BOOR e walag ni kar chuwgad ko nam rorad ka ranod ra pared nga boch e nam ni ngar maruwelgad ni nge yag e salpiy ngorad e kar sulod ko nam rorad. Bochan nib t’uf Jehovah nge girdi’ rorad, ma aram fan ni ka ranod ra pared nga boch e binaw nib t’uf e ayuw ko machib riy. (Matt. 22:37-39) Mang boch ban’en ni kar paged fan, ma mang boch e tow’ath ni ke yag ngorad? Ngad weliyed murung’agen fare nam nu Cameroon, ya nge yag nda nanged murung’agen e re n’ey.

Nap’an e duw ni 1998 ma bay reb e walag ni pumoon ni ka nog Onésime ngak ni chuw ko nam rok u Cameroon. Ragag nge aningeg e duw ni par u yugu reb e nam. Immoy reb e rran ni yibe muulung, me rung’ag ba fanathin nni pi’ u reb e welthin ni be weliy murung’agen fare maruwel ni machib. I weliy faen be pi’ e welthin ni gaar, “Faanra ba thil e gin be fita’ l’agruw i fager riy, ma bay bagayow ni boor e nig ni be kol ngak bagayow, ma gur, gathi ra chuw facha’ ni buchuuw e nig ni be kol nge yan i fita’ ko gin boor e nig riy?”

Re fanathin ney e k’aring Onésime ni nge adag ni nge sul nga Cameroon ko gin boor e girdi’ riy ni baadag ni nge fil e Bible, ya nge yag ni ayuweg e pi walag u rom ko machib. Machane bay boch ban’en ni i magafan’ ngay. Gur, rayog ni ngki mecham bayay nga rogon e par ko nam rok ni aram rogon ni ke yoor e duw ni ke par u yugu reb e nam, fa? Ere n’en ni rin’ Onésime e aram e yan i par nga Cameroon u lan nel’ e pul ya nge yag ni nang ko rayog ni ngki mecham bayay ko par u rom fa dabiyog. Nap’an e duw ni 2012, ma aram me chuw ko fare nam ni be par riy nge sul ko nam rok.

I weliy Onésime ni gaar: “Ba t’uf ni nggu mecham ko gowel u rom nge rarogon e par ko girdi’. Kub t’uf ni ngguy rogon ni nge mecham ngog ni ngaug un ko par u daken e benchi nib elel ni yima par nga daken u Tagil’ e Liyor romad.” Ki non ni be siminmin ni gaar, “Machane nap’an nug ra tiyan’ug ko pi welthin ni yibe pi’, ma aram e n’en ni ma ayuwegeg ni nge ndab kug lemnag e tin baaram e chiya nib fel’ rogon e par riy ni bay ko bin baaram e Tagil’ e Liyor ni ug un riy ko muulung.”

Nap’an e duw ni 2013, me leay Onésime Géraldine nreb e walag nib pin ni ke sul nga Cameroon ni i par u France u lan mereb e duw. Mang boch e tow’ath ni yag ngak e re wu’ i mabgol ney ni bochan e ra m’onegew e n’en nib m’agan’ Jehovah ngay u lan e yafos rorow? I gaar Onésime: “Ke yag ni nggu unew ko fare skul ni ka nog e School for Kingdom Evangelizers ngay, mu kug unew ko pigpig u Bethel. U lan fare duw ni ke yan ma 20 e girdi’ ni yima fil e Bible ngorad ko ulung romow e kar uned ko taufe. Rayog ni nggog ni chiney e gu bay ko gin nsusun e gu bay riy ni nggu ‘yognag’ e girdi’.” (Mark 1:17, 18) Ki yog Géraldine ni gaar: “Boor e tow’ath ni ke yag ngog nda ug lemnag nra yag ngog.”

Judith e chuw ko nam rok nge yan i par nga Meriken, machane baadag ni nge yoornag e tin be rin’ ni fan ngak Jehovah. I gaar, “Urngin yay nug ra sul nga Cameroon ni ngguy girdien e tabinaw rog, ma ra taw nga nap’an ni nggu chuw, ma gu ma yor ni bochan e nggu pag e piin ni ka fin gu tababgad ko fol Bible.” Machane be maruwar laniyan’ Judith ni nge sul nga Cameroon. Ba fel’ puluwon e maruwel rok ko gin ma  par riy ma rayog ni nge pi’ puluwon e tafalay ko chitamangin ni ma par u Cameroon. Yugu aram rogon me pagan’ Judith ngak Jehovah, ma aram me dugliy ni nge sul nga Cameroon. I yog ni bay boch ban’en ni i momnag rogon e par rok u Meriken ni ka ma finey. Ere meybil ngak Jehovah ni nge ayuweg ya nge yag ni mecham nga rogon e par rok u Cameroon, maku bay reb e walag ni ma lekag e ulung nge ppin rok nra piew e athamgil nga laniyan’.

