BENE wirhu na bali birhu banji bahamiraga omu mahanga g’ekuli n’emwabo lyo bajilonza ensaranga bashub’irigaluka omu bihugo baburhiragwamwo. Obuzigire kuli Yehova n’omulungu bunabashumye bagaluke omu bihugo bigwerhe bulagirire bunji bw’abahubiri bw’okuyaliza omwanzi mwinja gw’Obwami. (Mt. 22:37-39) Bintu bihi baciyima na migisho mici babwîne? Lyo rhumanya emigisho babwîne, rhuganirire ecihugo c’e Cameroun ciba omu Afrique de l’Ouest.

Omu mwaka gwa 1998, mwene wirhu muguma ohamagalwa Onésime ahama omu cihugo cage aburhiragwamwo c’e Cameroun. Alamîre omu mahanga ga bene myaka 14. Lusiku luguma bali omu ntimanano z’Ecikristu, ayumva olwiganyo lwinja luyerekire omukolo gw’amahubiri. Owagezagya ehotuba aderha ntya: “Erhi bîra babirhi bakaba bali badubira ensamaki ahantu hali lubero, muguma adube nsamaki nyinji kulusha owabo, kw’oyo wundi orhadubire nsamaki nyinji k’arhakaja olundi lunda owabo ali lwakabonekanamwo nsamaki nyinji?”

Olo lwiganyo lwarhabala mwene wirhu Onésime arhanye bwenene okubiyerekire obulyo bw’okushubira e Cameroun ly’agendekeza omukolo gw’amahubiri eyo bulya yal’ibonekine oku yali bulagirire bunji bw’abahubiri. Cikone kurhakabire kulembu bulya hali mazibu maguma na maguma. Alonza amanye erhi anacikomera akalamo k’e Cameroun bulya hal’ikola hali myaka minji ali omu mahanga ga bene. Lyo mwene wirhu Onésime amanya erhi anacihasha okulama eyo, arhang’ilambagirira e Cameroun, ajirayo myezi ndarhu. Buzinda, omu mwaka gwa 2012, ahamira loshi e Cameroun.

Onésime adesire ntya: “Bulya eco cihugo cibamw’idurhu linene n’akalamo kali lubero n’aka nal’ilamire, byampuna nkomere ako kanga. Byahuna ncibikomera okudamala oku biti by’empahu omu Nyumpa y’Entimanano. Cikone, okusegeza obwenge oku nyigirizo kwakarhuma nayibagira bunyi-bunyi ebiti binja biba omu zindi Nyumpa z’Entimanano.”

Omu mwaka gwa 2013, Onésime ajira obuhya na mwali wirhu Géraldine, naye agalukaga e Cameroun enyuma z’okulama myaka mwenda e France. Migisho mici babwine omu kusegeza akalamo kabo omu mukolo gw’Obwami? Onésime adesire ntya: “Nie na mukanie rhwahamagalwa oku Masomo g’aba Eneza Injili bw’Obwami na buzinda rhwarhangira rhwakola oku Beteli. Omu mwaka gwageraga banafunzi b’Ebibliya 20 babatizibwa omu cigamba cirhu. Ene, ndi naciyumva oku ndi ahantu hinja hw ‘okudubira.’” (Mk. 1:17, 18) Géraldine naye adesire nya: “Nk’ola gwerhe migisho minji bwenene kulusha oku nal’irhanyize.”

Judith ahamîra e États-Unis cikoki al’igwerhe omuhigo gw’okuyushûla omukolo gwage gw’amahubiri. Adesire ntya: “Ngasi kulambagirira omulala gwani e Cameroun, nakag’ilaka bwenene amango nkola nagaluka e États-Unis bulya nakagilekaga bantu banji narhangizagya nabo ifunzo ly’Ebibliya.” Ciru akaba ntyo, Judith akarhindira okugaluka e  Cameroun. Agwerhe akazi kinja n’omushahara mwinja n’oko kwakag’imurhabala okubukisa ishe wal’ilamire e Cameroun. Cikone, mwali wirhu Judith alangalira oku Yehova amushibirira na ntyo ashubira e Cameroun. Adesire n’obwalagale oku kurhali kulembu, bulya akalamo k’âli lubero n’ak’alilamire omw’ihanga lya bene. Asalira Yehova amurhabale akomere ezo mpindûlo na buzinda alembera kugerera amahano minja gw’okumuha omurhima ahâbagwa na mwangalizi w’omuzunguko na mukage.

