1. Aha do na mangapuli rohatta tikki tahilala holan sahalakta na mangadopi masalahta? (Psalmen 118:5-7)

TIKKI susa hamu, hea do hamu makkilala holan sahalakmuna do jala dang adong na mangurupi? Godang do na makkilala songon i, termasuk ma naposo ni Debata na setia. (1 Raj. 19:14) Molo songon i do na dihilala hamu, ingot ma janji ni Jahowa, “Ndang tadingkononku ho jala ndang pasombuonku ho.” Gabe pos ma rohatta mandok, “Jahowa do pangurupi di ahu, ndang mabiar ahu.” (Heb. 13:5, 6) Dibahen Apostel Paulus do surat on tu akka halak Kristen di Judea taon 61 M. Sarupa do pakkilalaan ni si Paulus dohot sahalak panurat Psalmen na disurat di Psalmen 118:5-7.​—Jaha.

2. Aha do na lao taulas di artikel on, jala boasa?

² Jotjot do dihilala si Paulus na diurupi Jahowa ibana. Misalna dua taon andorang so dibahen si Paulus surat tu halak Heber, selamat do ibana di pardalanan nang pe masa badai di laut. (Ul. 27:4, 15, 20) Saleleng di pardalanan i dohot martaon-taon andorang so i, diurupi Jahowa do si Paulus marhite marragam cara. Diurupi do ibana marhite Jesus dohot akka suru-suruan, akka halak na marhuaso, dohot dongan sahaporseaon. Tikki taulas pengalaman ni si Paulus di artikel on, lam pos ma rohatta tu janji ni Debata na urupanna do hita.

3. Sukkun-sukkun aha do na tubu di roha ni si Paulus jala boasa?

³ Di taon 56 M, disarat akka jolma ma si Paulus kaluar sian bagas joro na di Jerusalem jala naeng dibunu ma ibana. Marsogotna i tikki diboan ibana tu jolo ni Sanhedrin, nga hampir mate ibana dibahen akka musuna. (Ul. 21:30-32; 22:30; 23:6-10) Tikki mangadopi i sude, pasti porlu do si Paulus diurupi. Sukkun-sukkun do ra rohana, ‘Sadia leleng nai do hutaon na haccit on?’

4. Songon dia do Jahowa mangurupi si Paulus marhite Jesus?

⁴ Songon dia do si Paulus diurupi? Di borngin dung ditakkup si Paulus, jongjong ma Jesus di labbungna jala ninna ma, “Unang ho mabiar! Ai ingkon paboaonmu dope taringot tu ahu di Rom songon na pinaboam di Jerusalem.” (Ul. 23:11) Dipatogu do si Paulus alani i! Dipuji Jesus do si Paulus ala semangat do ibana marbarita saleleng on di Jerusalem. Marjanji do muse Jesus tu si Paulus pasti selamat do ibana sahat tu Rom, asa marbarita na uli muse ibana disi. Tikki mambege janji ni Jesus i lam pos ma roha ni si Paulus, songon sahalak dakdanak na merasa aman tikki dihaol bapakna.

5. Songon dia do Jahowa mangurupi si Paulus marhite suru-suruan? (Ida gambar sampul.)

⁵ Akka tantangan aha dope na diadopi si Paulus? Dua taon dukkon na masa di Jerusalem i markapal ma si Paulus tu Rom. Alai ro ma badai. Ala massai balga do badai i, dipikkir parkarejo ni kapal dohot penumpang i ma mate nama nasida. Alai dang mabiar si Paulus. Boasa? Didok ibana ma tu nasida, “Na bodari, jongjong do di lambungku suru-suruan ni Debata, i ma Debata nampuna ahu jala na husomba. Jala ninna ma, ‘Unang ho mabiar Paulus. Ingkon jongjong do ho di jolo ni Kesar. Alani asi ni roha ni Debata tu ho, malua do sude donganmu na sakapal i.’” Marhite suru-suruan dipaingot Jahowa do muse janjina tu si Paulus na hea dipaboa Jesus tu ibana. Jala ujungna selamat do si Paulus sahat di Rom songon na dijanjihon Jahowa.​—Ul. 27:20-25; 28:16.

