1. Aha do na boi mangapoh uhurta sanggah iahap hita lang dong na mangurupi hita? (Psalmen 118:5-7)

ONGGA do iahap ham lang dong na mangurupi sanggah ham ibagas hasosakan? Bahat do na mangahapkon sisonai tarmasuk ma homa juakjuak ni Naibata. (1 Raj. 19:14) Anggo sonai pangahapmu, dingat ma janji ni Jahowa on, “Sabonar na so tadingkonon-Ku do ho, sabonar na so paturuton-Ku do ho!” Halani ai, gabe pos ma uhurta mangkatahon, “[Jahowa] do pangurupi bangku, seng mabiar ahu.” (Heb. 13:5, 6) Isurat si Paulus do hata ai hubani halak Kristen i Judea bani tahun 61 M. Na ihatahon si Paulus ai dos do songon na ihatahon bani Psalmen 118:5-7.​—Basa.

2. Aha do na laho iulas hita bani artikel on, janah mase?

² Sarupa do pangahap ni si Paulus songon pangahap ni panurat ni Psalmen ai. Humbani pangalaman ni sandiri, domma iahapkon si Paulus sonaha Jahowa gabe Sipangurupi bani. Umpamani, dua tahun paima itulis ia suratni bani halak Heber, hona haba-haba ma si Paulus sanggah marlayar. (Lah. 27:4, 15, 20) Hassi pe sonai, ipatuduh Jahowa do bani si Paulus sonaha Ia boi gabe Sipangurupi sanggah ibagas hasosakan. Dong tolu cara na ibahen Jahowa laho mangurupi si Paulus. Umpamani, iurupi Ia do si Paulus marhitei malekat, marhitei halak siparkuasa, ampa marhitei hasoman sahaporsayaon. Sanggah iulas hita pangalaman ni si Paulus, lambin porsaya ma hita ibalosi Jahowa do homa tonggonta sanggah hita mangindo pangurupion hu Bani.

3. Aha do ra na ipingkirhon si Paulus, janah mase?

³ Si Paulus porlu iurupi. Bani tahun 56 M, isarad halak na mabuei ma si Paulus hun darat ni rumah panumbahan i Jerusalem. Sihol bunuhon ni sidea do ia. Anjaha patarni ai, iboan ma ia hu lobei ni Sanhedrin, janah ibalbali ma ia ijai. (Lah. 21:30-32; 22:30; 23:6-10) Sanggah ai, ra do nini uhurni sonon, ‘Sadiha dokah ma boi hutaron sonon?’

4. Sonaha Jahowa mangurupi si Paulus marhiteihon Jesus?

⁴ Sonaha Jesus mangurupi si Paulus? Patarni, bani borngin ni ari, roh ma Jesus janah nini ma, “Tenger ma uhurmu! Songon na dob sinaksihonmu ahu i Jerusalem, sonai do saksihononmu ahu i huta Rom.” (Lah. 23:11) Tontu gabe tarapoh ma uhur ni si Paulus. Ipuji Jesus do ia halani domma mambaritahon pasalsi i Jerusalem. Anjaha marjanji do Jesus das do holi si Paulus i Rom laho marbarita ijai. Dobkonsi ai, gabe sonang ma uhur ni si Paulus usih songon dakdanak na i lambungni bapani.

5. Sonaha Jahowa manggunahon malekat laho mangurupi si Paulus? (Tonggor ma gambar sampul.)

⁵ Hasunsahan aha ope na iahapkon si Paulus? Hira-hira dua tahun dobkonsi ai, sanggah markapal ia hu Italia, roh ma haba-haba na doras mangkantam kapal ai. Iagan ganup halak na i kapal ai ma matei mando sidea. Hassi pe sonai lang mabiar si Paulus. Mase? Nini do, “Ai na jongjong do na borngin i lambungku malekat ni Naibata, simada ahu anjaha na hubalosi, nini, ‘Ulang ho mabiar ale Paulus, ai maningon jongjong do ho i lobei ni Kesar, anjaha domma iondoskon Naibata bam haganup hasomanmu na sakapal in.’” Jadi sobali marhiteihon Jesus, igunahon Jahowa do malekat na legan laho patoguhkon uhur ni si Paulus. Anjaha tongon, songon na ijanjihon Jahowa das ma si Paulus i Rom.​—Lah. 27:20-25; 28:16.

