VÄL Breeda un Sestren, waut em Utlaunt wieren toom mea Jelt vedeenen, sent wada trigj no äa Launt jetrocken. Ut Leew fa Jehova un fa dän Näakjsten sent dee no soone Jäajenden jetrocken, wua daut aun mea Vekjindja fält (Mat. 22:37-39). Waut musten dee oppjäwen, un woo haft Jehova dee jesäajent? Well wie mol seenen, waut eenje Breeda von Kamerun beläft haben. Daut es een Launt en Wast-Afrika.

Aune 1998 trock een Brooda, waut Onésime heet, von Kamerun wajch un läwd 14 Joa em Utlaunt. Doa en een Toopkomen brukt een Rädna mol een Jlikjnis äwa daut Prädichtwoakj. Dee säd: “Twee Frind doonen opp veschiedne Städen feschen un eena von dee kjricht väl mea Fesch aus de aundra. Wudd dee, waut nich soo väl kjricht, dan nich doa gonen feschen, wua eena väl mea kjricht?”

Daut brocht Onésime toom nodenkjen, aus hee wudd sellen trigj no Kamerun trakjen. Doa wullen een deel Menschen de Bibel studieren, oba hee wia sikj doawäajen nich secha, aus hee wudd sellen trigjtrakjen. Hee wia je soo lang en een aundret Launt jewast. Wudd hee sikj wada trigjwanen kjennen? Om daut uttofinjen, fua hee doa mol fa sas Moonat han. Un aune 2012 trock hee dan gaunz doa han.

Onésime sajcht: “Ekj must mie wada to daut woame Wada un to daut Läwen doa wanen. Em Vesaumlungshus wia ekj daut nich mea jewant, opp hoade Benkjen to setten.” Dan mott hee schia lachen un sajcht: “Je dolla ekj toohorchen deed, je weinja bangd ekj mie trigj no de wieekje Setten.”

Aune 2013 befried Onésime sikj met Géraldine, waut ea fa näajen Joa en Frankreich jeläft haud. Woo säajend Jehova dee, wäajen dee emma daut ieeschte doarom todoonen wieren am to deenen? Onésime sajcht: “Wie kunnen toop no de School fa Kjennichrikjsvekjindja gonen un em Betel deenen. Un tojoa leeten sikj en onse Vesaumlunk 20 Bibelstudiums deepen. Ekj denkj, nu sie ekj opp de rajchte Städ toom feschen” (Mar. 1:17-18). Un Géraldine sajcht: “Jehova haft mie dolla jesäajent, aus ekj mie jeemols jedocht haud.”

Judith wia no de Stäts jetrocken, oba see wull mea em Deenst doonen. See sajcht: “Wan ekj no miene Famielje en Kamerun fua, dan must ekj jiedatsmol roaren, ea ekj trigjfua, wäajen ekj doa met soone feine Bibelstudiums aunjefongen haud.” Oba Judith wia sikj doawäajen nich fuaz eenich, aus see trigj no Kamerun trakjen sull. See haud enne Stäts eene Oabeit, wua see dia betolt kjrieech, un  kunn doaderch äaren Voda en Kamerun halpen, siene Doktarieen to betolen. Oba Judith veleet sikj opp Jehova un trock wada trigj no äa Launt. Ieeschtlich bangd see sikj een bät no daut makelje Läwen enne Stäts. Oba see bäd Jehova om Help, daut see sikj wada to äa Launt wanen kunn. Un een Kjreisoppsechta un siene Fru spruaken ar Moot too.

Nu sajcht Judith: “Ekj frei mie sea, daut ekj en dree Joa vea Menschen halpen kunn, sikj deepen to loten.” Lota wort Judith Sondapionia. Un nu es see met Sam-Castel befriet, waut Kjreisoppsechta es. Oba waut wort met Judith äaren Voda? See un äare Famielje fungen en een aundret Launt een Hospitol, waut äaren Voda sien Oppereeschen betold, un daut foll goot ut.

Victor es een Brooda, waut mol no Kanada trock. Hee läsd eenen Artikjel em Woaktorm, waut sikj doavon haundeld, aus eena sikj saul huach utlieren loten. Dan docht hee äwa sien Läwen no un wort sikj eenich met de Uniwersität opptohieren. Enne Städ daut leet hee sikj fa eene aundre Oabeit utlieren, waut nich soo lang dieed. Hee sajcht: “Soo kunn ekj ea aunfangen met schaufen un Pionia woaren. Daut haud ekj mie aul lang jewenscht.” Lota befried Victor sikj met Caroline un dee reisden mol no Kamerun. Aus dee sikj doa daut Betel besagen, fruagen de Breeda an, aus see nich mol wudden wellen en Kamerun deenen. Victor sajcht: “Wie hauden nuscht toom väajäwen. Un wäajen wie een eefachet Läwen fieeden, kunn wie doa hantrakjen.” Caroline wia nich gaunz jesunt, oba dee worden sikj doawäajen eenich omtotrakjen.

Victor un Caroline worden Pionia, wiels dee doa aul de Menschen halpen wullen, waut sikj fa de Schreft intressieeden. Aum Aunfank kunnen see von daut läwen, waut see sikj toopjespoat hauden. Dan fuaren dee fa een poa Moonat no Kanada toom schaufen un kjeemen wada trigj no Kamerun un wieren wieda Pionia. Woo worden dee jesäajent? Dee kunnen no de School fa Kjennichrikjsvekjindja gonen un worden Sondapionia un schaufen nu en eene Bugrupp. Victor sajcht: “Wäajen wie ons makeljet Läwen oppjeewen, must wie ons opp Jehova veloten un dee sorjd fa ons.”

