1. Kan nou gagn bann difikilte ek nou santi nou tousel, ki kitsoz kapav rekonfort nou? (Psom 118:5-7)

ESKI to’nn deza santi twa tousel kan to’nn gagn enn difikilte? Boukou dimounn inn deza resanti sa, mem bann fidel serviter Zeova. (1 Ler. 19:14) Si sa ariv twa, rapel promes Zeova: “Zame mo pa pou kit twa, ni abandonn twa.” Alor, nou kapav dir avek konfians: “Lesegner [Zeova], limem mo sekour, mo pa pou per nanye.” (Ebre 13:5, 6) Ver lane 61 Nou Lepok, lapot Pol ti ekrir sa bann parol-la pou bann Kretien ki ti res dan Zide. So bann parol rapel nou seki enn ekrivin Psom ti ekrir dan Psom 118:5-7.​—Lir.

2. Ki nou pou examine dan sa lartik-la, ek kifer?

² Parey kouma sa ekrivin Psom-la, Pol ti kone ki Zeova ti pe ed li parski Zeova plizir fwa inn ed li dan lepase. Par exanp, plis ki de-z-an avan ki li ekrir so let pou bann Kretien Ebre, Pol ti fer enn vwayaz bien danzere lor lamer pandan ki ti ena enn tanpet. (Zist. 27:4, 15, 20) Pandan sa vwayaz-la ek osi bann lane avan, Zeova ti ed lapot Pol dan plizir fason. Anou examinn trwa fason kouma Zeova ti ed li. Pou ed Pol, Zeova ti servi Zezi ek bann anz, bann dimounn ki ena enn sertenn lotorite, ek bann konpagnon Kretien. Kan nou reflesi lor seki ti ariv Pol, sa pou ogmant nou konfians dan promes ki Bondie inn fer, setadir ki Li pou reponn nou bann lapriyer.

3. Ki kitsoz kitfwa Pol ti pe demann limem, ek kifer?

³ Pol ti bien bizin led. Ver lane 56 Nou Lepok, enn lafoul dimounn ti trenn Pol andeor tanp Zerizalem ek zot ti esey touy li. Landemin, kan zot ti amenn Pol devan Sanedrin, so bann lennmi ti deza bien bles li. (Zist. 21:30-32; 22:30; 23:6-10) Dan sa ler-la, kitfwa Pol ti pe demann limem, ‘Komie letan ankor mo pou kapav andir sa sitiasion-la?’

4. Kouma Zeova ti servi Zezi pou ed Pol?

⁴ Ki led Pol ti gagne? Apre ki zot ti aret Pol, so landemin aswar, “Lesegner” Zezi ti debout pre ar li, ek ti dir li: “Pran kouraz! Parey kouma to finn rann temwagnaz lor mwa dan Zerizalem, koumsamem to pou fer dan Rom.” (Zist. 23:11) Sa promes-la ti bien ankouraz Pol! Zezi ti felisit Pol parski li ti prese dan Zerizalem. Ek li ti promet Pol ki li pou reisi al Rom, pou prese laba osi. Apre ki li ti tann sa promes-la, sirman Pol ti rasire, parey kouma enn zanfan ki dan lebra so papa.

5. Kouma Zeova ti servi enn anz pou ed Pol? (Get zimaz lor kouvertir.)

⁵ Ki lezot difikilte Pol ti gagne? Apepre de-z-an apre seki ti arive dan Zerizalem, Pol ti pran enn bato pou al Litali. Pandan sa vwayaz-la, ti ena enn gro tanpet ek tou bann dimounn ki ti lor bato ti panse ki zot ti pou mor. Me Pol pa ti per. Kifer? Li ti dir sa bann dimounn-la: “Yer swar, Bondie ki mo adore e ki mo servi, finn avoy mwa enn anz ki finn dir mwa, ‘Pa per, Pol; to bizin pas devan Sezar, ek Bondie dan so bonte finn donn twa ek tou bann ki vwayaz ar twa zot lavi sov.’” Zeova ti servi enn anz pou repet promes ki Zezi ti fer Pol. Alafin, Pol ti reisi ariv Rom parey kouma Zeova ti promet li.​—Zist. 27:20-25; 28:16.