6. Aha do na ijanjihon Jesus, janah mase ai boi patoguhkon uhurta?

⁶ Sonaha Jesus mangurupi hita? Sai tongtong do Jesus mangurupi hita usih songon na ibahen ia bani si Paulus. Marjanji do Jesus bani ganup susianni, “Sai na hasomananku do hanima ganup ari, ronsi roh ujung ni dunia on.” (Mat. 28:20) Gabe tarapoh do uhurta mambotoh ai. Mase? Halani dong bei do sitarononta sonari on. Umpamani, sanggah matei na hinaholonganta, ra do marpusok ni uhur hita lang pitah piga-piga ari,  tapi ra do ronsi martahun-tahun. Dong homa na sunsah halani domma matua. Anjaha na leganni dong na depresi. Hassi pe sonai, boi do hita totap martahan halani ibotoh hita ihasomani Jesus do hita bai “ganup ari”, tarlobih sanggah ibagas hasunsahan.​—Mat. 11:28-30.

7. Domu bani Pangungkabon 14:6, sonaha Jahowa mangurupi hita sonari on?

⁷ Marhitei Bibel ibotoh hita igunahon Jahowa do malekatni laho mangurupi hita. (Heb. 1:7, 14) Umpamani, iurupi anjaha itogu-togu malekat do hita sanggah mambaritahon ‘ambilan na madear pasal Harajaon’, bani haganup halak humbani “haganup bangsa, marga, hata pakon suku”.​—Mat. 24:13, 14; Basa Pangungkabon 14:6.

8. Sonaha Jahowa manggunahon siparkuasa i Rom laho manlinggomi si Paulus?

⁸ Sonaha siparkuasa mangurupi si Paulus? Anggo idingat hita use aha na masa bani tahun 56 M, domma marjanji Jesus das do holi si Paulus i Rom. Tapi, dong piga-piga halak Jahudi na mambahen rencana laho mamunuh si Paulus. Sanggah itangar kapiten Klaudius Lisias pasal ai, marusaha ma ia paluahkon si Paulus. Mintor ipabingkat ia ma si Paulus hun Jerusalem hu Kesarea, daohni hira-hira, 105 km. Janah bahat tumang tentara mangkasomanisi. Daskonsi ijai, isuruh Gubernur Feliks ma ase “itahan ia i rumah paruhuman ni Raja Herodes”. Jadi lang boi be munsuh ni si Paulus mamunuhsi ijai.​—Lah. 23:12-35.

9. Sonaha Gubernur Festus mangurupi si Paulus?

⁹ Dua tahun dobkonsi ai, itahan ope si Paulus i Kesarea. Anjaha domma igantihon si Festus si Feliks gabe gubernur. Jadi, ipindo halak Jahudi ma hubani si Festus ase iboan use si Paulus hu Jerusalem laho iuhumi. Tapi lang ra ia. Ra do si Festus mambotoh domma “iranggihon sidea hinan manggompangi [si Paulus] i tongah dalan, laho mambunuhsi”.​—Lah. 24:27–25:5.

10. Aha ma balosni Gubernur Festus sanggah mangindo banding si Paulus hubani Kesar?

¹⁰ Dob ai, iuhumi ma si Paulus i Kesarea. Halani si Festus sihol “mambuat uhur ni Jahudi”, isungkun ma si Paulus, “Ra do ho tangkog hu Jerusalem, ase ijai ho huuhumi pasal haganupan ai?” Tapi ibotoh si Paulus anggo laho ia hu Jerusalem, ibunuh halak Jahudi ma ia. Halani ai marusaha ma ia paluahkon dirini ase das ia hu Rom laho mandalankon pangidangionni. Jadi nini ma, “Naik [banding] do ahu bani Kesar.” Dob iriahkon si Festus pasal ai bani hasomanni, nini ma mambalosi si Paulus, “Mangindo [banding] do ho bani Kesar, ai pe bani Kesar ma ho laho!” Halani haputusan ni si Festus, gabe maluah ma si Paulus humbani munsuhni. Ujungni das ma ia i Rom, daoh humbani halak Jahudi na sihol mamunuhsi.​—Lah. 25:6-12.