6. Aha do janji ni Jesus na boi patoguhon hita jala boasa?

⁶ Songon dia do hita diurupi? Urupan ni Jesus do hita songon ibana mangurupi si Paulus. Marjanji do Jesus tu sude na mangihutton ibana, “Sai na dongananku do hamu sahat tu panutup ni jaman on.” (Mat. 28:20) Boi do hata ni Jesus  on patoguhon rohatta. Boasa? Alana sipata maol do situasi na taadopi. Uppamana tikki mate halak na tahaholongi, olo dope sai lungun rohatta dang holan piga-piga ari alai sappe martaon-taon. Na asing mangadopi situasi na maol ala nungnga lam matua. Na asing muse mandele ala depresi. Nang pe songon i boi do hita martahan ala taboto sai didongani Jesus do hita mangadopi situasi manang aha pe.​—Mat. 11:28-30.

7. Songon na didok di Pangungkapon 14:6, songon dia do Jahowa mangurupi hita saonari?

⁷ Didok do di Bibel na lao urupan ni Jahowa do hita marhite suru-suruanna. (Heb. 1:7, 14) Uppamana, diurupi suru-suruan do hita paboahon “barita na uli taringot tu Harajaon” tu “saluhut bangso, marga dohot bahasa”.​—Mat. 24:13, 14; jaha Pangungkapon 14:6.

8. Songon dia do Jahowa mangurupi si Paulus marhite sahalak komandan militer?

⁸ Songon dia do si Paulus diurupi? Taon 56 M, dipapos Jesus do roha ni si Paulus na boi do ibana selamat sahat tu Rom. Alai piga-piga halak Jahudi di Jerusalem berencana lao pamatehon si Paulus. Tikki diboto komandan militer ni Rom si Klaudius Lisias rencana i, pittor diurupi ibana do si Paulus. Pittor diparettahon ibana ma asa diboan si Paulus tu Kaesarea, hira-hira 100 kilometer daona sian Jerusalem. Jala disuru ibana do akka tentarana manjaga si Paulus saleleng di pardalanan i. Di Kaesarea, diparettahon Gubernur Feliks ma asa ditahan si Paulus di istana ni si Herodes. Gabe selamat ma si Paulus sian akka halak Jahudi na naeng mambunu ibana.​—Ul. 23:12-35.

9. Aha do na dibahen Gubernur Festus mangurupi si Paulus?

⁹ Dua taon dukkon i, toktong dope si Paulus di Kaesarea. Tikki i si Festus ma gubernur ni Kaesarea manggattihon si Feliks. Dipangido halak Jahudi ma si Festus asa mamboan si Paulus tu Jerusalem lao diadili, alai dang olo si Festus. Nungnga diboto ibana ra naeng “marsangkap nasida laho manangkup jala mambunu si Paulus di tonga dalan”.​—Ul. 24:27–25:5.

10. Tikki dipangido si Paulus naik banding, aha do na diulahon si Festus?

¹⁰ Ujungna diadili ma si Paulus di Kaesarea. Ala naeng mambuat roha ni halak Jahudi, disukkun si Festus ma tu si Paulus, “Olo do ho laho tu Jerusalem, asa disi ho diadili di jolongku taringot tu parsoalan on?” Alai diboto si Paulus do molo lao ibana tu Jerusalem dibunu halak Jahudi ma ibana disi. Jadi asa boi ibana selamat jala marbarita na uli di Rom, dipangido ibana ma naik banding tu Kesar. Dung makkatai si Festus dohot akka penasehatna didok ibana ma, “Ala dipangido ho naik banding tu Kesar, borhat ma ho tu Kesar.” Alani keputusan i gabe selamat ma si Paulus. Ujungna borhat ma si Paulus tu Rom, dao sian akka musu na naeng mambunu ibana.​—Ul. 25:6-12.

