E KʼI qachalal che e bʼenaq pa jun tinamit che más qʼinom xetzalij lo pa ri kitinamit. Rumal ri kiloqʼoqʼebʼal che ri Jehová y che ri kajil kitzʼaqat, tajin kkiya tobʼanik pa ri lugares che kajwataj wi más tobʼanik (Mat. 22:37-39). ¿Jas jastaq xkiya kanoq y jas xubʼan ri Jehová che kitewchixik? Chojchoman chrij ri xkʼulmataj pa Camerún, jun tinamit re África occidental.

Pa 1998, jun qachalal ubʼiʼ Onésime xel bʼi pa Camerún y xubʼanaʼ catorce junabʼ pa jun chi tinamit. Jun qʼij, pa ri Ja rech Ajawbʼal, jun qachalal xukoj jun kʼutbʼal chrij ri utzijoxik ri utzij ri Dios xubʼij: «Chqachomaj che e kʼo kebʼ winaq che kachiʼl kibʼ tajin kkitzukuj kar pa jalajoj taq lugares y jun chke tajin kuriq más kar. ¿La mat qastzij che ri tajin ta kuriq kar kbʼe rukʼ ri rachiʼl?».

Are chiʼ Onésime xuta wajun kʼutbʼal riʼ xuchomaj che ktzalij lo pa Camerún, rumal che kajwataj tobʼanik chke ri e qachalal rech kkitoʼ ri e winaq rech kketaʼmaj chrij ri Biblia. Are kʼu kubʼisoj che weneʼ kukʼam ta chi uwach pa ri utinamit rumal che kʼi junabʼ xkʼojiʼ ta chilaʼ. Rumal laʼ, xuchomaj xbʼe seis ikʼ pa Camerún, y pa ri 2012 xbʼe chi jumul y xkanaj kan chilaʼ.

Onésime kubʼij: «Xinkoj nuchuqʼabʼ rech kukʼam nuwach pa ri qʼaqʼ y ri kʼaslemal chilaʼ. Pa ri Ja rech Ajawbʼal, xkʼaman chi jumul chwe kintʼuyiʼ pa uwiʼ ko taq tem». Y rukʼ tzeʼn kubʼij: «Are kʼu, are chiʼ más kinchoman chrij ri tajin kintatabʼej, knaʼtaj ta chi chwe ri utzalaj taq tem che xinkoj ojer».

Pa ri 2013, Onésime xkʼuliʼ rukʼ Géraldine, che xuqujeʼ xel bʼi pa Camerún y xubʼanaʼ lo nueve junabʼ pa Francia. ¿Jas tewchibʼal xuya ri Jehová chke rumal che are nabʼe xkiya ri jastaq che kʼo ubʼanik rukʼ ri kikojonik pa ri kikʼaslemal? Onésime kubʼij: «Xojbʼe pa ri Escuela para Evangelizadores del Reino y kimik kojpatanin pa Betel. Junabʼir, e 20 tijoxelabʼ re ri Biblia pa ri qacongregación xkibʼan kiqasanjaʼ. Kinnaʼo che in kʼo pa jun lugar che qas kajwataj wi tobʼanik» (Mar. 1:17, 18). Géraldine kubʼij: «Xinchomaj taj che kqariq kʼi tewchibʼal».

Judith, che xbʼe pa Estados Unidos, kraj kutzijoj más ri utzij ri Dios. Kubʼij: «Are chiʼ kinopan pa Camerún che uchʼabʼexik ri nufamilia, rukʼ oqʼej kintzalij loq rumal che kinbʼisoj kiwach ri e winaq che nuyaʼom etaʼmanik re ri Biblia chke». Paneʼ jeʼ kunaʼ wariʼ, are kʼu kubʼan kebʼ ukʼuʼx ktzalij lo pa  ri utinamit. Kʼo jun utzalaj uchak, che kubʼano che kkunik kutoj ri kunanel che kilow ri utat, pa Camerún. Are kʼu xukubʼsaj ukʼuʼx chrij ri Jehová y xtzalij loq. Kubʼisoj ri ukʼaslemal pa Estados Unidos. Xutaʼ che ri Jehová che kutoʼ rech kukʼam uwach pa ri utinamit, y xyaʼ ri tobʼanik che kajwataj che rumal jun kʼamal bʼe re circuito y ri rixoqil.

