BAKWETU balume na bakashi be bungi abadi bafilukye benda mu angi maumbo bwa kukimba makuta, mbalukye mu maumbo abo abutandwa. Kifulo kyabo bwa Yehowa na bwa bantu nabo, nkibatakule bwa kwenda ma mbalo e lukalo lwa balungudi be bungi ba Bufumu. (Mat. 22:37-39) Myanda kinyi yabadi besumine na myabi kinyi yabadi bapete? Bwa kupeta lwalulo, twendeyi mu Cameroun, eumbo dya mu Afrique.

Mu kipwa kya 1998, ungi mukwetu mulume abetamina bu Onésime bafilukile mu Cameroun eumbo dyaye dya butandwa.” Badi mu kashale mu dingi eumbo munda a bipwa 14. Dingi efuku mu bisangilo, Onésime badi mupushe kileshesho pabitale mudimu wa kulungula mukandu wibuwa. Sha mwisambo bayipwishe’shi: “Su bantu babidi abalobo ma mbalo elekene, na ungi akwata mishipa kukila mukwabo, yawa akwata mishipa ipeela, ta mulombene kwenda mbalo i yawa akwata i bungi su?”

Kyakya kileshesho kibadi kitakule Onésime bwadya kwalukila mu Cameroun, mwi bantu be bungi be na lukalo lwa kulonga Bible. Anka badi ealashena. Obesha dingi nshalelo a mu Cameroun kunyima kwaye kukisha bipwa bi bungi mu dingi eumbo su? Bwa kutala su obesha, Onésime bayile mu kutemba mu Cameroun bwa myeshi isamombo. Akupu, mu 2012 balukile bwa kwimushala bwa loso.

Onésime amba’shi: “Bibadi abitungu’shi ngubile kibobo na nshalelo a mwanka. Ku Nshibo ya Bufumu, bibadi abitungu’shi mbangye dingi kushala ku bibasa.” Amba dingi’shi: “Pantumu binangu ku programe, nayilwa ma nkwasa e buwa a nadi na shala mu angi Mashibo a Bufumu.”

Mu 2013, Onésime badi mwibakile Géraldine, badi mwalukile mu Cameroun kunyima kwaye kupwa kushala bipwa kitema mu France. Myabi kinyi ibadi Yehowa mwibelele paabo kutula kikyebe ky’eshimba dyaye pa mbalo ya kumpala mu muwa wabo? Onésime amba’shi: “Twibatwele mu Kalasa ka balungudi ba Bufumu na kufuba ku Betele. Penda mu kipwa kimune, balongi ba Bible 20 ba mu kakongye ketu mbabatshishibwe. Binobino, n’epusha’shi ne mbalo i buwa bwa ‘kuloba.’” (Mak. 1:17, 18) Géraldine amba’shi: “Ne mupete myabi i bungi ya shi nadi napwandikisha.”

Judith badi mufilukile mu États-Unis badi akumiina kutamisha mudimo waye bwa Yehowa. Amba’shi: “Misusa yoso i nadi nende mu kutala kifuko kyande mu Cameroun, nadi nalongo Bible na bantu. Anka pakwibaleka, nadi nadidi.” Kadi, Judith badi ealashena bwa kwalukila mu kushala mu Cameroun. Badi na mudimo ubabadi abamufutu kalolo ubadi aumukwasha bwa kubukisha  nshaye badi mu Cameroun. Anka Judith badi mukulupile mwi Yehowa na aye kwalukila mu Cameroun. Ingi nsaa atentekyesha nshalelo e buwa abadi naye mu États-Unis. Anka, badi atekye Yehowa bwashi amukwashe bwadya kuubila nshalelo a mu Cameroun, na dingi mukunkushi a kifunda na mukash’aye abadi abamunyigisha.

