1. Sɛ yɛtse nka dɛ yɛayɛ ankonam anaa nsɛndzendzen ahyɛ hɛn do a, ebɛnadze na ɔbɛkyekye hɛn werɛ? (Ndwom 118:5-7)

ANA atse nka pɛn dɛ ayɛ ankonam na innyi obiara a ɔbɔboa wo ma eegyina wo nsɛndzendzen ano? Nyimpa piinara na wɔatse nka dɛm a Jehovah n’asomfo anokwafo mpo ka ho. (1 Ahe. 19:14) Sɛ biribi a ɔtse dɛm to wo a, kaa anohoba a Jehovah abɔ yi: “Mirinngya wo da, eso meremmpa wo da biara da.” Dɛm ntsi, yebotum dze ahotodo akã dɛ: ‘Jehovah nye mo boafo; murunnsuro.’ (Heb. 13:5, 6) Bɛyɛ afe 61 H.B. na ɔsomafo Paul kyerɛɛw dɛm asɛm yi kɛmaa ne mfɛfo Christianfo a nna wɔwɔ Judea no. Paul ne nsɛm yi ma yɛkaa nsɛm a ɔdwontofo no kyerɛwee wɔ Ndwom 118:5-7.​—Kenkan.

2. Ebɛnadze na yerubosusu ho wɔ adzesua yi mu, na ebɛnadze ntsi a?

² Tse dɛ ɔdwontofo no, nsɛm a osisii wɔ Paul n’asetsena mu no maa ohun dɛ Jehovah nye no Boafo. Dɛ nhwɛdo no, bɔbor mfe ebien ansaana Paul rekyerɛw ne krataa akɛma Hebrewfo no, wɔnye no tuu kwan faa po do. Nna dɛm po do akwantu no yɛ hũ, osiandɛ ehum kɛse bi maa po no do yɛɛ begyabegya naaso onyaa ne tsir dzidzii mu. (Andw. 27:4, 15, 20) Mfe kakra ansaana akwantu no reba do nye ber a wɔnam kwan mu no, Jehovah daa noho edzi dɛ ɔyɛ Ɔboafo ma Paul wɔ akwan pii do. Yerubosusu no mu ebiasa ho. Jehovah nam Jesus nye abɔfo no, nyimpa a wodzi tum nye ne mfɛfo agyedzifo do boaa no. Paul n’asetsena mu nsɛm yi a yerubosusu ho no bɔboa hɛn ma yeenya ahotodo kɛse wɔ Nyankopɔn n’anohoba mu dɛ, sɛ hɛn so yɛbɔ mpaa hwehwɛ no hɔ mboa a, obetsie hɛn.

3. Obotum aba dɛ ebɛnadze na Paul dwendween ho, na ebɛnadze ntsi a?

³ Nna Paul hia mboa. Bɛyɛ afe 56 H.B. no, nyimpadɔm bi kɔtwee Paul fii Jerusalem asɔrfi no mu, na wɔbɔɔ mbɔdzen dɛ woboku no. Adze kyee a wɔdze Paul kegyinaa Sanhedrin bagua no enyim no, ɔkaa ketseketse ma nkyɛ n’atamfo no aatsetsew no mu. (Andw. 21:30-32; 22:30; 23:6-10) Dɛm aber no, obotum aba dɛ Paul dwendween ɔhaw no ho na obisaa noho dɛ, ‘Mibegyina dɛm atseetsee yi ano ekesi da bɛn?’

4. Ebɛn kwan do na Jehovah faa Jesus do boaa Paul?

⁴ Ebɛn mboa na Paul nyae? Aber a wɔkyeer Paul no, anafua a odzi hɔ no, “Ewuradze” Jesus begyinaa ne nkyɛn na ɔkãa dɛ: “Hyɛ dzen: na dɛ mbrɛ edzi mo ho dase wɔ Jerusalem yi, dɛmara so na ɔsɛ dɛ ikedzi dase wɔ Rome so.” (Andw. 23:11) Nna dɛm nkuranhyɛsɛm yi yɛ ne ber mu dze papaapa! Jesus kamfoo Paul wɔ dase a nna woedzi wɔ Jerusalem no ho. Afei ɔhyɛɛ no bɔ dɛ ɔbɔkɔ ekodu Rome asomdwee mu, na oeekedzi dase wɔ hɔ so. Aber a Jesus kãa dɛm asɛm no, obotum aba dɛ, Paul tsee nka dɛ ɔwɔ bambɔ dɛ abofra a ne papa aka no efua.

