LOPHITANNI noo gobbanni woxe afiˈrate yite Galchimi gobbuwa hadhinori batinyu roduuwi, agurte ilantino gobba higgino. Yihowaranna mannaho noonsa baxilli insa Maganu Mangiste halashshaano roore hasiissannowa hadhe sabbakkanno gede assinonsa. (Mat. 22:37-39) Kuri roduuwi hatto assate uminsa horo agurtinohu hiittoonniiti? Ikkirono mayi atoote afidhino? Hanni kuri xaˈmuwara dawaro afiˈrate Kaamerooni gobbara soqqantino roduuwi woˈnaalshuwa laˈno.

Oneesime yinanni rodii ilaminote Kaamerooni gobbanni 1998nni wole gobba haˈrino. Isi 14 diro wole gobbara heeˈrino. Mitto barra Kiristaanu gambooshshiwa mittu rodii sabbakate loosi daafira kulino lawishsha macciishshino. Gambooshshunniwa roduu togo yee coyiˈrino: “Lamu jaalla addi addi bayicho qulxuˈme woshshaaxxitanno; mittu lowo qulxuˈme mittu kayinni shiima qulxuˈme amaxxino; ikkina, shiima qulxuˈme calla woshshaaxxe amaxxi manchi lowota amaxxi jaalisiwa mare diwoshshaaxxanno?”

Oneesime konne lawishsha macciishshihu gedensaanni, Qullaawa Maxaafa xiinxalla hasiˈrannohu lowo manni noowa ilamino gobba Kaamerooni hige hakko heedhanno halashshaano kaaˈlate hedino. Kayinni yaachishinosiri no. Oneesime lowo diro wole gobbara keeshshihu gedensaanni gobbasi hige hakko heeˈnanni heeshsho rosa dandaanno ikka? Tenne afate isi balaxe Kaamerooni haˈre lee agana keeshshino. Hakkiinni isi woˈmunni woˈma hakko heeˈrate 2012 Kaamerooni higino.

Oneesime togo yiino: “Hakko noota iibbado ayyarenna heeˈnanni gara rosa hasiissinoe. Gambooshshu Addaraashera xarapheessaho ofolla rosa hasiissinoe.” Isi lede, “Ikkollana woˈmunni woˈma roso illachinsheemmo daafira, sunu sununni wole gobbara noommo waro ofolleemmota injiitanno wombarra hawoommo” yee muushshi yaanni coyiˈrino.

Oneesime 2013 honse diro Faransayete heedhe Kaamerooni higginota Zheeraldine yinanni rodoo adhino. Kuri minaanninna minaama Yihowara soqqamate illachishansanni mayi atoote afiˈrino? Oneesime togo yiino: “Lamunku Maganu Mangiste Sawaakooti Rosi Mine ronsoommo; hattono Beeteelete soqqammoommo. Sai diro songonke giddo 20 Qullaawu Maxaafi rosaano cuuantino. Addinta qulxuˈme ‘woshshaaxxate’ malino bayicho noommo yee hedeemmo.” (Maq. 1:17, 18) Zheeraldine, “Hedoommahunni aleenni lowo atoote afiˈroomma” yitino.

Juuditi yinanni rodoo Ameerika hadhe hakko heedhanno; kayinni ise Yihowara albinni roore soqqama hasidhanno. Ise togo yitino: “Maateˈya layiˈrammara Kaamerooni haˈre higeemma kiiro Qullaawa Maxaafa xiinxalliseemmaha lowo manna agure haˈreemma daafira wiˈleemma.” Ikkirono Juuditi Kaamerooni higge heeˈrate hobbi ruxxi yitino.  Isera lowo woxe baantanni loosi noose daafira, Kaamerooni heeˈranno annisera akkaˈmanno woxe aa dandiitanno. Kayinni Juuditi Yihowa addaxxite ilantino gobba Kaamerooni higgino. Ise xa heedhanni noo heeshsho Ameerikaho noo warite gede qawaaxxaame ikkitinokkita coyidhino. Juuditi Kaamerooni heedhanno heeshsho rosa dandiitanno gede kaaˈlasera Yihowa huuccidhino; woradu aliidi laˈˈaanchinna minaamasino jawaachishinose.