Alain wia en Dietschlaunt un jinkj doa no de Uniwersität. Aune 2002 läsd hee daut Zeichnisblaut Ihr Jugendlichen — was werdet ihr aus eurem Leben machen?. Daut brocht am bat doa, daut hee no jeisteljet sträwen wull. Aune 2006 jinkj hee no de School toom em Deenstaumt utlieren un dan wort hee no Kamerun jeschekjt, wua hee jebuaren wia.

En Kamerun funk Alain eene Oabeit, wua hee bloos jewessen Tiet schaufen deed. Lota funk hee eene Oabeit, wua hee diera betolt kjrieech, oba hee beduad, aus hee dan nich wudd weinja Tiet fa dän Deenst haben. Aus se am dan fruagen Sondapionia to woaren, wia hee sikj fuaz eenich. Sien Wieet wull am mea Jelt jäwen, wan hee bliewen wudd, oba Alain neem daut nich aun. Lota befried hee sikj met Stéphanie, waut fa Joaren en Frankreich jewast wia. Met waut must see foadich woaren, aus see trigj no Kamerun kjeem?

Stéphanie sajcht: “Ekj kjrieech doa Trubbel met de Jesuntheit, oba ekj deed doa emma wada met doktren un dan wort daut bäta.” Waut fa goodet beläwden dise Lied, wäajen dee nich oppjeewen? Alain sajcht: “Aus wie  en daut Stautje Katé prädjen deeden, waut wiet auf wia, fung wie doa eenje, waut de Bibel studieren wullen. Lota kunn wie met dee äwa Fon studieren. Twee von dee leeten sikj deepen un doa jeef et dan eene Grupp von Jehova siene Zeijen.” Stéphanie sajcht: “Daut jeft nich eene jratre Freid, aus Menschen to halpen, daut dee sikj kjennen Jehova hanjäwen. Un wiels wie hia deenen, hab wie daut aul foaken kunt beläwen.” Vondoag dän Dach deenen Alain un Stéphanie aus Kjreisoppsechta-Lied.

Gisèle leet sikj deepen, aus see en Italien no eene School jinkj, wua see sikj fa Doktarieen utlieren leet. See jleicht daut eefache Läwen, waut de Pionia-Lied hauden, dee met ar studieren deeden, un see wull uk mea fa Jehova doonen. Doawäajen wort Gisèle aul Pionia, ea äare School gaunz to Enj wia.

Gisèle wull wada trigj no Kamerun trakjen un doa mea fa Jehova doonen, oba see muak sikj een bät Sorjen. See sajcht: “Wan ekj wudd trigjtrakjen, dan wudd ekj nich mea de Frieheit haben, lota wada en Italien to wonen, wua miene Famielje un Frind sent.” Un doch trock Gisèle en Mei 2016 trigj no Kamerun. Lota befried see sikj met Léonce un daut Betel en Kamerun fruach an, aus see nich wullen no Ayos trakjen. Daut wia eene Staut, wua daut sea needich aun Vekjindja fäld.

Woo wia daut en Ayos? Gisèle sajcht: “Foaken haud wie doa wäakjenlank nich Fia un kunnen onse Fons nich scharzhen. Un foaken schauft daut uk nich mol to fonen. Ekj must daut lieren, met Holt Fia to moaken un soo Äten to moaken. Un wie jinjen zeowes met de Mestkoa un met een Licht nom Borm Wota holen, wiels doa dan nich soo väl Menschen wieren.” Woo worden dee doamet foadich? Gisèle sajcht: “Waut ons holp, wia Jehova sien Jeist un daut wie ons aus Lied unjarenaunda biestunden un daut onse Famielje un onse Frind ons Moot toospruaken un ons uk bieaun em tieteljen unjastetten deeden.”

Es Gisèle daut schod, daut see trigj no äa Launt jetrocken es? See sajcht: “Nä, secha nich! Aum Aunfank wia daut nich emma leicht un wie wieren uk mol mootloos, oba wie jeewen nich opp. Ekj un mien Maun sent ons gaunz secha: Daut wia de rajchte Entscheidunk! Wie haben ons opp Jehova veloten un sent am noda jekomen.” Léonce un Gisèle jinjen no de School fa Kjennichrikjsvekjindja un nu sent dee fa eene jewesse Tiet Sondapionia.

Soone, waut een deel Fesch kjrieen wellen, sent äwanäment un wanen sikj to veschiedne Omstend. Krakjt soo sent deejanje, waut trigj no äa Launt trakjen, wellich reed, waut opptojäwen, om opprechtje Menschen to halpen, waut no de goode Norecht horchen wellen. Gaunz secha woat Jehova dise flietje Vekjindja beloonen, waut soone groote Leew fa sienen Nomen wiesen (Neh. 5:19; Heb. 6:10). Wurscht du uk trigjtrakjen kjennen, wan du en een aundret Launt wonst un daut en dien Launt aun mea Vekjindja fält? Wan du daut deist, dan woat Jehova die sea säajnen (Spr. 10:22).