SÖMËNI baaa ku sisa di bi foloisi kumutu a di köndë ka de pai de di bi go wooko a wan woto köndë, ta toona go libi a di köndë dë baka. U di de lobi Jehovah, söseei u di de lobi woto sëmbë, mbei de ta foloisi go libi a kamian ka de abi möön peleikima fanöudu (Mat. 22:37-39). Andi ku andi de bi musu du, nöö unfa Jehovah bi mbei de feni gaan bunu? Wë boo go luku unfa soni bi waka a wan köndë de kai Kamelun, di dë na Afiikan.

A di jaa 1998, hën wan baaa de kai Onésime, bi foloisi kumutu a Kamelun, di köndë ka de pai ën, go libi a wan woto köndë. A bi libi söwan 14 jaa longi a di woto köndë. Ma wan daka, di a bi dë a wan komakandi fuu, hën a jei wan woto di bi nama ku di peleikiwooko, a wan taki di wan baaa bi hoi. Di baaa di bi hoi di taki, bi taki taa: „Ee tu sëmbë di dë mati go kisi fisi a tu peipei kamian, ma wan ta kisi fisi möön di wotowan, nöö di wan di an ta kisi fisi sö an o go ka a sa kisi möön hia fisi ö?”

Di woto dë bi mbei Onésime go pakisei u toona go a Kamelun u heepi dee peleikima fu ala. Sömëni sëmbë u di köndë dë bi kë lei soni u Bëibel. Ma a bi ta booko hën hedi ku so soni. A bi o sa ko guwenti di libi u di köndë dë jeti, hii fa a bi libi a woto köndë sömëni jaa longi ö? Wë Onésime bi go luku di köndë Kamelun sikisi liba longi. Bakaten, a di jaa 2012, hën a foloisi go libi ala.

Onésime bi taki taa: „Mi bi musu ko guwenti di kendi sonu, ku di fasi fa dee sëmbë u di köndë ta libi. Mi bi musu ko guwenti dee sutuu dee bi dë a di Könuköndë zali. De an bi dë putuu. Ma möön mi bi ta buta pakisei a di komakandi, möön mi bi ta fëëkëtë dee putuputu sutuu u dee woto Könuköndë zali.”

A di jaa 2013, hën Onésime tööu ku wan sisa de kai Géraldine. Di sisa aki bi ta libi a Gaan Faansiköndë nëigi jaa longi, ma a bi toona go libi a Kamelun. Un gaan bunu Jehovah bi mbei de feni u di de bi buta di kë u Jehovah a di fosu kamian a de libi? Onésime bi taki taa: „Mi ku mi mujëë bi sa go a di Siköö da Könuköndë Peleikima, nöö nöunöu u ta wooko a Bëtëli. A di jaa di pasa aki, 20 sëmbë u di kemeente fuu, di bi ta lei soni u Bëibel dopu. Mi ta fii taa mi dë a di soifi kamian u du di ’fisi wooko’” (Maik. 1:17, 18). Géraldine bi taki taa: „Mi feni gaan bunu möön fa mi bi mëni.”

Wan sisa de kai Judith bi foloisi go libi na Amëëkanköndë, ma a bi kë du möön soni da Jehovah. Di sisa aki bi taki taa: „Te mi go luku dee famii u mi a Kamelun, nöö te di juu ta dou u mi toona ko a wosu, mi ta këë u di mi musu go disa dee sëmbë dee mi bi bigi lei soni u Bëibel.” Tökuseei Judith an bi kë toona go libi a Kamelun. A bi abi wan wooko di bi ta paka bunu. Nöö sö a bi sa heepi hën tata di bi ta libi a Kamelun, faa  paka data, u di a bi dë ku suwaki. Ma hii fa soni bi dë sö, Judith buta futoou a Jehovah, hën a toona go libi a Kamelun baka. A bi taki bakaten taa a bi ta hangi so soni di a bi abi na Amëëkanköndë. Ma a begi Jehovah faa heepi ën faa sa ko guwenti so soni baka. Söseei di keling-gaanwomi ku hën mujëë bi dëën taanga.

