IMIZU buebun ri nẹ amwa re vwiẹ aye riẹ ẹkwotọre ri vwo igho, i rharhumu riẹ amwa aye i nurhe ne. Ẹguọlọ aye i vwo kpahen Jehova ọrhẹ ereva aye, no mwurun aye riẹ ekete ra mai guọlọ ighwoghwẹmro Uvie na. (Matt. 22:37-39) Izobo ego yẹ imizu enana i zeri, ebrurhọ ego yẹ aye i mẹrẹnren? Na mẹrẹn ẹkpahenrhọ ye, jenẹ a tẹnrovi ẹkwotọre Cameroon rọ ha uvuẹn Africa.

Uvuẹn ẹgbukpe 1998, omizu re se Onésime no nẹ amwa re vwiẹ ye ro rhiẹ Cameroon. O rhirhiẹ inọko emrẹ ẹgbukpe 14. Ẹdẹ owu uvuẹn uyono ukoko, no rhon udje kpahen owian aghwoghwo na. Ọtẹmro na nọ tare, “Orhianẹ igbehian awanva e kpe irhenrin uvuẹn ekete sansan, ọrẹn owu no kpe vrẹn ugbehian ọreva ye, ọrọ vwọ ghwai mẹrẹn irhenrin kpe na, o riẹ ekete ugbehian yen o kpe omamọ na?”

Udje ọrana nọ lẹrhẹ Onésime roro kpahen oborẹ ono ru ghwẹrioma riẹ i Cameroon, ro rhiẹ ekete ihworho buebun a guọlọ yono i Baibol na, jeghwai ha userhumu rẹn imizu ri ha avwaye. Ọrẹn no brudu. Ọnọ ghini sabu rharhumu rhirhiẹ Cameroon, ra mẹriẹn taghene o jiri ne o nẹ oboran? No rhe sẹ ọnọ sabu rhirhiẹ ye, Onésime no riẹ Cameroon ye rhirhiẹ emrẹ ibiamo erhan. Ọke oru, uvuẹn ẹgbukpe 2012, nọ kwa riẹ oboran.

Onésime nọ tare: “Ni mi rharhumu ruẹ ewene lele aruọke ọdjedjẹrẹ na ọrhẹ akpenyerẹn ihworho uvuẹn ẹkwotọre na. Ni mi rharhumu riẹnrioma rhẹ esiyẹ aga egbogbanhon uvuẹn Aghwẹlẹ Uvie na.” Nọ tare rhẹ echẹẹ, “Ọrẹn ọke mia kerhọ uvuẹn uyono, mi vwa rha karorhọ ega irhorhomu mie siyẹ uvuẹn Aghwẹlẹ Uvie ereva na-a.”

Uvuẹn ẹgbukpe 2013, Onésime nọ rọnmọ Géraldine, rọ ji ghwẹrioma riẹ Cameroon ọke ro rhirhiẹ i France emrẹ ẹgbukpe irhinrin ne. Ebrurhọ ego yẹ esa ọrhẹ ane ọnana i mẹrẹnren ọke aye a tẹnrovi ewian Uvie na? Onésime nọ tare: “Ame awanva ni riẹ Isukuru Ighwoghwẹmro Uvie na, jeghwai ga uvuẹn Oghọn Ukoko. Uvuẹn ẹgbukpe rọ vrẹnren na, ihworho 20 rẹ ame a ha Baibol yono uvuẹn ukoko ame i havwọ yi bromarhame ne. Mi rheri taghene mi ha ekete ro serhọ mi ne ‘kpe irhenrin.’” (Mark 1:17, 18) Géraldine nọ habaye: “Mi mẹrẹn ebrurhọ buebun vrẹn oborẹ mi fiẹrorhọ ne.”

Judith ọ kwa riẹ United States, ọrẹn ọ guọlọ ru riarorhọ uvuẹn owian aghwoghwo yi. Nọ tare, “Mi rha ya mẹrẹn ekrun mẹ obẹ i Cameroon, ni mia viẹ mia rha guọlọ rie, fọkime o vwo ihworho buebun mie lele yono i Baibol na ne.” Ọrẹn, Judith o vwo ẹhẹn  eveva sẹ ọnọ rharhumu kwa riẹ Cameroon. O vwo iruo ra dabu kwa omamọ osa riẹn, rọ ji ha userhumu riẹn kwosa omesimo ọsẹ ye obẹ i Cameroon. Ọrẹn, fọkime Judith ọ hẹroso i Jehova, nọ kwa riẹ Cameroon. Nọ tare taghene ọ vwọ rhọ sabu riamerhen ekwakwa ezẹko rọ riamerhen aye ọke rọ United States bi-i. Nọ nẹrhomo vwe i Jehova nọ ha userhumu riẹn ruẹ ewene, nọ ji mẹrẹn userhumu mie oniruo okinhariẹ owu ọrhẹ aniẹ.