6. Ki promes kapav donn nou lafors ek kouraz, ek kifer?

⁶ Ki led nou nou gagne? Zezi pou ed nou parey kouma li ti ed Pol. Par exanp, Zezi promet tou so bann disip: “Mo avek zot toulezour ziska lafin-dimonn.” (Mat. 28:20) Sa bann parol Zezi la kapav donn nou lafors ek kouraz. Kifer? Parski parfwa, nou konn bann sitiasion ki difisil pou andire. Par exanp, kan enn kikenn ki nou kontan mor, kitfwa nou kapav soufer pandan plizir lane. Sertin parmi nou gagn bann difikilte akoz zot laz. Ek ena osi ki bizin lit kont depresion. Me kanmem sa, nou gagn lafors ek kouraz pou andire parski nou kone  ki Zezi avek nou “toulezour ,” mem dan bann moman pli difisil nou lavi.​—Mat. 11:28-30.

7. Dapre Revelasion 14:6, kouma Zeova ed nou azordi?

⁷ Labib dir nou ki Zeova servi bann anz pou ed nou. (Ebre 1:7, 14, NW) Par exanp, bann anz gid nou ek soutenir nou kan nou pres “Bonn Nouvel Rwayom Bondie” ar bann dimounn ki sorti dan “tou bann nasion, tribi, [ek] langaz.”​—Mat. 24:13, 14; lir Revelasion 14:6.

8. Kouma Zeova ti servi enn komandan Romin pou ed Pol?

⁸ Ki led Pol ti gagne? An 56 Nou Lepok, Zezi ti promet Pol ki li ti pou al Rom. Selman, sertin Zwif dan Zerizalem ti fer enn konplo pou atak Pol ek pou touy li. Kan komandan Romin Klod Lizias ti aprann ki ti ena enn konplo pou touy Pol, li ti ed Pol. Deswit, Klod ti avoy enn group solda pou protez Pol ek pou amenn li dan Sezare, ki trouv 105 km ar Zerizalem. Dan Sezare, Gouverner Felix ti donn lord pou “gard Pol dan sato ki Erod ti konstrir.” Bann Zwif ki ti anvi touy Pol pa ti pou kapav fer li nanye laba.​—Zist. 23:12-35.

9. Kouma Gouverner Festus ti ed Pol?

⁹ De-z-an plitar, lane 58 Nou Lepok, Pol ti ankor dan prizon dan Sezare. Festus ti ranplas Felix kouma gouverner. Bann Zwif ti sipliy Festus pou avoy Pol Zerizalem pou li pas devan lakour, me Festus ti refize. Kitfwa li ti kone ki bann Zwif ti “fer enn konplo pou touy [Pol] lor larout.”​—Zist. 24:27–25:5.

10. Ki Gouverner Festus ti fer kan Pol ti demann pou pas devan Sezar?

¹⁰ Plitar, Pol ti pas devan lakour dan Sezare. Festus “ti anvi fer plezir bann Zwif,” alor li ti demann Pol: “Eski to anvi al Zerizalem pouki mo ziz twa laba?” Pol ti kone ki dan Zerizalem sirman bann Zwif ti pou touy li. Li ti kone osi seki li ti bizin fer pou gagn lavi sov, pou al Rom, ek pou kontign so minister. Alor, li ti dir: “Mo fer apel Sezar.” Apre ki li ti koz ar so bann konseye, Festus ti dir Pol: “To finn fer apel ar Sezar, to pou al devan Sezar.” Festus ti pran desizion pou avoy Pol Rom. Gras-a sa, li ti sap Pol dan lame so bann lennmi. Apre inpe letan, Pol ti ariv Rom kot li ti bien lwin ar bann Zwif ki ti pe rod touy li.​—Zist. 25:6-12.

