1. Dapré Psaume 118:5-7, si nou ka santi nou tousèl douvan roun problèm ouben nou ka santi ki nou pa ké tchenbé, kisa ki ké ankourajé nou ?

ÈS TO ja santi to kò tousèl douvan roun problèm, é i pa gen pyès moun pou idé to ? Bokou moun ja viv sa, menm sèrvitèr fidèl Bondjé-ya (1 Rois 19:14). Si sa ka rivé to roun jou, sonjé sa promès Jéova fè-a : « Mo pa ké lésé to, é mo pa ké janmen lagé to. » A pou sa, asiré pa pitèt, nou tout pouvé di : « Jéova ka sové mo ; mo pa ké pè » (Héb. 13:5, 6). Apot Pòl ékri sa paròl-ya pou krétyen Jidé-ya annan lannen 61 di nou lépòk. Yé ka fè nou sonjé sa moun-an ki ékri Psaume 118:5-7 (li) di.

2. Kisa nou ké wè annan sa artik-a, é poukisa ?

² Kou moun-an ki ékri sa Psaume-an, Pòl té savé ki Jéova té pouvé sové li, paské i té ja idé li roun patché fwa anvan sa. Parèkzanp, pasé dé lannen anvan i ékri so lèt pou Ébré-ya, roun jou i té asou roun bato, roun  gro tanpèt lévé mé i pa mouri (Actes 27:4, 15, 20). Sa jou-a, mé osi pannan plizyèr lannen anvan sa, Jéova té fè plizyèr bagaj pou idé li. Nou ké wè trwa annan yé : pou idé Pòl, Jéova sèrvi 1) Jézi ké zanj-ya, 2) moun ki té gen otorité épi 3) so zanmi krétyen-yan. Si nou ka sonjé plizyèr moman Bondjé idé Pòl, sa ké fè nou ankò plis sir ki Jéova ké réponn nou lò nou ké doumandé l’ idé nou kou i promèt.

3. Kisa Pòl pitèt doumandé so kò, é poukisa ?

³ Pòl té bézwen roun moun idé l’. Pa bò d’ lannen 56 di nou lépòk, annan vil Jérizalèm, roun patché moun chròlòlò l’ dèrò di tanp-a é éséyé tchwé l’. Jou apré sa, lò yé mennen l’ Sanédren-an, so lèlmi-ya manké kayakaya l’ (Actes 21:30-32 ; 22:30 ; 23:6-10). A sa moman-an, pitèt i doumandé so kò : « Konmyen tan ankò mo ké pouvé sipòrté yé malmennen mo konsa ? »

4. Kouman Jéova itilizé Jézi pou idé Pòl ?

⁴ Kouman Jézi idé Pòl ? Lannwit apré yé arété l’, « Sényèr-a », Jézi, vini bò d’ li é di li : « Kouraj ! Paské, menm fason to bay roun bèl témwanyaj asou mo lò to té Jérizalèm, a pou to bay roun témwanyaj lò to ké rivé Ròm osi » (Actes 23:11). Sa ankourajman-an rivé jiskont lò Pòl té bézwen ! Jézi félisité Pòl pou bèl témwanyaj i té bay lò i té Jérizalèm. É i di li ki i té ké rivé Ròm vivan é la osi i té ké bay roun témwanyaj. Lò Pòl tandé sa promès-a, i divèt santi so kò an sékirité, kou roun timoun byen séré annan bra so papa.

5. Kouman Jéova itilizé roun zanj pou idé Pòl ? (gadé zimaj-a anlè prémyé paj-a).

⁵ Ki ròt problèm Pòl jwenn ? Apéprè dé lannen apré sa, bò d’ lannen 58 di nou lépòk, Pòl té asou roun bato pou alé an Itali, lò roun tanpèt lévé. Tanpèt-a té tèlman fò ki tout moun asou bato-a krè ki yé té ké mouri. Mé Pòl pa té pè. Poukisa ? I di sa-ya ki té asou bato-a ké li : « Sa lannwit-a, roun zanj Bondjé mo ka adoré-a, Bondjé mo ka bay roun sèrvis sakré, vini òbò mo é i di mo : “Pa pè, Pòl. A pou to alé douvan Sézar, épi gadé, paské to la, Bondjé ké sové tout sa ki annan bato-a ké to” » (Actes 27:20-25 ; 28:16). Jéova té itilizé roun zanj menm fason i té itilizé Jézi anvan sa pou ankourajé Pòl. É Pòl byen rivé Ròm (Actes 27:20-25 ; 28:16).

