BAYAL ermanoetik bajtik ta yan nasion te banti bayalxan takʼine, pero chaʼsujtik tal ta slumalik. Ta swenta te skʼuxul yoʼtanik ta stojol te Jehová sok te spatxujkik, bajtik ta lugaretik te banti ya skʼanxan jcholkʼopetike (Mat. 22:37-39). ¿Bintik la spasik sok bin bendision akʼbotik yuʼun te Jehovae? Kilbeytik skʼoplal te lum Camerún te ay ta África occidental.

Ta 1998, jtul ermano te Onésime sbiil lokʼ bael ta Camerún, bajt ta kuxinel ta yan lum 14 jaʼbil. Jun buelta ta sNail Tsoblej, jtul ermano la yal te lokʼombakʼop ini ta swenta te scholel skʼop Dios: «Jnop kaʼiytik te ay chaʼtul amigoetik te yakik ta stsakel chay ta yanyantik lugaretik, pero te yane jaʼ bayalxan yak ta stsakel te chaye. Te machʼa jtebnax yak ta stsakel ¿mabal jichuk te ya xbajt banti ay te yamigoe?».

Kʼalal te Onésime la yaʼiy stojol te lokʼombakʼop ini, la snop te ya sujt bael ta Camerún swenta ya xkoltaywan ta snojptesel te machʼatik ya skʼan ya snopik te Bibliae. Pero la smel yoʼtan yuʼun teme ma xkʼayix ta Camerún, melel bayal jaʼbil kuxin ta yan lum. Jaʼ yuʼun bajt wakebnax u, pero ta 2012 bajt ta kuxinel tey-a.

Jich la yal te Onésime: «La jpas tulan yuʼun ya xkʼayon-a te bitʼil kʼux te kʼajkʼal sok te bin yilel te kuxlejalil tey-ae. Ta sNail Tsoblej jaʼnix jich kʼayon ta najkajel ta bankaetik te pasbil ta teʼ». Jich la yalxan sok stseʼelil yoʼtan: «Te kʼalal jaʼ ya xbajt ta koʼtan yaʼiyel te tsobleje, ma xjulix ta koʼtan te lekil naktajibaletik te ay ta yan sNail Tsobleje».

Ta 2013 te Onésime nujpun sok te Géraldine. Te Géraldine kuxin 9 jaʼbil ta Francia, pero chaʼsujt tal ta Camerún. ¿Bin bendision akʼbotik yuʼun Jehová ta swenta te la spasbeyik te skʼanojel yoʼtane? Te Onésime jich la yal: «Kʼootik ta Eskuela yuʼun Ebanjelisador sok aʼtejotik ta Betel. Te yan tal jaʼbile, la yichʼik jaʼ 20 ta tul estudianteetik ta jkongregasiontik. Jich ya kaʼiy te ayon ta jun lugar te banti bayal ya jtsak chaye» (Mar. 1:17, 18). Te Géraldine jich ya yal: «Maʼyuk bin-ora la jnop te bayal bendision ya jtae».

Te kʼalal kuxinem ta Estados Unidos-a te Judith, ya skʼan ya scholxan skʼop Dios-a. Jich la yal: «Ta jujun buelta te ya xbajt kulaʼtay te jfamilia ta Camerún, ya x-okʼon te kʼalal ya kijkitay te machʼatik ya jnojptes ta Biblia». Manchukme jich-abi, maʼyuk la  snop te ya sujt bael ta slumal, melel ay lek yaʼtel sok jich ya xjuʼ ya stoj-a te poxetik ya xtuun yuʼun te spapa te ay ta Camerún. Pero la yakʼ smukʼul yoʼtan ta stojol te Jehová sok sujt bael. Aynix la snaʼ te bintik la yijkitay ta Estados Unidos, pero la skʼanbey koltayel te Jehová yuʼun ya xkʼay tey-a. Akʼbot smukʼul yoʼtan yuʼun te superintendente yuʼun sirkuito sok te yinam.

