БУТ пхраља хем пхења кола со селинѓе пе таро економска причине ко побарвале западна пхувја, решинѓе те иранен пе ки пли пхув. Поттикниме таро мангипе спрема о Јехова хем спрема о мануша, иранѓе пе адатхе коте со иси побари потреба таро објавителија (Мат. 22:37-39). Саве жртве керѓе, хем сар о Јехова денѓа лен берекети? Те дикха со уло ко Камерун, ки западно Африка.

Ко 1998 берш, јекх пхрал со викинела пе Онисим гело песке тари пли пхув Камерун, ки јавер пхув коте со живинѓа 14 берш. Јекх диве, ко јекх собраниско состанок, шунѓа јекх споредба башо проповедибе. О говорнико вакерѓа: „Ако дуј амала астарена мачхе ко различна тхана, хем јекх астарела повише мачхе таро јавер, зарем адава со астарѓа похари мачхе нане те џал адари коте со шај те астарел повише?“

Акаја споредба поттикнинѓа е Онисиме те размислинел дали те иранел пе ко Камерун, коте со бут мануша мангена сине те сикљовен тари Библија, хем те поможинел е пхраленге сој тане адатхе. Ама, пало добором берша ко странство, дарандило дали шај палем те сикљовел ко живото ко Камерун. Те шај те дикхел дали ка успејнел ко адава, гело шов масек те живинел адари. А пало адава, ко 2012 берш, одлучинѓа те ачховел адатхе.

О Онисим вакерела: „Ваљани сине те прилагодинав ман ко тато време хем ко акала условија живибаске. Ки дворана мора сине палем те сикљовав те бешав ко каштунале клупе. Ама, кобор повише концентриринава ман сине ки програма“, асандор вакерела, „добором повише бистрава сине о удобна столице ко јавера дворане“.

Ко 2013 берш, о Онисим женинѓа пе јекхе пхењаја која со викинела пе Жералдин, која со иранѓа пе ко Камерун откеда ења берш живинѓа ки Франција. Саве берекетија добинѓе адалеске со одлучинѓе те чхивен о духовна буќа ко прво тхан? О Онисим вакерела: „Заедно сием сине ки Школа башо полновремена објавителија хем служинѓем ко Бетел. Лани, ко амаро собрание крстинѓе пе 20 џене. Сигурно сиум кај аракхљум бут шукар тхан „те астарен пе мачхе“ (Мар. 1:17, 18). И Жералдин исто аѓаар вакерела: „Добинѓум бут повише берекетија него со мислинѓум!“

И Џудит селинѓа пе ко САД, ама мангела сине те керел нешто повише ки служба башо Јехова. Ој вакерела: „Секова пути кеда џава сине ки мли фамилија ко Камерун хем иранава ман сине палал, ровава сине адалеске со мора сине те мукхав некоборе џенен коленцар со почминѓум те проучинав и Библија“. Ама, и Џудит сине ко дуј гоѓа дали те иранел  пе ко Камерун. Сине ла шукар платими бути колаја со шај сине те платинел о медицинско трошако пле дадеске кова со живинела сине ко Камерун. Ама, и Џудит сине ла доверба ко Јехова, хем иранѓа пе ко Камерун. Ој признајнела кај ко почеток фалинена сине лаке несаве удобностија со сине ла џикоте живинела сине ко САД. Молинѓа е Јехова те поможинел лаке те навикнинел пе ко неве околностија, хем добинѓа адаја помош аѓаар со охрабринѓе ла о покраинско надгледнико хем лескири ромни.

Кеда и Џудит сетинела пе ко адава периоди, вакерела: „Ко прва трин берш сине ман прилика те поможинав штаре џененге те крстинен пе“. Ој почминѓа те служинел сар специјално пионери. Авдиве служинела заедно пле ромеа, о Сем-Кастел, ки покраинско служба. Ама, со уло лакере дадеа? Ој хем лакири фамилија успејнѓе те аракхен болница ки јавер пхув која со сине спремно те платинел о трошако баши лескири операција хем и операција сине успешно.

Јекх пхрал со викинела пе Виктор селинѓа пе ки Канада. Откеда читинѓа ки Стражарско кула и статија башо баро образование, сине поттикнимо те размислинел башо пло школујбе. Чхинавѓа те џал ко факултети хем завршинѓа јекх курси башо несаво занати. О Виктор вакерела: „Аѓаар успејнѓум посигате те аракхав бути хем те почминав е пионерско службаја — нешто со секогаш бут мангава сине“. Покасно женинѓа пе е пхењаја со викинела пе Каролин, хем заедно посетинѓе о Камерун. Џикоте ола сине ки обиколка ки подружница, сине поттикниме те размислинен те служинен ко Камерун. О Виктор вакерела: „На сине амен нисави причина те одбина, хем адалеске со водинаја сине едноставно живото, шај сине те прифатина адаја покана“. Иако и Каролин сине ла проблемија е састипаја, ола сепак одлучинѓе те селинен пе.

