Vandriyathu nya vangi va nga ba va digide mayigo yawe vaya thumeya ga mambe mayigo gasi gu mana dzitsapawu olu vo bweleya gambe mayigoni yawe. Khu gu kutswa khu lihaladzo lawe khu Jehovha ni vathu, avo va di hongola malangani gu vbwetegago vahuweleyi. (Mat. 22:37-39) Gu dzigaradza muni va gu giridego nigu Jehovha va tshatshazede kharini? Gasi gu tugula isoso hongoleni Afrika Ocidental ga Camarões.

Khu 1998 ndriyathu Onésime a di fuluga tigoni gwaye nya mavelego Camarões. Uye vbedzide 14 myaga na vbanya ga limbe litigo. Litshigu limwedo nari mitshanganoni nya wuKristo pwide giyeyedzo nyo khaguri maningano ni thumo nyo tshumayele. Muganeyi a di khuye: “Nga dundrugeya khu dzipari dzimbili dzi gogago ga malanga nyo hambane. Mweyo yomo ga wulanga gu gu ni dzindzandzi nya dzingi ganiolu yimbe yomo ga wulanga gu gu mwalo dzindzandzi nya dzingi. Ina eyi yi gomogo ga wulanga gu gu mwalo dzindzandzi nya dzingi, yi di hadzi gu mba hongola ga wulanga gu gu ni dzindzandzi nya dzingi?”

Giyeyedzo gegi gi giride gu Onésime a dundrugeya khu gu bweleya Camarões omu vathu nya vangi va nga ba va vbweta gu hevbula Bhibhiliya. Ganiolu uye garadzegide. Ina si di hadzi mu vbevbugeya gambe gu ya vbanya Camarões hwane nyo ba a vbanyide myaga nya yingi ga limbe litigo? Gasi gu wona gu a na si kodza gani, Onésime a di ya khalanyana gitepwana nyo ningane 6 migima Camarões. Khavbovbo, khu 2012 a di bweleya a ya khala iyoyo.

Onésime a di khuye: “Nyi di ya vbanya omu gu nga ba gu vbisa ngudzu nigu mavbanyelo yangu ma di vbindrugedza. Salawuni nya Mufumo si lombide gu nyi ya khaleya dzibhanku gambe. Ganiolu, nyi di vega gupima avba nya mitshangano.” Uye a di ganeya na mwerugeya khuye: “Nyi di divala dzikadera nya dzadi dzi nga ba dziri Salawuni nya Mufumo nyi nga ba nyiri iyo gale.”

Khu 2013, Onésime a di tshadha ni Géraldine, oyu a bweledego Camarões hwane nyo vbanye França khu 9 myaga. Jehovha a va tshatshazede kharini kholu va thangisidego gu gira gu gola gwaye womini gwawe? Onésime wari khuye: “Hi hongode hatshavbo ga Xikola nya vavhangeli nya Mufumo hi bwe hi thuma Bheteli. Ga myaga yi vbindridego, 20 sihevbulo nya Bhibhiliya sa libandlani gwathu, si di bhapatiswa. Nyi ngu dzipwa gu kheni olu, nyi womo ga wulanga nya wadi nyo goge.” (Marko 1:17, 18) Géraldine ganede nuye khuye: “Nyi manide makategwa nya mangi aya nyi nga ba nya sa ma vireya.”

Judith fulugide a hongola a ya khala Estados Unidos ganiolu a di gu vbweta gu gira nya singi thumoni wa Jehovha. Uye wari khuye: “Tepo yatshavbo nyi nga ba nyi wuseya valongo Camarões, si di gu nyi vbisa monyo gu bweleya kholu nyi nga ba nyi tshiya sihevbulo nya Bhibhiliya nyi nga ba nyi si phede.” Ambari ulolo, Judith a di gu vhikavhika gu  bweleya Camarões. Uye a diri ni thumo wu nga ba wu mu phasa gu livbeya mirendre papayi waye Camarões. Ganiolu, khu gu tumba Jehovha Judith a di hunga gu bweleya Camarões. Uye a ngu ganeya gu khuye a ngu wu suva womi nya wadi a nga ba ari nawo Estados Unidos. Judith gombede ga Jehovha a lomba gu khuye a mu phasa gu dzi pwananisa ni giemo nya giphya. Nigu tiyisidwe khu muwoneleyi nya gipandre ni mwangadzi waye.

