BALUPUA ni bankazi bengi baafumine mu byalo byabo, ni kukuukila mu byalo bya bueni bili ni buyantanzi, baabuelele mu byalo byabo bya kavyalilo. Kumutona Yehova ni mwikazi-naabo kwabakinkiziizie bakuukile mu nkeende ikabiilue ba kasimika bengi ba Bukolo. (Mat. 22:37-39) Baalangiliile siani kwipeela, kabili Yehova waabapaalile siani? Eevi kumana, tuli kulondoluela saana kyalo kya Cameroun.

Mu 1998, lupua Onésime waafumine mu kyalo kyakue kya kavyalilo kya Cameroun. Waakitile miaka 14 wali mu kyalo kya bueni. Busiku bumo ku kulonghaana kwa Kikristu, waaunvuile mufuano umo waaleetelue palua miilo ya kusimikila. Mulanzi waalandile eevi: “Tulande babibuza babili bali mu kuloba mu nkeende yapuseene, umo wakwata nsabi ingi kumukila mwinakue. Eba, mwinakue taviinda kukuukila mu nkeende muli mukumoneka nsabi ingi, muli mukulobela ozo kibuza wakue?”

Ozo mufuano waamukinkiziizie Onésime atontonkanie palua kubuela mu kyalo kyakue kya Cameroun, mwaali bantu bengi batonene kusambilila Bibilia, kabili eevi akwasiane miilo ni bakasimika ba kooko. Inzi, waali watwisika. Eba, wakaviinda kwipatanisia ni buikazi bwa kale bwa kwabo kisia kupua miaka ingi wali mu kyalo kya bueni? Eevi kumona kine wakaba kuviinda, Onésime waaendeele mu kyalo kya Cameroun, ni kupuamo miezi sita. Kisia paapo, mu muaka wa 2012, waakuukile loonse.

Onésime walanda eevi: “Naali napalile kwipatanisia ni aali ya lyuza ni buikazi bwa mu Cameroun. Mu Nsesi ya Bukolo, naali napalile kwizibila kabili kwikala pa bitebe bya mbao.” Watwalilila kulanda eevi wasekele: “Inzi, kutwalilila kutonta maano ku kulonghaana, kwaandengele ngie naya nalaba beelia bitebe biweeme bya mu Nsesi ya Bukolo ya koolia kunaali.”

Mu 2013, Onésime waamuupile Géraldine, waali wabuelele mu Cameroun kisia kwikala miaka kenda mu kyalo kya Ufaransa. Paantu baabiikile kutona kwakue Yehova pa ntaanzi, baapatile mpaalo ki? Onésime walanda eevi: “Twaaile kusoma Masomo a Bakabilambila ba Bukolo ni kubombela ku Beteli. Kakiine, mu muaka umo sie, basambi ba Bibilia 20 baabatiziiziwe mu kilonghaano kyetu. Loonu, naiunvua nangue ndi mu nkeende mwa ‘kuloba’ mupalile.” (Mark. 1:17, 18) Géraldine watwalilila eevi: “Nakipata mpaalo ingi kukila vinakiba naswapiile.”

Judith waakuukiile ku Amerika, inzi waali watonene saana kutania miilo yakue ya kusimikila. Walanda eevi, “Kila musita unaali nasyabuela ku Amerika kufuma mu Cameroun kwendela lupua lwane, naali nalila paantu naali nasia basambi bane ba Bibilia.” Anzia evio, Judith abanga watwisika kubuela ku Cameroun. Abanga wali ni miilo  yaali yalipa nfalanga ingi ibanga yamukwasia kulipa matunzo akue baba wakue waali waikeele ku Cameroun. Inzi, Judith waamuswapiile Yehova ni kukuuka. Walanda nangue waasiile bintu kampanda ao aali iweeme yabanga waali naayo ku Amerika. Waapepele kuli Yehova eevi amukwasie kwipatanisia ni aali, kabili waakwasiiziwe na kangalila wa muputule pamo ni mukazi wakue baamukoseleziizie.

