FOR past, plenty brothers and sisters wey go another country make they get better life, don come back to their own country. The love wey they get for Jehovah and for people, don move them to go place wey publishers no too dey to preach the good news. (Matt. 22:37-39) Which things they leave, and wetin be the blessings wey they get? To answer the question, make we talk about one country for West Africa wey them de call Cameroon.

For 1998, one brother wey e name na Onésime pack from e country for Cameroon go live for another country for 14 years. One day for meeting, e hear one example about the preaching work. The brother wey de give the talk, talk say, “If two friends de catch fish for two different place, and one de catch fish pass the other one, you no think say the friend wey no de catch plenty fish go move go the place wey plenty fish dey?”

That example make Onésime begin think about how to go back to Cameroon, where plenty people want study Bible, so that e go fit help the publishers for there. But something de disturb e mind. Brother Onésime fit live for Cameroon again after e don live for another country for many years? For Onésime to know whether e go fit still live for Cameroon again, e go visit Cameroon for six months. Then for 2012, e pack go back to Cameroon.

Onésime talk say: “I need to learn how to live for hot weather again, and how to live life for there. For Kingdom Hall, I need to learn how to sitdown for hard bench again.” But Onésime still talk with smile say: “The more I de put my mind for the program, the more I stop to think about the soft chairs wey I de sitdown before.”

For 2013, Onésime marry one sister wey e name na Géraldine. This sister go back to Cameroon after e don live for France for nine years. Because this husband and wife put the Kingdom first for their life, how Jehovah bless them? Onésime talk say: “Me and my wife don attend the School for Kingdom Evangelizers and we don serve for Bethel. Twenty people wey we study Bible with for our congregation, baptize last year. Now I feel say the place wey I de catch ‘fish,’ na the correct place.” (Mark 1:17, 18) Géraldine talk say: “Jehovah don bless me pass the way I expect-am.”

One sister wey e name na Judith, pack go America. But e want do more for Jehovah. The sister talk say, “Anytime wey I go visit my family for Cameroon and I want go back to America, I de cry because I de leave people wey I don start to study Bible with.” But, e de hard Judith to go live for Cameroon again.  This sister get better job wey them de pay-am well, and wey de allow-am to pay for the treatment wey them de give e papa wey no well for Cameroon. But Judith pack go back go live for Cameroon again because e trust Jehovah. E talk say e miss some of the sweet things wey e de enjoy for America. E pray to Jehovah to help-am make e fit adjust to the kind life wey them de live for Cameroon. And one circuit overseer and e wife, come encourage-am.

When Judith remember how things be that time, e talk say, “Before three years finish, I happy say I fit help four people baptize.” Judith start to serve as special pioneer. Today, e de follow e husband wey e name na Sam-Castel de do circuit work. But, wetin happen to Judith papa? Sister Judith and e family come see one hospital for another country wey dey ready to pay for the operation wey they go do for Judith papa. The fine thing be say, the operation go well.

One brother wey e name na Victor pack go de live for Canada. After e read one Watchtower article about university, e come de think about-am. E stop to go university and e begin learn handwork. This brother talk say, “This one help me to quick get work and to pioneer, as I plan to do before.” After, Victor marry one sister wey e name na Caroline, and the two of them visit Cameroon. When they visit the branch office for Cameroon, some brothers encourage them make they think-am whether they fit come serve for Cameroon. Victor talk say, “We no get reason to say no, and since our life don already dey simple, we agree to come.” Even though say Caroline de sick, they still decide say they go come serve for Cameroon.

Victor and Caroline start to serve as regular pioneer so that they go fit help all the people wey they meet wey get interest for Bible. For some time, na the money wey they don save they use survive. After that one, they go work for Canada for some months, and this one give them chance to come back to Cameroon and continue to pioneer. Jehovah bless them? They go School for Kingdom Evangelizers, they serve as special pioneers, and now they be construction servants. Victor talk say, “Because we fit leave the things wey we de enjoy, this one allow us to see how Jehovah de support us.”

For 2002, one university student for Germany wey e name na Alain, read the tract wey be Youths—What Will You Do With Your Life? The thing wey e learn from the tract move-am to get new plans for life. For 2006, e go Ministerial Training School and after, they send-am go serve for Cameroon, the country wey they born-am.

For Cameroon, Alain see part-time work. After, e come see one better job with better salary. But e de worry say e no go get time to preach and teach like before. So when they invite-am make e come serve as special pioneer, e no waste time accept-am. The person wey e de work for tell-am say e go add join e salary. But Alain no gree, e do wetin e don plan. After, Alain marry one sister wey e name na Stéphanie. The sister don live for France for many years. Which problems Stéphanie get after e pack go Cameroon?

Stéphanie talk say: “I start to get small-small sickness and no be everything for there good for my body. But even though say e no  easy for me, I de manage to get treatment and I come dey okay.” Jehovah bless them as they endure. Alain talk say: “When we go preach for one village wey no near town wey them de call Katé, we see many people wey want study Bible. After, we come de use phone de study Bible with them. Two of the Bible student baptize, and the publishers come form one group.” Stéphanie still talk say: “Nothing de give person joy pass when e help people make they qualify to give their life to Jehovah. Because we don serve for this place, we don get this kind joy plenty times.” Today, Alain and Stéphanie de do circuit work.

One woman wey e name na Gisèle baptize when e de study medicine for school for Italy. The kind simple life wey the pioneer husband and wife wey study Bible with-am de live, really touch-am. And so this one want make-am do more for the preaching work. So Gisèle start to serve as regular pioneer before e finish school.

Gisèle get-am for mind to do more for Jehovah for Cameroon, but some things de worry-am for mind. E talk say, “I go need to lose the right wey I get to live for Italy and I no go dey with my friends and family wey de live for Italy.” Even with this one, for May 2016, Gisèle pack go back to Cameroon. After some time, e marry one brother wey e name na Léonce, and the branch office for Cameroon talk say make they go serve for one town wey the name na Ayos. The place really need more publishers to preach.

How life be for Ayos? Gisèle talk say: “Sometimes, we no de get light for many weeks and we no de fit charge our phones, and e de take long time before we de fit use the phone. I learn how to use fire wood cook, and we de use wheelbarrow and torch de go fetch water for night when plenty people no dey the stream.” Wetin help Gisèle and e husband? Gisèle talk say: “Jehovah use e spirit help us to endure. Me and my husband support each other. Our family and friends de encourage us and them de give us money sometimes.”

Gisèle happy say e go back to the country wey they born-am? E talk say: “Yes! I dey happy no be small. Things no first easy for us and we de feel sad sometimes. But when we comot-am for mind, me and my husband tell ourself say we do wetin we suppose do. We trust Jehovah and we don dey near to Jehovah now pass before.” Léonce and Gisèle go School for Kingdom Evangelizers, and now they don de serve as temporary special pioneer.

Like fisherman wey get heart to catch plenty fish even when e hard, people wey de go back to the country wey they born them de leave plenty things to help people wey really want hear the Kingdom message. The truth be say, Jehovah no go forget the hard work wey this publishers don do because they show say they love e name. (Neh. 5:19; Heb. 6:10) If you de live for another country, and they need more publishers to preach the good news for the country wey they born you, you dey ready to go back? If you go, Jehovah go really bless you.—Prov. 10:22.