TAUCA huauquipanicunami paicuna nacirishca propio llactacunamanda llujshishpa shuj shuj llactacunapi trabajangapaj rishca. Shinapash huaquingunaca paicuna nacirishca propio llactacunaman tigrana tucushca. Paicunaca Jehová Diosta, huauquipanicunata juyaimandami ashtahuan villachijcunata minishtijuj ladocunapi ayudangapaj rishca (Mat. 22:37-39). Shinapash chai huauquipanicunaca ¿imacunatallata saquina tucushca? Shinallata paicunataca ¿imashinata Jehová Diosca bendiciashca? Chaita yachangapaca Camerún llactamanda huaquin ejemplocunata ricupashunchi.

Huata 1998​pica Onésime shuti huauquica pai nacirishca Camerún llactamandami rina tucurca. Paica 14 huatacunatami shuj llactapi causarca. Shuj punllaca shuj tandanajuipi cajpimi villachinamanda shuj chimbapuraita uyarca. Discursota cuj huauquica cashnami nishcarca: “Ishcai amigocuna pescadocunata japingapaj rishcanman. Shinapash diferente pushtucunapi japinajuimandami shujca ashtahuan pescadocunata japishcanman. Chaita ricushpaca ¿nachu chaishuj amigoca ashtahuan pescadocunata japijuj amigota ayudangapaj rinman?”.

Chai chimbapuraita uyashpami huauqui Onesimeca villachinapi ashtahuan apoyangapaj Camerún llactaman tigranata dicidirca. Shinapash huauqui Onesimeca tauca huatacunata shuj llactapi causashcamandami cutin Camerún llactapi causai ushashacha yashpa preocupado carca. Paica chaita yachangapami 6 quillacunata chaipi causangapaj rirca. Jipamanmi huata 2012​pica ña chai llactaman causaitapacha causangapaj rirca.

Huauqui Onesimeca: “Camerún cunuj cunuj llacta cajpipash chaipi yacharingapami esforzarircani. Tandanajui Huasipica tablahuan rurashca bancocunami tiarca. Shinapash tandanajuita aligutapacha uyajuimandami bancocuna shilli cajtaca na sintin carcani” ninmi.

Huauqui Onesimeca huata 2013​pimi panigu Geraldinehuan cazararca. Paniguca 9 huatacunatami Franciapi causashcarca. Shinapash Jehovata ashtahuan sirvingapaj decidishcamandaca ¿imashinata Jehová Diosca bendiciarca? Huauqui Onesimeca ninmi: “Ishcandimi Diospa Reinomanda Villachijcunapa Escuelaman invitai tucurcanchi. Shinallata Betelpipashmi sirvircanchi. Caina huataca 20 Bibliamanda yachajujcunami ñucanchi congregacionbica bautizarirca. Chaita ricushpami ashtaca pescadocunata japijunshna ayudajushcata cuenta japircani” ninmi (Mar. 1:17, 18). Panigu Geraldineca ninbashmi: “Na yashca bendiciongunatami charishcanchi”.

Panigu Judithca Estados Unidospimi causajurca. Paica villachinapimi ashtahuan ayudangapaj munarca. Judithca ninmi: “Siempremi Camerún llactapi ñuca familiata visitangapaj rin carcani. Chaimanda shamugrijushpaca tauca Bibliamanda  yachajujcunata saquina tucuimandami llaquiyan carcani” ninmi. Shinapash Judithca paipa taitapa tratamientota pagangapaj Estados Unidospi ali trabajota charimandami Camerún llactapi sirvitaca na ushajurca. Jehová Dios paita ayudanapimi confiarca. Chaimi Camerún llactapi causangapaj rirca. Paica Estados Unidospishna ñana causagrijushcataca alimi yacharca. Paica Camerunbi yacharingapaj ayudahuai nishpami Jehová Diostaca mañarca. Shuj superintendente paipa huarmigundimi Judithtaca ninanda cushichishpa ayudarca.