Nap’an ni sul Judith nge lemnag e ngiyal’ ni sul nga Cameroon, me yog ni gaar, “U lan dalip e duw ma ke felfelan’ug ngay ni ke yag ni nggu ayuweg aningeg e girdi’ ni ngar uned ko taufe.” I tabab Judith ko pigpig ni ir reb e special pioneer, machane chiney e ma un ko pumoon rok ni ka nog Sam-Castel ngak ni ngaur lekagew boch e ulung. Ere mang e buch rok e chitamangin Judith? I yag ni ngar pirieged girdien e tabinaw rok reb e aspital u reb e nam nib m’agan’rad ngay ni ngar pied puluwon e tafalay rok e chitamangin u nap’an nni sey. Ra felfelan’gad ni bochan e gubin ban’en ni yan nib fel’ rogon ko tafalay rok.

Bay reb e walag ni pumoon ni ka nog Victor ngak ni chuw nge yan i par nga Canada. Tomuren ni beeg reb e article ni bay u lan reb e Wulyang ko Damit ni be weliy murung’agen e skul nib tolang, ma aram mi i fal’eg i lemnag murung’agen e skul rok. Ere tal ko bin baaram e skul ni i un ngay nib tolang, me tabab ni nga i fek in e class nra yognag boch e salap ngak nra ayuweg ni nge pirieg e maruwel. I gaar: “Re n’ey e yag ni nge ayuwegeg ni nggu pirieg e maruwel nib papey, mug rin’ e n’en ke n’uw nap’an nug be lemnag ni nggu rin’ ni aram e nggu pioneer.” Boch nga tomuren me leay Victor Caroline, ma aram ma ranow nga Cameroon. Nap’an nranow ra guyew e branch ofis u rom, ma bay boch e walag u rom nra pied e athamgil nga lanin’row ni ngar lemnagew ko rayog ni ngar pigpiggow u Cameroon fa danga’. I gaar Victor, “Dariy ban’en ni be talegmow ndab gu pigpiggow u Cameroon, ma bochan nib mom rogon e par romow ma ireray ban’en nrayog ni nggu rin’ew.” Yugu aram rogon nib m’ar Caroline, machane mar dugliyew ni ngar sulow nga Cameroon ngar pigpiggow u rom.

I tabab Victor nge Caroline ko pigpig u rom ni yow l’agruw e regular pioneer ni ngar ayuwegew e girdi’ ni kar mada’gad u nap’an e machib ni yad baadag ni ngar nanged e n’en be weliy e Bible. Ba gaman e salpiy ni kar tew nga bang nrayog ni nge ayuwegrow, ere aram fan nde t’uf ni ngar maruwelgow ko som’on. Machane boch nga tomuren mar sulow nga Canada ngkur maruwelgow bayay ya nge yag e salpiy ngorow mfin kur sulow nga Cameroon ngar ululgow ko pioneer. Mang boch e tow’ath ni ke yag ngorow? Ke yag ni ngar unew ko fare skul ni ka nog e School for Kingdom Evangelizers ngay, ma aram mi yow pigpig ni yow l’agruw e special pioneer, ma chiney e yow ma un i toy boch e naun ni fan ko liyor rodad. I gaar Victor, “Bochan ni kug digeyew boch ban’en ni i momnag rogon e par romow, ma aram e thingar gu taga’gow ngak Jehovah ma ke ayuwegmow.”

Nap’an e duw ni 2002, ma bay reb e walag ni pumoon ni ka nog Alain ngak ni ma un nga reb e skul nib tolang u Germany ni beeg fare tract ni kenggin e Piin Fel’ Yangaren​—Mang e Ngam Rin’ed ko Yafas Romed? Pi n’en ni beeg u lan e re tract nem e k’aring ni nge nameg boch ban’en ni nge rin’. Nap’an e duw ni 2006, me un ko fare skul ni ka nog e Ministerial Training School ngay, ma aram min pi’ nge yan nga Cameroon ko gin nni gargeleg riy ni nge pigpig u rom.