¿Bin lek la sta-a? Te Judith jich la yal: «Ta oxebnax jaʼbil la yichʼik jaʼ chantul estudianteetik kuʼun». Jaʼnix jich la yichʼ akʼbeyel yaʼtel ta prekursora espesial. Ta ora ini ya sjokin te smamalal te Sam-Castel sbiil ta aʼtel jich bitʼil superintendente yuʼun sirkuito. Te Judith sok te sfamilia la staik jun ospital ta yan nasion te la stoj te operasion yuʼun te spapae. Lek-a lokʼ te operasione.

Jtul ermano te Víctor sbiil bajt ta kuxinel ta Canadá. Te kʼalal la skʼopon jun artikulo yuʼun Te J-ilkʼinal ta toyol ta swenta te snopel jun ta unibersidad, la sta ta nopel te ya yijkitaye. Jajch yichʼ jun kurso yuʼun ya snop yan aʼtelil, jich la yal: «Ora la jta kaʼtel sok ochon ta prekursor». Ta patil nujpun sok te Caroline sok bajtik ta Camerún. Kʼalal tey ayik-ae, bajt yulaʼtayik te Betel, tey albotik-a te ya xjuʼ ya x-abatinik ta Camerún. Te Víctor jich la yal: «Maʼyuk bin la smakotik, la jchʼuuntik spasel». Manchukme tsakbil jtebuk ta chamel te Caroline, ma jaʼuk komotik yuʼun.

Te Víctor sok te Caroline ochik ta prekursor regular yuʼun ya snojptesik te ants winiketik te ya smulanik snopel te Bibliae. Cheʼoxeb kʼajkʼal jaʼ la stuuntesik te takʼin stsobojik-ae, pero ta patil bajtik ta aʼtel cheʼoxeb u ta Canadá yuʼun jich ya x-abatinikxan ta prekursor. ¿Bin bendision akʼbotik yuʼun te Jehová? Bajtik ta Eskuela yuʼun Ebanjelisador, aʼtejik ta prekursor espesial sok ta ora ini ayik ta aʼtel ta konstruksion. Te Víctor la yal: «Te kʼalal la kijkitaytik te bitʼil leknax ayotik ta kuxinel-ae, la kiltik te koltayel yuʼun te Jehová».

Ta 2002, jtul ermano te Alain sbiil te yak ta snopel jun ta unibersidad ta Alemania, la skʼopon te tratado Joven, ¿qué harás con tu vida? Jich la sta ta nopel te ay bin ya spasxan ta skuxlejal. Ta 2006 bajt ta Escuela de Entrenamiento Ministerial sok la yichʼ tikunel bael ta Camerún te jaʼnix slumale.

Tey la sta jun aʼtelil te banti ma bayaluk ora ya x-aʼtej. Ta patil la sta yan te banti bayal ya xtojot, pero la smel yoʼtan yuʼun te yaniwan xmakot ta scholel skʼop Dios. Te kʼalal la yichʼ albeyel te ya x-abatin ta prekursor espesial, la schʼuun ta oranax. Albot yuʼun te spatron te ya xmojtesbotxan stojol teme ma xlokʼ ta yaʼtele, pero te Alain ma la skʼan. Ta patil nujpun sok Stéphanie te kuxin cheʼoxeb jaʼbil ta Francia. ¿Bintik wokolil la sta te Stéphanie te kʼalal bajt ta kuxinel ta Camerún?

Te Stéphanie jich la yal: «La stsakon jtebuk chamel, pero la jtabey spoxil, jich lekubon». Akʼbotik bendision yuʼun Jehová te bitʼil kujch yuʼunike. Te Alain jich la yal: «Te kʼalal bootik ta scholel skʼop Dios ta lum Katé te namal ay, la jtatik bayal  ants winiketik te ya smulanik snopel te Biblia. La kakʼbeytik kurso yuʼun Biblia ta telefono, chaʼtul la yichʼik jaʼ sok jajch jun grupo». Te Stéphanie jich la yalxan: «Ya yakʼ stseʼelil koʼtantik skoltayel te ants winiketik ta snaʼbeyel sba te Jehová sok te ya yakʼ skuxlejalik ta stojole. Bayal buelta jich kaʼiyoj jbatik liʼ ta Camerún». Ta ora ini, te Alain sok te Stéphanie yakik ta aʼtel jich bitʼil superintendente yuʼun sirkuito.