Musita lwali walanguluka bintu byaakitikile, Judith walanda eevi, “Mu miaka itatu naali ni nsaansa ya kupata baana bana ba kimupasi.” Judith waatendekele kubomba waali painia ebeleele. Loonu, ali mukubomba pamo ni mulume wakue Sam-Castel, mu miilo ya bukangalila bwa muputule. Ale palwakue baba wakue kwa Judith? Weene pamo ni lupua lwakue, baapatile lupitalo, mu kyalo kya bueni, lwaaitabiile kukwasia operasio yakue baba wakue. Kabili kya kusaansamusia, operasio yaapitile buino.

Lupua umo ali wakuutua Victor, waakuukiile ku Canada. Kisia kusoma lyasi limo mu Lupungu Lwakue Kamwenenena lyaali lyalandila palua masomo a pamuulu, waatontonkaniizie palua masomo akue. Waapinguile kulekela kusoma masomo ku iniversite ni kutendeka kukoonka masomo a musita uniini a bufundi bwa miilo ya minue. Walanda eevi: “Keekio kyaankwasiizie kupata miilo bila kukokola, ni kukita keelia kinaali natonene saana kukita​—bupainia.” Kisia paapo, Victor waamuupile Caroline, bonse babili baaendeele ku Cameroun. Lubaali kooko, baaendeele ku musambo, baakinkiziiziwe kutontonkania kine kunti babombela mu Cameroun. Victor walanda eevi, “Te twaamwene nsaambu ya kutulengia tukaane, paantu buikazi bwetu bubanga bwaleengele, pakaako twaamwene nangue kunti twaitabila mukupo ozo.” Anzia kine Caroline abanga wali ni maavia mu bukose bwakue, baapinguile kukuuka.

Ba Victor ni Caroline baatendekele kubomba bupainia bwa loonse, eevi kukwasia bantu baali batonene kusambilila Bibilia mu kazonga mu baakuukiile. Musita kampanda, nfalanga yabo ibabanga basuungile yaabakwasiizie te kunti babombe miilo inge ku ntendeko. Kisia paapo, baabuelele kubomba ku Canada mu miezi iniini, kukita evio kwaabakwasiizie kubuela ku Cameroun ni kutwalilila ni bupainia. Baapatile mpaalo ki? Baasomene Masomo a Bakabilambila ba Bukolo, baabombele bali bapainia, kabili loonu ni babombi mu miilo ya kukuula. Victor walanda eevi, “Kusia nkeende yeetu iweeme kwaatupeele fuasi ya kwimwena Yehova vyali wakwasia.”

Mu 2002, Alain, waali wasoma ku iniversite ya ku Ujerumani, waasomene trakti imo yaali yalanda nangue: Vijana​—Mtatumiaje Maisha Yenu? Mpunda yaali mu ezio trakti, yaamukinkiziizie ebiikile mipaango ya leenu. Mu 2006, waasomene masomo aali akuutua, Shule ya Mazoezi ya Kihuduma, ni kutumua mu Cameroun, kyalo kyakue kya kavyalilo.

Mu Cameroun, Alain, waapatile miilo ya kubomba nsiku kampanda mu mulungu. Kisia paapo, waapatile miilo ya kulipua nfalanga ingi, inzi waatendekele kutwisika nangue kunti yalengia musita wakue wa kusimikila waaluke uniini. Pakaako, musita lwaakupilue abombe waali painia ebeleele, waaitabiile bila kutwisika. Mukulu wakue wa miilo waamwanine nangue wakaba kumupeela nfalanga ingi, inzi Alain, waasiele sinta ni bupinguzi bwakue. Kisia paapo, Alain waamuupile Stéphanie, waakitile miaka ingi waikeele mu kyalo kya Ufaransa. Nkazi Stéphanie waapatile maavia ki kisia kukuukila ku Cameroun?

