UÁNIKUA erachicha ka pirenchicha engaksï ióntki imani paisicha jimbo mótsipka enga sánderu tumina andanhajka, kʼuanhatsentastiksïa imecheri paisi jimbo. Jimbokaksï xénchasïnga Jeobani ka máteru kʼuiripuechani, jimaksï mótsisti nani engaksï sánderu aianhpiricha uétarhini jaka (Mat. 22:37-39). ¿Ambe ka ambeksï jatsispi para jurajkuni, ka néna újchakuraaski Jeoba? Parachi úni míteni ju je exeni ambe enga úkuarhika Camerún, paisi ma enga África occidental jaka.

Uéxurhini 1998 jimbo, erachi ma enga Onésime arhinhajka Camerún uératini niraspti máteru paisi jimbo ka jima irekaspti katorse uéxurhini. Ma jurhiatikua, tánguarhikua ma jimbo, arhijtsïkpiti arini ejempluni úraspti enga aianhpikueri ambe uandenga: “Ju je eranhaskani eskaksï tsimani amiguecha táchanisï kurucha pʼímaaxaka ka ma sánderu pʼímaaxati eska máteru. ¿A no eska ima enga no xáni pʼímaani jaka jima mótsipiringa nani enga imeri amigu pʼímaani jaka?”.

Enga Onésime kurhaapka ini ejempluni, eratsespti kʼuanhatsentani Camerún, nani engaksï erachicha jarhuajperata uétarhinchani japka para Bibliaeri ambe jorhendaani kʼuiripuecha. Joperu uandanhiasïrendi enga no úpiringa pʼindentani na enga irenhaka imeri paisi jimbo, jimboka uánikua uéxurhinicha jimbo máteru paisirhu irekaspka. Ísï jimbo, para úni míteni, seisi kutsï kʼuanhatsentaspti Camerún ka 2012 jimbo mátirku kʼuanhatsentasptia.

Onésime uandantasïndi: “Jatsispka parani pʼindentani na enga irenhaka ka na enga xáni aparhikuarhijka. Kʼumanchikua Reinuerirhu, jatsipka parani pʼindentani uaxakani bankuecharhu engaksï kánikua tetekajtsïkurhapka”. Ka tsípiparini seguirispti uandantani: “Joperu engani sánderu jingontku kurhaani jarhenga programani, ni miáueni imani uaxantskuechani engaksï sanujtsïkurhapka”.

Uéxurhini 2013, Onésime tembuchaspti Géraldine jingoni, enga nuebe uéxurhini irekapka Francia ka enga Camerún kʼuanhatsentapkia. ¿Néna újchakuraaspi Jeoba engaksï sánderu jukaparharapka Tata Diosïri ambe imecheri tsípikuarhu? Onésime uandasïndi: “Májku kʼérichi niraska Jorhentperakuarhu para Aianhpiricha Reinueri ka Betelichi marhuaxaka. Uéxurhikua, juchari kúnguarhikuarhu, 20 Bibliaeri jorhenguarhirichaksï itsï atakuarhisti. Iásï ísï pʼikuarherasïnguia eskani jima jarhaska nani enga sánderu sési jaka para kurucha pʼímaani” (Mar 1:17, 18). Géraldine ístu uandasïndi: “No méni eratsespka eskani xáni uáni kóntperatechani jatsiapiringa”.

Judith, enga Estados Unidos mótsipka, tsitisïrendi sánderu aianhpini. Uandantasïndi: “Méntkisï engani familiani nirenga pʼorhembini jini Camerún, ueparini kʼuanhatsentasïrenga jimbokani jatsisïrenga parani jurajkuani uánikua kʼuiripuechani engani uénenguia Bibliaeri ambe jorhendaani”.  Joperu no eratsesïrendi kʼuanhatsentani imeri paisi jimbo. Ambakiti ánchikuarhita ma jatsispti ka úsïrendi meianhpikuni táti jémbani para doktorini jingoni nirani jini Camerún. Joperu mintsikaspti Jeobani ka kʼuanhatsentaspti. Uandantasïndi eska jirinhakuarhintasïrenga na enga irekapka jini Estados Unidos. Kurhakuspti Jeobani eska jarhuatapiringa pʼindentani, ka sirkuitueri orhejtsïkuti ma ka imeri témba uinhaperantasptiksï.