Judithca caitami yarin: “Ñucaca quimsa huatacunapimi chuscu Bibliamanda yachajujcunata bautizarichun ayudarcani”. Judithca precursora especialshna sirvi callarirca. Cunanbica paica paipa cusa Sam-Castel shutihuanmi superintendenteshna sirvinajun. Shinallata Judithca paipa taitata operachunmi shuj hospitalpa ayudata mañarca. Shinami paipa taitaca gratis operarirca. Chai operacionmandaca Judithpa taitaca alimi llujshirca.

Huauqui Victorca Canadamanmi causangapaj rishcarca. Paica Villajun revistapi universidadta estudiana o na estudiana cashcatami liirca. Paica universidadta estudianapa randica uchilla cursocunatami catirca. Victorca: “Chai cursocunata catinaca uchalla shuj trabajota tarichunmi ayudahuarca. Shinallata ashtahuan tiempota villachichunmi ayudahuarca” ninmi. Jipamanga huauqui Victorca panigu Carolinehuanmi cazararca. Cazarashca jipaca Camerún llactata visitangapami rirca. Chai llactamanda Betelta visitanajujpimi chaimanda huauquipanicunaca Camerunbi sirvingapaj shamuichi nishpa animashcarca. Victorca ninmi: “Minishtirishcaguhuanlla causanajuimandami chai invitaciondaca chasquircanchi” nishpa. Panigu Caroline ashata irquilla cajpipashmi Camerunbi sirvingapaj decidirca.

Victorca paipa huarmigundimi precursor regularcuna tucurca. Shinami paicunaca Bibliamanda yachajungapaj munaj gentecunata ayudaita usharca. Asha tiempotaca paicuna ahorrashca culquiguhuanmi causanajurca. Shinapash chai culquigu tucurishca jipaca Canadapi huaquin quillacunata trabajangapami tigrarca. Chaimi paicunaca precursorcunashna sirvishpa cati usharca. Chaita rurashcamandaca ¿ima bendiciongunatallata paicunaca chasquirca? Paicunaca Diospa Reinomanda Villachijcunapa Escuelamanmi invitai tucurca. Shinallata precursor especialcunashnami sirvirca. Cunanbica paicunaca construccionbimi ayudanajun. Huauqui Victorca ninmi: “Shuj ladocunapi minishtirishcaguhuanlla sirvigrinami Jehová Dios imashina ayudajushcata cuenta japichun ñucanchitaca ayudashca” nishpa.

Huata 2002​pica Alemania llactapi shuj universidadpi estudiaj Alain joven huauquica Joven, ¿qué harás con tu vida? nishca tratadotami liishcarca. Chaita liinami paipa causaipi imata rurana cashcata yachachun ayudarca. Jipamanga huata 2006​pica Escuela de Entrenamiento Ministerial nishcamanmi invitai tucurca. Chaimi pai nacirishca llactaman sirvichun cacharca.

Camerún llactapica Alain huauquica medio tiempo trabajotami tarirca. Jipamanga ashtahuan ali pagaj trabajotami tarirca. Shinapash chaipi trabajajuimandami ñana pundashna villachijurca. Chaimi precursor especialshna sirvichun invitajpica cushijushpa chasquirca. Paipa trabajota saquigrijujpimi paipa jefeca ashtahuan pagasha nirca. Shinapash Alain huauquica precursor especialshna sirvingapaj ña decidishca carca. Jipamanga Alain huauquica Stéphanie paniguhuanmi cazararca. Chai paniguca 4 huatacunatami Franciapi causashcarca. Shinapash Camerún llactapi sirvingapaj rishpaca ¿imata pasarca?

