E TOKOUKE a taina mo tuagane kolā ne tiaki olotou fenua tonu o olo ki nisi fenua o ‵sala galuega, ko oti ne toe ‵foki ki olotou fenua tonu. Ko te alofa ki a Ieova mo olotou taina ne fakamalosi atu ki a latou ke olo o ‵nofo i koga kolā e manakogina malosi ei a tino talai o te Malo. (Mata. 22:37-39) Ne a mea ne tiaki ne latou, kae ne a fakamanuiaga ne tau ne latou? Ke maua te tali, ke onoono tatou ki te fenua ko Cameroon i Afelika ki togala.

I te 1998 ne tiaki ne te taina ko Onésime a tena fenua tonu ko Cameroon. Ne nofo a ia i se isi fenua i tausaga e 14. I te aso e tasi, i te taimi o te fakatasiga Kelisiano, ne lagona ne ia se tala fakatusa e uiga ki te galuega talai. Muna a te failauga, “Kafai e faiika se tokolua taugasoa i koga kese‵kese kae tokotasi e uke ana ika e maua i lō te suā tino, e mata, ka se fanatu a ia telā e se uke ana ika ki te koga telā e uke a ika i ei?”

Ne fai ne te tala fakatusa tenā ko Onésime ke mafaufau o foki ki Cameroon, te koga telā e uke i ei a ika faka-te-agaga, kae ke fesoasoani ki tino talai i konā. Kae ne manavase a ia. E mata, koi mafai ne ia o ola i tena fenua tonu mai tua o se fia tausaga ne ola a ia i fenua i tua atu? Ke fakamautinoa aka, ne fanatu a Onésime ki Cameroon o nofo i ei i masina e ono. Kae i te 2012, ne foki a ia o nofo tumau i ei.

Ne fai mai a Onésime: “Ne ‵tau o fakamasani au ki te ‵vela o te fenua mo te olaga i ei. I te Fale Tapuaki, ne ‵tau o fakamasani ke sagasaga ki nofoga laupapa. Kae kafai e saga tonu au ki te polokalame,” ko ana pati, “ko se fia mafaufau ei au ki nofoga ‵gali kae malūlū.”

I te 2013, ne avaga Onésime ki a Géraldine, telā ne foki mai ki Cameroon mai tua o te iva tausaga ne nofo ei a ia i Falani. Ne a fakamanuiaga ne maua ne te tauavaga konei ona ko te ‵saga tonu o fakamuamua te loto o Ieova? Ne fai mai a Onésime: “Ne ‵kau māua e pelā me se tauavaga ki te Akoga mō Tino Talai o te Malo kae tavini atu i te Peteli. I te tausaga ko teka, e toko 20 a tino a‵koga ki te Tusi Tapu i te motou fakapotopotoga ne papatiso. Ko lagona ne au me ko nofo au i te koga ‘faiika’ tonu.” (Male. 1:17, 18) Ne fakaopoopo mai a Géraldine: “Ko uke atu nei a fakamanuiaga ne maua ne au i lō mea ne fakamoemoe au ki ei.”

Ne fanatu a Judith o nofo i te Iunaite Sitete kae ne manako malosi ke fakalauefa atu tena taviniga. Ana muna, “Kafai ko oti te malōlōga ki kāiga i Cameroon, ne tagi faeloa au me ko ‵tau o tiaki ne au a tino kolā ne kamata ne au olotou akoga faka-te-Tusi Tapu.” Kae ko Judith ne seki fia foki mai o nofo i Cameroon. Ne maua ne ia se galuega ‵togi ‵lei telā ne fesoasoani ke ‵togi ki ei a  mea e manakogina mō te masaki o tena tamana i Cameroon. Kae ui ei, ne foki eiloa a Judith mo te talitonu katoatoa ki a Ieova. Ne fai ‵tonu mai a ia me ko misi ne ia a nisi mea ‵gali i te fenua ne nofo a ia i ei. Ne ‵talo a ia ki a Ieova ke fesoasoani mai ke fai ne ia a fakamafulifuliga kae ne fesoasoani atu eiloa te avaga a te ovasia o te seketi ki a ia.

