INIỌVO buebun ri vrẹn nẹ ẹkuotọ rayen ra guọnọ igho vwẹ ẹkuotọ efa, rhivwin kpo ẹkuotọ re de vwiẹ ayen re. Ayen kpo asan ra da ma guọnọ ukẹcha fikirẹ ẹguọnọ rẹ ayen vwo kpahen Jihova kugbe irivẹ rayen. (Mat. 22:37-39) Die yen ayen vwo ze, ebruphiyọ vọ yen te ayen obọ? Ra vwọ mrẹ ẹkpahọnphiyọ rẹ enọ nana, jẹ e kpo ẹkuotọ ri Cameroon vwẹ Africa.

Vwẹ ukpe ri 1998 oniọvo ọshare ọvo re se Onésime vrẹn nẹ Cameroon rọ dia ẹkuotọ re de vwiẹ. Ẹgbukpe 14 yen ọ dia isiorho. Ẹdẹ ọvo, rọ vwọ hẹ uyono, e de djudje ọvo kpahen iruo rẹ aghwoghwo na. Ọtota na da ta: “Igbeyan ivẹ de kpo iyerin ehwe, ọvo da mrẹ hwe bun vrẹ ọ ro chekọ, ọ ro chekọ na rhe se vrẹn nẹ asan rọ hepha vwo kpo asan rẹ ugbeyan rọyen da mrẹ iyerin buebun hwe na?”

Udje na nẹrhẹ Onésime jiroro ro vwo rhivwin kpo Cameroon rọ dia asan rẹ ihwo buebun de vwo ẹwẹn rẹ ayen vwo yono Baibol na, rere ọ vwẹ ukẹcha kẹ ighwoghwota rehẹ oboyin. Ẹkẹvuọvo, o vwo emuọvo ro kpokpo ẹwẹn. Rọ vwọ ghwọrọ ikpe buebun vwẹ isiorho re na, ọ sa rhoma dia ẹkuotọ rẹ obọ rọyen na? Ọ sa vwọ kpahenphiyọ onọ yena, Onésime da ra dia Cameroon vwẹ emeranvwe esan. Ukuotọ rọyen, vwẹ 2012 ọ da kua kpo oboyin.

Onésime da ta: “Ememerha yen aruọke ọrhorhorho na vẹ akpeyeren rẹ oboyin vwọ riẹnriẹn ovwẹ oma, eriyin ji te egbara egangan rẹ avwanre chidia vwẹ Ọguan Ruvie.” Ọ da ta vẹ ehwẹ: “Kidie nẹ mi mu ẹwẹn mẹ kpahen obo ra ta vwẹ uyono, ọ rha nẹrhẹ me mrẹ ọke vwo roro kpahen omamọ egbara ra nabọ phare rẹ avwanre vwo chidia vwẹ isiorho-o.”

Vwẹ 2013, Onésime da rọvwọn Géraldine rọ dia France vwẹ ẹgbukpe irhirin tavwen ọ ke kua rhivwin rhe Cameroon. Ebruphiyọ vọ yen ayen rhiẹromrẹ fikirẹ iruo rẹ Uvie na rẹ ayen tẹnrovi? Onésime da ta: “Kerẹ aye gbe ọshare, avwanre ihwo ivẹ na kpo Isikuru rẹ Ihwo ri Ghwoghwo Uvie Na kugbe, je ga vwẹ Bẹtẹl. Ihwo 20 yen e bruphiyame vwẹ ukoko rẹ avwanre vwẹ ukpe rọ wanre na. Mi niro nẹ me rhe asan ro shephiyọ kẹ ‘iyerin ehwe’ re.” (Mak 1:17, 18) Géraldine da ta: “Ebruphiyọ ro te vwe obọ bun vrẹ oborẹ mi rhẹro rọyen.”

Judith kua kpo United States, ẹkẹvuọvo o vwo ẹwẹn ro vwo ru aghwoghwo rọyen hẹrephiyọ. Ọ da ta: “Mi de bru ihwo rẹ orua mẹ ra vwẹ Cameroon, kọke kọke yen me vwọ viẹ siẹrẹ mi de che rhivwin kpo, kidie me cha yanjẹ ihwo ri mi nene ton uyono ri Baibol phiyọ vwo.” Ẹkẹvuọvo, Judith  vwo ẹwẹn rọ vwọ kua rhivwin kpo Cameroon ra dia-a. O ruiruo ra da hwa omamọ osa kẹ, rọ nẹrhẹ ọ sa vwẹrote omakpokpọ rẹ ọsẹ rọyen. Dedena, Judith vwẹroso Jihova, ọ da kua rhivwin. Ọ tare nẹ ọyen je karophiyọ erọnvwọn evo rọ riavwerhen rọyen vwẹ isiorho. Ọ nẹrhovwo rhe Jihova nẹ ọ vwẹ ukẹcha kẹ ọyen vwo wene iroro rọyen, oniruo okinriariẹ ọvo vẹ aye rọyen da je chọn uko.

