APHANGI avula a mala nu a akhetu anyi ayile mukamba makuta mu ifutshi iko, avutugile mu ifutshi yawo. Mukunda natshi? Guzumba guawo mukunda nu Yehowa nu athu ako guaatumine ha guvutuga mu mafundo akhalele nu funu ya alongeshi avula a Ufumu. (Mat. 22:37-39) Usombegeshi utshi akadigile mu monyo wawo nu ishimbigo itshi ahetele? Ha gujiya ndaga eyi kiawaha, tutadilenu ndaga jiakalegewe gu gifutshi gia Cameroun gu Afrique de l’Ouest.

Mu 1998 phangi Onésime wakatugile gu Cameroun, fundo diavalewe muene. Wakadigile ivo 14 mu gifutshi giko. Lusugu lumoshi mu gudibungisa gua mu hungu, wavuile phangi mumoshi muhana gifezegeselo giatadila mudimo wa gulongesa mu diskur dienji. Phangi muene wazuelele egi: “Gula mafuta mbadi aya mulowa jishui mu mafundo agudisha, mumoshi udi mukuata jishui jiavula uvi muko ndo. Futa yonu gashigo mukuata jishui jiavula gajiyilego guya musanga futa dienji ha fundo didi muene mukuata jishui jiavula ba?”

Gifezegeselo giene giatumine phangi Onésime ha gutangiza luholo wajiya guvutuga gu Cameroun, mu mafundo anyi athu akhalele nu nzala ya gulonguga Biblia, ha gukuatesa alongeshi a mu mafundo ene. Uvi wadisagesele muavula. Wadihudile egi: Mbangujidila luko nu lujingu lua gu Cameroun gungima dia ivo eyi yavula ngabalegesa mu gifutshi giko ba? Thomo, phangi Onésime wayile mutala Cameroun mukunda nu mbeji 6 ha gujiya gula wajiya diago gujidila guene. Uvi, mu 2012 wavutugile ha gujinga guene.

Phangi Onésime udi muzuela egi: “Ngakhalele naye gusombegesa luholo luami lua gujinga nu gujidila nu muanya wakola. Ngakhalele naye gujidila luko gukhala ha ibasa (banc) yabala gungima mu Inzo ya Ufumu. Uvi, udi muzuela nu gumuemueta gamba: “Ngakalegele yagasue ha gubuita mutshima gu ibasa yabonga ngakhalele mukhala mu Jinzo jiko jia Ufumu, ha gudihana ha gutegelela muabonga programe mu gudibungisa.”

Mu 2013 phangi Onésime wazudile Géraldine mu ulo. Géraldine nji wajingile gu France ivo 9, gungima wavutugile gu Cameroun. Ishimbigo itshi phangi owu nu mukaji’enji ahetele luholo ahagele ndaga jia mu nyuma ha fundo dia thomo? Phangi Onésime udi muzuela egi: “Ame nu mukaji’ami tuanginyile Khalasa dia Alongeshi a Ufumu, tuakalegele nji gu Betele. Givo giabalega, mu hungu dietu athu 20 tuakhalele mulongesa Biblia abatijiwe. Henyaha ngudi gudivua egi ngudi hafundo diabonga dia ‘gulowa.’” (Mako 1:17, 18) Géraldine udi muzuela egi: “Ngahetele ishimbigo yavula diago.”

Phangi Judith wayile gu États-Unis, uvi wakhalele nu nzala ya gukalagala muavula mudimo wa gulongesa. Udi muzuela egi: “Ngakhalele muya mutala enya fami yami mbala jiavula gu Cameroun. Ngadidile handaga ngakotelesele egi ngabembele athu avula anyi ngasendesele gulongesa Biblia guene.”  Uvi phangi Judith wakhalele nu ba dute ha guvutuga luko gu Cameroun. Wakhalele nu mudimo wabonga wakhalele gumukuatesa ha guheta makuta ha gukuatesa tata wenji wakhalele mukata gu Cameroun. Uvi, Judith washile mutshima wenji gudi Yehowa hene wavutugile gu Cameroun. Udi muzuela egi wakhalele muvua uhote wa lujingu luabonga akhalele nalo gu États-Unis. Watogele Yehowa ha gumukuatesa ha gusombegesa matangi’enji, wahetele nji ukuateshi gudi mutadi muwendji nu mukaji’enji.