Ọke i Judith ọ karorhọ ekwakwa ri phiare, nọ tare, “Uvwre ẹgbukpe esa, mi vwo aghọghọ mia ha userhumu rẹn ihworho awan ẹne bromarhame.” Judith nọ garẹ ẹrhẹ ọkobaro oghẹnrensan. Inyenana, o lele esa ye, Sam-Castel, wian owian oniruo okinhariẹ. Ọrẹn, me yọ phia rẹn ọsẹ i Judith? Ọye ọrhẹ ekrun ọnẹyen i sabu mẹrẹn ihọsipita uvuẹn ẹkwotọre ọrọrọ ro mwuegbe rọ nọ kwosa omesimo ọsẹ ye. Ọrẹ omamerhomẹ, na sabu ruẹ omesimo na serhọ.

Omizu ọhworhare owu re se Victor nọ kwa riẹ i Canada. Ọke ro se Oghwa Odẹrẹ rọ ta kpahen isukuru eduado hin, nọ roro kpahen isukuru ọnẹyen. Nọ dobọ isukuru ọduado rọ nya ji, no yo yono ona owian rọ nọ sabu ha ruiruo. Victor nọ tare, “Ọ lẹrhere mẹ kiki sabu mẹrẹn iruo, jeghwai ru oborẹ mi guọlọ ru ọke jijiri ne, nọyẹ iruo ọkobaro.” Ọke oru, Victor nọ rọnmọ Caroline, aye awanva ni riẹ Cameroon. Ọke aye e kiẹn Oghọn Ukoko rọ ha oboran, imizu ezẹko ni jiririe rẹn aye nẹ aye i roro kpahen uphẹn aye ina ga uvuẹn i Cameroon. Victor nọ tare, “Ame e rorie gbegberegbe-e, ra mẹriẹn taghene ame e nyerẹn akpọ rọ lọhọre bi, ame ni sabu rhiabọ dede use na.” Dedevwo oma i Caroline ọ ghwai gbanho-on, ame ni ji kwa ghele.

Victor ọrhẹ Caroline ni tuẹn iruo ọkobaro rhọ, nẹ aye i sabu yono ihworho ri vwo omamerhomẹ kpahen i Baibol na. Ọke ukaro, igho aye i kokori yẹ aye i ha ruiruo. Ọke oru, aye ni ya wian obẹ i Canada emrẹ ibiamo ezẹko, rọ ha userhumu rẹn aye ghwẹrioma riẹ Cameroon jeghwai wian owian ọkobaro na. Ebrurhọ ego yẹ aye i mẹrẹnren? Aye ni riẹ Isukuru Ighwoghwẹmro Uvie na, ga ẹrhẹ ekobaro oghẹnrensan, vwana aye a wian owian ebanbọn. Victor nọ tare, “Fọkime ame i nyaji akpọ ame e nyerẹn bi vwo, nọ ha uphẹn rẹn ame rhiẹromẹrẹn obẹhatua i Jehova.”

Uvuẹn ẹgbukpe 2002, Alain, ro riẹ isukuru ọduado obẹ Germany, no se ọbe ọphophẹghẹ na Youths—What Will You Do With Your Life? Oborẹ o seri no mwurien vwo ẹkẹ ekpokpọ. Uvuẹn ẹgbukpe 2006, nọ riẹ Ministerial Training School, ne djerie riẹ Cameroon, ro rhiẹ ẹkwotọre re vwiẹ ye.

Uvuẹn Cameroon, Alain nọ mẹrẹn iruo ono rho ruẹ ibiọke. Ọke oru, nọ mẹrẹn iruo ra dabu kwa omamọ osa, ọrẹn no roro sẹ ọnọ ha uphẹn riẹn dabu vwobọrhọ aghwoghwo na. Omarana, ọke ra ha use riẹn no rhiẹ ọkobaro oghẹnrensan, no rhiabọ dedie ogege. Ohworho rọ wian riẹn no fi ba igho rọ kwa riẹn, ọrẹn Alain o kwe-e, no rhiẹ ọkobaro oghẹnrensan. Ọke oru, Alain nọ rọnmọ Stéphanie, ro rhirhiẹ i France emrẹ ẹgbukpe buebun ne. Ebẹnbẹn ego yẹ ọye ọ mẹrẹnren ọke rọ kwa riẹ Cameroon hin?