Te Gisèle la yichʼ jaʼ kʼalal yak ta snopel jun ta Italia yuʼun ya x-och ta doktora. La smulanbey skuxlejal te prekursoretik te akʼbot te nojptesel yuʼun Biblia, jich yuʼun la skʼan ya scholxan skʼop Dios. Jaʼ yuʼun och ta prekursora regular kʼalal yakto ta nop jun-a.

Te Gisèle ya skʼan ya xchaʼsujt ta Camerún yuʼun ya scholxan skʼop Dios, pero ay bin la smel yoʼtan yuʼun. Jich la yal: «Ya jchʼay te permiso yuʼun ya xkuxinon ta Italia sok ya kijkitay te kamigotak sok te jfamilia». Manchukme jich-abi, ta mayo 2016 bajt ta Camerún. Ta patil nujpun sok te Léonce, sok albotik yuʼun te sukursal te yakuk xbajtik ta Ayos te banti ya skʼanxan jcholkʼopetik.

Pero, ¿bin yilel te kuxlejalil tey-a? Te Gisèle jich la yal: «Bayal buelta ya xbajt cheʼoxeb semana te lus, jaʼ yuʼun ma xjuʼ ya jpastik kargar te jselulartike. Jaʼ yuʼun jteb ma spisiluk-ora tupʼen. La jnop snupʼel kʼajkʼ yuʼun tey ya jpas jweʼeltik-a. Ta ajkʼabal te kʼalal maʼyuk bayal ants winiketik-ae, ya kichʼ bael jfokotik yuʼun ya xbajt kichʼtik tal jaʼ ta karretiya. Te bin la skoltayotik ta stsʼikele, jaʼ te schʼul espiritu te Jehová sok te talel kʼaxel la jkoltay jbatik, jaʼnix jich te jfamiliatik sok te kamigotaktik la yakʼ yip koʼtantik sok ay la kichʼtik koltayel ta takʼin».

¿Tseʼelbal yoʼtan te Gisèle yuʼun te sujt bael ta slumal? Jich la yal: «Tseʼel, tseʼel koʼtan. Ta sjajchibal la jtatik wokolil sok la jmel koʼtantik. Pero te kʼalal ma jaʼuk bajt ta koʼtantik snopilanele, te jmamalal sok te joʼone la jtatik ta ilel te jaʼ lek te jich la jpastike. Jaʼ la smukʼulin koʼtantik te Jehová sok nopolxan la kaʼiy jbatik ta stojol». Te Léonce sok te Gisèle bajtik ta Eskuela yuʼun Ebanjelisador, ta ora ini ayik ta prekursor espesial.

Jich bitʼil te jtsakchayetik te ya stsʼikik biluk wokolil yuʼun ya staik bayal chayetik, te ermanoetik te ya sujtik bael ta slumalik aynix bin ya yijkitayik yuʼun ya skoltayik te machʼatik ya smulanik yaʼiyel te skʼop Diose. Te Jehová ma xchʼay ta yoʼtan sok ya yakʼbey bendision te jcholkʼopetik te ya yakʼik ta ilel skʼuxul yoʼtanik ta swenta te sbiile (Neh. 5:19; Heb. 6:10). Teme ayat ta kuxinel ta yan nasion, pero teme ya anaʼ te ya skʼanxan jcholkʼopetik ta alumal, ¿yabal xjuʼ awuʼun te ya sujtat baele? Teme jich ya apase, naʼame te ya yakʼbat bayal bendision te Jehovae (Prov. 10:22).