СӔ ЦАРД фӕххуӕздӕр кӕнунмӕ ӕндӕр бӕстӕмӕ ка ралигъдӕй, еци хуӕртӕ ӕма ӕнсувӕртӕй беретӕ фӕстӕмӕ сӕ райгурӕн бӕстӕмӕ раздахтӕнцӕ, игъосунгӕнгути ӕнхус си ке гъӕуй, уой туххӕй (Матф. 22:37–39). Цума сӕ уой туххӕй ци гъудӕй бакӕнун ӕма син Йеговӕ куд райарфӕ кодта? Гъӕйдӕ ӕркӕсӕн, Африки нигулӕн фарс, горӕт Камеруни ка цӕруй, еци хуӕртӕ ӕма ӕнсувӕрти хабӕрттӕмӕ.

1998 анзи ӕнсувӕр Онесим Камерунӕй фӕсарӕнтӕмӕ фӕллигъдӕй ӕма уоми 14 анзи фӕццардӕй. Еухатт ба ӕмбурди еу радзубандий уӕхӕн цӕветтон фегъуста: «Уӕ цӕститӕбӕл рауайун кӕнайтӕ, цума дууӕ ӕмбали дони билӕбӕл кӕсалгӕ ахӕссунцӕ. Ӕма сӕ еу берӕ кӕсалгӕ ахӕссуй, иннӕ ба неци. Уӕд ка неци ахӕссуй, е ци бакӕндзӕй? Ӕвӕдзи, иннемӕ хӕстӕгдӕр бацӕудзӕй, цӕмӕй е дӕр ести ниййахӕсса».

Аци цӕветтонмӕ гӕсгӕ Онесим фӕстӕмӕ Камерунмӕ раздӕхунбӕл сагъӕс кӕнун райдӕдта, уомӕн ӕма си Библи ахур кӕнун берети фӕндадтӕй, игъосунгӕнгутӕ ба нӕ фагӕ кодта. Фал Онесим тухстӕй, уал анзей фӕсте ма ӕ райгурӕн бӕсти цардбӕл исахур уодзӕй ӕви нӕ, уобӕл. Уомӕ гӕсгӕ бал еу цуд фӕккодта ӕма си анзи ’рдӕг фӕцӕй. Уой фӕсте ба 2012 анзи еугур цуд ӕркодта.

Онесим зӕгъуй: «Нӕуӕгӕй мӕ еци тӕвдитӕбӕл, удта еци царди уавӕртӕбӕл ахур кӕнун гъудӕй. Ӕмбурди ба нӕуӕгӕй еци гъӕдӕг къелатӕбӕл бадун. Фал фӕлмӕн къелатӕбӕл сагъӕс кӕнуни бӕсти архайдтон, цӕмӕй ӕмбурди лӕмбунӕг игъустайнӕ, ӕма мӕ еу афони еци сагъӕстӕ ӕппундӕр нӕбал тухсун кодтонцӕ».

2013 анзи Онесим ӕ цард байеу кодта Жеральдини хӕццӕ. Жеральдинӕ ба Камерунмӕ раздахтӕй, Франций 9 анзи ку фӕццардӕй, уой фӕсте. Еумӕ лӕггадӕ кӕнгӕй Онесим ӕма Жеральдинӕ сӕ царди алкӕддӕр фиццаг бунати Хуцауи гъуддӕгтӕ ӕвардтонцӕ. Цума син Йеговӕ куд райарфӕ кодта? Онесим зӕгъуй: «Паддзахадӕ игъосунгӕнгути скъола фӕцан ӕма нур лӕггадӕ кӕнӕн Вефили. Фӕстаг анзмӕ ба не ’мбурди 20 адӕймаги райстонцӕ донаргъуд. Нур ӕцӕгӕйдӕр „берӕ кӕсалгӕ кӕми ес“, уӕхӕн бунати лӕггадӕ кӕнун» (Мар. 1:17, 18). Жеральдинӕ ба зӕгъуй: «Сагъӕс дӕр кӕбӕл нӕ ракодтайнӕ, гъе уӕхӕн арфӕдзийнӕдтӕй нӕ исхайгин кодта Йеговӕ».