¿Y jas xukʼulmaj? Judith kubʼij: «Kinkikotik che, pa oxibʼ junabʼ, xintoʼ e kajibʼ winaq rech xkibʼan kiqasanjaʼ». Xuqujeʼ, xyaʼ ri precursorado especial che. Kimik tajin kepatanin pa ri obra re circuito rukʼ ri rachajil, Sam-Castel. ¿Y jas xkʼulmataj rukʼ ri utat? Judith y ri familia xkiriq jun hospital pa jun tinamit chik che xutoj ri operación che xbʼan che ri utat. Utz xel ri operación.

Jun qachalal ubʼiʼ Víctor xbʼe pa Canadá. Are chiʼ xusikʼij jun kʼutunem pa ri wuj Ri Chajinel che kchʼaw chrij ri nimaʼq taq etaʼmabʼal, xchoman chrij ri restudios, y xuya kan ri universidad y xumaj jun curso técnico rech kretaʼmaj jun chak. Kubʼij: «Aninaq xinriq jun chak y xinkunik xinbʼan ri amaqʼel nuchomam: ri precursorado». Chiʼ xqʼax ri tiempo, xkʼuliʼ rukʼ Caroline y xebʼe pa Camerún. Are chiʼ e kʼo chilaʼ, xekilaʼ ri sucursal, chilaʼ xbʼix wi chke we kkaj kepatanin pa Camerún. Víctor kubʼij: «Kʼo ta jun jastaq kojqʼatenik. Y rumal che kʼo jun qakʼaslemal rukʼ kebʼ oxibʼ jastaq, aninaq xqakʼam ri invitación». Paneʼ kʼo jubʼiqʼ kʼax che ri Caroline, are kʼu xkiya ta kan ubʼanik ri kichomam.

Víctor y Caroline xeʼux precursores regulares rech kkitoʼ ri e winaq che kkaj kketaʼmaj chrij ri Biblia. Pa jun tiempo are xkikoj ri kirajil kikʼolom, tekʼuriʼ xebʼe jujun ikʼ pa Canadá rech kechakunik tekʼuriʼ xetzalij lo pa Camerún. ¿Jas xubʼan ri Jehová che kitewchixik? Xebʼe pa ri Escuela para Evangelizadores del Reino, xeʼux precursores especiales y kimik e siervos re construcción. Víctor kubʼij: «Rumal che xojbʼe chi pa jun chi tinamit xubʼano che xqil más ri utobʼanik ri Jehová pa ri qakʼaslemal».

Pa ri 2002, jun qachalal ubʼiʼ Alain, che tajin kubʼan restudio pa ri universidad re Alemania, xusikʼij ri tratado Joven, ¿qué harás con tu vida?, xutoʼ rech kuchomaj ukojik umetas. Pa ri 2006, xbʼe pa ri Escuela de Entrenamiento Ministerial y xtaq bʼi pa Camerún, ri tinamit che xkʼiy wi.

Chilaʼ xuriq jun uchak re nikʼaj qʼij. Tekʼuriʼ xuriq chi jun che más ktoj chi jubʼiqʼ, are kʼu xubʼisoj che weneʼ kubʼano che kel ta chi más che utzijoxik utzij ri Dios. Rumal laʼ, are chiʼ xyaʼ ri invitación che, rech kux precursor especial, xubʼan ta kebʼ ukʼuʼx che ukʼamik ri invitación. Ri upatron xupaqʼabʼisaj más ri uqʼij rech kbʼe taj, are kʼu Alain xukʼam taj. Chiʼ xqʼax ri tiempo, xkʼuliʼ rukʼ Stéphanie, che xkʼojiʼ jujun junabʼ pa Francia. ¿Jas kʼax xuriq Stéphanie are chiʼ xbʼe pa Camerún?