Kafai e toe kilo ki aso mua, e fai mai a Judith, “I loto i tausaga e tolu, ne fiafia au ke maua a tama‵liki faka-te-agaga e tokofa.” Ne kamata o tavini atu a Judith pelā me se paenia fakapito. Nei la, ko olo fakatasi a ia mo tena avaga ko Sam-Castel, o fai a galuega i te seketi. Kae pefea te tamana o Judith? Ne maua ne ia mo tena kāiga se fakaimasaki i tua atu telā e mafai o ‵togi ne ia te ‵tipiga o tena tamana. Se mea fakafiafia me ne iku manuia te ‵tipiga tenā.

Ne fanatu te taina ko Victor o nofo i Kanata. I te otiga ne faitau ki se Faleleoleo Maluga e uiga ki akoakoga ma‵luga, ne mafaufau ‵mafa a ia ki tena akoga. Ne taofi ne ia ana mataupu i te iunivesiti kae ‵fuli o fai a akoga puke lima kolā e toe‵toe fua. “Ne fesoasoani mai ke mafai o maua vave saku galuega,” ko ana pati, “kae ke fai a te mea telā ko leva ne manako au o fai—ko te paenia.” Fakamuli ifo, ne avaga a Victor ki a Caroline, kae olo atu o āsi ki Cameroon. I te oloatuga a lāua o āsi ki te ofisa lagolago, ne fakamalosi atu ki a lāua me e mata, e mafai o tavini lāua i Cameroon. Muna a Victor, “E seai se pogai ke se talia te mea tenā, kae ona ko te mea ko oti ne fakafaigofie aka te mā olaga, e mafai o talia ne māua te ‵kamiga tenā.” Faitalia a tulaga o te masaki o Caroline, ne fakaiku eiloa ne lāua ke toe ‵foki ki Cameroon.

Ne kamata a Victor mo Caroline o tavini atu pelā me ne paenia tumau ke fesoasoani atu ki te lasi o te fia‵fia o tino i te galuega talai. Muamua la, ne ola lāua mai i lā tupe ne ‵teu. Oti aka, ne olo lāua o ga‵lue i Kanata mō se fia masina, kae ne mafai o toe ‵foki lāua ki Cameroon ke faka‵soko te lā galuega paenia. Ne a fakamanuiaga ne maua ne lāua? Ne ‵kau lāua ki te Akoga mō Tino Talai o te Malo, tavini pelā me ne paenia fakapito, kae nei ko tavini atu i galuega fakatu‵tu. Muna a Victor, “A te tiakinaga o te olaga gali o māua ne fai ei ke lavea atu a te ‵lago mai o Ieova.”

I te 2002, ne faitau a Alain, se tamaliki e akoga i te iunivesiti i Siamani, ki te tamā pepa ko te Talavou—Ne a Otou Fakamoemoega mō Aso Mai Mua? Ne fakamalosi ne fakamatalaga i ei ke fakatoka ne ia ne fakamoemoega ‵fou. I te 2006, ne kau a ia ki te Akoga Fakamasani mō Faifeau kae ne ‵tofi ke tavini i Cameroon, ko te fenua ne fanau a ia i ei.

I Cameroon, ne galue a Alain i se galuega sē tumau. Fakamuli ifo, ne maua ne ia se galuega ‵togi ‵lei, kae ko ia ne manavase me e mafai o fai i ei ke se uke ana mea e fai i te galuega talai. Kae i te taimi ne maua ne ia se ‵kamiga ke fai pelā me se paenia fakapito, ne talia fakavave ne ia. Ne ofo atu ne tena pule se ‵togi tai maluga, kae ko Alain ne taofi ‵mau ki tena fakaikuga ne fai. Fakamuli ne avaga a Alain ki a Stéphanie, telā ne nofo i tausaga e uke i Falani. Ne a mea faiga‵ta ne fepaki mo ia i tena fokimaiga o nofo i Cameroon?

