BAZALWANE kanye nabodzadze labanyenti labashiya emave abo baya kulamanye kuze bayokwakha imali lenyenti sebabuyele emaveni labatalwa kuwo. Ngesizatfu sekutsi bayamtsandza Jehova kanye nalabanye bantfu, batfutsele etindzaweni lapho khona kunesidzingo sebamemeteli. (Mat. 22:37-39) Ngukuphi kutidzela labakwentile, futsi ngutiphi tibusiso labatitfolile? Asesicoce ngelive lase-Cameroon leliseNshonalanga ye-Africa.

Nga-1998, umzalwane lokutsiwa ngu-Onésime wahamba eCameroon, lokulive latalelwa kulo. Kwaphela iminyaka lengu-14 ahlala kulelinye live. Ngalelinye lilanga asemhlanganweni welibandla, weva umfanekiso lomayelana nemsebenti wekushumayela. Lesikhulumi satsi: “Nangabe bangani lababili badweba timfishi etindzaweni letehlukene, futsi munye wabo atfola timfishi letinyenti kunalolomunye, lona lotfola letincane angeke yini aye kulendzawo lapho kunaletinyenti khona?”

Lomfanekiso wenta Onésime wacabanga kubuyela eCameroon lapho kunebantfu labanyenti khona labafuna kufundza liBhayibheli. Kodvwa bekakhatsatekile. Bekatawukhona yini kuphindze ahlale eCameroon ngemuva kweminyaka leminyenti kangaka angekho khona? Kuze abone, Onésime wavakashela eCameroon tinyanga letisitfupha. Nga-2012, wabese uyatfutsa uyohlala eCameroon.

Onésime utsi: “Kwadzingeka ngetayelane nekushisa kwalendzawo kanye nesimo sakhona sekuphila. NangiseHholweni leMbuso, kwadzingeka ngiphindze ngetayele kuhlala emabhentjini.” Onésime uchubeka utsi: “Nangichubeka ngilulalelisisa luhlelo lwemhlangano, bengikhohlwa ngetitulo letintofotelako temaHholwa lebengike ngaba kuwo.”

Nga-2013, Onésime washada naGéraldine, lobesekabuyele eCameroon ngemuva kwekuhlala eFrance iminyaka lengu-9. Jehova wababusisa njani laba labashadene ngenca yekwenta intsandvo yakhe ite kucala ekuphileni kwabo? Onésime utsi: “Sobabili saya eSikolweni SebaVangeli BeMbuso futsi sakhonta eBethel. Kulomnyaka lophelile, kubhajatiswe bafundzi beliBhayibheli labangu-20 ebandleni letfu. Nyalo sengiyabona kutsi sengisendzaweni lekahle ‘yekudweba.’” (Mak. 1:17, 18) Géraldine utsi: “Ngitfole tibusiso letinyenti kunaleto bengiticabanga.”

Judith waya e-United States kodvwa bekanesifiso sekwenta lokwengetiwe emsebentini wekushumayela. Utsi, “Njalo nasengihamba ngemuva kwekuvakashela ekhaya eCameroon, bengikhala ngobe besekufanele ngibashiye bantfu lebesengifundza nabo liBhayibheli.” Nobe kunjalo, Judith bekangaciniseki ngekutsi  bekufanele yini abuyele eCameroon. Bekanemsebenti loholela kahle futsi lobewumvumela kutsi akhone kubhadala tindleko tababe wakhe tasesibhedlela eCameroon. Kodvwa Judith bekametsemba Jehova, futsi wabuyela emuva ekhaya. Akaphiki kutsi bekatikhumbula letinye tintfo letinhle lebekatitfola nakasahlala eMelika. Wathantaza kuJehova wamcela kutsi amsite etayelane nesimo lesekakuso futsi wasitwa nasikhutsato lasitfola kumbonisi wesigodzi nemfati wakhe.

Nakabuka emuva, Judith utsi, “Eminyakeni lemitsatfu nje kuphela, ngajabulela kusita bantfu labane kutsi babhajatiswe.” Judith wase ucala kukhonta njengelihlahlandlela lelikhetsekile. Lamuhla, ukhonta nendvodza yakhe Sam-Castel, lengumbonisi wesigodzi. Kodvwa kwentekani ngababe waJudith? Judith kanye nemndeni wakhe bakhona kutfola sibhedlela lesikulelinye live lebesitawubhadala tindleko tekuhlindvwa tababe wakhe. Lokujabulisako kutsi lokuhlindvwa kwahamba kahle.

Umzalwane lokutsiwa nguVictor watfutsela eCanada. Ngemuva kwekufundza sihloko lesikuSicongosekulindza lebesikhuluma ngemfundvo lephakeme, wacabanga ngemfundvo yakhe. Wayekela kuya eNyuvesi wase ufundzela likhono. Victor utsi: “Loko kwangisita ngasheshe ngatfola umsebenti futsi ngakhona kuba lihlahlandlela njengobe bengisolo ngifisa.” Ngekuhamba kwesikhatsi, Victor washada naCaroline, futsi bavakashela eCameroon. Nabefika khona, bavakashela lihhovisi leligatja futsi bakhutsatwa kutsi bacabangele kutewukhonta eCameroon. Victor utsi: “Besite sizatfu sekwala, futsi ngenca yekutsi besesente kuphila kwetfu kwaba melula, besingasemukela lesabelo.” Ngisho nobe Caroline bekanetinkinga temphilo, bakhetsa kusemukela lesabelo.