11. Lor ki parol Izai lapot Pol kitfwa ti reflesi?

¹¹ Pandan ki Pol ti pe atann pou koumans so vwayaz pou al Litali, kitfwa li ti pe mazinn lavertisman ki profet Izai ti done kont bann pep ki ti opoz zot ar Zeova. Zeova ti fer Izai ekrir: “Fer enn plan me li pa pou tini! Dir seki zot anvi, me sa pa pou reisi, parski Bondie avek nou!” (Iza. 8:10) Pol ti kone ki Bondie ti pou ed li, ek sirman sa ti donn li lafors pou andir bann leprev ki li ti pou gagne dan lavenir.

12. Kouma Zilyis ti tret Pol, ek ki Pol sirman ti realize?

¹² Kan Pol ti al Litali, enn ofisie Romin ki ti apel Zilyis ti gagn responsabilite pou vey Pol parski Pol ti enn prizonie. Zilyis ti kapav swa maltret Pol, ouswa tret li dan enn bon fason. Kouma eski Zilyis ti servi so lotorite? Landemin, kan zot ti aret dan enn premie lepor, Zilyis “ti tret Pol bien e li ti  mem donn li permision pou al vizit so bann kamarad.” Inpe apre, Zilyis ti mem sov lavi Pol. Kouma? Bann solda ti anvi touy tou bann prizonie ki ti lor bato, me Zilyis ti anpes zot fer sa. Kifer? Parski li “ti anvi sov Pol.” Pol sirman ti realize ki Zeova ti pe servi sa ofisie-la pou ed li ek protez li.​—Zist. 27:1-3, 42-44.

13. Kouma Zeova kapav servi bann dimounn ki ena enn sertenn lotorite?

¹³ Ki led nou nou gagne? Kan sa an-akor avek so volonte, Zeova kapav servi so lespri sin pou fer bann dimounn ki ena enn sertenn lotorite, fer seki Li Li anvi. Lerwa Salomon ti ekrir: “Leker enn lerwa, li parey kouma bann ti larivier delo dan lame Zeova. Li diriz sa partou kot Li kontan.” (Prov. 21:1) Kouma nou bizin konpran sa proverb-la? Bann dimounn kapav fouy enn kanal pou devie enn larivier ek fer delo-la al kot zot anvi. Dan mem fason, Zeova kapav servi so lespri sin pou inflians bann dirizan, pou ki zot fer seki Li Li anvi. Lerla, sa bann dimounn-la pran bann desizion ki dan faver pep Bondie.​—Konpar avek Esdras 7:21, 25, 26.

14. Dapre Zistwar Bann Apot 12:5, pou kisannla nou kapav priye?

¹⁴ Ki nou kapav fer? Nou kapav priye “pou bann lerwa, [ek] tou bann ki ena lotorite,” kan sa bann dimounn-la ena pou pran bann desizion ki kapav ena enn lefe lor nou minister ek nou ladorasion pou Zeova. (1 Tim. 2:1, 2; Ne. 1:11) Parey kouma bann Kretien dan premie siek, nou osi nou kapav priye Bondie avek tou nou leker pou nou bann frer ek ser ki dan prizon. (Lir Zistwar Bann Apot 12:5, NW; * Ebre 13:3) Nou kapav osi priye pou bann gard prizon ki ena responsabilite pou vey nou bann frer ek ser. Nou kapav sipliy Zeova pou inflians zot, pou ki zot azir parey kouma Zilyis ek ki zot tret nou bann frer ek ser dan enn bon fason.​—Zist. 27:3.

15-16. Kouma Zeova ti servi Aristark ek Lik pou ed Pol?

¹⁵ Ki led Pol ti gagne? Kan Pol ti al Rom, Zeova plizir fwa ti servi bann frer ek ser pou ed li. Anou get de-trwa lexanp.

¹⁶ De kamarad Pol, Aristark ek Lik ti  desid pou al Rom ansam avek Pol. * Labib pa dir ki Aristark ek Lik ti pou reisi rant Rom an sekirite. Alor, zot ti met zot lavi an danze kan zot ti fer sa vwayaz bien danzere la. Me zot ti dispoze pou fer sa pou soutenir Pol. Se plitar pandan sa vwayaz-la, ki zot ti aprann ki zot pa ti pou mor. Alor, kan Aristark ek Lik ti rant dan bato pou al Sezare, sirman Pol ti priye Zeova avek tou so leker pou remersie Li pou led ki so de kamarad ti donn li.​—Zist. 27:1, 2, 20-25.