Judith akengire oku byali yosire erhi agaluka e Cameroun. Adesire ntya: “Omu myaka isharhu, napata bana bani ba kiroho.” Buzinda, Judith aba painiya wa pekee. Ene, ali alusa iba Sam-Castel omu mukolo gw’omuzunguko. Gurhigi byayishiribera ishe wa Judith? Ye haguma n’omulala gwage bayishimanya hopitali nguma y’omu bihugo by’ekuli, n’eyo hopitali yayemera okulipira ishe ensaranga z’okuberwa. Akantu kw’okushagalula kuli kubona oku bamubera buzira mazibu goshi-goshi.

Mwene wirhu ohamagalwa Victor ahamîra e Canada. Enyuma z’okusoma Ilabiro ly’Akalalizi lyal’iganirire amasomo g’e université, oyo mwene wirhu arhanya okubiyerekire amasomo akag’ijira. Ahali hw’okugenderera oku université, oyo mwene wirhu asoma amasomo gw’obufundi ga myaka misungunu. Mwene wirhu adesire oku okujira ntyo “kwamurhabala abe n’akazi kw’okumurhabala ajire omukolo gw’obupainiya nk’oku anal’ilonzize.” Buzinda, mwene wirhu Victor ajira obuhya na mwali wirhu Caroline, bombi balambagirira e Cameroun. Erhi bahika eyo munda, balambagirira oku tawi, bene wirhu babahâ omurhima oku balole gurhi bakayish’ikolera Yehova omu cihugo c’e Cameroun. Mwene wirhu Victor adesire ntya: “Ntaco cakarhumire rhwalahira ogo mulali bulya rhwal’icihanganyire okulama akalamo karhahunyiri bintu binji, rhwabona oku rhwanahash’iyemera ogo mulali.” Ciru akaba Caroline al’iyobohire amagala gage, bayemera oku bahamira e Cameroun.

Mwene wirhu Victor na mukage Caroline barhondera bakola nka bapainiya b’akasanzi koshi lyo bahâna oburhabale bwabo oku bulagirire bunji bw’abahubiri bwali eyo munda. Barhang’ilama eyo munda n’olusaranga bagwerhe kasanzi karhali kanyi. Enyuma z’aho bacib’ija e Canada bajikolayo akazi myezi misungunu, buzinda bacibigaluka e Cameroun bagendekeza omukolo gwabo gw’obupainiya. Migisho ehi badesire babwine? Bayish’ija oku Masomo g’aba Eneza Injili bw’Obwami, bakola nka bapainiya ba pekee, na buno rhwaderha bali bakola nka bubasi b’Enyumpa z’Entimanano. Mwene wirhu Victor adesire ntya: “Okuleka akalamo kinja rhwal’ilamire kwarhurhabire rhwabona okuboko kwa Yehova.”

Omu mwaka gwa 2002, Alain mwanafunzi muguma w’oku Université y’omu cihugo c’e Allemagne, asoma etrakte edesire Vijana​—Mtatumiaje Maisha Yenu? Ebi asomaga mw’eyo trakte byamushumya ashanje emihigo yage. Omu mwaka gwa 2006, aja oku Masomo ya Mazoezi ya Kihuduma na buzinda arhumwa omu cihugo cage c’e Cameroun.

Eyo munda e Cameroun, mwene wirhu Alain abona akazi karhakamurhôla akasanzi koshi. Buzinda, abona akandi kazi kinja bwenene, cikone ayoboha oku karhuma arhakabone kasanzi kanji kw’okuja omu mahubiri. Na ntyo erhi bamubwira oku arhondere akola nka painiya wa pekee arhalahiraga. Bose wage amubwira oku amuyushulira omushahara, cikone mwene wirhu Alain alahira na ntyo ahikiriza omuhigo gwage. Buzinda ajira obuhya na mwali wirhu Stéphanie, wal’ilamire kasanzi kaguma e France. Mazibu gahi gagwasire mwali wirhu Stéphanie erhi ahamîra e Cameroun?