Stéphanie kubʼij: «Xinyawaj jubʼiqʼ y xinriq kʼi alergias, are kʼu xinriq ri kunabʼal che kajwataj chwe y xinutoʼ». Jehová xutewchij ri kochʼonik xukʼut wajun kʼulaj riʼ. Alain kubʼij: «Are chiʼ xojbʼe che utzijoxik utzij ri Dios pa jun alaj tinamit che naj kʼo wi ubʼiʼ Katé, xeqariq e kʼi winaq che kkaj kketaʼmaj chrij  ri Biblia. Xojkunik xqaya etaʼmanik re ri Biblia chke pa teléfono. E kebʼ tijoxelabʼ xkibʼan kiqasanjaʼ y xbʼan jun grupo re publicadores chilaʼ». Stéphanie kubʼij: «Sibʼalaj kuya kikotemal kitoʼik ri e winaq rech kketaʼmaj chrij ri Jehová y kkijach kikʼaslemal che. Waral pa Camerún kʼi taq mul qanaʼom wajun kikotemal riʼ». Kimik, Alain y Stéphanie kepatanin che solinel re circuito.

Gisèle xubʼan uqasanjaʼ are chiʼ tajin kretaʼmaj chrij Medicina pa Italia. Xumay ri kikʼaslemal ri kʼulaj precursores che xkiya ri etaʼmanik re ri Biblia che rumal che kkitzukuj ta qʼinomal, y kraj kel más che utzijoxik ri utzij ri Dios. Rumal laʼ xux precursora regular are chiʼ tajin kubʼan na ri restudios.

Gisèle kraj ktzalij pa Camerún rech kupatanij más ri Dios, are kʼu kʼo jujun jastaq kqʼatenik. Kubʼij: «Kesax riʼ ri nuwuj italiano y keʼenya kan riʼ ri e wachiʼl y nufamiliares che e kʼo Italia». Paneʼ jeʼ kkʼulmataj wariʼ, pa mayo re 2016, xtzalij lo pa Camerún. Chiʼ xqʼax ri tiempo xkʼuliʼ rukʼ Léonce, y ri sucursal xubʼij chke we kkaj kepatanin pa ri tinamit Ayos, che kajwataj más publicadores chilaʼ.

¿Jas ubʼanik ri kʼaslemal chilaʼ? Gisèle kubʼij: «Kʼi mul, jujun taq semana kbʼe ri luz y kojkun taj kqabʼan cargar ri qateléfonos. Rumal laʼ amaqʼel chupitalik. Xwetaʼmaj ukojik siʼ, y chaqʼabʼ kqakʼam bʼi qalinterna kojbʼe che utzukuxik qajoron chuchiʼ ri kʼwaʼ rumal che pa ri hora riʼ e kʼo ta más winaq». Gisèle kubʼij ri xetowik rech xkichʼijo: «Xojkunik xqachʼijo rumal ri ruxlabʼixel ri Jehová, xqatolaʼ qibʼ y ri qafamilia y ri e qachiʼl xkiya qachuqʼabʼ y jujun taq mul xkiya pwaq chqe».

¿La kkikot Gisèle che xtzalij lo pa ri utinamit? Areʼ kubʼij: «Jeʼ qastzij kojkikotik. Nabʼe, xqariq jujun kʼax y xojbʼisonik. Are kʼu, are chiʼ xojchoman ta chi chrij wariʼ, xqilo che xqabʼan ri rajawaxik kqabʼano. Xqakubʼsaj qakʼuʼx chrij ri Jehová y xqanaʼo che xojkʼojiʼ más naqaj che». Léonce y Gisèle xebʼe pa ri Escuela para Evangelizadores del Reino y kimik e precursores especiales temporales.

Junam che kkibʼan ri e chapal taq kar kkichʼij apachike kʼax rech kkiriq utzalaj taq kar, ri e qachalal che ketzalij pa kitinamit kkaj kkichʼij apachike kʼax rech kkitoʼ ri e winaq che kkaj kketaʼmaj chrij ri uQʼatbʼal tzij ri Dios. Qastzij riʼ, che ksach ta che ri Jehová ri kkibʼan ri e qachalal riʼ che upatanexik y ri loqʼoqʼebʼal che kkikʼut che ri ubʼiʼ (Neh. 5:19; Heb. 6:10). We at, at kʼo pa jun chi tinamit y awetaʼm che kajwataj más publicadores pa ri atinamit, ¿la kachomaj che katkunik kattzalijik? We kabʼano, qastzij riʼ che Jehová katutewchiʼj (Prov. 10:22).