Tangua phangi Judith ana gutangigiza luholo ndaga jiakalegewe tangua ahetele gu Cameroun wana guzuela egi: “Ngudi nu gusuanguluga luholo ngakuatesele athu nguana ha gubatijiwa mu ivo thathu.” Judith wasendesele mudimo wa gipionye spesiale. Mangino mulumi’enji Sam-Castel udi mutadi-muwendji, anaya mutala mahungu hamoshi. Uvi ndaga itshi yabuidile tata wa Judith? Judith nu enya fami yenji ahetele opital umoshi mu gifutshi gimoshi unu wakhalele musaga athu a githuhu hagula aphande tata wawo. Ndaga yagusuanguluga idi egi ndaga jiabalegele muabonga.

Phangi Victor wayile gu Canada. Tangua alongugile Inzo Yaleha ya Mutaledi yakhalele muzuelela makhalasa aleha-leha, wasombegesele luholo luenji lua gutadila makhala aleha-leha. Wabembele guya gu université, wasendesele gukalagala formasio yahihia ya midimo ya mago. Udi muzuela egi: “Formasio yene ya ngukuatesele ha guheta mudimo muphushi wunu wakhalele gungukuatesa ha gukalagala mudimo wa muvundji wa njila.” Gungima Victor wazudile Caroline mu ulo nu ayile mutala dimbo dia Cameroun. Tangua ahetele guene, ayile mutala betele. Aphangi a akuatesele ha gutangiza ndaga yatadila gukalagala mudimo gu Cameroun. Victor udi muzuela egi: “Tuamonelego luholo lua gutuna, uvi tuasombegesele ndaga jiko mu monyo wetu ha guya mukalagala mudimo gu Cameroun.” Ikhale Caroline wakhalele nu misongo iko yakhalele gumusagesa uvi, azudile desizio dia guya guene.

Victor nu Caroline asendesele gukalagala mudimo wa muvundji wa njila ha gukuatesa athu akhalele musuanguluga nu maga a Biblia. Akhalele nu ndambo ya makuta yakhalele naye guakuatesa gula aheta guene. Gungima dia gukalagala mudimo mbeji jiazonda gu Canada, avutugile gu Cameroun ha gulandula gukalagala mudimo wa muvundji wa njila. Ishimbigo itshi ahetele? Anginyile Khalasa dia Alongeshi a Ufumu, akalegele mudimo wa gipionye spesiale, mangino adi mu mudimo wa gutunga Jinzo jia Ufumu. Victor udi muzuela egi: “Luholo tuabembele lujingu luetu luawaha, tuana mona diago luholo Yehowa wana gutukuatesa.”

Mu 2002, Alain, munu wakhalele mulonguga gu université ya gu Allemagne watangele trakte ya khalele muzuela egi, Jeunes gens, qu’allez-vous faire de votre vie? Ndaga jiatangele muene jia mukuatesele ha guzula ba desizio ahe-ahe. Mu 2006, wanginyile khalasa dia khalele mutamegewa egi, École de formation ministérielle nu watumiwe ha guya mukalagala mudimo gu Cameroun, gifutshi giavualewe muene.

Tangua ahetele gu Cameroun, Alain wahetele mudimo wa tangua diazonda. Gungima wahetele mudimo wunu wakhalele gumufutshiwa muabonga, uvi wakhalele mudisagesa handaga mudimo wene wakhalele gumuzula tangua diavula nu akhalelego nu tangua diaguya mu mudimo wa gulongesa. Hene, tangua amutamegele ha gukalagala mudimo wa gipionye spesiale, watshiginyile mu mbala imoshi. Patron wenji wamuhanele ginemo giko giakoma, uvi Alain watunyile genji. Gungima, Alain wazudile phangi Stéphanie mu ulo. Stéphanie wajingile nji ivo yavula gu France. Malamba atshi Stéphanie ataganele nawo havutugile muene gu Cameroun?