Judith a gu khedza hwane wari khuye: “Ndrani nya myaga miraru nyi tsakide kholu nyi phasidego 4 vathu gu hevbula Bhibhiliya kala va ya bhapatiswa.” Judith a di pheya gu thuma kha nga piyonero nyo hathege. Muhuno, Judith a gu phasedzeya mwama waye Sam-Castel avba nya thumo nyo endreye mabandla. Ganiolu, ginani gi dugeledego papayi wa Judith? Judith ni valongo vaye va di mana yimbe xipitali ga wumbe wulanga avba va si kodzidego gu livbeya sirujiya papayi waye. Egi gi tsakisago khu gu sirujiya yi gimbide gwadi.

Ndriyathu Victor a di fuluga a ya khala Canadá. Hwane nyo leri ndrima nyo khaguri nya Mukhedziseyi yi nga ba yi ganeya khu sihevbulo nyo khugege, uye a di dundrugeya khu sihevbulo saye. Uye a di diga gu hevbula Univhersidhadhe, a gira kursu nya gitepwana. Uye wari khuye: “Isoso si nyi dzumelede gu mana thumo nya mba hweya nyi bwe nyi gira esi nyi nga ba nyi si vbweta khu gale ni gale a gu gu thuma kha nga piyonero.” Hwane nyo ba Victor a tshadhide ni Caroline va di ya wuseya Camarões. Na va gu wuseya Bheteli ya Camarões, vandriyathu nyo khaguri va di va kutsa gu dundrugeya khu gu ta thumeya Camarões. Victor wari khuye: “Kha nga olu hi nga ba hi vbevbugiside womi wathu hi diri mwalo gighelo nyo bombe konvhite yoyo.” Ambari olu Caroline a nga ba ari ni gigaradzo nya madwali avo va di hunga gu fuluga.

Victor ni Caroline va di pheya gu thuma kha nga vapiyonero nya tepo yatshavbo gasi gu phasa ava va nga ba vari ni gu dogoreya nyo hevbule Bhibhiliya. Avo va di vegedzede dzitsapawu nyo eneye, khu kharato, kha sa lomba gu va vbwetedzeya thumo gupheyani. Hwane nya isoso, va di hongola va ya thuma Canadá khu migimana esi si nga va dzumeleya gu bweleya Camarões va ya simama gu thuma kha nga vapiyonero. Makategwa muni va ma manidego? Avo va manide lithomo nyo hongole Xikwatunu nya vavhangeli nya Mufumo, va thuma kha nga vapiyonero nyo hathege nigu olu vomo avba nya thumo nyo vbahe. Victor wari khuye: “Gu vbevbugisa womi wathu si hi dzumelede gu wona giphaso gya Jehovha.”

Khu 2002 Alain a nga ba a hevbula Univhersidhadhe Alemanha, a di leri gidangaliyana gi gu khigyo Jovens como usarão sua vida? Mahungu a ma leridego omu nya gidangaliyana gegi, ma mu kutside gu dzi vegeya misuvo nya yiphya. Khu 2006 a di hongola Escola de treinamento ministerial a bwe a rumedwa Camarões omu a nga velegedwa umo.

Camarões, Alain a di mana thumo a nga ba a thuma khu matshigwana basi. Khu hwane, a di mana thumo nya wadi. Ganiolu, a di gu garadzega khu gu khuye thumo wowo kha wu na nga mu tshiyela tepo nyo tshumayele kha nga edzi a nga ba a gira khidzo gale. Khu kharato, tepo a nga mana konvhite nyo thume kha nga piyonero nyo hathege a di yi dzumeya. Patrawu waye a di tumbisa gu mu hakhisa dzitsapawu nya dzingi, ganiolu, Alain a di bomba, a hunga gu hongola a ya thuma kha nga piyonero nyo hathege. Khu hwane, Alain a di tshadha ni Stéphanie oyu a nga ba a vbanya França khu myaga nya yingi. Sigaradzo muni esi Stéphanie a tshanganidego naso tepo a nga fuluga a ya vbanya Camarões?

