1. Janji kai bas Pustaka si banci ngapuli kita sanga sisada siakap banta ntah pe sanga melala masalahta? (Masmur 118:5-7)

SANGA ngadapi tentangen, pernah nge akapndu kam sisada janah la lit iakapndu si nampati kam? Adi pernah, kam labo sisada, umat Jahwe si setia si debanna pe bage ka nge perasanna. (1 Raj. 19:14) Ingetlah janji Jahwe enda: “Labo ndigan pe kam Kutadingken janah labo ndigan pe kam Kupediat.” Erkiteken si e, banci kita tek janah sikataken, “Jahwe kap si nampati aku, emaka labo aku mbiar.” (Heb. 13:5, 6) Kata-kata Rasul Paulus enda itulis man kalak Kristen bas Judea kira-kira tahun 61 Masehi. Kata-katana enda ngingetken kita man kata-kata si nulisken Masmur bas Masmur 118:5-7.​—Baca.

2. Kai kari sibahas bas artikel enda, janah engkai?

² Bagi si nulisken Masmur, iteh Paulus arah pengalamenna sendiri maka enggo rusur kel Jahwe nampati ia. Contohna, lebih dua tahun ope itulisna surat man kalak Kristen i Judea, iadapi Paulus badai si luar biasa sanga ia nangkih kapal. (Perb. 27:4, 15, 20) Isampati Jahwe ia paksa si e, tapi ope si e pe rusur kel ia isampati Jahwe alu erbage-bage cara. Sibahas kari telu cara Jahwe nampati Paulus sanga ngadapi tentangen. Isampati Jahwe Paulus arah Jesus ras malekat-malekatNa, arah kalak si lit jabatenna, bage pe arah turang senina. Alu mbahas kai si terjadi bas kegeluhen Paulus, banci reh tekna kita man janji Dibata maka pasti isampatiNa kita.

3. Kai si banci saja iukuri Paulus, janah engkai?

³ Perlu Paulus penampat. Kira-kira tahun 56 Masehi, isaren jelma si enterem ia arah rumah pertoton nari i Jerusalem  janah ibunuh atena ia. Paginna, sanga ibaba ia ku lebe-lebe Pengadilen Agama Jahudi, menam ia ibunuh. (Perb. 21:30-32; 22:30; 23:6-10) Paksa si e, banci saja Paulus tersungkun-sungkun, ‘Asa kai nari nge dekahna aku bagenda?’

4. Uga Jahwe nampati Paulus arah Jesus?

⁴ Uga Jesus nampati Paulus? Bas berngi kenca Paulus itahan, “Tuan” Jesus cinder i sampingna janah nina, “Ula kam mbiar! Enggo kam ersaksi kerna aku i Jerusalem, emaka arus ka pagi kam ersaksi i Roma.” (Perb. 23:11) Tuhu-tuhu mpegegehi kel kata-kata Jesus e! Ipuji Jesus Paulus perban enggo ersaksi ia i Jerusalem. Ikataken Jesus man Paulus maka selamat nge kari ia seh bas Roma. I je erberita ka kari ia mulihi. Perban enggo ipegegehi Jesus, pasti aman iakap Paulus bali bagi sekalak anak si lit bas dakepen bapakna.

5. Uga Jahwe nampati Paulus alu nggunaken malekat? (Nen gambar sampul.)

⁵ Tentangen si deban kai ka si iadapi Paulus? Kira-kira dua tahun kenca kai si terjadi bas Jerusalem, nangkih kapal Paulus ku Roma. Terjadi ka badai si mbelin bas laut, e erbanca mbiar kerina kalak bas kapal e. Iakap kalak e pasti nari nge kalak e mate. Tapi Paulus la mbiar. Engkai? Nina man kalak bas kapal e, “Berngi ndai, reh malekat ndahi aku janah cinder ia i deherku. Malekat e isuruh Dibata si kulayani alu pelayanen si badia, nina malekat e, ‘Ula kam mbiar Paulus! Kam arus ngadap man Kaisar, janah kerina kalak si erlayar ras kam pasti iselamatken Dibata erkiteken perkuah ateNa.’” Igunaken Jahwe sada malekat guna ngingetken Paulus mulihi kerna kata-kata Jesus si mpegegehi si pernah ibelasken Jesus man bana. Dungna, seh me Paulus bas Roma bagi si ijanjiken Jahwe.​—Perb. 27:20-25; 28:16.