Juuditi hakkawarita qaagge “Sasu diri giddo shoole ayyaanaamittete ooso afiˈraˈyanni lowo geeshsha hagiidhoomma” yitino. Ise baxxitino suwisaancho ikkite soqqama hanaffino. Xa ise minaannise Saami Kasteli ledo woradu looso loossanni no. Juuditi anni makkiyya? Isenna maatese wole gobbara annase woxe adhitukkinni darte gobbanno hospitaale hase afiˈrino. Annase qarru nookkiha darre akkammoonni; tini hagiirsiissannote.

Vikitori yinanni rodii Kanaadaho heeˈrara haˈrino. Isi Agarooshshu Shaera yuniversite eˈˈe rosate daafira kulanno birxicho nabbawihu gedensaanni, tenne daafira seekke hedino. Isi yuniversitete rosanni noo roso facci asse agure harancho yanna giddo ogimma rosa hanafino. Isi togo yiino: “Tenne ogimma rosaˈya mulenni looso afiˈreemmo gede kaaˈlitinoe; hattono suwisaancho ikke soqqama hanafoommo; tini halchanni keeshshoommote.” Vikitori gedensaanni Kaaroolini yinanni rodoo adhino; insa lamunku Kaamerooni haˈrino. Insa hakkiicho sinu biiro daaˈˈati woyite, mitu roduuwi Kaamerooni soqqamate daafira heddanno gede jawaachishshinonsa. Vikitori togo yiino: “Tenne maahoyye yineemmokki gede assannonkeri dino; heeshshonke bikkunnita assiˈne heeˈnoommo daafira, konne koyishsha adhinoommo.” Kaaroolini mito woyite dhiwannoseha ikkirono, insa Kaamerooni haˈrate murciˈrino.

Vikitorinna Kaaroolini dancha duduwo macciishsha hasiˈrannohu lowo manni noo daafira insa kaaˈlate suwisaano ikke soqqama hanafino. Insara codhino woxi noonsa daafira umi qara looso diloosino. Hakkunni gedensaanni, insa Kanaada hadhe boode agana looso loossino; hakko loosse afidhino woxinni xaano Kaamerooni higge suwisaano ikkite soqqama hanaffino. Insa mayi atoote afidhino? Maganu Mangiste Sawaakooti Rosi Mine eˈe rossino; hakkiinni baxxitino suwisaano ikkite soqqama hanaffino; xa insa gimbaataho soqqantanni no. Vikitori, “injiitino heeshsho aguranke Yihowa atoote afiˈneemmo gede assitinonke” yiino.

Aaleni yinannihu 2002 Jarmanete yuniversitera rosanni heeˈre Wedella Heeshshoˈne Giddo Maa Assate Doodhitinanni? yitanno tiraakte nabbawino. Nabbawinori wole mixo fushshiˈranno gede assinosi. Isi 2006 Soqqamaanote Qajeelshi Rosi Mine eˈˈe rosino; hakkiinni ilamino gobba Kaamerooni haˈre soqqamanno gede kulloonnisi.

Aaleni Kaamerooni gobbara gama barra calla loosanno looso afiˈrino. Gedensaanni isi lowo woxe baantanni looso afiˈrinoha ikkirono, kuni loosi Yihowara albi geeshsha soqqameemmota hoolannoe yee yaadino. Konnira, baxxino suwisaancho ikke soqqamara koyinsisita konne koyishsha hobbi ruxxi yiikkinni adhino. Loosiisaanchisi damooza ledinosiha ikkirono, isi kayinni giwe baxxino suwisaancho ikkino. Gedensaanni Aaleni Isteefani yinannita Faransayete gobbara lowo diro heedhino rodoo adhino. Ise Kaamerooni hadhuhu gedensaanni qarra ikkannori mayi iillinose?

