EFULA kɛ wananyɔ l’ankana yɛsɛkwisa ntitansɛ l’ewila enkina welekɔ l’okfudji wakalɔka ntitansɛ l’ewila wɛwɔ wɛ lowotshɔ. Má ngandji kokawɔ Yehova edjinge winawɔ anto, iwɔ watshɔka tá ewila welekɔ la djonyi dj’ansakodji y’Onkfumi. (Mat. 22:37-39) Kɛkɔnge k’iyoyapekala, edjinge wopo wɔkɔnge Yehova ndatshɔkɔla? Dj’iso ndjewa, nyontshɔ tokila yimba lá kɛnɛ kehetisa l’owila wɔ Cameroun l’Afrikɛ wa Owɛstɛ.

Lá 1998 wɔnanyɔ wetawɔ Onésime asɛkɔka má Cameroun, mbandja kɛwɔ kɛ lowotshɔ tá owila onkina. L’ila k’ɛnɔnyi 14, nde itansɛka etengo ɔngangɛnda lá mbandja k’ekina. Lofu lɔmɔtshi, wina windayalaka lá losanghanyɛ l’Akristo, nde okaka ndjɔmbɔmba kelendana l’olemo w’ipoposanyɛ. Ontependji atepelaka ante: “Ntsha anto ape wasaka ndjale lá todjena totshikitanyi, ko ɔmɔtshi avunda nse efula ndeka winande, kanga lopawa nse efula, apongima má idjena yɛnde ko ntshɔ tá idjena yɛ nse efula?”

Ndjɔmbɔmba kɛsɔ ketshindaka Onésime djɛ nkanela wopo wɔ nkalɔ tá Cameroun etena k’anto efula awolawɔ ndjeka Bible, djɛ ntokotshɛ ansakodji walekɔ l’eteyi. Koko nde akakandaki nkambo mɔtshi. Nde angekela ntitansɛ lonkina l’owila wɔwɔ wɔ lowotshɔ m’ɔkɔngɔ wɔ ndjitansɛ ɛnɔnyi efula l’owila wangangɛnda? Djɛ ndenda kana angekela, Onésime atshɔka towembola Cameroun l’ila kɛ Ngɔndɔ isamalo. Masɔ, lá 2012, nde atshɔka ntitansɛ l’eteyi.

Onésime atepela ante: “Ndjɛka ndjekala deko djɛ taane edjinge wopo wɔ lowiko wolekɔ l’eteyi. Ndjalaka ladjɛ ndjekela lonkina djɛ ndjitansɛ lá aba w’ambaya welá Mvulu k’Onkfumi.” Nde atepela l’omonghamongha ante: “Wina wolekami ndjila yimba lá nonghanyi kɛ losanghanyɛ ndeke imɛmi yimba m’olando wamba wambaya.”

Lá 2013, Onésime atshukanaka nya Géraldine, kanga lokalisa tá Cameroun, mbandja kɛwɔ kɛ lowotshɔ, m’ɔkɔngɔ wɔnde ndjitansɛ lá France ɛnɔnyi djuwa. Wopo wɔkɔnge Yehova ndatshɔkɔla lá wopo w’iyapɛyɛ lowiko l’onkfumo l’olemo wɔ teokrasi? Onésime atepela ante: “Lemi sa wadjɛmi tingelaka lá Nkalasa k’esambisha w’Onkfumi edjinge m’ɔkɔngɔ toyɛka ndokamba lá Betelɛ. Lako ila, ngo l’ɔnɔnyi ɔmɔ ambeki wa Bible 20 wa l’otshumano wɔso walongolaka batisimo. Wina wɔsɔ, ndawoka ente ndekɔ l’etena kɛ wɔlɔ kɛ ‘mvunda nse.’” (Mar. 1:17, 18) Géraldine akotshɛ ante: “Mbaka ɛtshɔkɔ efula wɛ motakanelaki ente langowa.”