11. Ra, ayat na ija do na isurat si Jesaya na irimangi si Paulus?

¹¹ Paima bingkat si Paulus hu Italia, ra do irimangi ia sipasingat ni nabi Jesaya hubani halak na manlawan Jahowa. Ijai ihatahon, “Manriahi ma hanima, tapi seng saud ai, bahen hanima ma ranggian, tapi seng jadi ai, ai Naibata do hasomannami!” (Jes. 8:10) Jadi, pos do uhur ni si Paulus sai urupan ni Jahowa do ia. Ai do na mangurupisi ase totap martahan sanggah marsitaronon.

12. Sonaha pambahenan ni si Julius bani si Paulus, janah aha do ra na ibotoh si Paulus?

 ¹² Bani tahun 58 M, marlayar ma si Paulus hu Italia. Iondoskon ma ia hubani sada letnan na margoran si Julius. Humbani ari ai, rosuh ni si Julius ma aha na sihol bahenonni bani si Paulus. Tapi, sonaha ia manggunahon kuasani? Patarni, sanggah singgah sidea i pelabuhan, “basar do si Julius hubani si Paulus, ilopas do ia marayak hasoman”. Marusaha do homa ia paluahkon si Paulus. Sonaha carani? Sanggah sihol tentara mamunuh ganup tahanan i kapal ai, mintor ilanglangi si Julius ma sidea. Mase? Halani “sihol do pagoluhonni si Paulus”. Ra, ibotoh si Paulus ma halani pangurupion ni Jahowa do gabe bujur tentara ai hu bani.​—Lah. 27:1-3, 42-44.

13. Sonaha Jahowa mangurupi hita marhitei siparkuasa?

¹³ Sonaha siparkuasa mangurupi hita? Sipata igunahon Jahowa do parkuasa i tanoh on laho mangkorjahon harosuh-Ni. Raja Salomo mangkatahon, “Songon bah na bani bondar do uhur ni raja ibagas tangan ni Jahowa; ibobai do ai dompak ja rosuh ni uhur-Ni.” (Pod. 21:1) Aha do artini ai? Boi do ibahen halak bah ni bondar mardalan hu sabah ni sidea. Sonai ma homa uhur ni siparkuasa, boi do ai ibahen Jahowa gabe sadalan pakon harosuh-Ni. Halani ai, boi do siparkuasa mambahen haputusan na marguna bani juakjuak ni Naibata.​—Bandingkon Esra 7:21, 25, 26.

14. Domu bani Lahoan 12:5, ise do na boi itonggohon hita?

¹⁴ Aha na boi ibahen hita? Tonggohon hita ma “raja-raja ampa haganup siparkuasa” ase ipaturut sidea hita martumpu ampa mangidangi. (1 Tim. 2:1, 2; Neh. 1:11) Songon na ibahen halak Kristen bani abad na parlobei, boi do homa itonggohon hita sanina botou na ipenjarahon. (Basa Lahoan 12:5; Heb. 13:3) Leganni ai, tonggohon ma homa panjaga penjara ase ulang ibogbogi sidea sanina botou na ijai. Pindo ma bani Jahowa ase “basar” sidea hubani sanina botou na ipenjarahon ai, usih songon na ibahen si Julius hubani si Paulus.

15-16. Sonaha Jahowa manggunahon si Aristarkus pakon si Lukas laho mangurupi si Paulus?

¹⁵ Sonaha hasoman sahaporsayaon mangurupi si Paulus? Sanggah si Paulus i  pardalanan hu Rom, gati do igunahon Jahowa sanina botou laho mangurupisi. Ulas hita ma piga-piga contohni.

