BUT phralja hem phenja kola sebepi i buti đelje ko avera phuvja, akana irinđe pe ki pi phuv. O mangipe premalo Jehova hem premalo manuša, podstakninđa len te preselinen pe uduri kaj isi pobari potreba (Mat. 22:37-39). Kola žrtve on ćerđe hem sar o Jehova blagoslovinđa len? Te bi dikhaja odgovor ko akava pućibe, ka razmotrina disave iskustvija ando Kamerun, ki zapadno Afrika.

Ko 1998. berš o phral kova vićini pe Onesim preselinđa pe kotar Kamerun ki aver phuv. Ov živinđa prekal 14 berš. Jekh dive, ko sastanko, šunđa jekh poređenje ando propovedanje. O govorniko phenđa: „Duj amala astarena maćhen ko duj averćhane thana. Ako jekh olendar astari pobuter maćhen, so ka ćerel okova aver kova na astari odobor maćhen? Zar na ka đal uduri kaj šaj te astari pobuter maćhen?“

Ked šunđa odova poređenje, o Onesim počminđa te razmislini odolestar te irini pe ko Kamerun, ko than kuri tano but šukar te propovedini pe hem te pomožini odole phralenđe ki služba. Ama, ov hine le disave brige. Palo sa odola berša so živinđa prekal, ov pućlja pe da li ka šaj te prilagodini pe ko životi uduri? Te bi dikhela sar ka ovel lese, o Onesim đelo te živini šov masek ko Kamerun. Ko 2012. berš, ov potpuno preselinđa pe ko Kamerun.

O Onesim phenela: „Morandiljum te sikljovav ko tatipe hem ko životi uduri. Ki dvorana, morandiljum te sikljovav te bešav ko klupe kola na hine udobna. So pobuter koncentrišinđum man ko program,“ ov phenela asandoj, „me uspomene ko udobna thana ko avera dvorane pohari našaldilje.“

Ko 2013. berš, o Onesim ženinđa pe e phenjaja Žeraldin, koja irinđa pe ko Kamerun palo odova so enja berš živinđa ki Francuska. Sar o Jehova blagoslovinđa len sebepi so i služba ćhivđe ko prvo than ko po životi? O Onesim phenela: „Ðeljam ki Škola aso objaviteljija ando Kraljevstvo hem služinđam ko Betel. Aso jekh berš, 20 studentija andi amari skupština krstinđe pe. Mislinava so akana hijum ko šukar than te ’astarav maćhen‘“ (Mar. 1:17, 18). I Žeraldin phenela: „Naštinđum te zamislinav so ka ovel man asavke blagoslovija.“

I Džudit preselinđa pe ki Amerika, ama manglja te ćerel diso pobuter ki služba. Oj phenela: „Svako puti ked đeljum ko Kamerun, te posetinav me porodica, runđum sebepi so aćhavđum nekobor manušen kasa počminđum te proučinav.“ Ama i Džudit hine ko duj gođa da li te irini pe ko Kamerun. Oj hine la i buti koja hine šukar platimi hem sebepi koja šajinđa te platini pe dadeso lečenje ko Kamerun. Ama oj hine la poverenje upro  Jehova hem odlučinđa te irini pe ko Kamerun. Oj priznajini so nedostajinena laće disave šukar buća ko kola uživinđa đi hine ki Amerika. Oj molinđa pe e Jehovase te pomožini laće te prilagodini pe hem but pomožinđa laće o ohrabrenje kova dobinđa ando pokrajinsko nadglednik hem andi olesi romni.

Ked akana razmislini, i Džudit phenela: „Aso trin berš hine man odija radost te dobinav štar duhovna ćhave.“ I Džudit počminđa te služini sar specijalno pioniri. Avdije oj hem olako rom, o Sem-Kastel tane ki pokrajinsko služba. Ama so ulo olake dadeja? Oj hem olaki porodica arakhlje jekh bolnica ki aver phuv koja manglja te ućhari o troškija andi olake dadesi operacija. On hine bahtale so i operacija uspinđa.

O phral kova vićini pe Viktor preselinđa pe ki Kanada. Palo odova so ki Stražarsko kula čitinđa jekh članko ando visoko obrazovanje, ov razmislinđa pestar. Odlučinđa te aćhavi o fakulteti hem upisinđa disavo kurs. Ov phenela: „Sebepi odova šajinđum posig te počminav te ćerav buti hem te ćerav odova so oduvek mangljum, te ovav pioniri.“ Kasnije, o Viktor ženinđa pe e phenjaja koja vićini pe Karolin hem on đelje te posetinen o Kamerun. Ked posetinđe i podružnica ko Kamerun, disave phralja podstakninđe len te razmislinen odolestar te služinen odothe. O Viktor phenela: „Na hine amen ni jekh razlog te na prihvatina odova poziv. Sebepi so već živinđam jednostavno, šajinđam te preselina amen.“ Iako i Karolin hine la disave problemija sastipaja, on ipak odlučinđe te preselinen pe.