Judith bi taki taa: „A dii jaa dendu, mi bi sa heepi fö sëmbë u de dopu.” Judith bi bigi du di apaiti-pioniliwooko. Nöö tide hën ku hën manu de kai Sam-Castel, ta du di keling-wooko. Ma andi bi pasa ku Judith tata? Wë di sisa aki makandi ku dee famii fëën bi feni wan hatiwosu a wan woto köndë, di bi dë kabakaba u du wan opalasi da hën tata söndö paka. Soni bi waka bunu da di tata.

Wan baaa de kai Victor bi foloisi go libi a di köndë Kanada. Di a bi lesi wan Hei Wakitimawosu di ta taki u hei siköö, hën a bi go pakisei luku unfa soni dë dëën a di pisi dë. A disa di Universiteit ka a bi nango, hën a go a wan siköö ka a bi o sa lei wan wooko hesihesi. Di baaa aki bi taki taa: „A bi heepi mi u mi feni wan wooko möön hesi. Söseei a heepi mi u mi bigi du di pioniliwooko. Di soni dë mi bi kë du gaanduwe kaa.” Bakaten, Victor tööu ku wan sisa de kai Caroline. Di baaa aki ku hën mujëë bi go luku di köndë Kamelun. Di de go luku di bëikantoo u di köndë dë, hën so u dee baaa da de taanga u de luku ee de bi o sa du di diniwooko a Kamelun. Victor bi taki taa: „Soni an bi dë di bi o mbei u taki nönö, söseei wa bi ta biinga a gudu baka. Fëën mbei u bi foloisi go a Kamelun.” Hii fa di gösöntu u Caroline an bi dë bunu hii juu, tökuseei de buta taa de o go.

Victor ku Caroline bi bigi du di kowoonu pioniliwooko, u di de bi ta miti sömëni sëmbë di bi kë ko sabi möön soni u Bëibel. U di de bi buta möni a wan së, mbei bigibigi de an bi abi fu wooko. Ma baka wan pisiten, hën de go wooko a di köndë Kanada wantu liba longi, hën de toona go a Kamelun, go du di pioniliwooko go dou. Un gaan bunu Gadu bi mbei de feni? De bi go a di Siköö da Könuköndë Peleikima, de bi du di apaiti-pioniliwooko, ma nöunöu de ta heepi mbei kamian u dini Gadu. Victor bi taki taa: „U di u bi disa dee soni dee u bi abi, mbei u bi musu möön buta futoou a Jehovah, nöö Jehovah an disa u.”

A di jaa 2002, hën wan baaa de kai Alain, di bi nango a Universiteit na Alumanköndë, bi lesi wan talakitaati fuu de kai Yonguwan​—San unu o du nanga un libi? Dee soni dee a bi lesi bi heepi ën faa buta njunjun maaka da hënseei. A di jaa 2006, hën a go a di Dinai-siköö. Baka di dë, de hakisi ën faa go dini a Kamelun, di köndë ka de bi pai ën.

Di a foloisi go ala, hën a feni wan wooko ka a bi sa wooko wantu daka a di wiki nöö. Bakaten a bi ko feni wan woto wooko ka de bi o pakëën möön bunu. Ma Baaa Alain bi ta booko hën hedi, u di di wooko bi sa mbei an du di peleikiwooko kumafa a bi naa. Fëën mbei di dee baaa hakisi ën faa du di apaiti-pioniliwooko, wantewante a piki aai. Di basi fëën bi taki taa a bi o pakëën möön hia möni seei, ma di baaa du di soni di a bi buta taa a o du. Bakaten di baaa aki tööu ku wan sisa de kai Stéphanie. Di sisa aki bi ta libi sömëni jaa longi a Gaan Faansiköndë. Andi bi ta taanga da di sisa aki di a bi foloisi go libi a Kamelun?