Кӕддӕр Америкӕмӕ ка фӕллигъдӕй, еу уӕхӕн хуӕрӕ Джудит хъӕбӕр бӕлдтӕй игъосун кӕнуни гъуддаги фулдӕр архайунмӕ. Джудит зӕгъуй: «Камерунмӕ хеуӕнтти рабӕрӕг кӕнунмӕ ку ’рцӕуинӕ, уӕд алли хатт дӕр цалдӕр адӕймагей хӕццӕ райдайинӕ Библи ахур кӕнун. Ӕма мӕ фӕстӕмӕ цӕун ку фӕгъгъӕуидӕ, уӕд мин дӕр хъӕбӕр зин уидӕ, уадзгӕ сӕ ке кодтон, е». Фал еугур цуд ӕркӕнунмӕ ба Джудит ӕ нифс нӕ хаста, уомӕн ӕма ин Америки хуарз куст адтӕй, ӕма уой фӕрци ӕ бон адтӕй, Камеруни ин ка цардӕй, еци сӕйгӕ фидӕн хуастӕ ӕлхӕнун. Фал Джудит уӕддӕр ӕ зӕрдӕ Йеговӕбӕл бадардта ӕма Камерунмӕ  еугур цуд ӕркодта. Фиццаг рӕстӕг, дан, Камеруни царди уавӕртӕбӕл зинтӕй ахур кодтон. Фал Джудит Йеговӕй хъауритӕ курдта, цӕмӕй ӕ царди ӕййивддзийнӕдтӕбӕл исахур адтайдӕ, ӕма ин Йеговӕ ӕ кувдбӕл дзуапп равардта. Бунӕттон хуӕртӕ ӕма ӕнсувӕртӕ ин хъӕбӕр ӕнхус кодтонцӕ, удта ’й сӕ районон цӕстӕдарӕг ӕма ӕ бийнойнаг дӕр бафедар кодтонцӕ.

Еци рӕстӕгутӕбӕл сагъӕс кӕнгӕй Джудит зӕгъуй: «Ӕртӕ анземӕ Библи ке хӕццӕ ахур кодтон, уонӕй цуппар адӕймаги донаргъуд райстонцӕ». Сӕрмагонд пионерӕй дӕр ралӕггадӕ кодта. Нур ба ӕ лӕг, Сам-Кастел районон цӕстӕдарӕг ӕй ӕма ӕ хӕццӕ лӕггадӕ кӕнуй. Ӕ фидӕ ба цума ци бацӕй? Джудит ӕма ӕ хеуӕнттӕ иссирдтонцӕ, ӕ фидӕн операци лӕварӕй кӕми искодтайуонцӕ, уӕхӕн сӕйгӕдонӕ фӕсарӕнти. Ӕма операций фӕсте ӕ фидӕ хъӕбӕр тагъд ӕхе кеми ӕрцудӕй.

Ӕнсувӕр Виктор ба Камерунӕй Канадӕмӕ фӕллигъдӕй. Уоми университети ахур кодта, фал еухатт ба «Гъӕуайгӕнӕн мӕсуг»-и уӕлдӕр ахури туххӕй еу статья бакастӕй ӕма исфӕндӕ кодта, цубур рӕстӕгмӕ ести кустбӕл райахур кӕнун. Виктор зӕгъуй: «Еци ахури фӕрци косун дӕр тагъддӕр райдӕдтон, удта мӕ рагӕй ци фӕндадтӕй, уой дӕр бакодтон, пионерӕй лӕггадӕ кӕнун райдӕдтон». Цӕйбӕрцӕдӕр рӕстӕги фӕсте ба Виктор ӕ цард байеу кодта Каролини хӕццӕ ӕма исфӕндӕ кодтонцӕ еумӕ Камерунмӕ фӕццӕун. Уоми бунӕттон филиал фӕууинунмӕ ку ’рбацудӕнцӕ, уӕд сӕ ӕнсувӕртӕ баразӕнгард кодтонцӕ, Камеруни лӕггадӕ кӕнунбӕл расагъӕс кӕнун. Виктор зӕгъуй: «Ба ’й лӕдӕрдтан, Камеруни лӕггадӕ кӕнунмӕ нӕ ке неци хъор кӕнуй, уой. Ӕнӕуой дӕр хумӕтӕг цард кодтан ӕма берӕ дӕр нӕ сагъӕс кодтан, уотемӕй райарази ан». Кӕд Каролинӕн е ’нӕнездзийнадӕ хуӕздӕр гъӕуагӕ адтӕй, уӕддӕр исфӕндӕ кодтонцӕ Камерунмӕ рандӕ ун.