Mwali wirhu Stéphanie adesire ntya: “Narhondera nakalwala ngasi mango erhi mpik’eno, ebiryo n’oku eno munda eba eyosire byampuga, cikoki nagenderera okubukwa na buzinda nayumva bwinja.”  Alain na mukage bagishwa enyanya z’okulembera kwabo. Mwene wirhu Alain adesire ntya: “Erhi rhuj’ihubiri omu lugo luguma luhamagalwa Katé lwa kuli bwenene, rhwabugana bantu banji balonzize okuyiga Ebibliya. Buzinda, rhwakayiga Ebibliya haguma nabo kugerera etelefone. Bantu babirhi ba mw’abo banafunzi bahikira aha babatizibwa n’ecikundi c’amahubiri carhondezibwa eyo munda.” Mwali wirhu Stéphanie ayushwire ntya: “Nta bundi bushagaluke buhaba nk’okurhabala omuntu amanye Yehova anahikire aha acihâna emwage. Kanji-kanji rhwabwine oku okuhubiri omu eneo erimw’obulagirire bw’abahubiri kwarhuhashisize rhurhabale abantu bakolere Yehova.” Ene, mwene wirhu Alain na mukage Stéphanie bali bakola omu muzunguko.

Mwali wirhu Gisèle abatizibagwa erhi aciri oku masomo g’ecinganga e Italie. Ashagalukira akalamo karhahunyiri bintu binji mwene wirhu muguma na mukage bakag’imuyigiriza Ebibliya bal’ilamire. Oyo mwene wirhu na mukage bali bapainiya, na ntyo alonza naye ajire binji omu mukolo gw’amahubiri. Mwali wirhu Gisèle arhondera akola nka painiya w’akasanzi koshi erhi arhanaciyusa amasomo.

Mwali wirhu Gisèle agwerhe irala ly’okujira binji omu mukolo gwa Yehova omu cihugo c’e Cameroun, cikone hali ebintu akag’irhanyako. Akag’irhanya ntya: “Nkolaga narhenga emwirhu e Italie ndeke bene wirhu bw’omu mulala n’abîra bani nje e Cameroun.” Cikone, ciru akaba akag’irhanya ntyo ahikira aha ahamira e Cameroun omu Mwezi gwa 5, 2016. Enyuma za nsiku nsungunu mwali wirhu Gisèle ajira obuhya na mwene wirhu Léonce, na buzinda etawi y’e Cameroun yabarhuma oku bajikolera omu lugo lw’e Ayos, bulya eyo munda yali obulagirire bw’abahubiri bw’omwanzi mwinja g’Obwami.

Gurhi akalamo kâli yosire omu lugo lw’e Ayos? Mwali wirhu Gisèle adesire ntya: “Hali amango omuliro gw’ekura gwakagijira mugobe muguma buzira kuyisha, na ntyo rhubule ebi rhwasharje mw’etelefone zirhu. Rhwakagijira nsiku nyinji rhurhali rhwahamagala oku telefone. Nacifunza okuyenda n’omuliro gw’enshali, rhwakaja oku lwishi budufu n’amatoroshi nk’abantu barhaciri ah’iriba.” Bici byarhabire oyo mwene wirhu na mukage balembere? Mwali wirhu Gisèle adesire ntya: “Iroho litagatifu lya Yehova, okuhânana omurhima rhwene na nnene, n’oburhabale bwa bene wirhu n’abîra birhu byarhuhashisa okulembera.”

Ka mwali wirhu Gisèle ashagalukire okugaluka emwabo aburhagwa? Adesire erhi: “Nashagaluka bwenene buzira karhinda. Hâli mazibu maguma-maguma n’entanya z’okuvuna omurhima, cikone erhi rhuhima ebyo byoshi, rhwaciyumva oku rhwajijire ebi rhwanal’ishinganine rhujire, rhwalangalira Yehova rhwanakaciyumva rhuli hofi-hofi naye.” Mwene wirhu Léonce na mukage Gisèle bayish’ija oku Masomo g’aba Eneza Injili bw’Obwami, na buno bali bakola nka bapainiya ba pekee ba kasanzi kasungunu.

Nk’omudubi w’ensamaki olembera amazibu ly’aduba nsamaki nyinji, bene wirhu bagaluka omu cihugo baburhagwamo banaciyime bintu binji lyo barhabala abantu bagwerhe enyorha y’okuyumva omwanzi mwinja gw’Obwami. Yehova arhakayibagira abo bene wirhu n’obuzigire bayerekine okw’izino lyage. (Neh. 5:19; Hb. 6:10) Akaba olamire omu ihanga lya bene n’omu cihugo cinyu muli obulagirire bw’abahubiri bw’omwanzi mwinja gw’Obwami, ka wanahash’igaluka eyo munda ojihânayo oburhabale? Erhi wakajira ntyo, wanabona migisho minji.​—Mig. 10:22.