17. Kouma Zeova ti servi bann frer ek ser pou ed Pol?

¹⁷ Pandan so vwayaz, plizir fwa Pol ti gagn led avek bann frer ek ser. Par exanp, kan bato ti aret dan lepor lavil Sidon, Zilyis ti “donn [Pol] permision pou al vizit so bann kamarad e pou resevwar bann kiksoz ki li ti bizin.” Ek plitar, dan lavil Piteoli, Pol ek so bann konpagnon ti “trouv detrwa frer ki ti invit [zot] pou pas enn semenn kot zot.” Pandan ki bann frer dan sa bann landrwa-la ti pe okip Pol ek so bann konpagnon, Pol sirman ti partaz bann lexperyans ankourazan avek zot ek sa ti rann zot bien zwaye. (Konpar avek Zistwar Bann Apot 15:2, 3.) Apre sa bann vizit ankourazan la, Pol ek so bann konpagnon ti kontign zot vwayaz.​—Zist. 27:3; 28:13, 14.

18. Kifer Pol ti remersie Bondie ek ti pran kouraz?

¹⁸ Pandan ki Pol ti pe marse pou al Rom, sirman li ti pe mazinn bann parol ki li ti ekrir trwa-z-an avan, pou lasanble ki dan Rom. Li ti dir zot: “Depi plizir lane mo pe anvi rann zot vizit.” (Rom. 15:23) Selman, li pa ti atann ki li ti pou vinn Rom antan ki prizonie. Alor, sirman sa ti bien ankouraz li kan li ti trouv bann frer sa lavil-la pe atann li lor sime pou akeyir li! “Kan Pol ti trouv sa bann dimoun la, li remersie Bondie e li pran kouraz.” (Zist. 28:15) Remarke ki, kan  Pol ti trouv so bann frer, se Bondie ki li ti remersie. Kifer? Parski Pol ti realize ki Zeova ti pe servi so bann frer pou ed li.

19. Dapre 1 Pier 4:10, kouma Zeova kapav servi nou pou ed bann ki bizin led?

¹⁹ Ki nou kapav fer? Eski to konn bann frer ek ser dan to lasanble ki pe soufer, parski zot malad ouswa zot ena lezot problem. Ouswa, kitfwa enn kikenn ki zot kontan inn mor. Si nou tann dir ki enn kikenn bizin led, nou kapav demann Zeova pou ed nou pou dir ouswa fer enn kitsoz ki pou fer li dibien. Kitfwa nou bann parol ek nou bann aksion, se samem lankourazman ki li bizin. (Lir 1 Pier 4:10, NW. *) * Kan to ed enn kikenn, li kapav regagn konfians dan promes ki Zeova inn fer: “Zame mo pa pou kit twa, ni abandonn twa.” Pena dout ki sa pou rann twa bien zwaye!

20. Kifer nou kapav dir avek konfians ki ‘Zeova, Limem nou sekour’?

²⁰ Parey kouma Pol ek so bann konpagnon, kitfwa nou osi nou ena nou bann problem. Me kanmem sa, nou kone ki nou kapav pran kouraz parski Zeova avek nou. Li servi Zezi ek bann anz pou ed nou. Anplis, si sa an-akor avek so volonte, Zeova kapav mem servi bann dimounn ki ena enn sertenn lotorite pou ed nou. Ek parey kouma boukou parmi nou inn fer lexperyans, Zeova servi so lespri sin pou motiv so bann serviter pou ed zot bann konpagnon Kretien. Alor, parey kouma Pol, nou kapav dir avek konfians: “Lesegner [Zeova], limem mo sekour, mo pa pou per nanye. Ki dimoun kapav fer kont mwa?”​—Ebre 13:6.