Judith atentekyesha’shi: “Mu bipwa bisatu, ne mupete muloo wa kukwasha bantu bananka bwabadya kubatshishibwa.” Judith babangile kufuba bu mbala-mashinda a nsaa yoso. Lelo uno, kwete kufuba pamune na mulume aye Sam-Castel mu mudimo wa kifunda. Kadi bwa nshaye na Judith? Aye na kifuko kyaye abadi bapete lupitalo mu dingi eumbo lubadi lukumiine bwa kubala nshaye bisumanga. Mwanda wa muloo, abadi bamubale kalolo.

Mukwetu mulume abetaminaa bu Victor badi mufilukile mu Canada. Kunyima kwaye kubadika mwisambo wa Kitenta kya Mulami pabitale tulasa tukata, badi munangushene pabitale kulonga kwaye. Aye nkwimika kulonga kilongyelo kikata, bwa kulonga kalasa ka mudimo wa maasa. Amba’shi: “Mbikwashe bwa kupeta mudimo bukidibukidi na kubanga mudimo wa bu mbala-mashinda​—unadi nakumiina kukita takudi bipwa.” Kunyima, Victor badi mwibakile Caroline, na abo kwenda mu kutemba mu Cameroun. Pababayile mu kutala Betele, bangi bakwetu balume abadi bebanyingishe bwa kufubila Yehowa mu Cameroun. Victor amba’shi, “Bu bibatudi na nshalelo mupelepele, ta tubadi na kabingilo ka kupela lwitamino.” Sunga bibadi Caroline na lukalakashi lwa mbidi, babadi bate kitshibilo kya kufiluka.

Victor na Caroline bababangile kufuba bu ba mbala-mashinda ba myeshi yoso bwa kukwasha bantu abadi na lukalo lwa kulonga Bible. Abadi balame ndambo ya makuta bwa’shi t’ababanganga kufuba musango umune nka abo bakyabafiki mu Cameroun. Kunyima kw’abo kufuba myeshi ipela mu Canada, bibadi bibakwashe bwa kwalukila mu Cameroun bwa kutungunuka na mudimo wa bu mbala-mashinda. Myabi kinyi ibabadi bapete? Mbatwele mu Kalasa ka balungudi ba Bufumu, kufuba bu ba mbala-mashinda ba nsaa yoso, na lelo uno bakwete abafubu mu mudimo wa lwibako. Victor amba’shi: “Kuleka bintu byetu bya ku mbidi nkwitukwashe bwa kumona bukwashi bwa Yehowa.”

Mu 2002, Alain badi alongo ku kilongyelo kikata mu Allemagne, babadikile trakte amba’shi: Jeunes gens, qu’allez-vous faire de votre vie ? Myanda ibabadikile mwanka ibadi imutakule bwa kwata bingi bitshibilo. Mu 2006 batwelele mu École de formation ministérielle, na abo nkumutuma mu Cameroun, kibundji kyaye kya butandwa.

Mu Cameroun, Alain bapetele mudimo wa kufuba angi mafuku ku lubingo. Kunyima, bapetele mudimo wabamufutu kalolo, anka badi ekalakasha mwanda taubadi aumupa nsaa ya kulungula mukandu wibuwa bu kumpala. Nyi bwakinyi nsaa ibabamulungwile bwa kufuba bu mbala-mashinda a nsaa yoso, bakuminyine kushi kwitutusha. Mukata aye a mudimo bamulungwile’shi amukamiisha makuta, anka Alain kupela mwanda badi akumiina kwikala mbala-mashinda a nsaa yoso. Kunyima, Alain kwibakila Stéphanie, badi mushale mu France mund’a bipwa bi bungi. Nkalakashi kinyi ibadi Stéphanie mupete p’aye kwalukila mu Cameroun?