Judith da ta: “Me chọn ihwo ẹne uko vwo bromaphiyame vwẹ uvwre rẹ ẹgbukpe erha.” Ọ da ton ẹga rẹ ọkobaro oghẹresan phiyọ. Enẹna, ọ vẹ ọshare rọyen Sam-Castel rọ dia oniruo okinriariẹ ga kuẹgbe. Kẹ ọsẹ rọyen vwo? Judith vẹ ihwo rẹ orua rọyen mrẹ họsipito ọvo vwẹ inọko rọ hwosa rẹ omaẹbẹrẹ rẹ ọsẹ rọyen. Ọ vwerhoma nẹ e ru omaẹbẹrẹ na ẹfẹrọvo.

Oniọvo ọvo re se Victor kua kpo Canada. Ro vwo se uyovwinrota ọvo vwẹ Uwevwin Orhẹrẹ ro shekpahen ẹbe eyono ride nu, o de roro kpahen oma rọyen. Ọ da dobọ rẹ ẹbe eyono rọyen vwẹ yunivasiti ji, o de wene kpo isikuru ro de se yono iruo rẹ obọ. Ọ da ta: “Ọyena nẹrhẹ me fobọ mrẹ iruo, me da je ton iruo rẹ ọkobaro ro rhe vwe ẹwẹn krire na phiyọ.” Ọke vwọ yanran na, ọ da rọvwọn Caroline, ayen ihwo ivẹ na de kpo Cameroon. Ayen vwo kin oghọn ukoko ri Cameroon, iniọvo evo de jiro kẹ ayen nẹ ayen kua rhe Cameroon rhe ga. Victor da ta: “Avwanre sa se-en, kidie nẹ avwanre yeren akpọ ọlọlọhọ, avwanre de rhiabọreyọ edurhie na.” Dede nẹ Caroline vwo ebẹnbẹn rẹ omakpokpọ, avwanre brorhiẹn rẹ avwanre vwọ ra.

Victor vẹ Caroline da ton ẹga rẹ ọkobaro ọkieje phiyọ rere ayen sa vwọ vwẹ ukẹcha kẹ ihwo buebun ri vwo omavwerhovwẹn rẹ ayen vwo yono Baibol na. Igho rẹ ayen sẹro rọyen yen ayen vwọ vwẹrote oma rayen ẹsosuọ. Ọke vwọ yanran na, ayen de kpo Canada ra wian vwẹ emeranvwe evo, ọyena da nẹrhẹ ayen se rhivwin kpo Cameroon re ruiruo rẹ ọkobaro rayen kpobarophiyọ. Ebruphiyọ vọ yen te ayen obọ? Ayen kpo Isikuru rẹ Ihwo ri Ghwoghwo Uvie Na, je ga kerẹ ekobaro oghẹresan, enẹna ayen ga kerẹ iniọvo ri ruiruo rẹ ebanbọn. Victor da ta: “Ẹkua rẹ avwanre kuare na, nẹrhẹ avwanre sa mrẹ obicha ri Jihova.”

Vwẹ 2002, Alain ro kpo yunivasiti ọvo vwẹ Germany, de se itrati ọvo re se Ighene—Die Ovwan Cha Vwẹ Akpeyeren Rovwan Ru? Ovuẹ rọhẹ evun rọyen de muo vwo vwo erọnvwọn kpokpọ rọ tẹnrovi. Vwẹ 2006, o de kpo Isikuru rẹ Uyono rẹ Ewiowian, e de jo kpo Cameroon rọ dia ẹkuotọ ro nurhe.

Alain da mrẹ iruo rẹ ubrokẹ vwẹ Cameroon. Ọke vwọ yanran na, ọ da mrẹ iruo ra da hwa omamọ ọsa kẹ, ẹkẹvuọvo o de no nẹ iruo na rha cha nẹrhẹ ọ mrẹ ọke vwo kpo aghwoghwo kirobo ri jovwo-o. Re vwo durhie nẹ ọ rhe ga kerẹ ọkobaro oghẹresan, o de rhiabọreyọ edurhie na kpakpata. Ọga rọyen da vuẹ nẹ ọyen cha vwẹ igho buebun ba osa rọyen, ẹkẹvuọvo Alain wene orhiẹn ro bruru na-a. Ukuko na, ọ da rọvwọn Stéphanie rọ dia France vwẹ ikpe buebun. Egbabọse vọ yen o hirharoku vwẹ Cameroon?