6. Ki promès Jézi bay ka ankourajé nou, é poukisa ?

 ⁶ Kouman Jézi ka idé nou ? Jézi ké idé nou menm fason i idé Pòl. I ka promèt tout so disip-ya : « Mo ké la ké zòt touléjou jistan lafen monn-an rivé » (Mat. 28:20). Sa paròl Jézi di-ya ka ankourajé nou. Poukisa ? Paské i gen jou ki rèd menm. Parèkzanp, pitèt roun moun nou kontan mouri. Chagren nou gen annan sa sitiasyon-an ka rété pannan plizyèr jou, é byen souvan roun patché lannen. Ouben kou laj ka rantré nou ka jwenn dézagréman. É pou rounòt ran lavi-a pa mòl paské yé ka fè déprésyon. Magré tousa, nou ka trapé fòrs pou tchenbé rèd paské nou savé ki Jézi la ké nou « touléjou », menm lò lavi-a rèd menm (Mat. 11:28-30).

7. Dapré Révélation 14:6, kouman Jéova ka idé nou jòdla ?

⁷ Paròl Bondjé-a ka byen montré nou ki Jéova ka itilizé so zanj pou idé nou (Héb. 1:7, 14). Parèkzanp, zanj-ya ka idé nou é ka gidé nou lò nou ka préché « bon nouvèl di Rwayonm-an » pou « tout nasyon, piti kou gran, ké pou tout lang » (Mat. 24:13, 14 ; li Révélation 14:6).

8. Kouman Jéova itilizé roun koumandan romen pou idé Pòl ?

⁸ Kouman yé idé Pòl ? Kou nou ja wè l’, annan lannen 56 di nou lépòk, Jézi di Pòl ki i té ké rivé Ròm vivan. Mé, plizyèr Jwif Jérizalèm té lé tchwé li é yé té ka chaché roun mwayen pou baré l’. Lò koumandan romen Klod Lizyas tandé palé di sa konplo-a, i idé Pòl. San pédi tan, i doumandé roun gran konvwè sòlda protéjé Pòl é mennen l’ Sézaré. Apré i fè 105 kilomèt, Pòl rivé Sézaré. Lò i rivé, gouvèrnèr Féliks doumandé pou yé « mété roun moun pou véyé Pòl annan palè Éròd-a ». Konsa pyès moun pa té ké pouvé fè li anyen.

9. Kouman gouvèrnèr Fèstis idé Pòl ?

⁹ Dé lannen pita, Pòl té toujou lajòl Sézaré. Aprézan, a té Fèstis gouvèrnèr-a. Atò, Jwif-ya sipliyé l’ pou li voyé Pòl Jérizalèm pou yé té jijé l’, mé i réfizé. Pitèt i té savé ki Jwif-ya « té lé baré Pòl pou tchwé li asou chimen-an » (Actes 24:27 – 25:5).

10. Lò Pòl doumandé pou Sézar jijé l’, kisa Fèstis réponn li ?

¹⁰ Apré sa, yé jijé Pòl annan vil Sézaré. Kou Fèstis, « té lé ganyen favèr Jwif-ya », i doumandé Pòl : « Ès to lé alé Jérizalèm pou yé jijé to douvan mo asou sa bagaj-ya ? » Pòl té savé ki si i té ka alé Jérizalèm, pitèt yé té ké tchwé l’. I té savé osi sa pou i té fè pou i pa té mouri : i té divèt alé Ròm koté i té ké kontinyé préché. A pou sa, Pòl réponn : « Mo ka doumandé wè Sézar ! » Apré i fin palé ké moun-yan ki té ka bay li konsèy, Fèstis réponn : « To doumandé alé wè Sézar, a douvan Sézar to ké alé. » Ké sa désizyon Fèstis pran-an, i protéjé Pòl di so lèlmi-ya. I té ké annan vil Ròm, lwen di Jwif-ya ki té lé tchwé l’ (Actes 25:6-12).

