o be o sa mo nee nako e ntši ya go ruta batho Beibele. Ka gona ge a be a hwetša taletšo ya gore e be mmulamadibogo yo a kgethegilego, o ile a e amogela le morago a sa lebelele. Motho yo a bego a mo hirile o ile a mo tshepiša go mo okeletša tšhelete yeo a bego a mo godiša yona, eupša Alain o ile a gana gomme ya ba mmulamadibogo yo a kgethegilego. Ka morago Alain o ile a nyala Stéphanie, yo a bego a ile a fetša mengwaga a dula France. Stéphanie o ile a ba le mathata afe ka morago ga gore a hudugele Cameroon?

Stéphanie o re: “Ke ile ka thoma go ba le malwetšinyana le go ganwa ke dilo tše itšego goba di-allergy, eupša ke ile ka kgona go hwetša kalafo yeo e ilego ya nthuša.” Jehofa o ile a šegofatša  banyalani bao ka baka la kgotlelelo ya bona. Alain o re: “Re ile ra ya go bolela ditaba tše dibotse motseng wo o bego o le kgole wa Katé, gomme ge re le moo re ile ra hwetša batho ba bantši bao ba bego ba nyaka go ithuta Beibele. Ka morago re ile ra kgona go swara dithuto tša Beibele le bona re diriša founo. Ba babedi ba bona ba ile ba kolobetšwa gomme gwa thoma go ba le sehlopha sa bagoeledi moo.” Stéphanie o okeditše ka gore: “Ga go na selo seo se thabišago go feta go thuša batho gore ba ineele go Jehofa. Ka go hlankela nageng ye, re thabetše go thuša batho ba bantši kudu.” Gona bjale Alain le Stéphanie ba modirong wa tikologo.

Gisèle o ile a kolobetšwa ge a be a le sekolong sa go ithutela bongaka kua Italy. O ile a kgahlwa ke tsela e bonolo yeo banyalani ba babulamadibogo bao ba bego ba ithuta Beibele le yena ba bego ba phela ka yona, gomme o ile a nyaka go hlankela Jehofa ka mo go oketšegilego. Ka gona Gisèle o ile a thoma go ba mmulamadibogo wa ka mehla ge a dutše a feleletša dithuto tša gagwe.

Gisèle o be a nyaka go boela Cameroon gore a oketše nako yeo a e fetšago a hlankela Jehofa, eupša go be go na le dilo tšeo a tshwenyegilego ka tšona. O re: “Ke ile ka swanelwa ke gore ke se sa ba le tshwanelo ya go ba modudi wa Italy ka semolao, e bile ke se sa ba kgauswi le ba gešo le bagwera ba ka bao ba bego ba dula Italy.” Lega go le bjalo, ka May 2016, Gisèle o ile a hudugela gape Cameroon. Ka moragonyana o ile a nyalana le Léonce, gomme ofisi ya lekala ya Cameroon ya kgothaletša banyalani bao gore ba hudugele Ayos, e lego toropong yeo go bego go na le tlhokagalo ya bagoeledi.

Bophelo bo be bo le bjang kua Ayos? Gisèle o re: “Gantši re be re fetša dibeke re se na mohlagase gomme re sa kgone go tšhatšiša difouno tša rena. Difouno tšeo di be di fetša nako e ntši di sa šome. Ke ile ka ithuta go apea ka mollo wa fase e bile re be re tšea kiribane le dithotšhi re eya go ga meetse bošego ge go be go se na batho ba bantši moo go bego go giwa meetse.” Ke’ng seo se ilego sa thuša banyalani ba go kgotlelela? Gisèle o re: “Moya wa Jehofa o ile wa re thuša go kgotlela e bile nna le monna wa ka re be re thekgana. Le gona ba gabo rena le bagwera ba be ba re kgothatša gomme ka dinako tše dingwe ba re thuša ka go re fa tšhelete.”

Na Gisèle o thabile ka ge a boetše nageng ya gabo? O re: “Ee, ke thabile kudu! Mathomong re be re na le mathatanyana e bile re nyamile, eupša ka morago ga gore mathata ao a fete, nna le monna wa ka re ile ra bona gabotse gore re dirile seo re bego re swanetše go se dira. Re tshepa Jehofa e bile re ikwa re le kgauswi kudu le yena.” Léonce le Gisèle ba ile ba ya Sekolong sa Baebangedi ba Mmušo gomme gona bjale ke babulamadibogo ba kgethegilego ba nakwana.

Go no swana le barei ba dihlapi bao ba bontšhago sebete sa go tšwa ba yo rea dihlapi le ge maemo a leratadima a sa kgahliše, bana babo rena le dikgaetšedi bao ba boelago dinageng tša gabo bona ba tlogela dilo tše dintši morago e le gore ba kgone go thuša batho bao ba nyakago go ithuta Beibele. Ga go pelaelo gore Jehofa a ka se lebale mošomo o thata woo bagoeledi ba ba o dirilego le lerato leo ba le bontšhitšego leineng la gagwe. (Neh. 5:19; Baheb. 6:10) Ge e ba o dula nageng e nngwe gomme go na le tlhokagalo ya bagoeledi nageng yeo o tšwago go yona, na o ka kgona go boela gae? Ge o ka dira bjalo Jehofa o tlo go šegofatša kudu.—Die. 10:22.