¿Ka néna nikuspi Judithini? Uandasïndi: “Tanimu uéxurhini jimbo, tʼámu kʼuiripuechani jarhuataaska paraksï niárani itsï atakuarhini”. Ístu niárasti prekursora espesialini. Iásï, imeri uámba jingoni Sam-Castel marhuaxatiksï komu sirkuitueri orhejtsïkuticha. ¿Ka imeri táti jémbia? Judith ka imeri familia, exentasptiksï ospitali ma máteru paisirhu nani engaksï operaripiringa táti jémbani no ma tumina jimbo. Operasioni sési uéraspti.

Erachi ma enga Víctor arhinhajka, Canadá mótsispti. Enga arhintapkia jorhenguarhikua ma rebistarhu Aianhpiri enga unibersidadiri jorhentperakuaeri ambe uandenga, eratsentaspti ambe enga ima jorhenguarhini japka ka jurajkuspti unibersidadini para imani ambe jorhenguarhini enga jarhuatapiringa sánderu sóntku exentani ánchikuarhita ma. Ima uandasïndi: “Indeni ambe jingoni sóntkuni exespka ánchikuarhita ma ka úspka úni ambe ma engani méntkisï uékapka: prekursorini”. Ísï tátsekua, tembuchaspti Caroline jingoni ka nirasptiksï Camerún. Engaksï jima japka, nirasptiksï Beteli ka jimaksï pʼímarhiaspti paraksï Camerún marhuani. Víctor uandantasïndi: “No ma ambe jarhaspti engachi jimbo úpiringa uandani eska nómbe. Ka jimbokachi arisku sáni irekaspka, uékaspkachi ísï úni”. Nájkiruka Caroline sáni pʼamenchani japka, seguirisptiksï úni imani ambe engaksï eratsetini japkia.

Víctor ka Caroline uénasptiksï májku kʼéri marhuani komu prekursori regularicha paraksï úni jorhendaani iámindu imani kʼuiripuechani engaksï uékenga Bibliaeri ambe jorhenguarhini. Ma tiempu jimbo, imanksï tuminani úraspti engaksï patsani japka, peruksï tátsekua Canadá niraspti ánchikuarhini máru kutsïcha jimbo paraksï úni ménderu Camerún kʼuanhatsentani ka seguirinksï prekursoriini. ¿Néna újchakuraaspi Jeoba? Nirasptiksï Jorhentperakuarhu para Aianhpiricha Reinueri, marhuastiksï komu prekursori espesialicha ka iásïksï kontruksionirhu marhuaxatia. Víctor uandasïndi: “Jimbokachi jurajkuspka imani irekuani engachi no ma ambe kueratanchenga, úspkachi exeni na engajtsïni Jeoba jarhuataka”.

Uéxurhini 2002 jimbo, erachi ma enga Alain arhinhajka, unibersidadirhu jorhenguarhixapti jini Alemania, arhintaspti trataduni Joven, ¿qué harás con tu vida?, ka inde ambe jarhuataspti exeni néna úpirini sánderu sési marhuakuni Jeobani. 2006 jimbo, niraspti Jorhentperakuarhu de Entrenamiento Ministerial ka axasptiksï imeri paisi jimbo, Camerún.

Jima exentaspti ánchikuarhita ma enga no interu semaneripka. Ísï tátsekua, exentaspti máteru ánchikuarhita nani enga sánderu andenga, joperu uandanhiasïrendi eska inde ambe úpiringa para nóteru xáni aianhpinia. Ísï jimbo, engaksï pʼímarhipka para prekursori espesialini, jirejiresï jiókuarhispti. Imeri patroni jémba aiakuspti eska sánderu maiamupiringa enga pakarapiringa, joperu Alain no jiókuarhispti. Ísï tátsekua, tembuchaspti Stéphanie jingoni enga Francia irekapka máru uéxurhinicha jimbo. ¿Náki uandanhiatechani jatsiaspi Stéphanie enga Camerún mótsipka?