6. Kai janji Jesus si banci mpegegehi kita janah engkai?

⁶ Uga Jesus nampati kita? Bali bagi Jesus enggo nampati Paulus, kita pe pasti isampatina. Contohna, erjanji ia man muridna, nina, “Katawari pe aku tetap ras kena seh ku kedungen jaman enda.” (Mat. 28:20) Mpegegehi kel kata-kata Jesus e. Engkai? Perban banci saja siadapi tentangen si mberat si erbanca arus kita megenggeng. Contohna, sanga mate kalak si keleng kel ateta, banci saja labo ngenca piga-piga wari kita erceda ate, tapi ertahun-tahun dekahna. Lit ka si ngadapi tentangen perban enggo metua janah si debanna ka latih kel ukurna perban stres. Aminna pe ngadapi tentangen,  banci kita megegeh perban siteh “katawari pe” Jesus ras kita, termasuk bas keadan si sulit bas geluhta.​—Mat. 11:28-30.

7. Menurut Ketangkasen 14:6, uga Jahwe nampati kita gundari?

⁷ I bas Pustaka ikataken maka pasti isampati Jahwe kita arah malekat-malekatNa. (Heb. 1:7, 14) Contohna, isampati malekat-malekat kita sanga siberitaken “berita si meriah kerna Kerajan” man “tiap bangsa, suku, bahasa, ras umat.”​—Mat. 24:13, 14; baca Ketangkasen 14:6.

8. Uga Jahwe nampati Paulus alu nggunaken komandan militer?

⁸ Uga kalak si lit jabatenna nampati Paulus? I bas tahun 56 Masehi, ipetetap Jesus ukur Paulus maka pasti nge ia seh bas Roma. Tapi, irencanaken piga-piga kalak Jahudi si lit i Jerusalem guna munuh Paulus. Sanga ibegi komandan militer Roma eme Klaudius Lisias kerna rencana e, iselamatkenna atena Paulus. Uga carana? Isuruhna sada pasuken tentera maba Paulus ku Kesarea gelah ula ia kaden pe. Jerusalem nari ku Kesarea dauhna lit kira-kira 105 kilometer. I Kesarea, isuruh Gubernur Pelik gelah Paulus “itahan i bas istana Herodes.” Alu bage, la banci ibunuh kalak Jahudi ia.​—Perb. 23:12-35.

9. Uga Gubernur Pestus nampati Paulus?

⁹ Dua tahun kenca si e, ipenjaraken denga Paulus bas Kesarea. Pestus enggo jadi gubernur si mbaru nggantiken Pelik. Ipindo kalak Jahudi man Pestus gelah Paulus isuruh ku Jerusalem guna ihakimi. Tapi la nggit Pestus, perban banci saja itehna ‘irencanaken kalak Jahudi munuh Paulus i tengah dalan alu erbuni-buni.’​—Perb. 24:27–25:5.

10. Kai si ilakoken Gubernur Pestus sanga ipindo Paulus gelah Kaisar si ngadili ia?

¹⁰ Bas pudi wari iadili Paulus i Kesarea. “Gelah ngena ate kalak Jahudi,” nungkun me Pestus man Paulus, nina, “Nggit nge kam lawes ku Jerusalem gelah kuadili perkarandu i je?” Ieteh Paulus maka banci saja ibunuh kari ia i Jerusalem. Emaka, ipindona naik banding ku Kaisar i Roma. Alu bage, banci iselamatkenna dirina janah erberita i je. Kenca icakapken Pestus kerna si e ras penasehatna, nina man Paulus, “Perban ipindondu Kaisar si ngadili kam, laweslah kam ngadap Kaisar.” Selamat me Paulus perban keputusen Pestus e. Kentisik nari, lawes me Paulus ku Roma, ndauh arah kalak Jahudi si atena munuh ia.​—Perb. 25:6-12.

