VAMAKWERHU va vanyingi lava nga rhurha va ya matikweni man’wana swaku va ya tirha va kuma male ya yinyingi, swoswi va tlhelele matikweni ya vona. Leswi va rhandzaka Yehovha ni vanhu van’wana, va rhurhile va ya ka tindhawu leti ku lavekaka vachumayeli va vanyingi. (Mat. 22:37-39) Hi yini minzamu leyi va nga yi yentxa naswona hi yini minkateko leyi va nga yi kuma? A hi voneni leswi nga yentxeka a tikweni la Camarões aAfrika.

Hi 1998 makwerhu lweyi a vitaniwaka Onésime a rhurhile Camarões lomu a nga psaliwa kona a ya tshama 14 wa malembe ka tiku lin’wana. Siku lin’wana na a li mintlhanganwini a twe xikombiso lexi vulavulaka hi ntirho wa ku chumayela. Makwerhu lweyi a a veka wukaneli a te: “Loko vanghanu vambirhi va phasa tihlampfi na va nyime ka tindhawu ta ku hambana, mun’we a kuma tihlampfi ta tinyingi lweyi mun’wana a kuma ta titsongo, lweyi a kumaka ta titsongo a nge suki lani a nga kona a ya phasa lani ku kumekaka tihlampfi ta tinyingi?”

Xikombiso lexi xi pfune Onésime a pimisa hi ku tlhelela Camarões a ya pfunisa lani ku lavekaka vachumayeli va vanyingi. Kambe a ku ni leswi a swi mu karhata. A a ta swi kota ku tlhela a tolovela wutomi la Camarões hambileswi a nga heta malembe ya manyingi na a tshama ka tiku lin’wana? Onésime a yi tshama aCamarões 6 wa tiwheti swaku a ta tolovela mahanyelo ya kona. A gama hi 2012 a tekela ku ya tshama kohala.

Onésime a li: “A swi lava ni tolovela mumu ni wutomi la Camarões. Loko hi li mintlhanganwini a swi lava ni tolovela ku tshama ka banku. Kambe loko ni sungula ku pimisa hi leswi a swi djondziwa ka mintlhanganu ni tekeli ku khohlwa switshamu swa luxu leswi a hi swi tirhisa lomu a ni tshama kona.”

Hi 2013 Onésime a chade na Géraldine lweyi a a hete 9 wa malembe na a tshama França. Hi yini minkateko leyi va nga yi kuma leswi va nga rhangisa ntirho wa Yehovha ka wutomi la vona? Onésime a li: “Hi ye ka Xikola xa Vachumayeli va Mfumu, hi tlhela hi sungula ku tirha aBetele. Ka lembe leli nga hundza ku tsakamisiwe 20 wa vanhu abandleni la hina. Swoswi na swi vona swaku ni ka ndhawu ya kahle ya ku chumayela mahungu ya ku tsakisa.” (Marka 1:17, 18) Géraldine a te: “Ni kume minkateko ya yinyingi ya ku tlula leyi a ni pimisa swa ku ni nga yi kuma.”

Judith a rhurhile a ya tshama aEstados Unidos kambe a a navela ku yengesela ntirho wa yena wa ku chumayela. A vula leswi: “Nkama ni nkama loko ni ya pfuxela maxaka ya mina aCamarões, loko se ni muka a ni rila hikusa a ku ni vanhu va vanyingi lava a ni va siya, lava a ni sungule ku djondza na vona Bibele.” Kambe Judith a a ha kanakana ku tlhela a rhurha a ya tshama aCamarões.  Lomu a a tirha kona a a hola male ya yinyingi funtshi a yi yanela ku pfuna papayi wa yena ka mavabyi lawa a a li na wona. Kambe leswi Judith a a tshemba Yehovha a rhurhile a ya Camarões hambileswi a swi lava a siya minchumu ya yinyingi leyi a a yi rhandza. A khongele ka Yehovha a kombela swaku a mu pfuna a titwananisa ni xiyimu nakambe a tlhele a pfuniwa hi mudjikelezi ni nsati wa yena.