О Виктор хем и Каролин почминѓе те служинен сар општа пионерија соске бут мануша адатхе интересинѓе пе баши Библија. Несаво време шај сине те живинен таро адава со штединѓе. Пало адава керѓе некобор масекија бути ки Канада те шај палем те иранен пе ко Камерун хем те продолжинен е пионерско службаја. Саве берекетија добинѓе? Ола сине ки Школа башо полновремена објавителија, служинѓе сар специјална пионерија хем акана служинена ки изградба. О Виктор вакерела: „Адалеске со мукхлем о удобно живото, мора сине те овел амен доверба ко Јехова хем ов грижинѓа пе аменге“.

Ко 2002 берш, о пхрал Ален, кова со студиринела сине ко факултети ки Германија, читинѓа о трактати Тернален — со керена тумаре животоја? * О информацие поттикнинѓе ле те чхивел песке неве целија. Ко 2006 берш, сине ки Школа башо организациско оспособување хем сине бичхалдо те служинел ко Камерун, коте со сине бијамо.

Ко Камерун аракхља бути похари саатенцар. Покасно аракхља шукар платими бути ама дарандило кај, ако прифатинела ла, ка овел ле похари време те проповединел. Адалеске, кеда сине замолимо те служинел сар специјално пионери, одма прифатинѓа. Лескоро газда нудинѓа леске побари плата, ама о Ален одбинѓа ла хем уло специјално пионери. Покасно женинѓа пе јекхе пхењаја со викинела пе Стефани, која со живинела сине ки Франција. Саве пхарипа сине ла кеда селинѓа пе ко Камерун?

И Стефани вакерела: „Појавинѓе пе манге несаве проблемија е састипаја хем е алергиенцар,  ама адалеске со лава сине редовно терапија уљум пошукар“. Акава брачно пари сине наградимо адалеске со сине истрајно. О Ален вакерела: „Кеда проповединѓем ко јекх изолиримо гав, аракхлем некоборе џенен со мангле те проучинен и Библија. Покасно, продолжинѓем те проучина ленцар преку телефони. Дуј лендар крстинѓе пе, хем пхравдили јекх група“. И Стефани вакерела: „Нане побаро бахталипе таро адава те поможине е манушенге те ден лафи е Јеховаске кај ка служинен леске. Откеда служинаја акате, бут пути осетинѓем адава бахталипе“. Авдиве, о Ален хем и Стефани служинена ки покраинско служба.

И Жизел крстинѓа пе џикоте сине ко медицинско факултети ки Италија. Сине воодушевими таро едноставно живото со водинела сине о брачно пари со проучинела сине лаја, хем ој да мангља те џал повише ки служба. Адалеске почминѓа те служинел сар општо пионери џикоте завршинела сине е школаја.

Иако и Жизел мангља те иранел пе ко Камерун те служинел е Јеховаске ки побари мера, сине секирими башо несаве буќа. Ој вакерела: „Мора сине те откажинав ман таро мло престој ки Италија, хем те одвојнав ман таро мле амала хем тари мли фамилија кола со ачхиле адари“. Сепак, ко мај 2016 берш, и Жизел селинѓа пе ко Камерун. Пало несаво време, ој кхувѓа ко брако е пхралеа Леонс, хем и подружница предложинѓа ленге те служинен ко Ајос, диз коте со сине бари потреба таро објавителија.

Сар сине о живото адари? И Жизел вакерела: „Понекогаш куркенцар на сине амен струја, хем нашти сине те пхера амаре мобилна телефонија. Побаро дело таро време на керена сине бути. Сиклиљум те готвинав ко кашта, а раќате џаја сине количкенцар хем лампенцар ко батерие те шај те пхера пани соске ко адава време на сине добором гужва ко извор“. Со поможинѓа ленге те издржинен? И Жизел вакерела: „Е Јеховаскоро духо, и поддршка таро брачно партнери, о охрабрување хем и финансиско помош со понекогаш добинаја ла тари амари фамилија хем таро амаре амала поможинена аменге те издржина“.

Дали и Жизел тани бахтали со иранѓа пе ки пли пхув? Ој вакерела: „Оја, апсолутно! Ко почеток сине амен проблемија хем осетинаја амен сине обесхрабриме, ама само со накхља адава, ме хем мо ром уверинѓем амен кај керѓем баш адава со ваљани сине те кера. Иси амен доверба ко Јехова хем осетинаја амен попаше леа“. О Леонс хем и Жизел сине ки Школа башо полновремена објавителија, хем акана служинена сар привремена специјална пионерија.

Исто сар о рибарија кола со сикавена храброст иако ленге пхаро те астарен мачхе, окола со иранена пе ки пумари пхув спремно керена жртве те шај те поможинен е искрена манушенге со сикавена интерес. О Јехова никогаш нане те бистрел акале буќарне објавителен хем о мангипе со сикавена спрема лескоро анав (Неем. 5:19; Евр. 6:10). Ако живинеа ки јавер пхув, а иси потреба таро објавителија ки тли пхув, ка шај ли те иране тут? Сарине со ка керен адава, ка овел лен баре берекетија! (Изр. 10:22).