11. Asou ki paròl ankourajan di Izayi Pòl divèt réfléchi ?

¹¹ Profèt Izayi té bay sa avèrtisman-an pou sa-ya ki kont Jéova : « Fè roun projè ! Mé yé ké fè l’ tonbé a dlo. Di sa zòt lé mé sa pa ké maché paské Bondjé la ké  nou ! » (Is. 8:10). Toupannan Pòl té ka antann yé mennen l’ an Itali, pitèt, i réfléchi asou sa paròl Izayi-a. I té savé ki Bondjé té ké idé l’, é sa divèt bay li fòrs pou éprèv-ya ki té ka vin dèyè.

12. Kouman Jilyis aji ké Pòl, é kisa Pòl divèt konprann ?

¹² Annan lannen 58 di nou lépòk, Pòl pran bato-a pou alé an Itali. Kou i té sa roun prizonyé, i té gen roun ofisyé romen ki té ka véyé l’, so non a té Jilyis. Jilyis té pouvé swa rété janti ké li swa fè li wè mizè. Kouman i té ké itilizé so otorité ? Landimen-an, yé kòsté bato-a annan roun vil, é i « byen aji ké Pòl é i lésé li alé koté so zanmi-ya pou yé pran swen di li ». Apré sa, i jis sové so lavi. Kouman i fè sa ? Sòlda-ya té lé tchwé tout prizonyé-ya ki té asou bato-a mé Jilyis pa lésé yé fè sa. Poukisa ? Paské i « té désidé idé Pòl ». Pòl dèt konprann ki a té Jéova ki té ka pousé ofisyé-a pou i té janti konsa ké li (Actes 27:1-3, 42-44).

13. Kouman lèspri Jéova pouvé aji asou moun ki gen otorité ?

¹³ Kouman yé ka idé nou ? Lò sa pouvé fè so projè vansé, détan, Jéova ka itilizé so lèspri sen ki pwisan pou fè moun ki gen otorité fè sa i lé. Rwa Salomon ékri : « Tchò roun rwa kou ti larivyè annan lanmen Jéova. I ka fè li alé tout koté i lé » (Prov. 21:1). Kisa sa proverbe-a lé di ? Lò sa ka ranjé yé, moun-yan pouvé fouyé roun kannal pou fè dlo larivyè-a alé koté yé lé. Menm fason-an, pou fè so projè vansé, Jéova pouvé itilizé so lèspri pou fè roun chèf fè sa i lé. Lò lèspri sen ka aji asou roun moun ki gen otorité, sa moun-an ka santi i anvi pran bon désizyon pou pèp Bondjé-a (gadé Esdras 7:21, 25, 26).

14. Dapré Actes 12:5, pou kimoun nou pouvé priyè ?

¹⁴ Kisa nou pouvé fè ? Nou pouvé priyè « pou tout rwa ké tout sa ki gen otorité » lò sa moun-yan gen pou pran désizyon ki ké gen konsékans asou nou prédikasyon ké nou réinyon (1 Tim. 2:1, 2, nòt ; Néh. 1:11). Menm fason prémyé krétyen-yan té ka fè l’, nou ka priyè rèd pou nou frè ké nou sò-ya ki lajòl (li Actes 12:5 ; Héb. 13:3). Mé nou pouvé priyè osi pou gardyen-yan ki ka okipé di yé : nou pouvé sipliyé Jéova pou i aji  asou yé, pou yé santi yé anvi fè kou Jilyis é « byen aji » ké nou frè ké sò-ya ki lajòl (Actes 27:3 ; nòt).

15-16. Kouman Jéova itilizé Aristark ké Lik pou idé Pòl ?

¹⁵ Kouman yé idé Pòl ? Lò Pòl té ka alé Ròm, Jéova souvan itilizé so frè ké sò-ya pou idé l’. Annou wè déztrwa èkzanp.