Loko a khumbuka leswi nga mu yentxekela Judith a li: “Ni tsakile hileswi ni nga djondzisa 4 wa vanhu ntiyiso ndzeni ka 3 wa malembe.” Judith a sungule ku va mupfuli wa ndlela wa ku hlawuleka. Swoswi a tirha ni nuna wa yena Sam-Castel lweyi a nga mudjikelezi. Ku humeleli yini hi papayi wa Judith? Yena ni maxaka ya yena va kume xi belhela ka tiku lin’wana lani papayi wa vona a a ta hambiwa operação kona. Lexi tsakisaka hi swaku operação la kona li fambe kahle.

Makwerhu lweyi a vitaniwaka Victor a rhurhile a ya tshama aCanadá. Loko a lerhe Murindzi lweyi a a vulavula hi ku djondza a ma univhersidade a sungule ku tikambela. A game a tshika ku djondza a univhersidade a gama a hamba kursu leli a li ta heta nkama wa wutsongo. A li: “Swi ni pfunile ku hantla ni kuma ntirho ni tlhela ni sungula ku va mupfuli wa ndlela, ku nga leswi a ni swi lava hi khale.” Hi ku famba ka nkama Victor a chade na Caroline va gama va ya pfuxela aCamarões. A siku va nga ya pfuxela aBetele va byeliwe swaku a va pimise hi ku ya pfunisa aCamarões. Victor a li: “Hi vone swaku a ku nga na lexi a xi hi pfalela ku pfumela a xirhambu lexi hikusa se a hi vevukise a wutomi la hina.” Hambileswi Caroline a a vabya va yentxe xiboho xa ku rhurha va ya Camarões.

Victor na Caroline va sungule ku va va pfuli va ndlela va nkama hinkwawu swaku va pfuna vanhu lava a va va kuma nsin’wini lava a va lava ku djondza Bibele. A va hlengeletele male swaku va nga tekeli ku tirha loko va fika Camarões. Hi yini minkateko leyi va nga yi kuma? Va ye ka Xikola xa Vachumayeli va Mfumu, va ve vapfuli va ndlela va ku hlawuleka naswona swoswi va tirha ka ku yaka. Victor a li: “Leswi hi nga suka lomu swilo a swi hi fambela kahle hi kote ku vona swaku i mpsini ku pfuniwa hi Yehovha.”

Hi 2002, Alain lweyi a a djondza a univhersidade aAlemanha a lerhe a tratadu leli nge: Vantshwa — Xana Mi Ta Endla Yini Hi Vutomi Bya N’wina? Leswi a nga swi lerha swi mu yentxe a pimisa hi leswi a a lava ku swi yentxa. Hi 2006 a ye ka Xikolo xa Ndzetelo wa Vutirheli a gama a rhumeliwa aCamarões lomu a nga psaliwa kona.

Alain a kume ntirho lowu a a nga tirhi masiku hinkwawu aCamarões. Hi ku famba ka nkama a kume ntirho lowu a wu ta mu holela male ya yinyingi kambe a a karhateka hileswi a a nga ha na nkama wa ku chumayela ku fana ni khale. Hi mhaka leyo nkama a nga rhambiwa swaku a va mupfuli wa ndlela wa ku hlawuleka a tekele ku pfumela. Patrão wa yena a tshembise ku mu yengesela muholo kambe Alain a nga pfumelanga ku txintxa xiboho xa yena. Hi ku famba ka nkama a chade na Stéphanie lweyi a nga tshama malembe ya manyingi aFrança. Hi swini swikarhatu leswi Stéphanie a nga kumana na swona aCamarões?