Stéphanie da ta: “Mi họnvwọ ega evo, o ji vwo erọnvwọn re vẹ oma mẹ shephiyọ-ọ, jẹ ọ vwerhoma nẹ me sa mrẹ erọnvwọn ri mi vwo sivwin oma mẹ ọkieje, ọyena nẹrhẹ mi se chirakon rẹ ẹdia na.” Odirin rayen na ghwa  ebruphiyọ rhe. Alain da ta: “Avwanre vwo kpo ota eghwoghwo vwẹ ọko ri Katé rọhẹ asan ro sherabọ, avwanre da mrẹ ihwo evo re guọnọ yono Baibol na. Ọke vwọ yanran na, kẹ avwanre nene ayen ruẹ uyono womarẹ ifonu. Ivẹ usun rayen de bromaphiyame, a da vwẹ ẹko ọvo vwo mu vwẹ oboyin.” Stéphanie da ta: “A mrẹ vwo dje omavwerhovwẹn rọ herọ siẹrẹ a da chọn ihwo uko te ẹdia rẹ ayen da vwomakpahotọ kẹ Jihova-a. Ẹga rẹ avwanre vwẹ etinẹ nẹrhẹ avwanre sa mrẹ aghọghọ yena abọ buebun.” Enẹna, Stéphanie vẹ ọshare rọyen Alain rọ rhe dia oniruo okinriariẹ re na, ga kuẹgbe sasasa.

Gisèle bromaphiyame ọke ro vwo kpo isikuru rẹ idọktọ vwẹ Italy. Oma vwerhenrọ mamọ rọ vwọ mrẹ akpeyeren ọlọlọhọ rẹ aye gbe ọshare ri yoniro Baibol na yerẹn, o de rhi vwo ẹwẹn ro vwo ru bunphiyọ vwẹ iruo rẹ aghwoghwo na. Ọtiọyena, oniọvo aye re se Gisèle na da ton iruo rẹ ọkobaro ọkieje phiyọ tavwen o ki wontọ nẹ isikuru.

Ọke rọ vwọ hẹ Cameroon yen Gisèle ke vwo vwo ẹwẹn ro vwo ru bunphiyọ, jẹ o vwo erọnvwọn evo ro roro kpahen. Ọ da ta: “Me cha kpairoro vrẹ uturhi mi vwori me vwọ dia Italy, je yanjẹ igbeyan vẹ ihwo rẹ orua mẹ vwo vwẹ Italy.” Dedena, vwẹ May 2016 Gisèle da kua rhivwin kpo Cameroon. Ọke evo vwọ wan nu, ọ da rọvwọn Léonce, oghọn ukoko ri Cameroon de jiro kẹ vẹ ọshare rọyen nẹ ayen kua kpo Ayos, rọ dia orere ra da guọnọ ukẹcha rẹ ighwoghwota.

Mavọ yen akpeyeren hepha vwẹ Ayos? Gisèle da ta: “Avwanre sa rioja rẹ urhukpẹ vwẹ udughwrẹn evo. Ọke buebun na, ifonu avwanre fuẹn kidie avwanre sa shaji raye-en. Mi yono obo ra vwẹ irhe chere emu, vwẹ ason, avwanre ji muẹ iwibaro vẹ itọshi vwo kpo amievo vwẹ uto, kidie ihwo buẹn etiyin ọke yena-a.” Mavọ yen ayen se vwo yerin ghene ẹdia na? Gisèle da ta: “Ẹwẹn ọfuanfon ri Jihova, uvi rẹ ọshare, kugbe uchebro vẹ igho ro nẹ obọ rẹ igbeyan vẹ ihwo rẹ orua rhe, chọn avwanre uko mamọ.”

Oma vwerhen Gisèle nẹ o rhivwin kpo ẹkuotọ ro nurhe? Ọ da kpahen vẹ omavwerhovwẹn: “E! Dẹn.” Vwọba, ọ da ta: “Ẹsosuọ, avwanre hirharoku egbabọse evo, ofu ji dje avwanre, jẹ, avwanre vwo phi enana kparobọ nu, mẹ vẹ ọshare mẹ de no nẹ avwanre ru obo ro fori nẹ avwanre ru. Avwanre vwẹroso Jihova ji sikẹrẹ.” Léonce vẹ Gisèle kpo Isikuru rẹ Ihwo ri Ghwoghwo Uvie Na, enẹna ayen ga kerẹ ekobaro oghẹresan ubrọke.

Kerẹ ihwiyerin ri chirakon rẹ aruọke sansan rere ayen se vwo hwe iyerin buebun, ihwo ri rhivwin kpo ẹkuotọ re de vwiẹ ayen na vwẹ erọnvwọn sansan vwo ze, rere ayen sa vwọ vwẹ ukẹcha kẹ ihwo ri rhiabọreyọ ovuẹ rẹ Uvie na. Jihova cha karophiyọ ighwoghwota yena re wian gangan fikirẹ ẹguọnọ rẹ ayen vwo kpahen odẹ rọyen. (Neh. 5:19; Hib. 6:10) Ọ da dianẹ wọ dia ẹkuotọ ọfa, wo de nyo nẹ a guọnọ ukẹcha rẹ ighwoghwota vwẹ ẹkuotọ wo nurhe, wo se rhivwin? Wo de ru ọtiọyen, wọ cha mrẹ ebruphiyọ gbidiki.—Isẹ 10:22.