Stéphanie udi muzuela egi: “Ngasendesele gukata tumisongo tuazonda-zonda tangua  diagasue. Uvi, ngasagewe gungima ngavuile ngolo.” Phangi owu nu mulumi’enji ahetele ishimbigo yavula luholo akolesele mu malamba. Alain udi muzuela egi: “Tangua tuayile mulongesa mu gadimbo gana gutamegewa egi Katé, tuahetele athu avula akhalele nu funu ya gulonguga Biblia. Gungima, tuasendesele gualongesa Biblia mu njila ya telefone. Athu mbadi abatijiwe nu tuazolele hunji dia alongeshi guene.” Stéphanie udi muzuela luko egi: “Gukuatesa athu ha gudihana gudi Yehowa, guana gubata gusuanguluga guavula. Gukalagala mudimo ha fundo edi guana gutubatela gusuanguluga matangua avula.” Mangino, Alain wana kalagala mudimo wa mutadi-muwendji hamoshi nu Stéphanie.

Phangi Gisèle wabatijiwe hakhalele mulonguga muene khalasa dia gimunganga gu Italie. Wakhalele musuanguluga nu lujingu lualeba luakhalele nalo phangi mumoshi wa muvundji wa njila nu mukaji’enji anyi amulongesele Biblia. Ndaga yene yamutumine ha gukalagala muavula mu mudimo wa gulongesa. Hamanesele muene khalasa, wasendesele mudimo wa muvundji wa njila wa tangua diagasue.

Gisèle wakhalele nu funu ya guvutuga gu Cameroun ha gukalegela Yehowa muavula, uvi wakhalele nu ndaga jiko jiakhalele gumusagesa. Udi muzuela egi: “Ngabembele inzo yami yawaha gu Italie nu mafuta ami nu enya fami yami anyi akhalele guene.” Ngatshima yakhalele ngenyi, mu Mai 2016, Gisèle wavutugile gu Cameroun.

Gungima, Léonce wamuzudile mu ulo. Betele ya gu Cameroun yaatogele ha guya gu Ayos dimbo diakoma diakhalele nu funu ya alongeshi a Ufumu.

Lujingu luawo luakhalele luholo lutshi gu Ayos? Gisèle udi muzuela egi: “Guma guene guakhalelego nu courant mu phoso nu mu lubingo tuakhalelego nga nu luholo lua gusha telefone gu sharje. Matangua avula jiakhalelego nu tshuiya. Ngalongugile luholo lua gutelega ima ha khunyi, tuakhalele muya nji muthaya meya gu muta mu phipha nu phusu-phusu nu ji torche tangua guma guakhalele tedie.” Itshi yaakuatesele ha gukolesela? Gisèle udi muzuela egi: “Nyuma ya Yehowa yatukuatesele ha gukolesela malamba ene. Mulumi’ami wangukuatesele nu mafuta ami nu aphangi ako atukuatesele nji nu ndambo ya makuta.”

Phangi Gisèle udi nu gusuanguluga ha guvutuga mu dimbo diavualewe muene ba? Ayi! Udi muzuela nu gikhesa giagasue egi: “Malamba a luholo elu akhalele naye gutulebesa muila. Uvi luholo tuabingile malamba ene, tuamonesele diago egi tuakalegele ndaga tuakhalele naye gukalagala. Tuashile mutshima wetu gudi Yehowa nu tuakhalele gudivua hehi nu muene.” Phangi Léonce nu Gisèle anginyile Khalasa dia Alongeshi a Ufumu. Mangino, adi mutshita mudimo wa gipionye spesiale.

Luholo mulowi wa jishui wana monesa gikhesa ha gukolesela mu malamba ha gukuata jishui jiavula, aphangi awa akalegele ngolo ha guvutuga gu gifutshi giawo ha guya mulongesa Lukuma lua Ufumu. Yehowa mbaajimbilago mudimo wakola alongeshi awa agikhesa akalegele nu guzumba amonesele mukunda nu jina dienji. (Neh. 5:19; Heb. 6:10) Gula wana jinga mu gifutshi giko uvi mu gifutshi gienu gidi nu funu ya alongeshi a Ufumu, mbawutshigina guvutuga luko guene ba? Gula wakalagala ngenyi, mbawuheta ishimbigo yavula.—Ish. 10:22.