MARO henanizao ty rahalahy noho anabavy noly amy tany niaviany ndraiky, lafa nila haveloma amy tany hafa any. Tea ani-Jehovah noho ty olo hafa rozy, ka nifindra amy pilasy mila mpitory maro. (Mat. 22:37-39) Ino iaby ty raha nafoin-drozy, le ino ty fitahia niazon-drozy? Mba hahaizantsika ani-zay, le ndao tsika ho a Cameroun, an’Afriky andrefa any.

Niala baka amy tany niaviany, a Cameroun any rahalahy Onésime tamy 1998. Nipetraky tan-tany hafa any avao ie tanatini-14 tao. Ndraik’andro amy zay, naharè fanohara raiky mikasiky ty asa fitoria ie tam-pivoria tany. Nivola mpandahateny iny hoe: “Laha misy mpinama roe mihaza amy pilasy samby hafa, le raiky iny ro nahazo fia maro mandilatsy ani-raiky iny, ino ty hataoni-azy nahazo fia kelikely iny? Tsy hamonjy marìny amy pilasy nahazoani-namany iny eny va ie?”

Nahavy ani-Onésime hieritseritsy himpoly a Cameroun any fanohara iny, mba hanampy ani-mpitory any reo. Fe natahotsy ie. Fa nipetraky maharitsy tan-dafy any ie, ka mbo ho vitany avao va ty hizatsy ty fiaina amy tany niaviany eo? Mba hahaiza ani-zay, le nitsidiky ani-Cameroun tanatini-enim-bola Onésime. Nifindra ao tanteraky amy zay ie tamy 2012.

Hoy Onésime: “Tsy maintsy nizatsy ty hafanà noho ty fomba fiaina atoy aho. Nila nizatsy mipetraky amy sezy hazo ndraiky aho amy Efitrano Fanjakà any.” Bakeo nihehy kelikely ie sady nivola hoe: “Fe lafa nifantoky soa amy fandahara iny aho, le nanomboky halinoko sezy malemilemy rey.”

Tamy 2013, Onésime nanambaly ani-Géraldine. Vo nimpoly ta Cameroun ao koa Géraldine io, lafa baka nipetraky sivy tao ta Fransy any. Ino iaby ty fitahia niazoni-mpivaly reo lafa nataon-drozy voaloha lista amy fiainan-drozy ty fanompoa? Hoy Onésime: “Niaraky nanatriky ty Sekolini-Mpitory Fanjakà Iny zahay, le manompo amy Betela ato. Tanatini-tao raiky avao, le nisy 20 ty mpianatsy Baiboly natao batisa amy fiangonanay ao. Tsapako hoe amy pilasy mety soa ‘ihazà’ aho henanizao.” (Mar. 1:17, 18) Hoy koa Géraldine: “Nahazo fitahia maro mandilatsy ty nieritseretiko aho.”

Nifindra a Etazinỳ any Judith, fe naniry hampitombo ty fanompoany ie. Hoy ty asany: “Lafa nitampitsy ty fotoa nitsidihako ty fianakaviako iaby ta Cameroun any, le nitany aho satria tsy maintsy nanenga olo maromaro fa nanomboky nianatsy Baiboly.” Fe nisalasala hifindra a Cameroun any Judith. Nana asa be karama ie ka afaky nandoa ty fitsaboa nilàni-babany a Cameroun ao. Fe natoky ani-Jehovah Judith, ka nanapa-kevitsy hifindra avao. Nieky ie hoe nimaninany ty sisany amy fiainany tan-dafy any rey. Nivavaky amy Jehovah  ie mba hanampy azy hihazatsy, le nampahery azy ty mpiandraikitsini-faritsy raiky miaraky amy valiny.

Hoy Judith lafa mahatiaro ty raha niseho tamin’ie nimpoly ta Cameroun any: “Telo tao zay, le nifalifaly aho fa afaky nanampy olo efatsy natao batisa.” Nanomboky nanao ty asani-mpisava lala manoka Judith. Miaraky manao ty asani-faritsy amy Sam-Castel valiny ie henanizao. Fe nanao akory zay babani-Judith iny? Afaky nahita lapotaly amy tany hafa any Judith noho ty fianakaviany. Parè hanao fandrasà tsy andoava drala lapotaly io. Nivita soa fandrasà iny.

Nifindra a Kanadà any ty rahalahy raiky mana anara Victor. Lafa baka namaky lahatsoratsy raiky amy Tilikambo mikasiky fianara ambony ie, le nieritseritsy mikasiky ty fianara ataony. Najanony ty fianarany tamy iniversitè eny, ka nanomboky nianatsy raha hafa ie mba hahafahany mahita asa. Hoy ty asany: “Nalaky nahita asa amy zay aho, farany nanao mpisava lala. Fa ela ty naniriako hanao ani-zay.” Nanambaly ani-Caroline Victor lafa tafara atoy, le nandeha nitsidiky ani-Cameroun rozy morovaly. Lafa nitsidiky biròni-sampana rozy tany, le nisy rahalahy nampirisiky an-drozy hieritseritsy hoe afaky hanompo a Cameroun any va rozy. Hoy Victor: “Tsy hitanay ty antony tokony handananay, sady fa nanatsotra ty fiainanay avao koa moa zahay ka afaky naneky ani-fanasà iny.” Tsy de salama aloha Caroline, fe nanapa-kevitsy hifindra avao rozy.