Stéphanie amba’shi: “Nabangile kukumba-kumba, anka nadi napete bwanga bubadi  abunkwasha bwa kupusha kalolo.” Uno mulume na mukashi, babadi bapete efuto bwa kunyingila kwabo. Alain amba’shi: “Nsaa ibatuyile mu kulungula mukandu wibuwa mu kangi ka kibundji kabetaminaa bu Katé, tubadi bapete bantu be bungi abakumiina kulonga Bible. Ingi misango, tubadi atulongo nabo Bible ku telefone. Babidi ba ku bano balongi, mbabatshishibwe na kasaka ka balungudi kababangile.” Stéphanie amba dingi’shi: “Kukwasha bantu bwabadya kwilambula kwi Yehowa, bi muloo wi kashaa! Kufuba kuno nkwitwikashe na uno muloo wi bino misango i bungi.” Lelo uno, Alain na Stéphanie bakwete kufuba mu mudimo wa kifunda.

Gisèle badi mubatshishibwe pa badi mu kalasa ka ba munganga mu Italie. Nshalelo mupelepele badi naye mulume na mukashi ba mbala-mashinda abadi abalongo naye Bible, badi mumukume kwishimba, abyo nkumutakula bwa’shi akite namu bi bungi mu mudimo wa Yehowa. Gisèle babangile mudimo wa nsaa yoso pabadi ku nfudilo a kalasa kaye.

Gisèle badi akumiina kwalukila mu Cameroun bwa kufubila Yehowa ngofu, anka badi ealashena. Amba’shi: “Nadi na kya kushimisha matalwa abadi ampe mbulamatadi akushala mu Italie, na nadya kwikala kula na ba kuuku na kifuko kyande kibadi mwanka.” Sunga mbyabya, mu mweshi wa 5/2016, Gisèle balukile mu Cameroun. Kunyima kwa mafuku, abadi bamwibakile kwi Léonce, na filiale a mu Cameroun nkwibateka bwa kwenda mu Ayos, ka kibundji kabadi na lukalo lwa balungudi be bungi.

Nshalelo badi naminyi mu Ayos? Gisèle amba’shi: “Ta tubadi na bya kwela ma telefone etu kalo nya, mwanda ta kubadi kalo ka nsembwe. Ke bungi abadi nka ashime. Nadi mulongye bya kutekyela ku ntente, na tubadi atwende mu kutapa mema na brouette n’elampi bufuku nsaa ishi’badi bantu ku mushima.” Mushindo kinyi ubabadi banyingile ino nkalakashi? Gisèle amba dingi’shi: “Kikudi kya Yehowa nkitukwashe bwa kunyingila, dingi ami na mulum’ande atwikwashenaa, na bifuko byetu na ba kuuku betu abetunyingisha, na ingi nsaa abetukwashaa n’ekuta.”

Gisèle mupete muloo p’aye kwaluka mwiumbo dyabo su? Amba’shi: “Oolo. Ku mbangilo, tubadi atupete nkalakashi na kubofula kwishimba, anka atwe nkwiyikambila; ami na mulum’ande atwipusha’shi twibakite kyakya akitunganga’shi tukite. Twi bakulupile mwi Yehowa na atwipusha peepi naye.” Léonce na Gisèle mbatwele mu Kalasa ka balungudi ba Bufumu, na lelo uno bakwete kufuba bu ba mbala-mashinda ba nsaa yoso bakwashi.

Nka bu balobi ba mishipa abanyingila nkalakashi ilekene bwa kukwata mishipa i bungi, baba boso balukile mu maumbo abo, mbesumine ingi myanda bwa kukwasha baba boso basha mashimba alombane bwa kupusha mukandu wa Bufumu. Yehowa ta mwilwankane bano balungudi ba sha kisumi bwa kifulo kyabadi baleshe bw’eshina dyaye. (Ne. 5:19; Eb. 6:10) Su we mu dingi eumbo na mwiumbo dyenu mwi lukalo lwa balungudi, we mulombene kwimwalukila su? Su okita byabya, Yehowa akwelela myabi i bungi.​—Nki. 10:22.