Victor naCaroline bacale baba ngemahlahlandlela lavamile kuze basite bonkhe bantfu labahlangana nabo kutsi bafundze liBhayibheli. Bebatibekele imali leyenele kuze bangenti umsebenti wekutiphilisa, kodvwa bente umsebenti wekushumayela. Ngemuva kwaloko, baya eCanada tinyanga letimbalwa, lokwabenta bakhona kuphindze babuye eCameroon bachubeke nekuba ngemahlahlandlela. Ngutiphi tibusiso labatitfola? Baya eSikolweni SebaVangeli beMbuso, baba ngemahlahlandlela lakhetsekile futsi nyalo benta umsebenti wekwakha. Victor utsi, “Kushiya tintfo lesititsandzako kwasisita sabona kutsi Jehova uyasisekela.”

Nga-2002, Alain, lobekangumfundzi enyuvesi yaseGermany, wafundza lipheshana lelitsi Basha—Niyokwenzani Ngokuphila Kwenu? Loko lakufundza kwamkhutsata kutsi atibekele imigomo lemisha. Nga-2006, waya eSikolweni Sekuceceshelwa Imisebenti YebuKhristu futsi wabelwa kutsi aye eCameroon, eveni latalelwa kulo.

ECameroon, Alain watfola umsebenti lebekawenta emalanga latsite. Ngekuhamba kwesikhatsi, watfola umsebenti loholela kahle, kodvwa bekakhatsatekile ngekutsi besewutamenta angasabi nesikhatsi lesinyenti sekwenta umsebenti wekushumayela. Ngako, nakacelwa kutsi abe lihlahlandlela lelikhetsekile, wavele wavuma ngekushesha. Umcashi wakhe wetsembisa kumengetela umholo, kodvwa Alain besekavele asentile sincumo. Ngekuhamba kwesikhatsi, Alain washada naStéphanie, lobesekuphele iminyaka leminyenti ahlala eFrance. Ngubuphi bumatima  Stéphanie labhekana nabo ngemuva kwekutfutsela eCameroon?

Stéphanie utsi: “Bengihle ngiba netinkinga temphilo nema-allergie, kodvwa bengiyitfola imitsi letangisita.” Laba labashadene babusiswa ngenca yekutikhandla kwabo. Alain utsi: “Nasiye kuyoshumayela endzaweni lekhashane lokutsiwa yiKaté, satfola bantfu labambalwa lebebafuna kufundza liBhayibheli. Ngekuhamba kwesikhatsi, sakhona kubafundzela liBhayibheli sisebentisa lucingo. Lababili balabafundzi babhajatiswa, futsi kwase kwakhiwa licembu.” Stéphanie uchubeka utsi: “Kujabulisa kakhulu kusita bantfu kuze bakufanelekele kunikela kuphila kwabo kuJehova. Ngekukhonta lapha, leyo njabulo siyitfole tikhatsi letinyenti.” Lamuhla, Alain ungumbonisi wesigodzi nemfati wakhe Stéphanie.

Gisèle wabhajatiswa ngesikhatsi asesikolweni sebudokotela e-Italy. Wayijabulela imphilo lemelula yemahlahlandlela lamfundzisa liBhayibheli, futsi Gisèle bekafuna kwenta lokunyenti ekukhonteni Jehova. Gisèle wacale waba lihlahlandlela lelivamile nakasacedzela imfundvo yakhe.

Gisèle bekafuna kwenta lokunyenti emsebentini waJehova eCameroon, kodvwa bekunalokumkhatsatako. Utsi, “Besekufanele ngiyekele kuhlala e-Italy ngalokusemtsetfweni futsi besengitawehlukana nebangani bami nemndeni wami lebebahlala e-Italy.” Nobe kunjalo, ngaMay 2016, Gisèle wabuyela eCameroon.Ngekuhamba kwesikhatsi, washada na-Léonce, futsi lihhovisi leligatja laseCameroon labakhutsata kutsi baye e-Ayos, lokulidolobha lelinesidzingo lesikhulu sebamemeteli beMbuso.

Beyinjani imphilo e-Ayos? Gisèle utsi: “Bekuvame kuphela emaviki kute gesi futsi besingakhoni kutifaka umlilo tincingo tetfu. Sikhatsi lesinyenti, tincingo tetfu betingasebenti. Ngafundza kupheka ngephandle, futsi ebusuku besivame kuhamba ngemabhala sikhanyise emathoshi siyokha emanti emfuleni ngobe bebasuke sebabancane bantfu.” Yini leyasita laba labashadene kutsi bacinisele? Gisèle utsi: “Sasitwa ngumoya waJehova, kusekelana, sikhutsato kanye nekusekelwa ngetimali ngumndeni wetfu nebangani betfu.”

Gisèle uyajabula yini ngekutsi wabuyela eveni latalelwa kulo? Yebo! Utsi: “Besihle sibhekana nabo bumatima futsi sitiva siphelelwa ngemandla, kodvwa nasesikuncobile loku, mine nendvodza yami besitiva shengatsi sente loko lobekufanele sikwente. Siyametsemba Jehova, futsi siva shengatsi sesisondzele kakhulu kuye.” Léonce naGisèle baya eSikolweni SebaVangeli beMbuso, futsi nyalo bangemahlahlandlela lakhetsekile esikhashana.

Njengebadwebi labakhombisa kuba nesibindzi ngisho nobe babhekene nebumatima kuze babambe timfishi letinyenti, labo lababuyela emaveni labatalelwa kuwo, bakhombisa kuba nesibindzi ngobe bayatidzela kuze basite labo labalalela umlayeto weMbuso. Siyaciniseka kutsi Jehova utawubakhumbula labamemeteli labatikhandlile ngenca yelibito lakhe. (Neh. 5:19; Heb. 6:10) Nangabe uhlala kulelinye live futsi kunesidzingo sebamemeteli beMbuso eveni lowatalelwa kulo, ungakhona yini kubuyela khona? Nawungabuyela, Jehova utakubusisa kakhulu.—Taga 10:22.