 Stéphanie wari khuye: “Nyi di pheya gu dwaladwala nyi bwe nyi manega ni alerijiya, ganiolu, nyi di pheya gu thumwa madwali yaya nyi bwe nyi hawuluga.” Patwa wowu wu tshatshazedwe khu gutimiseya gwawo. Alain wari khuye: “Tepo hi nga hongola hi ya tshumayela ga vhila nyo khaguri yi ranwago pwani Katé, hi di mana vathu nya vangi va nga ba va vbweta gu hevbula Bhibhiliya. Khu hwane, hi di va gimbidziseya sihevbulo nya Bhibhiliya khu gu thumisa telefone. Sivili sa kona si di bhapatiswa nigu gu di girwa tsawa nya vahuweleyi.” Stéphanie wari khuye: “Gi mwalo gilo nyo tsakise ngudzu gu vbindra gu phasa muthu gu hendzeledza womi waye ga Jehovha. Khu gu thuma Camarões, hi manide gu tsaka nya gu khongolo ngudzu khu dzitepo nya dzingi.” Muhuno Alain ni Stéphanie, vomo avba nya thumo nyo endreye mabandla.

Gisèle bhapatisidwe na gu gira kursu nya Medicina Itália. Uye tsakisidwe ngudzu khu gu wona edzi patwa nya vapiyonero wu nga ba wu mu gimbidziseya gihevbulo wu vbevbugisidego khidzo womi wawo, isoso si mu giride a vbweta gu gira nya singi thumoni nyo tshumayele. Khu kharato, na gu ngo keneleya vbadugwana gasi gu vbedzisa kursu yaye, Gisèle a di pheya gu thuma kha nga piyonero nya tepo yatshavbo.

Gisèle a di gu vbweta gu bweleya Camarões gasi a ya gira nya singi thumoni wa Jehovha, ganiolu, a di gu garadzega. Uye wari khuye: “Si lombide gu nyi diga womi nya wadi nyi nga ba nyiri nawo Itália nyi bwe nyi hanbana ni dzipari ni valongo nyi nga ba nyi vbanya navo Itália.” Ambari ulolo, khu Maio nya 2016, Gisèle a di bweleya Camarões. Khu gu gimbiya nya tepo, Gisèle a di tshadha ni Léonce nigu Bheteli ya Camarões, yi di va rumeya gu ya thumeya Ayos lidhoropa gu nga ba gu vbwetega ngudzu vahuweleyi nya Mufumo.

Womi wa Ayos wu di khade kharini? Gisèle wari khuye: “Gu di gu vbindra dzisemana na guri mwalo maghezi nigu si di gu garadza gu karegari dzitelefone. Dzitepo nya dzingi dzitelefone dzi di si thumi. Nyi di hevbuleya guphula khu dzikhuni nigu hi di gu thumisa gikarinyana nya mandza ni lanterna gasi guya rega mati ni wutshigu.” Ginani gi phasidego Gisèle ni mwama waye gu timiseya? Gisèle wari khuye: “Liphuvbo nya guage la Jehovha li hi phaside gu timiseya. Eni ni mwama wangu hi phasanide khu gyathu nigu valongo ni dzipari va hi phasedzede khu gu hi ninga dzitsapawu.”

Ina Gisèle tsakide kholu a nga bweleya tigoni gwaye nya mavelego? Uye wari khuye: “Nyi tsakide khu lisine. Ambari olu gupheyani hi tshanganidego ni sigaradzo si hi giridego hi vbeya tshivba, eni ni mwama wangu hi si kodzide gu si pala hi bwe hi dzipwa na hi tsakide khu guti gu khethu hi giride esi hi nga ba hi yede gira. Hi di tumba Jehovha hi bwe hi dzipwa vbafuvbi Naye.” Léonce ni Gisèle, va di hongola Xikwatunu nya vavhangeli nya Mufumo nigu olu va gu thuma kha nga vapiyonero nyo hathege nya gitepwana.

Gu fana ni mugogi nya dzindzandzi a tiyago hwambo ambari o ba a tshangana ni sigaradzo gasi gu mola dzindzandzi nya dzingi, vale va bweleyago mayigoni gwawe nya mavelego, va ngu vbindrugedza silo nya singi womini wawe gasi gu phasa vale va dzi emisedego gu hakha mahungu nya Mufumo wa Nungungulu. Khu lisine, Jehovha kha na nga divala vahuweleyi vava nya sighingi, ava va yeyedzago lihaladzo khu lina Laye. — Mav. 10:22.