O Viktor hem i Karolin počminđe te služinen sar stalna pionirija te bi šaj te pomožinen so pobuter manušenđe kola hine zainteresime. Jekh vreme živinđe kotar o pare kola ćhivđe ki strana. Palo odova, on nekobor masek ćerđe buti ki Kanada, so omogućinđa lenđe te irinen pe ko Kamerun hem te nastavinen te služinen sar pionirija. Kola blagoslovija hine len? On đelje ki Škola aso objaviteljija ando Kraljevstvo, služinđe sar specijalna pionirija hem akana služinena ki grupa asi gradnja. O Viktor phenela: „Sebepi so aćhavđam o šukar đivdipe kova hine amen, morandiljam te oslonina amen upro Jehova hem dikhljam sar o Jehova brinini pe amendar.“

Ko 2002. berš, o Alan đi studirinđa ki Nemačka čitinđa o traktati Mladi – čemu ćete posvetiti svoj život? Odova so čitinđa podstakninđa le te ćhivel pese neve ciljija. Ko 2006. berš, đelo ki Škola aso obučavanje ando naimenujime phralja hem pali škola hine bićhaldo te služini ko Kamerun, kuri hem bijandilo.

Ko Kamerun, o Alan arakhlja buti koja ćerđa ekvaš dive. Palo odova, ov arakhlja buti koja hine pošukar platimi, ama brininđa pe so sebepi odija buti na ka ovel le but vreme asi služba. Odolese, ked hine vićimo te služini sar specijalno pioniri, ov odmah prihvatinđa. Oleso šef manglja te del le pobari plata, ama o Alan na manglja te menjini pi odluka. Palo odova, o Alan ženinđa pe e phenjaja koja vićini pe Stefani, koja beršencar živinđa ki Francuska. Ama, kola pharipa oj doživinđa ked preselinđe pe ko Kamerun?

I Stefani phenela: „Hine man disave problemija me sastipaja hem disave alergije. Ama dobinđum i terapija hem hine maje pošukar.“ Sebepi so hine istrajna, akava bračno par hine le but blagoslovija. O Alan phenela: „Ked đeljam te propovedina  ko gav Kate, kova hine but dur, arakhljam nekobor manušen kola manglje te proučinen i Biblija. Proučinđam olencar prekalo telefoni. Duj olendar krstinđe pe hem ko odova than ulji jekh grupa.“ I Stefani pana phenela: „Nane pobari radost nego li te pomožine e manušenđe te predajinen pe e Jehovase. Ði služinđam akate, but putija osetinđam asavki radost.“ Avdije, o Alan hem i Stefani služinena ki pokrajinsko služba.

I Žizel krstinđa pe đi studirinđa medicina ki Italija. Olaće sviđinđa pe o jednostavno đivdipe kova hine le o bračno par kova proučinđa olaja hem kola služinđe sar pionirija. Sebepi odova, hem oj manglja te ćerel diso pobuter ki služba. Odolese, i Žizel počminđa te služini sar stalno pioniri đi završini hine o fakulteti.

I Žizel manglja te irini pe ko Kamerun te propovedini odothe kaj tani pobari potreba, ama hine la disave brige. Oj phenela: „Ðanđum so ka aćhovav bizo me lila hem so na ka šaj palem te irinav man ki Italija. Isto ađahar, hine maje pharo te odvojina man kotar me amala hem andi mi porodica ki Italija.“ Ipak ko maj 2016. berš, i Žizel preselinđa pe ko Kamerun. Hari palo odova, oj hem o phral Leons lelje pe. I podružnica ko Kamerun pućlja len te preselinen pe ko Ajos, ki diz kuri hine pobari potreba.

Savo hine o đivdipe ko Ajos? I Žizel phenela: „But putija, kurćencar na hine amen struja hem sebepi odova naštinđam te phera amare telefonija hem odolese but putija naštinđam te koristina len. Sikljiljum te ćerav habe ko kašta. Amen bi laja o kolice hem o baterijska lampe hem raćate bi đaja te ana pani ando jekh izvor ked odothe na hine but manuša.“ Sar akava bračno par borinđa pe? I Žizel phenela: „E Jehovaso duho pomožinđa amenđe te istrajina. Isto ađahar, mo rom hem me podržinđam jekh jekhe, a amare amala hem amari porodica ohrabrinđa amen, a podijekh puti finansijski pomožinđe amenđe.“

Da li tani i Žizel bahtali so irinđa pe ki pi phuv? „Bizo te razmislinav šaj te phenav ja,“ oj phenela. „Hine amen disave pharipa hem podijekh puti hijam le obeshrabrime, ama ked nakhljam odova amen haljiljam so anđam ispravno odluka. Amaro poverenje upro Jehova tano pana pobaro hem hijam pana popaše oleja.“ O Leons hem i Žizel đelje ki Škola aso objaviteljija ando Kraljevstvo hem akana služinena sar privremena specijalna pionirija.

Sar o ribari kova tano spremno ko razna pharipa te šaj te astari but maćhen, okola kola irinena pe ki pi phuv spremno ćerena žrtve te šaj te pomožinen e iskreno manušenđe kola prihvatinena i šukar vest. Odole revno objaviteljen o Jehova ka pamtini palo šukar delija hem palo mangipe kova mothovena premalo oleso anav (Nem. 5:19; Jevr. 6:10). Ako živineja prekal, a ki phuv kuri bijandiljan isi pobari potreba, da li bi oveja spremno te irine tut? Ako ja, ov sigurno so ađićerena tut but bare blagoslovija (Posl. 10:22).