11. Hata ni si Jesaya na dia do na diingot si Paulus?

¹¹ Tikki naeng borhat si Paulus tu Rom, diingot ibana do ra hata ni si Jesaya tu akka halak na mangalo Jahowa, “Pambahen hamu ma angka rencanamuna, alai ndang tarpasaut hamu i sude. Hatai hamu ma sagodanggodangna, alai  ndang marguna i sude. Ai Debata do dongannami.” (Jes. 8:10, Bibel siganup ari) Diboto si Paulus do na lao urupan ni Jahowa do ibana. Gabe togu ma ibana mangadopi hasusaan na lao masa.

12. Boha do sikap ni si Julius tu si Paulus, jala aha do na diattusi si Paulus sian i?

¹² Taon 58 M, borhat ma si Paulus tu Rom. Ala gabe sahalak tahanan do ibana, dipasahat ma si Paulus tu sahalak perwira tentara ni Rom na margoar si Julius. Nang pe marhuaso si Julius alai dang gabe lomo-lomona tu si Paulus. Marsogotna i dung marlabu kapal ni nasida, burju do si Julius tu si Paulus diloas do ibana mandapotton akka donganna. Gariada diselamatton si Julius do si Paulus. Tikki kandas kapal i naeng dibunu tentara ma sude tahanan i asa unang lari. Alai diorai si Julius do nasida ala naeng paluahon si Paulus. Diboto si Paulus do ra Jahowa do na mangurupi ibana marhite sahalak perwira na burju.​—Ul. 27:1-3, 42-44.

13. Songon dia do Jahowa boi mamakke akka halak na marhuaso?

¹³ Songon dia do hita diurupi? Boi do dipakke Jahowa tondi parbadiana mambahen akka halak na marhuaso mangulahon lomo ni rohana. Songon na didok Raja Salomo, “Tudoshon aek ni angka sunge do roha ni raja di bagasan tangan ni Jahowa, tung tu sandok lomo ni rohana do ditogutogu.” (Poda 21:1) Aha do lapatan ni ayat on? Boi do dibahen sasahalak saluran ni aek lao padalatton aek i tu inganan na dihalomohon rohana. Suang songon i ma, boi do dipakke Jahowa tondi parbadiana mambahen halak na marhuaso asa mangulahon lomo ni rohana. Gabe taronjar ma roha ni nasida mambahen keputusan na parohon laba tu naposo ni Debata.​—Bandingkon Esra 7:21, 25, 26.

14. Songon na didok di Ulaon ni Apostel 12:5, akka ise do na boi tatangiakkon?

¹⁴ Aha do na boi taulahon? Boi do tatangiakkon “angka raja dohot angka na marhuaso” tikki dibahen nasida keputusan na adong hubunganna tu ulaonta manomba Jahowa. (1 Tim. 2:1, 2; Neh. 1:11) Songon halak Kristen di abad na parjolo, marsitutu do hita manangiakkon akka donganta na adong dipenjara. (Jaha Ulaon ni Apostel 12:5; Heb. 13:3) Tapangido ma tu Jahowa asa burju akka penjaga penjara, songon na dibahen si Julius tu si Paulus.​—Ul. 27:3.

15-16. Songon dia do Jahowa mangurupi si Paulus marhite si Aristarkus dohot si Lukas?

¹⁵ Songon dia do si Paulus diurupi? Tikki pardalanan tu Rom, dipakke Jahowa do dongan sahaporseaon mangurupi si Paulus. Taida ma akka contohna.

¹⁶ Adong dua dongan ni si Paulus na setia, i ma si Aristarkus dohot si Lukas. Didongani nasida do si Paulus saleleng di pardalanan sian Kaesarea tu Rom. * Dang adong dipaboa di Bibel na hea Jesus marjanji tu si Aristarkus dohot tu si Lukas asa selamat nasida sahat tu Rom. Alai rade do nasida mandongani si Paulus nang pe berbahaya pardalanan i. Tikki di pardalanan i pe baru diboto nasida na lao selamat do nasida sahat tu Rom. Jadi tikki dohot si Aristarkus dohot si Lukas tu kapal i, pasti mandok mauliate do si Paulus tu Debata Jahowa. Ala nungnga dilehon Jahowa dua donganna na barani lao mangurupi ibana.​—Ul. 27:1, 2, 20-25.