Stéphanie nọ tare: “Ni mie kpomẹ, ni mi ji vwo ekwakwa ezẹko ri vwe serhọ rhẹ oma mẹ, ọrẹn mi sabu riẹ omesimo, oma mẹ  nọ ji gbanhon.” Alain ọrhẹ Stéphanie i mẹrẹn ebrurhọ fọkiẹ edirin aye. Alain nọ tare: “Ọke ame e ye ghwoghwo uvuẹn ọko owu re se Katé, ame ni mẹrẹn ihworho ezẹko ri guọlọ yono i Baibol na. Ọke oru, ame ni sabu yono aye i Baibol na nyoma ifonu. Awanva usuẹn ihworho enana ni bromarhame, na ji ha ẹko imizu ezẹko mwu uvuẹn avwaye.” Stéphanie nọ habaye: “O vwo aghọghọ rọ vrẹn ọrẹ ana ha userhumu rẹn ihworho homakpahontọre rẹn Jehova-a. Rẹ ame a ga uvuẹn arana, ame i rhiẹromẹrẹn aghọghọ ọrana ọgbọ buebun ne.” Inyenana, Alain ọrhẹ Stéphanie a wian owian oniruo okinhariẹ.

Gisèle o bromarhame ọke ro riẹ isukuru omesimo obẹ Italy. O vwo omamerhomẹ kpahen akpọ ọlolọhọ rẹ esa ọrhẹ ane owu ri rhiẹ ọkobaro, ri yonirien i Baibol na e nyerẹn, omarana no guọlọ ru riarorhọ uvuẹn owian Uvie na. Gisèle nọ tuẹn iruo ọkobaro rhọ, bọmọke o ki riẹ isukuru na hin.

Gisèle o vwo oruru ro no riẹ Cameroon neneyo ọ sabu wian rhọ uvuẹn ogame i Jehova, ọrẹn o vwo edamẹ ezẹko. Nọ tare, “Ni mi nyaji uphẹn mi vwori mi ne rhirhiẹ Italy vwo, jeghwai nyaji igbehian ọrhẹ ihworho ekrun re rhirhiẹ Italy vwo.” Udabo ọrana, uvuẹn May 2016, Gisèle nọ kwa riẹ Cameroon. Ọke oru, nọ rọnmọ Léonce, Oghọn Ukoko rọ ha i Cameroon no jiririe rẹn aye nẹ aye i kwa riẹ Ayos, amwa rọ guọlọ userhumu ighwoghwẹmro Uvie na.

Marhẹ akpenyerẹn ọ havwọ uvuẹn Ayos? Gisèle nọ tare: “Ọgbọ buebun, o vwo ukpe ẹlẹtriki emrẹ ikprughwre ezẹko-o, ame i vwa rha sabu ha ifonu ame ruiruo-o. Ọke buebun aye i vwa wia-an. Ni mi yono oborẹ a ha erhan sere emaren, jeghwai ha iwibaro ye vo ame uvuẹn aso ọke ihworho i vwa ghwai buẹn usurhẹn na.” Marhẹ aye i ru vwo edirin? Gisèle nọ tare: “Ẹhẹn ọfuanfon i Jehova, esa mẹ rọ ha userhumu phia, ọrhẹ urhebro kugbe userhumu igho ro nẹ abọ ihworho ekrun ọrhẹ igbehian ame, yọ ha userhumu rẹn ame.”

Oma ọ merhen Gisèle taghene ọ ghwẹrioma riẹ ẹkwotọre ro nurhe? “Ee! O vwo ẹfro kpahiẹ-ẹn,” nọ tare. “O vwo ebẹnbẹn ọrhẹ ẹhen ro seriotọre ọke ukaro, ọrẹn ọke ame e fi aye kparobọ ne, mẹmẹ ọrhẹ esa mẹ ni ru oborẹ o fori nẹ ame i ru. Ame ni hẹroso i Jehova jeghwai dabu tikẹriẹ rhọ.” Léonce ọrhẹ Gisèle ni riẹ Isukuru Ighwoghwẹmro Uvie na, vwana aye a ga ẹrhẹ ekobaro oghẹnrensan ibiọke.

Jerẹ ikpirhenrin re diẹn erhirhiẹ sansan nẹ aye i sabu mwu irhenrin buebun, imizu ri rharhumu ghwẹrioma riẹ ẹkwotọre aye i nurhe, i ze izobo buebun nẹ aye i sabu ha userhumu rẹn ihworho ri guọlọ rhon iyẹnrẹn esiri Uvie na. Jehova ọnọ ha ebrurhọ rhẹ ewian imizu enana fọkiẹ ẹguọlọ aye i vwo kpahen odẹ ye. (Neh. 5:19; Heb. 6:10) Orhianẹ we rhirhiẹ ẹkwotọre ọrọrọ, ọrẹn a guọlọ userhumu ighwoghwẹmro Uvie na uvuẹn ẹkwotọre wu nurhe, wu na sabu rharhumu ghwẹrioma? Wu rhe ruẹ omaran, Jehova ọnọ ha ebrurhọ wẹn.—Prov. 10:22.