Judith asɛkɔka tá États-Unis, koko nde akombolaki ndapɛyɛ efula l’olemo wɔnde w’ipoposanyɛ. Nde akɔndɔla ante: “Wina onkfumɔ wimakalɔka matowembola nkfumbo kɛmi kelá Cameroun, lakalɔki ngo la delo ladjikɛnde latshikaki ambeki wimatateyɛka ndjeka lawɔ Bible.” Koko, Judith akakandaki djɛ kalɔ lonkina tá Cameroun mbandja kɛwɔ kɛ lowotshɔ. Nde ayalaki l’olemo windafutama wɔlɔ, wokotshɛki djɛ nsombelaka papa kɛnde kintansɛki  lá Cameroun ekanga windayalaka la djonyi. Koko, la ndapɛyɛ tshɛ te Yehova, Judith asɛkɔka tá Cameroun. Nde ndjawolaka ante nde asambaka n’kete mɔtshi djɛ wɔlɔ djɛ ndakɔpaka wina wɔ ndayalaka lá mbandja k’angangɛnda. Nde alɔmbaka Yehova djɛ ndokotshɛ djɛ nde ndjekesanela, edjinge onami w’edjingadjinga nya wadjɛnde wokeketshɛka.

Wina wɔ Judith ovungɔnde wopo w’akambo iyahete wina windakalɔ tá Cameroun, nde ntepelaka ante: “L’ɛnɔnyi esato toko mbaka osasa wɔ mba wana anɛyi welá nyuma.” Judith atateyɛka nkamba etengo yat’ekalo yetshikitanyi. Lɔɔko kɛnɛ, nde atshindjeyɛ womɛnde Sam-Castel lolekɔ onami w’edjingadjinga. Ko kɛkɔnge kekomelisa papa kɛ Judith? Nde nya papa kɛnde wawaka akoka wa ndjingela opitalo l’ongindji onkina woyalisa entshupa djɛ nangha papa kɛnde epaso. Nkambo dj’osasa nde, epaso kɛ papa kɛnde kehetaka wɔlɔ.

Wɔnanyɔ w’etawɔ Victor asɛkɔka tá Canada. M’ɔkɔngɔ wɔnde mbala djamba djɛ Etange k’Olami djetepelaki nkambo djɛ nkalasa yel’adjiko, nde akanelaka lá kɛnɛ kelendana la nkalasa kɛnde. Nde atshikaka ndjingela nkalasa kɛ inivɛrsite, ko atateyɛka nangha fɔrmasiɔ k’itenyi kɛ tɛkinikɛ. Nde atepela ante: “Kɛsɔ kenkotshɛka djɛ mba olemo la nkeke, edjinge djɛ nangha kɛnɛ kimakombolaka ilá efula: Ndjala yat’ekalo.” M’ɔkɔngɔ, Victor ayɛka ndotshukana nya Caroline, edjinge watshɔka tokoma lá Cameroun. Wina w’iyayalaka l’eteyi, watshɔka towembola Betɛlɛ, ko wananyɔ wal’eteyi wakeketshɛka djɛ ntokotshɛ lá Cameroun. Victor atepelaka ante: “Tɔtɛna kaanga elonga kɛmɔ kɛ ntona, edjinge ladjikɛnde tolamaka lowiko lɔso ɔsɛlɛngɛ tɛnaka djɛ, iso nkoka ndjawola leeta lɔsɔ.” Kaanga Caroline ndayalaka la tolalando tɔmɔtshi, iwɔ wɔsaka n’kano djɛ ntshɔ ntitansɛ l’eteyi.