¹⁶ Dihut do si Aristarkus pakon si Lukas mangkasomani si Paulus hu Rom. * Lang dong ipatugah bani Bibel anggo Jesus mangkatahon horas-horas do homa si Aristarkus pakon si Lukas das i Rom. Tapi totap do ihasomani sidea si Paulus hassi pe ibotoh sidea dong parmaraan i pardalanan. Sanggah i pardalanan do baru pe ibotoh sidea ipaluah do holi sidea hun parmaraan ai. Halani ai, sanggah mulak use si Aristarkus pakon si Lukas hu Kesarea, tontu martarima kasih ma si Paulus hubani Jahowa halani domma igunahon Ia hasomanni na barani ai laho mangurupisi.​—Lah. 27:1, 2, 20-25.

17. Sonaha Jahowa manggunahon sanina botou na legan laho mangurupi si Paulus?

¹⁷ Sadokah i pardalanan, gati do homa sanina botou mangurupi si Paulus. Umpamani, sanggah i pelabuhan Sidon sidea, ‘ilopas do ia marayak hasomanni, ase itamuei sidea ia’. Dob ai, sanggah i Putioli, ‘pajumpah ma sidea pakon sanina-sanina ijai anjaha rap ma sidea pitu ari dokahni’. Ibere sidea ma aha na ihaporluhon si Paulus ampa hasomanni. Tontu sanggah marbuali sidea, isaritahon si Paulus ma pangalamanni laho patoguhkon sanina-sanina ijai. (Bandingkon Lahoan 15:2, 3.) Dobkonsi ai, itoruskon si Paulus ampa hasomanni ma pardalananni sidea.​—Lah. 27:3; 28:13, 14.

18. Aha do na mambahen gabe toguh uhur ni si Paulus anjaha martarima kasih bani Naibata?

¹⁸ Sanggah i pardalanan hu Rom, idingat si Paulus ma aha na itulis ia bani halak i Rom hira-hira tolu tahun na salpu. Nini do, “Domma piga-piga tahun hinan ihasiholi uhurhu marayak nasiam.” (Rom 15:23) Hape, lang isangka das do ia i Rom, tapi gabe sahalak tahanan. Hassi pe sonai, daskonsi ia i Rom mintor ialo-alo sanina botou do ia. Tontu  gabe tarojur ma uhur ni si Paulus halani ai! “Mangidah sidea ai, mangkatahon tarima kasih ma si Paulus bani Naibata, anjaha lambin tenger ma uhurni.” (Lah. 28:15) Mase ma martarima kasih si Paulus bani Naibata dobkonsi roh sanina botou ai? Halani si Paulus mambotoh igunahon Naibata do hasoman sahaporsayaonni laho mangurupisi.

19. Domu bani 1 Petrus 4:10, sonaha Jahowa boi manggunahon hita laho mangurupi sanina botou na mamorluhon?

¹⁹ Aha na boi ibahen hita? Dong do ibotoh ham sanina botou i kuria na boritan atap pe na marsitaronon? Atap ra do adong na baru marpusok ni uhur. Anggo sonai, pindo ma pangurupion ni Jahowa ase ibotoh ham sonaha mangapoh anjaha mangurupi sidea. Anggo iurupi ham sidea, ra do ai boi patoguhkon uhurni. (Basa 1 Petrus 4:10.) * Anjaha gabe iahapkon sidea ma tongon do na ihatahon Jahowa on, “Sabonar na so tadingkonon-Ku do ho, sabonar na so paturuton-Ku do ho.” Tontu gabe malas ma homa uhurta halani mambotoh ai!

20. Mase pos uhurta mangkatahon, ‘Jahowa do pangurupi bangku’?

²⁰ Songon na masa bani si Paulus pakon hasomanni, ra songon haba-haba do homa sitaronon na roh hubanta. Hassi pe sonai, boi do hita totap martahan halani ihasomani Jahowa do hita. Iurupi do hita marhitei Jesus ampa malekat. Sipata igunahon Jahowa do homa parkuasa i dunia on laho mangurupi hita. Leganni ai, boi do ibahen Jahowa gabe tarojur uhur ni sanina botou i kuria laho mangurupi hita. Anjaha bahat do hita na domma mangahapkon ai. Halani ai, songon si Paulus pos do uhurta mangkatahon, “[Jahowa] do pangurupi bangku, seng mabiar ahu, aha ma boi bahenon ni jolma bangku?”​—Heb. 13:6.