5. Ebɛn kwan do na Jehovah faa ɔbɔfo bi do boaa Paul? (Hwɛ mfonyin a ɔwɔ Ɔweɔn-Aban yi enyim no.)

⁵ Ebɛn nsɛndzendzen fofor na Paul hyiae? Bɛyɛ mfe ebien ekyir a nsɛm yi sisii wɔ Jerusalem no, nna Paul tse hɛn bi mu ma wɔnye no rutu kwan akɔ Italy. Wɔ dɛm akwantu no mu no, ehum kɛse bi tui wɔ po do ma hɔn a wɔyɛ edwuma wɔ hɛn no mu no nye hɔn a wɔwɔ mu no adwen yɛɛ hɔn dɛ worubowuwu. Naaso, Paul ammbɔ hũ. Ebɛnadze ntsi a? Ɔkãa kyerɛɛ hɔn a wɔwɔ hɛn no mu dɛ: “Anago yi Nyankopɔn a meyɛ nedze, na mosom no no, no bɔfoe begyinaa me nkyɛn see dɛ, Paul, mma nnsuro: otwar dɛ ibegyina Caesar enyim; na hwɛ, Nyankopɔn dze hɔn a enye hɔn nam nyina akyɛ wo.” Nkuranhyɛsɛm a nna Jehovah nam Jesus do dze ama Paul no, ɔnam ɔbɔfo bi do sanee sii do dua. Ampaara ampaara, Paul kodur Rome.​—Andw. 27:20-25; 28:16.

6. Ebɛn bɔ na Jesus ahyɛ a obotum ahyɛ hɛn dzen, na ebɛnadze ntsi a?

⁶ Ebɛn mboa na yenya? Dɛ mbrɛ Jesus boaa Paul no, ɔbɔboa hɛn so. Dɛ nhwɛdo no, Jesus hyɛɛ hɔn a wodzi n’ekyir nyina bɔ dɛ: “Menye hom wɔ hɔ daa, dze kesi wiadze ewiei.” (Matt. 28:20) Nsɛm a Jesus kãe no hyɛ hɛn dzen. Ebɛnadze ntsi a? Osiandɛ, ɔtɔ mber bi a, ɔyɛ dzen ma hɛn dɛ yebegyina nsɛndzendzen ano. Dɛ nhwɛdo no, sɛ hɛn dɔfo bi wu a, ɔnnyɛ ber kakraabi na yedzi awerɛhow mbom no, yetum dzi awerɛhow mfe pii.  Afofor so wɔ hɔ a, ɔsɛ dɛ wogyina nsɛndzendzen a mpanyinyɛ dze ba no ano. Bio so, binom wɔ hɔ a, adwendwen tum hyɛ hɔn do. Iyi nyina ekyir no, yenya ahoɔdzen dze gyina ɔhaw no ano. Osiandɛ yenyim dɛ Jesus nye hɛn wɔ hɔ “daa,” wɔ ber a no mu yɛ dzen wɔ hɛn asetsena mu mpo no.​—Matt. 11:28-30.

7. Dɛ mbrɛ Nyikyerɛ 14:6 kyerɛ no, ebɛn kwan do na Jehovah boa hɛn ndɛ?

⁷ Nyankopɔn n’Asɛm no ma hɛn awerɛhyɛmu dɛ Jehovah nam n’abɔfoe no do boa hɛn. (Heb. 1:7, 14) Dɛ nhwɛdo no, sɛ yɛrekã “Ahenman ho asɛmpa” no akyerɛ nyimpa a wofi “aman nye mbusuakuw nye kasa” nyina mu a, abɔfo taa hɛn ekyir na wɔkyerɛ hɛn kwan.​—Matt. 24:13, 14; kenkan Nyikyerɛ 14:6.

8. Ebɛn kwan do na Jehovah faa safohen panyin bi do boaa Paul?

⁸ Ebɛn mboa na Paul nyae? Wɔ afe 56 H.B. no, Jesus hyɛɛ Paul bɔ dɛ ɔbɔkɔ ekodu Rome. Naaso, Jewfo bi a nna wɔwɔ Jerusalem bɔɔ pɔw dɛ wɔbɔtow ahyɛ Paul do na woeeku no. Aber a Rome safohen panyin Claudius Lysias tsee pɔw a wɔabɔ no ho asɛm no, ɔboaa Paul. Ntsɛmara Claudius hyɛɛ dɛ nsordaafokuw bi mbɔ Paul ho ban na wɔmfa no nkɔ Caesarea. Ofi Jerusalem rokɔ Caesarea no yɛ bɛyɛ akwansin 65 (kilomita 105). Wɔnye Paul kodur Caesarea no, Ambrado Felix hyɛɛ dɛ “wɔmfa no nsie Herod aban mu.” Hɔ dze, nna hɔn a wɔrohwehwɛ Paul eku no no runntum mmfa hɔn nsa nnka no.​—Andw. 23:12-35.