11. Kata-kata Nabi Jesaya si mpegegehi si apai si banci saja iukuri Paulus?

¹¹ Sanga berkat ate Paulus ku Roma alu nggunaken kapal, banci saja iukurina persinget si ibereken Nabi Jesaya man kalak si nentang Jahwe, “Bahanlah rencanandu, tapi ndigan pe labo tersehkenndu. Belasi sajalah uga atendu, tapi sia-sia nge kerina, sebap Dibata ras kami.” (Jes. 8:10) Iteh Paulus maka pasti isampati Dibata ia, janah e pasti mpegegehi ia guna ngadapi tentangen si nandangi reh.

12. Uga nge perbahanen Julius man Paulus, janah banci saja kai nge si isadari Paulus kerna si e?

¹² Bas tahun 58 Masehi, berkat me Paulus ku Roma alu nggunaken kapal. Perban ia sekalak tahanen, isuruh me sekalak perwira si gelarna Julius njagai ia. Situhuna banci saja nge la mehuli perbahanen Julius man Paulus. Tapi uga ia nggunaken jabatenna e sanga erurusen ras Paulus?  Sanga seh kalak e bas pelabuhen, “mehuli perbahanen Julius man Paulus. Ipediatna ia ndahi temanna.” Kenca si e, iselamatken Julius ka Paulus. Uga carana? Ibunuh prajurit-prajurit atena kerina tahanen si lit bas kapal, tapi iusahaken Julius gelah e la terjadi. Engkai? “La ate perwira e Paulus ibunuh.” Banci saja sadar Paulus maka Jahwe si nggunaken perwira si mehuli e guna nampati ras njagai ia.​—Perb. 27:1-3, 42-44.

13. Uga Jahwe nggunaken kalak si lit jabatenna guna nampati kita?

¹³ Uga kalak si lit jabatenna nampati kita? Adi sue ras peratenNa, banci igunaken Jahwe kesah si badia guna erban tersuruh ukur kalak si lit jabatenna ngelakoken kai si iarapkenNa. Itulisken Raja Salomo, “[Jahwe] si ngaturken perukuren raja, emaka ratur bagi raturna perpaler lau maler.” (Kua. 21:1) Kai maksudna? Adi ipalerken kalak atena lau ku jumana, biasana ibanna sada parik gelah lau arah sungai banci maler arah parik e janah seh ku jumana. Jahwe pe bage ka nge. Banci igunaken Jahwe kesah si badia guna mpengaruhi pemerentah gelah ngelakoken peratenNa. Adi si e terjadi, tersuruh me ukur kalak si lit jabatenna erban keputusen guna kepentingen umat Dibata.​—Bandingken Esra 7:21, 25, 26.

14. Menurut Perbahanen Rasul-Rasul 12:5, ise saja si banci sitotoken?

¹⁴ Kai si banci silakoken? Banci kita ertoto “guna raja-raja ras kerina si kedudukenna meganjang” gelah iban kalak e keputusen si mereken pengaruh si mehuli man kegeluhenta bage pe man pelayanenta. (1 Tim. 2:1, 2; Neh. 1:11) Bagi si ilakoken kalak Kristen bas abad pertama, perlu ka tutus kel ateta ertoto man Dibata guna kepentingen turang seninata si lit bas penjara. (Baca Perbahanen Rasul-Rasul 12:5; Heb. 13:3) Selain si e, banci ka sitotoken penjaga penjara si njaga turang seninata bas penjara. Banci sitotoken man Jahwe gelah iban Jahwe tersuruh ukur kalak e ‘ngelakoken si mehuli’ man turang seninata bali bagi si ilakoken Julius.​—Perb. 27:3.

15-16. Uga Jahwe nampati Paulus alu nggunaken Aristarkus ras Lukas?

¹⁵ Uga turang senina nampati Paulus? Sanga perdalanenna ku Roma, lalap ibereken Jahwe penampat man Paulus arah turang seninana. Mari sibahas piga-piga contoh.