I pirieg Alain e maruwel nrayog ni nge un ngay u Cameroon nde polo’ reb e rran. Boch nga tomuren me pirieg reb e maruwel nib fel’ boch puluwon, machane i magafan’ nri chey ni un ngay me lich e tayim nrayog ni nge fanay ni fan ko machib. Ere nap’an nnog ngak ni nge pigpig ni ir reb e special pioneer, me m’agan’ ngay ni nge rin’ e re n’ey. I yog e en nib ga’ ko maruwel rok ngak nra tolangnag puluwon, machane me siyeg e re maruwel nem, ma aram me mang reb e special pioneer. Boch nga tomuren me  leay Stéphanie nreb e walag nib pin ni i par u France ni boor e duw. Ere mang boch e magawon ni mada’nag Stéphanie u nap’an ni yan i par nga Cameroon?

I gaar Stéphanie: “Gu tabab ni nggu m’ar, machane me yag ni nggu un ko tafalay miki fel’ rogog bayay.” Ri tow’athnag Jehovah e re wu’ i mabgol ney ko athamgil ni ur tew. I gaar Alain: “Nap’an nug warow nga Katé nreb e binaw nib palog ko mach ni nggu machibgow, ma aram mug piriegew boch e girdi’ u rom ni yad baadag ni ngar filed e Bible. Boch nga tomuren me yag ni ngaug filed e pi cha’ney e Bible u telefon. L’agruw i yad ni gamad ma fil e Bible e ra unew ko taufe, miki tabab in e walag u rom ni ngaur bad nga taabang ni ngaur muulunggad ma yad be machib u taabang.” Ki gaar Stéphanie: “Dariy ban’en nri ma yibnag e felfelan’ ngodad nge migid e bin ni ngad ayuweged be’ ni nge bung rogon ni nge ognag e yafos rok ngak Jehovah. Nap’an e pigpig ni kug tew u roy, ma boor yay ni ke yag ni nggu felfelan’gow ni bochan e re n’ey.” Chiney e ma lekag Alain nge Stéphanie boch e ulung.

I un Gisèle ko taufe u nap’an ni be skulnag e togta u Italy. Ri ngat nga rogon feni mom e par rok ba wu’ i mabgol ni yow ba pioneer ni ur filew e Bible ngak, ma aram fan ni baadag ni nge yoornag e tin be rin’ ni fan ko machib. Ere tabab Gisèle ko pigpig ni ir reb e regular pioneer u nap’an ni ke chugur ni nge mu’nag e skul rok.

Baadag ni nge sul nga Cameroon ni nge yoornag e tin be rin’ ni fan ngak Jehovah, machane bay boch ban’en ni be magafan’ ngay. I gaar, “Re n’ey e be yip’ fan ni nggu pag fan mat’awug nrayog ni nggu par u Italy, mug digey e pi fager rog nge chon e tabinaw rog u rom.” Yugu aram rogon, ma nap’an e pul ni May ko duw ni 2016, me sul Gisèle nga Cameroon.

Boch nga tomuren me leay Léonce, ma aram me yog e branch ofis ngorow ni ngan pi’row ngar pigpiggow u reb e binaw ni ka nog yu Ayos ngay nrib t’uf e ayuw ko machib riy.

Uw rogon e par u Ayos? I weliy Gisèle ni gaar: “Ba ga’ ni ma yan boch e wik ndariy e gamig, ere dabiyog ni nggu chargenagew e cell phone romow. Ere yooren e ngiyal’ e dabiyog ni nggu callgow riy. Gu fil rogon ni ngaug lum ko l’ud, ma ra nep’ ma gamow ma fek e wulbar nge dengki nggu warow ko lul’ ni nggu l’ingew e ran ni bochan e aram e ngiyal’ ni ke buchuuw e girdi’ u rom.” Uw rogon ni yag ni nge athamgil e re wu’ i mabgol ney? I gaar Gisèle: “Gelngin Jehovah nib thothup e ayuwegmow. Maku ra bagamow ma ma ayuweg bagamow. Ku arrogon girdien e tabinaw romow nge pi fager romow ni ku yad ma pi’ e athamgil nga lanin’mow, ma yu ngiyal’ e yad ma pi’ e salpiy ni nggu fekew e tin nib t’uf romow riy.”

Ere gur, i felfelan’ Gisèle ni ke sul ko nam rok? I yog ni gaar: “Arrogon! Som’on e ug mada’nagew boch e magawon maku immoy yu ngiyal’ ni i mulan’mow, machane ke yag ni nggu gelgow ko pi n’em. Rayog ni nggognew e pumoon rog ni kug rin’ew e n’en nib t’uf ni nggu rin’ew. Ba pagan’mow ngak Jehovah, ma kari chugur e tha’ u thilmad.” Ke un Léonce nge Gisèle ko fare skul ni ka nog e School for Kingdom Evangelizers ngay, ma chiney e yow be pigpig ni yow l’agruw e special pioneer ni bay n’umngin nap’an.