Камеруни Виктор ӕма Каролинӕ лӕггадӕ кодтонцӕ пионертӕй ӕма рӕстдзийнади надбӕл ислӕуунмӕ беретӕн банхус кодтонцӕ. Цӕйбӕрцӕдӕр рӕстӕг, ци ’хца сӕмӕ адтӕй, уонӕй цардӕнцӕ, уой фӕсте ба Канадӕмӕ цалдӕр мӕйемӕ рандӕ ’нцӕ, ӕхца ракустонцӕ ӕма фӕстӕмӕ исцудӕнцӕ. Цума син Йеговӕ куд райарфӕ кодта? Виктор ӕма Каролинӕ Паддзахадӕ игъосунгӕнгути скъола рацудӕнцӕ ӕма сӕрмагонд пионертӕй лӕггадӕ кодтонцӕ, нур ба арӕзтадон гъуддӕгти архайунцӕ. Виктор зӕгъуй: «Хуӕздӕр цард ке ниууагътан, уомӕй Йеговӕн бавдистан, нӕ зӕрдӕ ибӕл ке дарӕн, уой ӕма нӕ нӕ ниууагъта».

2002 анзи Ален Германий университети ахур кодта. Еухатт ба бакастӕй буклет «Ӕригӕнттӕ, уӕ цард цӕмӕн иснивонд кӕндзиайтӕ?» (урус.). Ӕма ’й еци буклет нӕуӕг нисӕнттӕ исӕвӕрунмӕ баразӕнгард кодта. 2006 анзи Ален рацудӕй Лӕггадӕ фӕххуӕздӕр кӕнуни скъола ӕма ’й ӕ райгурӕн бӕстӕмӕ, Камерунмӕ иснисан кодтонцӕ.

Камеруни Ален алли бон косун кӕми нӕ гъудӕй, уӕхӕн куст иссирдта. Уой фӕсте ба фулдӕр ӕхца кӕми фистонцӕ, уӕхӕн кустмӕ рацудӕй, фал тухстӕй еци кусти туххӕй ин игъосун кӕнунмӕ минкъийдӕр рӕстӕг ке изайдзӕй, уобӕл. Гъема ин сӕрмагонд пионерӕй лӕггадӕ кӕнунмӕ фадуат ку фӕззиндтӕй, уӕд уайтагъддӕр райарази ӕй. Ӕ кусти хецау ин фулдӕр ӕхца федунбӕл дӕр арази адтӕй, фал Ален уӕддӕр нӕ байзадӕй. Цӕйбӕрцӕдӕр рӕстӕги фӕсте Ален ӕ цард байеу кодта Стефаний хӕццӕ. Стефани дӕр берӕ ӕнзтӕ Франций фӕццардӕй. Цума Камеруни Стефани цӕхуӕн зиндзийнӕдтӕбӕл исӕмбалдӕй?

Стефани зӕгъуй: «Цӕмӕдӕр мӕмӕ аллергийӕ фӕззиндтӕй, удта ме ’нӕнездзийнадӕ дӕр хуӕздӕр гъӕуагӕ ӕй. Фал рӕстӕгӕй рӕстӕгмӕ хуастӕ ке фӕнниуазун, уой фӕрци мин дзӕвгарӕ  ӕнцондӕр ӕй». Йеговӕ еци бийнонтӕн сӕ фӕразондзийнади туххӕй райарфӕ кодта. Ален зӕгъуй: «Еухатт идард гъӕутӕй еуемӕ, Кате, зӕгъгӕ, игъосун кӕнунмӕ рандӕ ан. Ӕма си цалдӕр адӕймагей хӕццӕ Библи ахур кӕнун райдӕдтан. Ахур ба кодтан телефонӕй. Еци ахуркӕнуйнӕгтӕй дууӕ донаргъуд райстонцӕ. Цӕйбӕрцӕдӕр рӕстӕги фӕсте ба Катей фӕззиндтӕй игъосунгӕнгути къуар». Стефани ба загъта: «Уомӕй устурдӕр цийнӕ нӕййес, ӕма адӕнӕн сӕ цард Йеговӕн иснивонд кӕнунмӕ ку ӕнхус кӕнай. Уӕхӕн цийнӕ ба ами еу ӕма дууӕ хатти нӕ бавзурстан». Абони ба Ален ӕма Стефани ӕнцӕ районон лӕггади.

Жизель Италий дохтирбӕл исахур кодта, удта донаргъуд дӕр уоми райста. Ӕ хӕццӕ Библи ка ахур кодта, еци лӕг ӕма уоси цӕветтон ӕ зӕрдӕбӕл хъӕбӕр бамбалдӕй. Пионертӕй лӕггадӕ кодтонцӕ ӕма хъӕбӕр хумӕтӕг цард кодтонцӕ. Уонӕмӕ гӕсгӕ Жизели дӕр бафӕндадтӕй ӕ лӕггадӕ фӕффулдӕр кӕнун ӕма фӕстаг курси ку ахур кодта, уӕд пионерӕй лӕггадӕ кӕнун райдӕдта.