17. Songon dia do Jahowa mangurupi si Paulus marhite dongan sahaporseaon?

¹⁷ Saleleng di pardalananna, adong do piga-piga hali dongan di huria mangurupi si Paulus. Tikki marlabu kapalna di Sidon dipaloas si Julius do si Paulus “mandapothon angka donganna” asa boi “diurupi nasida si Paulus”. Jala tikki di kota Potioli, pajuppang ma si Paulus dohot akka dongan sahaporseaon. ‘Dijujui nasida do si Paulus asa tading disi saleleng pitu ari.’ Diparade nasida ma aha na porlu tu si Paulus dohot akka donganna. Jala pasti dipatogu do nasida tikki dipaboa si Paulus akka pengalamanna na denggan. (Bandingkon Ulaon ni Apostel 15:2, 3.) Dung pajuppang nasida, dilanjutton si Paulus dohot akka donganna ma pardalanan i.​—Ul. 27:3; 28:13, 14.

18. Aha do na mambahen si Paulus marpos ni roha jala mandok mauliate tu Debata?

¹⁸ Dung sahat si Paulus di Rom, pasti  diingot ibana do surat na dibahen ibana tolu taon naung salpu tu huria i na mandok, “Nunga martaon-taon ahu naeng ro mandapothon hamu.” (Rom 15:23) Alai dang hea tarpikkir si Paulus ro ibana muse tusi gabe tahanan. Pasti dipatogu do si Paulus tikki mangida akka dongan di Rom paimahon ibana di dalan. “Dung diida si Paulus nasida, didok ibana ma mauliate tu Debata jala lam pos ma rohana.” (Ul. 28:15) Boasa mandok mauliate si Paulus tu Debata alani akka dongan i? Ala diboto si Paulus do marhite akka dongan sahaporseaon i ma diurupi Jahowa ibana.

19. Songon na dipaboa di 1 Petrus 4:10, songon dia do Jahowa mamakke hita mangurupi akka donganta?

¹⁹ Aha do na boi taulahon? Adong do diboto hamu akka dongan di huria na marsitaonon alani sahit, manang alani situasi na maol? Manang adong do akka dongan na marhabot ni roha ala mate halak na dihaholongi ibana? Molo adong akka dongan na mangadopi sisongon i tapangido ma tu Jahowa, asa diurupi hita patuduhon holongta tu nasida marhite pakkataion dohot parniulaon. Pakkataion dohot parniulaonta i boi do patoguhon akka donganta. (Jaha 1 Petrus 4:10.) * Molo taurupi nasida gabe pos ma roha ni nasida tu janji ni Jahowa na mandok, “Ndang tadingkononku ho jala ndang pasombuonku ho.” Pasti las hian do rohatta molo boi taurupi akka donganta.

20. Boasa boi pos rohatta mandok, “Jahowa do pangurupi di ahu”?

²⁰ Songon si Paulus dohot akka donganna, hita pe taadopi do masalah na songon badai saonari. Alai taboto do boi do hita gabe togu ala didongani Jahowa do hita. Diurupi ibana do hita marhite Jesus dohot akka suru-suruan. Jala boi do diurupi Jahowa hita marhite akka halak na marhuaso lao mangulahon lomo ni rohana. Jala songon na tahilala, dipakke Jahowa do tondi parbadiana asa taronjar roha ni akka dongan lao mangurupi hita. Jadi songon si Paulus, gabe pos ma rohatta mandok, “Jahowa do pangurupi di ahu, ndang mabiar ahu. Aha ma na boi bahenon ni jolma tu ahu?”​—Heb. 13:6.