9. Ebɛn kwan do na Ambrado Festus boaa Paul?

⁹ Mfe ebien ekyir no, nna Paul da ho ara da efiadze wɔ Caesarea. Nna Festus ebedzi Felix n’adze dɛ ambrado. Jewfo no serɛɛ Festus dɛ ɔmma wɔmfa Paul mbra Jerusalem ma wombedzi n’asɛm wɔ hɔ, naaso Festus annyɛ. Obotum aba dɛ, nna ambrado no nyim dada dɛ Jewfo no abɔ Paul ho pɔw dɛ ‘wɔbɛtsɛw no wɔ kwan mu eku no.’​—Andw. 24:27–25:5.

10. Ber a Paul serɛɛ dɛ ɔpɛ dɛ Caesar dzi n’asɛm no, Ambrado Festus yɛɛ n’adze dɛn wɔ ho?

¹⁰ Ekyir yi, wodzii Paul n’asɛm wɔ Caesarea. Osiandɛ nna Festus pɛ dɛ “onya Jewfo enyimpa ntsi,” obisaa Paul dɛ: “Epɛ dɛ ekɔ Jerusalem ma woeebu wo ndzɛmba yi ho atsɛn wɔ m’enyim anaa?” Nna Paul nyim dɛ sɛ ɔkɔ Jerusalem a, annhwɛ a woboku no wɔ hɔ. Afei so, nna Paul nyim dza ɔsɛ dɛ ɔyɛ ama oeetum abɔ noho ban, oeekodu Rome, na ɔaakɔtoa n’asɛnka edwuma no do. Ntsi ɔkãa dɛ: “Emidze medan Caesar.” Ber a Festus nye ne baguafo tuu egyina ekyir no, ɔkãa kyerɛɛ Paul dɛ: “Edze akɛdan Caesar a: Caesar hɔ na ebɔkɔ.” Gyinae a Festus sii dɛ ɔdze Paul bɔkɔ Rome no amma Paul n’atamfo nsa annka no. Nna ɔrennkyɛr, Paul bodu Rome. Hɔ dze, nna Jewfo a wɔawe ataa do dɛ woboku no no nsa rennka no koraa.​—Andw. 25:6-12.

11. Obotum aba dɛ ebɛn nkuranhyɛsɛm na Isaiah kyerɛwee a Paul dwendween ho?

¹¹ Aber a nna Paul rotweɔn dɛ wɔnye no botu kwan akɔ Italy no, obotum aba dɛ ɔdwendween kɔkɔbɔ a nkɔnhyɛnyi Isaiah dze maa hɔn a wɔsoɛr tsia Jehovah no ho yie. Jehovah maa Isaiah kyerɛɛw dɛ: “Hom mbɔ mu nkɔ apam, na ɔbɛyɛ kwa; hom nkã asɛm no, na orinngyina: na [Nyankopɔn] nye hɛn tse.” (Isa. 8:10) Nna Paul nyim dɛ Nyankopɔn bɔboa no, na obotum aba dɛ iyi hyɛɛ no dzen dɛ obotum egyina nsɔhwɛ ahorow a obehyia no ano.

12. Ebɛn kwan do na Julius nye Paul dzii, na obotum aba dɛ iyi maa Paul hun dɛn?

¹² Kwan a wɔnye Paul tui kɔr Italy no hyɛɛ ase afe 58 H.B. Wɔdze Paul a ɔyɛ ɔdaduanyi no hyɛɛ Rome nsordaafo panyin bi a wɔfrɛ no Julius ne nsa. Ofi dɛm ber no dze rokɔ no,  nna Julius wɔ tum dɛ ɔtseetsee Paul anaa ɔnye no dzi no yie. Nna ɔdze tum a ɔwɔ no bedzi dwuma dɛn? Adze kyee a wodur beebi ma hɛn no gyinae no, “Julius maa Paul enyimpa maa no kwan dɛ ɔnkɔ ne mfɛfo nkyɛn.” Ekyir yi, Julius gyee Paul mpo nkwa. Ebɛn kwan do? Nna nsordaafo no pɛ dɛ wokuku ndaduafo a wɔwɔ hɛn no mu nyinara, naaso Julius siiw hɔn kwan. Ebɛnadze ntsi a? Nna ‘ɔpɛ dɛ ɔgye Paul nkwa.’ Obotum aba dɛ, Paul hun dɛ Jehovah nam nsordaafo panyin a ne yamu ye yi do roboa no na ɔaabɔ noho ban.​—Andw. 27:1-3, 42-44.