Жизели хъӕбӕр фӕндадтӕй Камерунмӕ раздӕхун ӕма уоми лӕггадӕ кӕнун, фал еу цӕбӕлдӕр тухстӕй. Жизель зӕгъуй: «Тарстӕн, Италийӕй ку рандӕ уон, уӕд мин уоми цӕрунмӕ гӕгъӕди ке нӕбал ратдзӕнцӕ, ӕма мӕ бон раздӕхун ке нӕбал исуодзӕй. Италий ба мӕ хеуӕнттӕ ӕма ме ’мбӕлттӕ цӕрунцӕ». Фал уӕддӕр 2016 анзи Жизель Камерунмӕ рандӕ ’й. Цӕйбӕрцӕдӕр рӕстӕги фӕсте ба ӕ цард байеу кодта ӕнсувӕр Леонси хӕццӕ ӕма филиали унаффӕмӕ гӕсгӕ город Айосмӕ рандӕ ’нцӕ, уомӕн ӕма си игъосунгӕнгутӕ нӕ фагӕ кодта.

Цума син Айоси ба куд адтӕй? Жизель зӕгъуй: «Арӕх нӕмӕ къуӕрегӕйттӕ рохс нӕ уидӕ, ӕма нӕ телефонтӕ зарядки байвӕрун дӕр нӕ бон н’ адтӕй. Хуруйнаг ба артбӕл кодтан. Удта нӕ донмӕ дӕр цӕун гъудӕй. Цӕугӕ ба имӕ талинги кодтан, уомӕн ӕма си еци афони адӕн уотӕ берӕ нӕбал уидӕ. Ӕма ’й тачкӕбӕл фонарикки рохсмӕ ӕрбаласианӕ». Цума син еци рӕстӕг бафӕразунмӕ ци ӕнхус кодта? Жизель зӕгъуй: «Хуцауи сугъдӕг хъаури фӕрци нӕ бон адтӕй кӕрӕдзей федар кӕнун. Ӕмбӕлттӕ ӕма нин хеуӕнттӕ дӕр ӕнхус кодтонцӕ, хатгай ба нӕмӕ ӕхцайӕй дӕр фӕккӕсиуонцӕ».

Цума Жизель фӕсмон кӕнуй, ӕ райгурӕн бӕстӕмӕ ке ӕрӕздахтӕй уобӕл? «Ӕппундӕр нӕ! – зӕгъуй Жизель.– Зиндзийнӕдтӕбӕл дӕр куд не ’сӕмбалдан, фал райевгъудӕнцӕ. Нур Леонси хӕццӕ ӕппундӕр нӕ дузӕрдуг кӕнӕн, ци кӕнгӕ нин адтӕй, уой ке бакодтан, уобӕл. Мах нӕ зӕрдӕ Йеговӕбӕл дарӕн ӕма ’й уинӕн, куд имӕ фӕххӕстӕгдӕр ан, уой». Леонс ӕма Жизель Паддзахадӕ игъосунгӕнгути скъола рацудӕнцӕ ӕма нур сӕрмагонд пионертӕй лӕггадӕ кӕнунцӕ.

Кӕсалгахӕсгутӕ лӕгъуз бонигъӕди дӕр куд рацӕунцӕ, уотӕ сӕ райгурӕн бӕстӕмӕ ка ӕрӕздахтӕй, еци хуӕртӕ ӕма ӕнсувӕртӕ дӕр цӕттӕ фӕуунцӕ, рӕстдзийнадӕ базонун ке фӕндуй, уони туххӕй сӕхе цӕмӕйдӕрти фӕццох кӕнунмӕ. Йеговӕ син некӕд байронх уодзӕй, ӕ ном исрохс кӕнуни туххӕй ин куд хъиамӕт кӕнунцӕ ӕма ци уарзондзийнадӕ ӕвдесунцӕ, уой (Неем. 5:19; Дзиуит. 6:10). Кӕд ду дӕр ескӕми фӕсарӕнти цӕрис, ӕма дӕ райгурӕн бӕсти игъосунгӕнгутӕ нӕ фагӕ кӕнуй, уӕд дӕ нӕ фӕндадтайдӕ фӕстӕмӕ раздӕхун? Еци къахдзӕф ку искӕнай, уӕд дин Йеговӕ хъӕбӕр рӕдауӕй райарфӕ кӕндзӕй (Ӕмб. 10:22).