Stéphanie a li: “A ni tshamela ku vabya funtshi a ku ni swilo leswi a swi nga ni kati kambe a ni zama kunwa murhi swaku ni tidaha.” Stéphanie na Alain va katekisiwile hileswi va nga tiyisela.” Alain a li: “A nkama hi nga ya chumayela ka xidoropana xa kule lexi va nge i Katé, hi kume vanhu va vanyingi lava a va lava ku djondzeliwa a Bibele.  Hi ku famba ka nkama a hi djondza na vona hi ku tirhisa telefoni. Ka lava a hi va djondzela vambirhi va tsakamisiwile ku tlhela ku hambiwa ni grupu la nyuwana.” Stéphanie na yena a li: “A ku na nchumu xa ku tsakisa ku tlula ku pfuna vanhu va tinyiketela ka Yehovha. Ku tirha ka ndhawu leyi ku lavekaka vachumayeli va vanyingi swini yentxe ni pfuna vanhu va vanyingi.” Swoswi Alain na Stéphanie i vadjikelezi.

Gisèle a tsakamisiwile na a djondzela ku va médica a Itália. A a tsakisiwa hi wutomi la ku vevuka la lava a va mu djondzela Bibele naswona a a lava ku va mupfuli wa ndlela ku fana na vona. Hi mhaka leyo Gisèle a sungule ku va mupfuli wa ndlela wa nkama hinkwawu na a ha hetisa kursu la yena.

Gisèle a a navela ku tirhela Yehovha aCamarões kambe a a ni swikarhatu. A li: “A ni fanele ni suka a Itália ni hambana ni maxaka ni vanghanu va mina.” Se hi Maio wa 2016 Gisèle a rhurhile a tlhelela aCamarões. Hi ku famba ka nkama a chade na Léonce naswona aBetele li va rhumele swaku va ya tirha a Ayos lani a ku laveka vachumayeli va vanyingi.

A ku tshamise ku yini a Ayos? Gisèle a li: “A ku hela mavhiki magezi na ma fambile hi tlhela hi pfumala ka ku karegara kona matelefoni. Minkama ya yinyingi matelefoni a ma nga tirhi. Ni djondze ku sweka hi tihunyi ni tlhela ni khelela mati hi karinya. A swi lava hi kha mati ni wusiku hikusa a ku nga tali, leswi a ku mphumile a swi lava hi tirhisa malanterna.” I mpsini swi nga va pfuna swaku va tiyisela? Gisèle a li: “Moya wa Yehovha, nuna wa mina, maxaka lawa a ma hi nyika male ni vanghanu va hina hi swona swi nga hi pfuna swaku hi kota ku tiyisela.”

Indje Gisèle a tsakile hileswi a nga tlhelela ka tiku la yena? Yena a li: “Ni tsakile hikakunene. Hambileswi a ku sunguleni a hi ni swikarhatu hi tlhela hi hela ntamu kambe hi swi kotile ku swi hlula. Mina ni nuna wa mina hi yentxe leswi a hi fanele hi swi yentxa. Ha mu tshemba Yehovha naswona hi titwa na hi li kusuhi na yena.” Léonce na Gisèle va ye ka Xikola xa Vachumayeli va Mfumu naswona swoswi i vapfuli va ndlela va ku hlawuleka swa nkamanyana.

Ku fana ni vaphasi va tihlampfi lava va yentxaka hinkwaswu swaku va phasa tihlampfi ta tinyingi hambiloko swiyimu swi karhata, lava va tlhelelaka ka matiku ya vona va yentxa minzamu ya ku pfuna vanhu swaku va tiva mahungu ya ku tsakisa. Yehovha a nge wu khohlwi ntirho wa vona ni lirhandzu leli va li kombisaka ka yena. (Neh. 5:19; Hev. 6:10) Loko ku li swaku u tshama ka tiku lin’wana ku ve lomu u nga psaliwa kona ku laveka vachumayeli, swi ngo yini u muka u ya pfunisa? Loko u yentxa leswo Yehovha a ta ku katekisa. — Swi. 10:22.