13. Ebɛn kwan do na bi a Jehovah dze nyimpa a wodzi tum no bedzi dwuma?

¹³ Ebɛn mboa na yenya? Sɛ ɔyɛ Jehovah ne pɛ dɛ ne tsirmpɔw bi mbra mu a, bi a ɔdze no sunsum krɔnkrɔn a tum wɔ mu no bedzi dwuma ama nyimpa a wodzi tum no aayɛ dza ɔrohwehwɛ no. Ɔhen Solomon kyerɛɛw dɛ: “Ɔhen n’akoma wɔ [Jehovah] nsamu dɛ nsukã: Ɔdan no fa mbrɛ ɔpɛ biara.” (Mbɛ. 21:1) Abɛbusɛm yi kyerɛ dɛn? Nyimpa botum etwa nsuka akɔto esutsen bi mu ama nsu no aapem afa beebi a wɔpɛ dɛ ɔfa no. Dɛmara na Jehovah so botum dze no sunsum no adan etumfo no hɔn adwen ama wɔaayɛ adze a ɔnye ne tsirmpɔw hyia. Sɛ Jehovah yɛ dɛm a, nyimpa a wodzi tum no sisi gyinae a Nyankopɔn no nkorɔfo nya do mfaso.​—Fa toto Ezra 7:21, 25, 26 ho.

14. Dɛ mbrɛ Asomafo Ndwuma 12:5 kyerɛ no, woananom na yebotum abɔ mpaa ama hɔn?

¹⁴ Ebɛnadze na yebotum ayɛ? Yebotum abɔ mpaa ama “ahemfo nye hɔn a wodzi tum nyina,” ber a akɛba dɛ ɔsɛ dɛ wosisi gyinae a ɔbɛka hɛn asetsena nye hɛn som no. (1 Tim. 2:1, 2; Neh. 1:11) Dɛ mbrɛ tsetse Christianfo no yɛe no, hɛn so yebotum abɔ Nyankopɔn mpaa dzendzenndzen ama hɛn nuanom a wɔdze hɔn egu efiadze no. (Kenkan Asomafo Ndwuma 12:5; Heb. 13:3) Bio so, yebotum abɔ mpaa ama hɔn a wɔhwɛ hɛn nuanom a wɔdze hɔn egu efiadze no do no. Yebotum aserɛ Jehovah dɛ ɔmma nyimpa a wɔtsetse dɛm no nnya adwen pa na woeetum ayɛ hɔn adze dɛ Julius na wɔnye hɛn nuanom a wɔdze hɔn egu efiadze no eedzi no yie.

15-16. Ebɛn kwan do na Jehovah faa Aristarchus na Luke do boaa Paul?

¹⁵ Ebɛn mboa na Paul nyae? Ber a nna wɔnye Paul rutu kwan akɔ Rome no, Jehovah nam ne mfɛfo Christianfo do boaa no mpɛn pii. Hom mma yensusu nhwɛdo ahorow yi ho.

¹⁶ Paul n’anyɛnkofo anokwafo beenu, Aristarchus na Luke, sii gyinae dɛ wɔnye Paul  bɔkɔ Rome. * Wofii hɔn pɛ mu dze hɔn nkwa too esian mu dɛ wɔnye Paul bɔkɔ. Ɔwɔ mu dɛ, hɔndze nna hɔn mu biara nnyi hɔ a Jesus ahyɛ no bɔ dɛ, obodu Rome asomdwee mu. Ber a wɔnam po do rokɔ a ehum kɛse bi tui ma po no do yɛɛ begyabegya no, ɔno ekyir ana woruhu dɛ wobenya hɔn tsir edzidzi mu. Dɛm ntsi, ber a Aristarchus na Luke bɔfoow hɛn no wɔ Caesarea no, obotum aba dɛ Paul fii n’akoma mu bɔɔ Jehovah mpaa, na ɔdaa no ase wɔ mboa a ɔnam ne mfɛfo Christianfo akokodurfo beenu yi do dze ama no no ho.​—Andw. 27:1, 2, 20-25.