 ¹⁶ Dua teman Paulus si setia eme Aristarkus ras Lukas, nggit nemani Paulus arah Kesarea nari ku Roma. * Bas Pustaka la lit iceritaken maka ikataken Jesus man kalak e selamat kari kalak e seh bas Roma. Tapi, tetap itemani kalak e Paulus ku Roma, aminna pe terancam kegeluhen kalak e. Bas perdalanen sanga nangkih kapal ku Roma, terjadi badai si luar biasa. Kenca seh kalak e i Roma me maka iteh kalak e banci kepe kalak e selamat. Emaka, sanga idah Paulus kalak e bas pelabuhen Kesarea, pasti ngata bujur kel Paulus perban ibereken Jahwe dua turang seninana si perpang guna nampati ia.​—Perb. 27:1, 2, 20-25.

17. Uga Jahwe nampati Paulus arah turang senina bas runggun?

¹⁷ Sanga Paulus bas perdalanen, lit piga-piga kali isampati turang senina bas runggun ia. Contohna, sanga bas kota pelabuhen i Sidon, perban ibere Julius ijin man Paulus, banci ‘idahina temanna guna ngaloken penampat kalak e.’ Kenca si e, bas kota Puteoli, Paulus ras teman-temanna ‘jumpa ras senina-senina janah ipaksana kalak e tading pitu wari.’ Icukupi turang senina keperlun Paulus bage pe teman-temanna ndai, janah iceritaken Paulus ka pengalamenna si mpegegehi man kalak e. (Bandingken Perbahanen Rasul-Rasul 15:2, 3.) Kenca si e, ilanjutken Paulus perdalanenna ras teman-temanna ndai.​—Perb. 27:3; 28:13, 14.

18. Engkai maka ngata bujur Paulus man Dibata janah engkai maka ia terpegegehi?

¹⁸ Sanga perdalanen Paulus ku Roma pasti ingetna surat si enggo itulisna telu tahun si lewat man runggun si lit bas kota e: “Nggo ertahun-tahun dekahna merhat kel aku ndahi kena.” (Rom. 15:23) Tapi, la iarapna jumpa ia ras kalak e selaku tahanen. Pasti terpegegehi kel Paulus sanga idahna turang seninana nimai ia bas dalan guna ngalo-ngalo ia. “Paksa ngidah kalak e, ngata bujur Paulus  man Dibata janah reh tetapna ukurna.” (Perb. 28:15) Engkai maka ngata bujur Paulus man Dibata? Perban mulihi igejapken Paulus penampat Jahwe arah turang senina si lit bas runggun.

19. Menurut 1 Petrus 4:10, uga Jahwe nggunaken kita guna nampati kalak si merluken penampat?

¹⁹ Kai si banci silakoken? Lit nge itehndu turang seninandu bas runggun si sangana latih kel ukurna perban ia sakit ntah pe ngadapi tentangen si deban? Ntah banci saja, lit nge si erceda ate perban mate kalak si ikelengina? Adi begindu lit si merluken penampat, totokenlah man Jahwe gelah mehuli ranan ras perbahanenndu. Kata-kata ras perbahanenta banci mpegegehi turang seninata si merluken penampat. (Baca 1 Petrus 4:10.) * Adi sipegegehi turang seninata, banci reh tekna ia man janji Dibata enda: “Labo ndigan pe kam Kutadingken, janah labo ndigan pe kam Kupediat.” Pasti meriah ukurndu meteh si e.

20. Engkai maka banci sikataken, “Jahwe kap si nampati aku”?

²⁰ Bagi si iadapi Paulus ras teman-temanna, kita pe banci saja siadapi melala tentangen. Tapi, siteh maka banci kita pang ngadapisa perban Jahwe ras kita. IberekenNa kita penampat arah Jesus bage pe arah malekat-malekatNa. Janah adi sue ras peratenNa, banci isampatiNa kita arah kalak si lit jabatenna. Selain si e, bagi si ialami piga-piga turang seninata, igunaken Jahwe kesah si badia gelah tersuruh ukur turang seninata nampati kita. Emaka bagi Paulus, banci sikataken, “Jahwe kap si nampati aku, emaka labo aku mbiar. Kai kin si banci ilakoken manusia man bangku?”​—Heb. 13:6.