Isteefani togo yitino: “Hakkeeshshi geeshsha batiˈrinokki dhibbi dhiwannoehanna alaarje qarrissinoeha ikkirono, ganye akkaˈmanni woyyimma afiˈroomma.” Kuri minaanninna minaama cincite soqqantino daafira Yihowa maassiˈrinonsa. Aaleni  togo yiino: “Katee yinanniwa xeertote noo qooxeessa haˈne sabbankummo woyite, Qullaawa Maxaafa xiinxalla hasiˈrannohunni lowo manninni xaandoommo. Gedensaanni insa Qullaawa Maxaafa silketenni xiinxallinsoommonsa. Insa giddo lamu cuuantino; hattono hakkiicho onte halashshaano noo gaamo xintantino.” Isteefani ledde togo yitino: “Mannu heeshshonsa Yihowara sayise aano gede kaaˈline afiˈnanni hagiirrinni sainori woluri dino. Kowiicho soqqamankenni togoo hagiirre duucha hinge afiˈnoommo.” Xa Aaleninna Isteefani woradu looso loosanni no.

Zhizeeli yinanni rodoo Ixaaliyaho hikkiminnu roso rossanni heedhe cuuantino. Ise Qullaawa Maxaafa xiinxallisise minaanninna minaama bikku heeshsho heeˈrannota laˈe dhagge assidhino; konnira, iseno Yihowara albinni roore soqqama hasidhino. Zhizeeli rossanni noo roso guddara kaˈe heedhe woˈma yanna suwisaancho ikkite soqqama hanaffino.

Zhizeeli Kaamerooni higge Yihowara albinni roore soqqama hasidhino; ikkirono ise yaachishinori no. Ise togo yitino: “Ixaaliyaho heeˈrate fajjoˈya hoogeemma hattono hakko noo jaallaˈyawiinninna maateˈyawiinni baxxeemma yee yaadoomma.” Ikkirono, Zhizeeli Onkoleessa 2016 Kaamerooni higgino. Yannate gedensaanni ise Leeyonse yinanni rodiira assidhino; Kaamerooni nooti sinu biiro insa Maganu Mangiste halashshaano roore hasiissannowa Ayosi yinanni katama haˈre soqqamanno gede jawaachishshinonsa.

Ayosi heeˈnanni heeshsho hiittoote? Zhizeeli togo yitino: “Duucha woyite korreente baˈe lowo barra keeshshitanno daafira, silkenke chaarje assiˈrate qarrammeemmo. Silkenke roore yanna diloossanno. Haqqete qishiˈra rosoomma; waa dirrirate gaare adhine hashsha baatiretenni haˈneemmo; hashsha haˈneemmohu mannu batiˈrannokki daafiraati.” Insa tenne baala cince heeˈranno gede kaaˈlinonsari maati? Zhizeeli togo yitino: “Yihowa ayyaani, minaanniˈya ledo kaaˈlamaˈya, hattono roduuwu ayyaanaamittetenni jawaachishshinonke daafira, tenne baala cincine saˈˈa dandiinoommo; qoleno maatenkenna jaallanke mito woyite woxunni kaaˈlitinonke.”

Ikkina, Zhizeeli ilantino gobba higasenni hagiidhitino? Ise “Ee hagiidhoomma” yitino. Ise ledde togo yitino: “Umi qara qarramme hexxo mudhinoommoha ikkirono, tenne dandiine saˈnummohu gedensaanni, minaanniˈyanna ani assa hasiissannonkerella assinoommo yine hendoommo. Yihowa addaxxinoommo daafira isiwa albinni roore shinqoommo yaa dandiineemmo.” Leeyonsenna Zhizeeli Maganu Mangiste Sawaakooti Rosi Mine eˈˈe rosino; insa xa baxxitino suwisaano ikke soqqamanni no.

Mittu qulxuˈme woshshaaxxanno manchi lowo qulxuˈme woshshaaxxate yee qarra ikkannore worbimmatenni dandee saˈˈannonte gede, Maganu mangiste sokka macciishsha hasiˈranno manna kaaˈlate yite ilantino gobba higginori uminsa horo agurtino. Yihowa, suˈmisira yite baxille leellishate diinaggaabbe loossino halashshaano horo hawannokkiti egennantinote. (Neh. 5:19; Ibi. 6:10) Heeˈrattohu wole gobbara ikkironna, ilamootto gobbara Maganu Mangiste halashshaano roore hasiissannoha ikkiro, ilamootto gobba higge soqqama dandaatto? Hatto assittoro lowo atoote afiˈratto.—Law. 10:22.