 Stéphanie walanda eevi: “Naali naluala, inzi naakitile maka kupata matunzo aali akeefiako maluele ane.” Babo balupua ni nkazi baapaalilue paantu baasipikiziizie. Alain walanda eevi: “Musita utwaile kusimikila mu kazonga ka kule, mu muzi uli wakuutua Katé, twaapatile bantu bengi baali batonene kusambilila Bibilia. Kisia paapo, twaaviindile kusambilila Bibilia pamo naabo kupitila telefone. Basambi babili baafikiile kubatiziiwa ni kitente kya bakasimika kyaatendekeziiziwe.” Stéphanie walanda kabili eevi: “Tekuli kintu kinge kili kyaleeta nsaansa kukila kukwasia bantu bamupeele Yehova buikazi bwabo. Kubombela koonu kwakilengia tunvue ezio nsaansa lingi.” Loonu, Alain ni Stéphanie bali mukubombela mu miilo ya muputule.

Gisèle waabatiziiziwe lwali wakili mukusoma masomo a bumunganga mu kyalo kya Italia. Waapapiiziwe na buikazi buleengele bwaali na ba mulume ni mukazi baali bamusambilizia Bibilia, kabili watonene saana kubomba miilo ya kusimikila. Gisèle waatendekele miilo ya bupainia bwa loonse wasyapuililila masomo.

Gisèle waali ni nkulu ya kukita bingi mu miilo yakue Yehova mu Cameroun, inzi waali watwisika. Walanda eevi, “Naali napalile kuzeezia nsaambu yane ya kwikala mu Italia, ni kusia babibuza bane ni bantu ba mu lupua ba mu Italia.” Anzia evio, mu Muezi wa 05, 2016, Gisèle waakuukiile ku Cameroun. Musita kampanda, baaupeene ni Léonce, ni biro ya musambo ya mu Cameroun yaabalandile baye babombele ku Ayos, muzi waali wakabiile saana bakasimika bengi ba Bukolo.

Buikazi bwali siani mu muzi wa Ayos? Gisèle walanda eevi: “Lingi kura yaali yapua milungu ingi yaile, ni pakaako te twali twaingizia kabili mulilo mu ma telefone etu. Lingi teaali abomba. Naasambiliile kwelekela na nkuni, kabili twali twaya kutapula menda twali ni brueti busiku, twatweme torshi, musita bantu lubaali bakeepa ku menda.” Ni kiki kyaabakwasiizie kusipikizia? Gisèle walanda eevi: “Mupasi wakue Yehova, mulume wane waali wankwasia, kukoseleziiwa, ni musita kampanda kutuminuako nfalanga na bantu ba mu lupua ni babibuza, byaatukwasiizie.”

Eba, Gisèle ali ni nsaansa paantu waabuelele ku kyalo kyabo kya kavyalilo? Walanda eevi: “Een! Bila kutwisika ata kaniini. Kakiine ku ntendeko twaali ni maavia ni kwiunvua kutioka mutima, inzi kisiasie kwanzia azo maavia onse, neene ni mulume wane twaamwene nangue twaakitile keelia kyenka kitwali twapalile kukita. Tumuswapiile Yehova ni kwiunvua kuya twali peepi nakue.” Ba Léonce ni Gisèle baasomene Masomo a Bakabilambila ba Bukolo, kabili loonu bali mukubomba bali bapainia bebeleele ba musita kampanda.

Nga balobi bali balangilila kusipa anzia maavia apusene-puseene eevi bapate nsabi ingi, baalia bali babuela mu byalo byabo bya kavyalilo bali baipeela mu kwitonena eevi kukwasia bantu bali ni aali iweeme ya mutima bali baitabila mpunda ya Bukolo. Kakiine Yehova takaba kulaba ata kaniini ntono ya babo bakasimika bali ni mute, ibali mukulangilila palua liina lyakue. (Neh. 5:19; Baeb. 6:10) Kine wikeele mu kyalo kya bueni, ni mu kyalo kyenu kya kavyalilo mukabiilue bakasimika ba mpunda ya Bukolo, eba, kunti wabuela? Kine wakita evio, wakaba kupata mpaalo ingi.​—Tus Maf. 10:22.