Victor nya Caroline watateyɛka nkamba olemo wɔ yat’ekalo yɛ lotshinda djɛ nkotshɛ mposɛ k’efula k’etatshi kɛ looko k’iyalaka. L’ila k’etsho ɛmɔtshi iwɔ waasɛnaki ngo la ndambo kɛ falanga kiyowombe. M’ɔkɔngɔ wɔ lasɔ, iwɔ wakalɔka lonkina tá Canada djɛ ntokamba olemo Ngɔndɔ imangha djɛ mba ndambo kɛ nfalanga kakotshisa djɛ nkalɔ lonkina tá Cameroun edjinge ntokindjɛ l’olemo wɔwɔ wɔ yat’ekalo. Ɛtshɔkɔ wɛkɔnge wiyawa? Iwɔ w’ingelaka lá Nkalasa k’esambisha w’Onkfumi, wakambaka etengo tat’ekalo totshikitanyi edjinge win’ɔsɔ wakamba l’olemo w’opikelo. Victor ante: “Wopo wisatshike lowiko lɔ wɔlɔ lisasɛnaka lá Canada ambɔtɔpɛyɛ mbamba kɛ nyɛna okotshɔ wɔ Yehova.”

Lá 2002 Alain, ombeki ɔmɔtshi w’ingelaki lá inivɛrsite imɔtshi yelekɔ lá Allemagne awalaka traktɛ kɛmɔtshi kelekɔ l’ɔtɛ wɔ djamba ante: Ɛlɔngɔlɔngɔ—Ngande wayonyokamba la lɔsɛnɔ lanyu? Akambo wandatane l’eteyi, wotshindaka djɛ nde ntshikitanyɛ akano wande. Lá 2006, nde ingelaka Nkalasa k’onkfumbelo w’enkambi edjinge wotomaka tá Cameroun, owila wɔnde wɔ lowotshɔ.

Lá Cameroun, Alain awaka olemo windakambaka lá win’ɛmɔtshi. M’ɔkɔngɔ, Alain awaka olemo wofutawɔ wɔlɔ efula, koko nde ayalaka la wɔma djɛ olemo wɔsɔ ndɔwɔsɛla wina efula dj’ipa nde ndapɛyɛ efula l’olemo w’ipoposanyɛ. Ko wina windawa leeta lɔnde nkamba etengo yat’ekalo yetshikitanyi nde awolaka ipa l’okakando. Owandji wɔnde w’olemo akɔpaka ndowafeyɛ lofuto, koko Alain atakɔpa, nde akɔpaka ngo ndjala yat’ekalo. M’ɔkɔngɔ, Alain ayɛka ndotshukana nya Stéphanie, kanga lintansɛki l’ilá k’ɛnɔnyi efula lá France. Ekakasano wɛkɔnge windapomana m’ɔkɔngɔ wɔ nde ntitansɛ lá Cameroun?

 Stéphanie atepela ante: “Ndjɛka ndoyala la tolalando mande, ntekelaki n’kete mɔtshi, koko lɔsaki esakelo wina onkfumɔ, ko ndjɛka ndoyala wɔlɔ.” Antshukanyi wasɔ wawaka ɛtshɔkɔ má wopo wiyakfumeyɛ. Alain atepela ante: “Wina wisatshu ntopoposanyɛ l’ikenda yetawɔ Katé, totanaka anto efula wakɔpaki ndjeka Bible. M’ɔkɔngɔ, totateyɛka ndjeka lawɔ Bible má telefɔnɛ. Ambeki ape l’anteyi k’ambeki wasɔ, walongolaka batisimo edjinge iloyi y’ansakondji ikengamaka.” Stéphanie akotshɛ ante: “Lako osasa w’ekekete woleka wɔ nkotshɛ anto dj’iwɔ ndaalambola te Yehova. Má nkamba l’edjena kɛnɛ, koyɛwɔ la djonyi dj’ansakondji, towaka osasa wɔ nghɔsɔ mbala la mbala.” Lɔɔko kɛnɛ, Alain nya Stéphanie wakamba etengo onami w’edjingadjinga.