Panigu Stephanieca: “Camerunbi cashpaca alergiacunatami chari callarircani. Chaimandami shuj tratamientota catircani” ninmi. Shina llaquicunata aguantashcamandami Jehová Diosca paicunataca  bendiciarca. Alain huauquica ninmi: “Shuj punllaca Katé shuti carulla pushtupimi villachingapaj rircanchi. Chaipica huaquin Bibliamanda yachajungapaj munajcunatami tarircanchi. Jipamanga ishcai gentecunamanmi telefonopi Bibliamanda yachachi callarircanchi. Tiempohuanga paicunaca bautizarircami. Chaimi shuj grupo tiai callarirca”. Panigu Stephanieca ninbashmi: “Shuj gentegucunapash paicunapa munai Jehovata candallami sirvisha nishpa decidijta ricushpaca ninandami cushijupanchi. Camerunbi sirvishpaca ñucanchicunaca ninandami cushijupashcanchi” ninmi. Cunanbica paicunaca superintendente de circuito shinami sirvinajun.

Gisèle paniguca doctora tucungapami Italia llactapi estudiajurca. Chaipimi Bibliamanda yachajushpa bautizarirca. Paita Bibliamanda yachachij precursorcuna minishtirishcaguhuan causanajujta ricuimandami paipash shinallata causashpa Jehová Diosta ashtahuan sirvingapaj munarca. Gisèle paniguca doctora tucungapaj estudiajushpallatami precursora regular tucungapaj decidirca.

Gisèle paniguca Jehovata ashtahuan sirvingapaj munaimandami Camerún llactapi sirvingapaj decidirca. Shinapash paica huaquin cosascunatami saquina tucurca. Gisèle paniguca: “Italiapi causai ushangapaj residenciatami saquina tucurcani. Shinallata ñuca familiata, amigocunatapashmi saquina tucurcani” ninmi. Chaicunata saquina cashpapashmi paica mayo 2016 huatapica Camerún llactapi causangapaj rirca. Tiempohuanga Léonce shuti huauquihuanmi cazararca. Camerún llactamanda Betelmi villachijcunata minishtijuj Ayos nishca pueblopi sirvichun paicunataca cacharca.

Ayos shuti pueblopi causaica ¿imashinata carca? Gisèle paniguca ninmi: “Casi siempremi micha illaj yalin carcanchi. Chaimi celularcunata na cargai ushaimanda celularcunataca na utilizan carcanchi. Shinallata yamdahuan yanunatami yachajurcani. Gentecuna na yacuta japijuj horasta ricushpami tutacuna carretillapi yacuta apamungapaj rin carcanchi”. Ayos pueblopi Jehovata sirvishpa catichunga ¿imata ayudarca? Gisèle paniguca ninmi: “Jehová Diospa espiritu santomi ayudarca. Ñuca cusaguhuanbash randimandami ayudarin carcanchi. Shinallata ñuca familiacuna, amigocunapash huaquinbica asha culquiguhuanmi ayudan carca. Shinami Jehovata sirvishpa cati usharcanchi” ninmi.

Gisèle paniguca pai nacirishca llactapi sirvingapaj tigrashcamandaca ninandami cushijun. Paica ninmi: “Callaripica huaquin llaquicunata charimandaca ninandami llaquiyan carcanchi. Shinapash ñuca cusaguhuan randimanda ayudarishcamandami imata rurana cashcata ña yachan carcanchi. Jehová Diosman quimirishpami paipi tucui shunguhuan confian carcanchi”. Huauqui Léonce, paipa huarmigundimi Diospa Reinomanda Villachijcunapa Escuelaman invitai tucurca. Cunanbica precursor especialcunashnami sirvinajun.

Pescadota japijcunashnami cai huauquipanicunaca paicuna nacirishca llactapi sirvingapaj rishca. Paicunaca villachinapi ashtahuan apoyangapaj munashpami huaquin cosascunata saquishca. Jehová Diosca chai huauquipanicuna ashtahuan villachingapaj imacunatalla rurashcataca nunca na cungangachu (Neh. 5:19; Heb. 6:10). Quiquinga talvez shuj carulla llactapimi causajupangui. Shinapash quiquin nacirishca llactapi ashtahuan villachijcunata minishtijujta yachaj chayashpaca ¿nachu chai llactapi ayudangapaj ri ushapanguiman? Chaita rurajpica Jehová Diosca quiquindapashmi ninanda bendicianga (Prov. 10:22).