17. Ebɛn kwan na Jehovah faa Paul ne mfɛfo Christianfo do boaa no?

¹⁷ Wɔ hɔn akwantu no mu no, Paul ne mfɛfo Christianfo boaa no mpɛn pii. Dɛ nhwɛdo no, ber a wokodur Sidon ma hɛn no gyinae no, Julius maa Paul kwan dɛ ‘ɔnkɔ ne mfɛfo nkyɛn ma wɔnhwɛ’ no. Ekyir yi, ber a wodur Puteoli no, Paul nye n’anyɛnkofo no ‘hun enuanom bi a wɔserɛɛ hɔn dɛ wɔntsena hɔn nkyɛn nda esuon.’ Ber a enuanom a wɔwɔ dɛm mbea yi dze Paul nye n’anyɛnkofo hɔn ehiadze maa hɔn no, ekyingye biara nnyi ho dɛ Paul kãa no suahu a ɔhyɛ nkuran ho asɛm kyerɛɛ enuanom a nna ɔakɔsoɛ hɔn no, na iyi maa hɔn enyi gyee papaapa. (Fa toto Andw. 15:2, 3 ho.) Wɔ dɛm nserahwɛ a ɔhyɛ nkuran yi ekyir no, Paul nye n’anyɛnkofo no toaa hɔn akwantu no do.​—Andw. 27:3; 28:13, 14.

18. Ebɛnadze na ɔmaa Paul daa Nyankopɔn ase na ɔhyɛɛ dzen?

¹⁸ Ber a nna wɔnam famu rokɔ Rome no, obotum aba dɛ Paul kaa asɛm bi a ɔkyerɛwee mfe ebiasa a woetwa mu no kɛmaa asafo a nna ɔwɔ kurow mu hɔ no. Ɔkyerɛɛw dɛ: “Mfe pii yi nyina mepɛ dɛ meba hom nkyɛn.” (Rom. 15:23) Naaso, nna ɔnnhwɛ kwan dɛ ɔbɔkɔ ekodu kurow mu hɔ dɛ ɔdaduanyi. Ber a Paul hun enuanom a wofi Rome no dɛ wɔrotweɔn no wɔ kwan ho na wɔaama no akɔaba no, obotum aba dɛ ɔhyɛɛ no nkuran papaapa! Ber a “Paul hun hɔn no, ɔdaa Nyankopɔn  ase na ɔhyɛɛ dzen.” (Andw. 28:15) Hyɛ no nsew dɛ, Paul daa Nyankopɔn ase ber a ohun no nuanom no. Ebɛnadze ntsi a? Osiandɛ, Paul sanee hun dɛ Jehovah nam ne mfɛfo Christianfo do roboa no.

19. Dɛ mbrɛ 1 Peter 4:10 kyerɛ no, hɔn a wohia mboa no, ebɛn kwan do na bi a Jehovah bɛfa hɛn do aboa hɔn?

¹⁹ Ebɛnadze na yebotum ayɛ? Ana inyim enuanom a wɔwɔ w’asafo mu a osian yarba anaa nsɛndzendzen a worihyia ntsi, wɔretseetsee? Anaadɛ bi mpo a nna hɔn dɔfo bi ewu. Sɛ yebohu dɛ hɛn nua bi hia mboa a, ɔsɛ dɛ yɛserɛ Jehovah dɛ ɔmboa hɛn ma yemfi ayamuyie mu nkã asɛm bi nkyerɛ no anaa yɛnyɛ biribi mboa no. Nsɛm a yɛbɛkã nye hɛn ndzeyɛɛ botum ayɛ nkuranhyɛ a dɛm onua no anaa akyerɛbaa no hia no. (Kenkan 1 Peter 4:10.) * Sɛ yɛboa hɔn a, wɔbɛsan enya ahotodo dɛ Jehovah n’anohoba a ɔnye dɛ: “Mirinngya wo da, eso meremmpa wo da biara da” no fa hɔnho. Ana ɔno remma w’enyi nngye?

20. Ebɛnadze ntsi na yebotum dze ahotodo akã dɛ: ‘Jehovah nye mo boafo’?

²⁰ Dɛ mbrɛ Paul nye n’anyɛnkofo no hyiaa nsɛndzendzen wɔ hɔn akwantu no mu no, dɛmara na hɛn so yebotum ehyia nsɛndzendzen wɔ hɛn asetsena mu. Naaso, yebotum ahyɛ dzen osiandɛ yenyim dɛ Jehovah ka hɛn ho. Ɔnam Jesus nye abɔfo no do boa hɛn. Afei so, Jehovah botum afa nyimpa a wodzi tum do aboa hɛn dze edzi ne tsirmpɔw bi ho dwuma. Nkyii so, dɛ mbrɛ hɛn mu piinara ehu no, Jehovah botum dze no sunsum no aka n’asomfo binom hɔn akoma ma wɔaaboa hɔn nuanom Christianfo. Dɛm ntsi, tse dɛ Paul no, yebotum dze ahotodo akã dɛ: ‘Jehovah nye mo boafo; murunnsuro: Nyimpa botum ayɛ me dɛn?’​—Heb. 13:6.