Stéphanie bi taki taa: „Mi bi ko abi pikipiki suwaki. Ma mi bi sa feni heepi da de.” Di baaa ku hën mujëë bi feni gaan bunu u di de bi hoi dou. Baaa Alain bi taki taa: „Di u bi go peleiki a wan longi kamian de ta kai Katé, hën u bi feni wantu sëmbë di bi kë lei soni u Bëibel. U bi lei de soni u Bëibel ku tëlëfön. Bakaten tu u dee sëmbë aki bi dopu hën  de bi ko abi wan kulupu peleikima ala.” Stéphanie bi taki taa: „Soni an ta mbei u wai möön di heepi di u ta heepi wan sëmbë faa buta hën libi a Jehovah maun. Di u ko libi aki, u si ën sömëni pasi kaa.” Nöunöu Alain ku Stéphanie ta du di keling-wooko.

Wan sisa de kai Gisèle, bi dopu di a bi nango a wan siköö a Italiaköndë faa sa toon data bakaten. A bi lobi di fasi fa di baaa ku hën mujëë dee bi lei ën soni u Bëibel, bi ta libi. Di baaa ku hën mujëë bi ta du di pioniliwooko, nöö Gisèle bi kë du möön soni a di peleikiwooko tu. Di Gisèle bi ta kaba di siköö fëën, a bi bigi ta du di kowoonu pioniliwooko.

Gisèle bi kë toona go a Kamelun, faa sa dini Jehovah möön gaanfa. Ma a bi ta booko hën hedi ku so soni. A bi taki taa: „Ma bi o abi pampia möön u mi sa libi a Italiaköndë, söseei ma bi o dë makandi ku dee mati u mi ku dee famii u mi dee ta libi a Italiaköndë möön.” Ma hii fa Gisèle bi ta fii sö, tökuseei a sebitaa-liba u di jaa 2016, a toona go libi a Kamelun baka. Baka wan pisiten, a tööu ku wan baaa de kai Léonce. Di bëikantoo a Kamelun bi hakisi de u de go libi a wan foto de kai Ayos, u di de bi abi möön Könuköndë peleikima fanöudu ala.

Unfa di libi bi dë a di foto Ayos? Gisèle bi taki taa: „Sömëni pasi a pasa taa faja an bi dë sömëni wiki longi, nöö dee tëlëfön fuu bi ta dë tapatapa. Mi bi musu ko sa’ u boi soni a pau faja, söseei a ndeti u bi musu go ku kolowagi ku batilëi fuu kisi wata a wan baaku wata. U bi nango a ndeti u di sëmbë an bi nango hia ala a di ten dë.” Andi bi heepi de u de hoi dou? Gisèle bi taki taa: „Di jeje u Jehovah, di da di u bi ta da useei taanga, di taanga di u bi ta feni a dee famii ku mati fuu, ku di heepi di de bi ta heepi u a di së u möni, bi heepi u fuu pasa dee ten dë.”

Gisèle ta wai taa a toona go libi a di köndë ka de pai ën u? Wë aai! A taa: „An ta hati mi seepiseepi. Bigibigi soni bi ta taanga da u, söseei so juu u bi ta lasi hati. Ma di u bi pasa dee soni dë, hën mi ku mi manu bi fii taa u bi du di soni di u bi musu du. U ta futoou Jehovah, nöö u ta fii taa u ku ën dë möön gaan mati.” Léonce ku Gisèle bi go a di Siköö da Könuköndë Peleikima, nöö nöunöu de ta du di apaiti-pioniliwooko u wan pisiten.

Leti kumafa sëmbë di ta kisi fisi ta lei taa de abi degihati, hii fa soni sa ta taanga da de u de kisi fisi, sö nöö dee baaa ku dee sisa dee ta toona go libi a di köndë ka de pai de, ta dë kabakaba u mbei taanga möiti u heepi dee sëmbë dee ta kë haika di bosikopu u di Könuköndë. Jehovah an o fëëkëtë dee peleikima aki, u di de bi lei taa de lobi ën (Neh. 5:19; Heb. 6:10). Ee i ta libi a wan woto köndë ma de abi möön peleikima fanöudu a di köndë ka de pai i, i bi o sa toona go libi ala baka u? Ee i du di soni aki, Jehovah o mbei i feni gaan bunu.​—Nöng. 10:22.