Stéphanie uandantasïndi: “Uénaspka sánisï pʼamenchani ka alerjia ambe pʼirani, joperuni úspka sïpiati ambe intsïnhani engani uétarhinchani japka  parani sési pʼikuarherantani”. Jeoba újchakurasti ini temungurhirini engaksï ísï tekaantaka. Alain uandantasïndi: “Engachi Katé nipka aianhpini, ireta ma enga iauanisï jaka, uánikua kʼuiripuechanchi exeantaspka engaksï uékenga Bibliaeri ambe jorhenguarhini. Úspkachi Bibliaeri ambe jorhendaani telefonu jimbo. Tsimani inde kʼuiripuecheri niárastiksï itsï atakuarhini ka grupu ma úkuarhispti aianhpiricheri”. Stéphanie ístu uandasïndi: “No jarhasti ambe ma engachi jimbo sánderu tsípikuarhijka ka eska jarhuataani kʼuiripuechani paraksï míteni Jeobani ka aiakukuarhenksï imani. Uánikua xanharichi ísï pʼikuarheraskia ixú Camerún”. Iásï Alain ka Stéphanie marhuaxatiksï komu sirkuitueri orhejtsïkutiicha.

Gisèle, itsï atakuarhispti jiáni enga Italia jorhenguarhini japka para doktoreni. Ísku pakatasïrendi na engaksï arisku sáni irekapka ima temungurhiri engaksï prekursoripka ka engaksï Bibliaeri ambe jorhendapka ka Gisèle uékasïrendi sánderu aianhpini. Ísï jimbo, uénaspti marhuani komu prekursora regulari enga útasï eskuela nirani japka.

Gisèle uékasïrendi Camerún kʼuanhatsentani para sánderu aianhpini, joperu uandanhiasïrendi máru ambe jimbo. Uandasïndi: “Nóteruni jatsipiringuia sésikua parani Italia irekani ka jatsipiringa parani jurajkuani amiguechani ka familiarichani engani Italia jatsiapka”. Joperu maiuni 2016 jimbo, kʼuanhatsentaspti Camerún. Ísï tátsekua, uambuchaspti Léonce jingoni ka jini anapu Beteli arhiaspti eska sési japiringa engaksï ireta Ayos jimbo mótsipiringa nani engaksï sánderu aianhpiricha uétarhini japka.

¿Ka néna irenhaspi imani ireka jimbo? Gisèle uandantasïndi: “Niárasïrendi engachi uánikua semanecha jimbo no jatsienga lusi ka nóchi úsïrenga telefonuechani kargariuantani. Ísï jimbo, sáno méntkisïksï patakuarhitini jarhasïrendi. Jorhenguarhispka újpantani parani tʼirekua úntani ka chúrikuechanchi nirasïrenga itsï pʼitani karretiiecha ka reflektoricha jingoni, jimboka jiáni no xáni kʼuiripu jarhasïrenga”. Gisèle uandantasïndi ambe enga jarhuataaka paraksï tekaantani: “Úskachi orhepani uérani Jeobaeri espiritueri jarhuajperata jimbo, engachi tsimaperani jarhuajperaka, engajtsïni juchari familia ka amiguecha uinhaperantaka ka ménisïjtsïni tumina sáni axachini”.

¿Sési pʼikuarherasïni Gisèle enga kʼuanhatsentaka imeri paisirhu? Ima uandasïndi: “Jo, meru sési pʼikuarherasïnga. Uénakuarhu jatsiaspkachi uandanhiatechani ka sánisïchi no sésichi pʼikuarheraspka. Joperu engachi jánguarhintapka nóteru indeni ambe eratsenia, juchiti acheeti jingonchi exespka eskachi úska ambe engachi meru jatsipka para úni. Mintsikasïngachi Jeobani ka sánderuchi andarhieraskia”. Léonce ka Gisèle nirastiksï Jorhentperakuarhu para Aianhpiricha Reinueri ka iásïksï ma tiempu jimbo prekursori espesialisti.

Májkueni eskaksï kurucha pʼitamaticha engaksï orhepani uérakujka na uéjki jasï uandanhiata ma paraksï úni uánikua kurucha pʼímaani, erachicha engaksï kʼuanhatsentajka imecheri paisicha jimbo, uékasïndiksï úni ambe enga xáni uétarhiaka paraksï jarhuataani imechani engaksï mintsita jingoni jiókuarhijka aianhperakuani Reinueri. Seguru eska Jeoba no mirikurhiaka ka kóndiantauati ini aianhpirichani engaksï kánikua ánchikuarhijka para uékperakua xarhatakuni imeri arhinhakuani (Neh. 5:19; Ebr. 6:10). Enga cha máteru paisi jimbo irekani jaka ka exentsï eska chári paisi jimbo sánderu aianhpiricha uétarhixaka, ¿úpirintsï kʼuanhatsentani? Engajtsï ísï úska, uákajtsï seguru jarhani eskaksïni Jeoba újchakuraaka (Prov. 10:22).