¹⁶ Dé bon zanmi Pòl, Aristark ké Lik, désidé alé Ròm ké li *. Yé té paré pédi yé lavi pou rété ké li. A vré, paské Labib-a pa ka di ki yé té ké rivé Ròm vivan. A pita rounso, yé anprann ki yé pa té ké mouri. A pou sa, lò yé barké ké li Sézaré, Pòl divèt di Jéova mèrsi ké tout so tchò pou sa dé bon zanmi plen ké kouraj i té bay li (Actes 27:1, 2, 20-25).

17. Kouman Jéova itilizé plizyèr krétyen pou idé Pòl ?

¹⁷ Lò Pòl té ka alé Ròm, so frè-ya idé li plizyèr fwa. Parèkzanp, lò yé rivé annan vil Sidon, Jilyis « lésé li alé koté so zanmi-ya pou yé pran swen di li ». Pita, annan vil Pitéoli, Pòl ké so konpanyen ‘kontré plizyèr frè ki ensisté pou yé rété sèt jou ké yé’. Tout sa krétyen-yan byen okipé di Pòl ké so konpanyen. É Pòl li menm rakonté yé bokou bagaj ankourajan, é sa dèt bay yé tchò kontan (gadé Actes 15:2, 3). Apré sa bèl ti moman yé té pasé ké yé frè, Pòl ké so konpanyen kontinyé yé vwayaj (Actes 27:3 ; 28:13, 14).

18. Kisa ki fè Pòl di Bondjé mèrsi, é pran kouraj ?

¹⁸ Toupannan Pòl té ka maché pou alé Ròm, i divèt sonjé sa i té ékri asanblé ki annan sa vil-a trwa lannen anvan sa : « Dipi plizyèr lannen mo anvi vini koté zòt » (Rom. 15:23). Mé sa tan-an, i pa té jen pansé ki i té ké rivé annan sa koté-a ké chenn ka maré so lanmen. Sa divèt ankourajé l’ lò i wè ki frè-ya ki té Ròm té vini di li bonjou ! « Lò i wè yé, [i] di  Bondjé mèrsi é i pran kouraj » (Actes 28:15). Ès to wè ki, lò i wè ki so frè té la, a Bondjé i di mèrsi ? Poukisa ? Paské, sa kou-a ankò, i té ka konprann ki a té Jéova ki té ka itilizé so konpanyen krétyen pou idé l’.

19. Dapré 1 Pierre 4:10, kouman Jéova pouvé itilizé nou pou idé so sèrvitèr-ya ?

¹⁹ Kisa nou pouvé fè ? Ès i gen annan to asanblé, frè ké sò ka soufri akoz di maladi ouben ròt traka ankò ? Ès i gen sa ki pédi roun moun yé kontan ? Si nou ka anprann ki annan nou asanblé i gen roun frè ouben roun sò ki bézwen nou soutni li, annou priyè Jéova pou idé nou di ouben fè roun bagaj ki ké bay li tchò kontan. Sa nou ké fè pou ankourajé l’, a ké pitèt jiskont sa i bézwen * (li 1 Pierre 4:10). Nou ké pitèt idé l’ viré sir ki sa promès Jéova fè-a : « Mo pa ké janmen lésé to, é mo pa ké janmen lagé to » a pou li osi. A pa ti kontan nou ké kontan !

20. Poukisa nou pouvé di ké tout nou fòrs : « Jéova ka sové mo » ?

²⁰ Kou Pòl ké so konpanyen, détan, nou pouvé jwenn problèm ki gro kou roun tanpèt. Mé nou savé ki nou pouvé pran kouraj paské Jéova la ké nou. I ka itilizé Jézi ké zanj-ya pou idé nou. Lò sa pouvé fè so projè vansé, i ka itilizé osi moun ki gen otorité pou idé nou. É, kou près nou tout ja wè l’, i ka itilizé so lèspri sen pou fè so sèrvitèr-ya idé yé frè ké yé sò. Kou Pòl, nou pouvé di ké tout nou fòrs : « Jéova ka sové mo ; mo pa ké pè. Kisa roun moun pouvé fè mo ? » (Héb. 13:6).