Ne fai mai a Stéphanie: “Ne poko au i nisi masaki fo‵liki kae poisini foki i nisi mea, kae ne mafai o maua ne oku talavai kae ne ‵lei au.” Ne maua ne te tauavaga se taui ona ko te lā kufaki. Ne fai mai a Alain: “I te mā ologa o talai i se fakai foliki e igoa ki a Katé, ne maua ne māua a tino e tokouke kolā e ma‵nako o sukesuke ki te Tusi Tapu. Fakamuli ifo, ne fai ne māua olotou akoga i telefoni. E tokolua mai i a latou ko oti ne papatiso, kae ko isi  se potukau o tino talai i konā.” Muna a Stéphanie: “E seai se suā mea e sili atu tena fakafiafia i tafa o te fesoasoani atu ki tino ke fai olotou tukuatuga ki a Ieova. Ko oti ne maua ne māua te fiafia tenā i taimi e uke i te taimi ne tavini ei māua i konei.” Nei la, ko tavini atu a Alain mo Stéphanie i te seketi.

Ne papatiso a Gisèle i te taimi koi akoga a ia fakatokita i Italia. Ne fiafia malosi a ia ki te olaga faigofie ne ola ei te tauavaga paenia kolā ne fai ne lāua tena akoga faka-te-Tusi Tapu, kae ne manako a ia ke uke atu ana mea e fai i te galuega talai. Tenā ne kamata ei o paenia tumau a ia kae koi fakaoti ana akoakoga.

Ne manako malosi a Gisèle ke uke ana mea e fai i te taviniga ki a Ieova i Cameroon, kae ne manavase tou fafine. Ana muna, “E ‵tau o tiaki ne au toku nofo tumau i Italia kae ka mavae au mo taugasoa mo kāiga kolā e ‵nofo i Italia.” Kae ui ei, i a Me 2016, ne foki eiloa a Gisèle ki Cameroon. Fakamuli ifo, ne avaga tou fafine ki a Léonce, kae ne fai atu te ofisa lagolago i Cameroon ke olo lāua ki Ayos, se fakai telā e ma‵nako malosi ki tino talai o te Malo.

E pefea te olaga i Ayos? Ne fai mai a Gisèle: “E masani o ‵mate te iti i se fia vaiaso, kae e se mafai o tiāti mā telefoni. Te ukega o taimi e ‵mate eiloa a mā telefoni. Ne fakaakoako au ke kuuka i te afi, kae olo māua i po mo te uilipalo mo molisulu o āsu vai māfai ko se tokouke a tino i te koga āsu vai.” Ne a mea ne fesoasoani atu ki te tauavaga? Muna a Gisèle: “Ko te agaga o Ieova, te fesoasoani mai se avaga ‵lei, mo fakamalosiga mo te ‵lago mai o kāiga mo taugasoa i mea tau tupe ne fesoasoani malosi mai ki a māua.”

E mata, ne fiafia a Gisèle me ne foki mai a ia ki tena fenua tonu? “Ao! E aunoa eiloa mo se fakalotolotolua,” ko ana pati. “E isi ne mea faiga‵ta mo lagonaga loto vāivāi i te taimi muamua, kae i te taimi ne manumalo ei i mea konā, ne iloa ne māua mo taku avaga me ne fai eiloa ne māua a mea kolā ne ‵tau o fai ne māua. Ne tali‵tonu māua ki a Ieova kae ne gasolo o ‵pili atu māua ki a ia.” Ne ‵kau atu a Léonce mo Gisèle ki te Akoga mō Tino Talai, kae ko tavini atu nei lāua e pelā me ne paenia fakapito sē tumau.

E pelā mo tāgata faiika kolā e loto malosi o fa‵ki a tau o aso kese‵kese ke uke olotou ika e maua, e loto fia‵fia a latou kolā e ‵foki ki olotou fenua ‵tonu o tiaki a mea e uke ko te mea ke fesoasoani latou ki tino loto ‵lei kolā e fia fakalogo‵logo ki te fekau o te Malo. E mautinoa me ka se mafai o puli i a Ieova a tino talai ga‵lue malosi konei ona ko te alofa ne fakaasi ne latou mō tena igoa. (Nee. 5:19; Epe. 6:10) Kafai koe e nofo i fenua fakaa‵tea kae iloa ne koe me e manakogina a tino talai o te Malo i tou fenua tonu, e a, e mafai koe o toe foki? Kafai e fai koe penā, ka fakamanuia eiloa koe ne Ieova.—Faata. 10:22.