Nanomboky nanao ty asani-mpisava lala maharitsy Victor noho Caroline, soa hanampy amy fikarakarà ani-ze olo iaby kinto amy faritany eny. Fa namory drala ampy rozy ka tsy nila niasa tse tamy voalohany. Tafarani-zay, le niasa ta Kanadà any tanatini-vola vitsivitsy rozy, bakeo nimpoly ta Cameroun any nanohy ty asani-mpisava lala. Ino iaby ty fitahia niazon-drozy? Nanatriky ty Sekolini-Mpitory Fanjakà Iny rozy, nanao ty asani-mpisava lala manoka, le manao fanorena henanizao. Hoy ty asani-Victor: “Nanenga ty tany nahazatsy anay zahay ka nahita ty fanohanani-Jehovah.”

Tamy 2002, le nivakini-Alain ty taratasy mivalo hoe Ry Tanora—Inona no Tanjonareo eo Amin’ny Fiainana? Mbo nianatsy tamy iniversitè raiky an’Alemaigny any ie tamy zay. Nandrisiky azy hana raha kendrè vaovao ty fanazavà tao. Nanatriky ty Sekoly Fampiofana ho amy Fanompoa ie tamy 2006, le nivoatendry ho a Cameroun, amy tany nahaterahany any.

Nahita asa tapa-potoa Alain lafa ta Cameroun any. Tafara atoy, le nahita asa be karama ie, fe natahotsy tsy no hampihena ty fanompoany raha zay. Ka lafa nasà hanao ty asani-mpisava lala manoka ie, le tsy nisalasala fa naneky. Nameani-sefony fisondrota karama Alain, fe tsy niova hevitsy fa nanao mpisava lala manoka avao. Nanambaly ani-Stéphanie Alain tafara atoy. Nipetraky tan-taony maro ta Fransy any Stéphanie. Ino iaby ty raha sarotsy nahazo azy lafa ie nifindra a Cameroun any?

Hoy Stéphanie: “Tsy de nisalama aho sady nisy raha sisany tsy zakako, fe misy fitsaboa arahiko, le tsy manahy loatsy aho.” Nahazo fitahia mpivaly reo satria niaritsy. Hoy ty asani-Alain: “Lafa zahay nandeha nitory amy tanà mitoka atao hoe Katé zay, le nahita olo maromaro naniry hianatsy Baiboly. Tafarani-zay rozy nampianarinay tamy telefony. Natao batisa ty roe amy mpianatsy reo, le nanjary nisy antoko-mpitory niforo.” Nivola koa Stéphanie hoe: “Tsy misy raha mahafalifaly mandilatsy ty hoe manampy olo mba hanokam-bata ho ani-Jehovah. Fa imaro zahay ro  nahita ani-fifalea zay lafa nanompo atoy.” Manao ty asani-faritsy Alain noho Stéphanie henanizao.

Natao batisa Gisèle tamin’ie nianatsy ho dokotera tan’Italỳ any. Nitseriky ie nahita ty fiaina tsotra nananani-mpivaly mpisava lala nampianatsy Baiboly azy rey, farany naniry hampitombo ty fanompoany. Nanomboky nanao mpisava lala maharitsy Gisèle lafa nivita ty fianarany.

Ta handeha a Cameroun any Gisèle mba hampitombo ty fanompoany ani-Jehovah, fe natahotsy. Hoy ty asany: “Tsy nifoiko ty fipetraha an’Italỳ any, ka natahotsy aho tsy no tsy hahazo lala hipetraky any sasy. Tsy nifoiko koa ty hisaraky amy nama noho fianakavia mipetraky any rey.” Fe ndre teo zay, le nifindra a Cameroun any avao Gisèle tamy Mey 2016. Tsy ela tafarani-zay, le nanambaly ani-Léonce ie. Nanoro hevitsy an-drozy morovaly ty biròni-sampana a Cameroun any mba hifindra a Ayos, tanà raiky mila mpitory maro.

Nanao akory ty fiaina ta Ayos any? Ho zao ty nitantaranini-Gisèle: “Matetiky ty jiro any tapaky anatini-herinandro, farany tsy nandeha ty telefoninay amy ankabeazani-fotoa. Nianatsy niketriky amy katà aho. Nantsaka amy vavarano zahay, le saky haly vo mangalaky rano satria mba fa tsy maro olo ty any amy zay. Nanday borety noho tôrsa zahay lafa nantsaka rano.” Ino ty nanampy ani-mpivaly reo hiaritsy? Namaly Gisèle hoe: “Ty fanahini-Jehovah, noho valy tena manoha. Nampahery koa ty fianakavia noho ty nama, sady nanome drala hanampea anay kindraiky.”

Niteani-Gisèle va ty nimpoly amy taniny any? “Eka! Tsy misy fisalasalà mihintsy” hoasany. “Nisy avao aloha ty raha sarotsy noho hakivia tamy voalohany, fe lafa niresinay raha rey, le nanjary tsapanay morovaly hoe nanao ze tokony hatao zahay. Vomaiky zahay matoky ani-Jehovah sady mahatiaro ho marìny azy.” Nanatriky ty Sekolini-Mpitory Fanjakà Iny Léonce noho Gisèle. Mpisava lala manoka tsy maharitsy rozy henanizao.

Mampiseho herim-po avao ty mpihaza fia ndre misy raha sarotsy aza, mba hahafaha mahazo fia. Manahaky ani-zay koa azy mimpoly amy tany niaviany rey. Mahafoy raha maro rozy mba hanampea ani-ze mana fo soa ka mandramby ty hafatsy mikasiky ani-Fanjakà iny. Azo antoky fa tsy ho halinoni-Jehovah ty asa mafy ataoni-mpitory rey noho ty fitiava asehon-drozy ho ahi-ty anarany. (Neh. 5:19; Heb. 6:10) Laha mipetraky an-tany hafa any iha, ka mila mpitory maro ty amy tany niavianao any, afaky mimpoly any va iha? Laha manao ani-zay iha, le misy fitahia maro mandiny anao.​—Ohab. 10:22.