Gisèle alongolaka batisimo wina wɔ ndingelaka nkalasa k’ifulumɛ l’Italie. Nde akamɔka lá ndenda lowiko l’ɔsɛlɛngɛ l’antshukanyi wa tat’ekalo wekaki lande Bible, ko nde akɔpaka nfundjɛ olemo wɔnde w’ipoposanyɛ. Djɛkondeke Gisèle awangaka olemo wɔ yat’ekalo m’ɔkɔngɔ wɔ nde nshiyɛ nkalasa kɛnde.

Gisèle akombolaka nkalɔ tá Cameroun djɛ nde toleka nkambela Yehova l’eteyi, koko nde akakandaka. Nde atepelaka ante: “Ko lemi ntshika mvulu kɛmi, nkakitɔna la tolongo tɔmi, l’ase nkfumbo kɛmi walekɔ l’Italie?” Kaanga oyɛwɔ nghɔsɔ lá Ngɔndɔ k’atano, 2016, Gisèle asɛkɔka tá Cameroun. M’ɔkɔngɔ w’etsho ɛmɔtshi, nde atshukanaka nya Léonce, edjinge biro djɛ filialɛ djelá Cameroun alɔmbaka dj’iwɔ nsɛkɔ tá Ayos, ngando kɛ daambi keyalaki la djonyi dj’ansakodji efula w’Onkfumi.

Lowiko iyayale mo lá Ayos? Gisèle akɔndɔla ante: “Mbala efula kura k’atshɔki l’ila kɛ mbengo efula edjinge totakokaki mba kaanga wopo wɔ ndjila iyɛ lá telefɔnɛ. Mbala efula anto watakambaki elemo. Ndjekaka wopo wɔ nkatshɛ lá nkonyi, edjinge tatshɔki la wapusupusu djɛ tɔtɛka watshi l’otsho wina w’anto efula iyotayalaki lá loshi.” Kɛkɔnge k’ekotshisa Gisèle nya womɛnde djɛ nkfulumeyɛ? Gisèle atepela ante: “Nyuma kɛ Yehova, ekimanyelo kime womɛmi, edjinge ekeketshelo kelá nyuma la mbala imɔtshi kelá demba kime nkfumbo yɛso la tolongo tɔso k’etokotshɛka efula.”

Gisèle ayalaka l’osasa wopo wɔ ndakalɔ tá owila wɔwɔ wɔ lowotshɔ? “Ee! Ipa l’ehamo,” nde ntepelaka ante: “Topomanaka l’ekakasano edjinge win’ɛmɔtshi toyawokaka etengo tɔmbɔlɛmba, koko wina wisakfulumeyɛka ekakasano wɛsɔ, lemi la womɛmi, tokaka djɛ tombonangha ngo kɛnɛ kisayale ladjɛ nangha. Toyawɛkɛka le Yehova edjinge toyawokaka djɛ tolekɔ entshupa lande.” Léonce nya Gisèle wingelaka Nkalasa k’esambisha w’Onkfumi, edjinge win’ɔsɔ, wakamba etengo tat’ekalo totshikitanyi.

Etengo onsaki ndjale wolekɔ l’oloko wolo kaanga lá ntondo k’ekakasano efula l’ikanyi yɛnde mvunda nse efula, waakalɔ t’ewila wɛwɔ wɛ lowotshɔ ndapekalaka akambo efula djɛ nkotshɛ wanɛ wawola losango l’Onkfumi. Yehova apongovungɛ ngadji k’ansakodji y’entete yekamba l’ɛkɔpa yɛsɔ, iyɛnyɛ lá nkambo djɛ djina djɛnde. (Nɛh. 5:19; Heb. 6:10) Ntsha wɛ itansɛnde lá mbadja y’angangɛnda ko djonyi dj’ansakodji y’Onkfumi djelekɔ lá mbandja kɛnyo kɛ lowotshɔ, ongawola nkalɔ? Ntsha wɛ nangha nghɔsɔ Yehova angɔkɔtshɔkɔla.​—Woo. 10:22.