1. Itshi yajiya gutuhana ngolo gula tudi gudivua gifua tudi hakhetu, nga tangua tudi mutagana nu malamba? (Ngimbo 118:5-7)

GUDI nu lusugu wadivuile gale gifua udi hakhaye, nga ndo ushigo nu muthu wa gugukuatesa ha gukolesela mu lamba dimoshi ngenyi ba? Akombeledi a Yehowa avula agujinginyina adivuile gale ngenyi. (1 Maf. 19:14) Gula ndaga ya luholo elu yagubuila, ujimbilago ndaga jiazuelele Yehowa egi: ‘Ame mbangugubembigo nga hazonda, mbangugutunyigo nga hazonda.’ Ngenyi tuajiya guzuela egi: ‘Yehowa udi mukuateshi wami, ngajiyilego guvua woma.’ (Heb. 13:5, 6) Mupostolo Phaula wasonegele Aklisto a gu Yudea mbimbi eji, hehi nu givo 61 gia Tangua Dietu. Mbimbi jiene jidi gutuwunguluisa luholo muyimbi wa ngimbo wadivuile mu Ngimbo 118:5-7.—Tanga.

2. Itshi tuza muzuelela mu longo edi? Mukunda natshi?

² Mupostolo Phaula wajiyile egi Yehowa udi Mukuateshi wenji gifua luholo muyimbi wa ngimbo wadivuile. Ha gufezegesa, ivo mbadi nu ndambo gutuama egi Phaula asonege mukanda wa Hebelu, wakalegele vuayaje ya lamba mu muta. (Makal. 27:4, 15, 20) Ivo yavula gutuama egi mupostolo Phaula atshite vuayaje yene, Yehowa wamumonesele egi wakhalele diago Mukuateshi wenji mu maluholo avula. Tuzuelelenu maluholo ene thathu. Yehowa wamukuatesele mu njila ya (1) Yesu nu anjelo, (2) mafumu a leta (3) nu aphangi’enji a Aklisto. Gulonguga ndaga eji jiabuidile mupostolo Phaula guza mukolesa gutshigina guetu gu laji dia Nzambi egi mbawuhana nji mvutu gu isambu yetu ha gutukuatesa.

3. Yajiya gukhala Phaula wadihudile egi itshi? Mukunda natshi?

³ Phaula wakhalele nu funu ya ukuateshi. Hehi nu givo 56 gia Tangua Dietu, athu avula azolele Phaula honze ya tempelo gu Yelusalema, akambele nji gumushiya. Lusugu lualanduile, tangua abatele Phaula gutuama dia Tribinale ya Sanedrene, mbalagaji ji’enji jiakambele gumubatula itshinyi-itshinyi. (Makal. 21:30-32; 22:30; 23:6-10) Mu tangua diene, yajiya gukhala egi Phaula wadihudile egi, ‘Uu nu tangua ditshi ngudi naye gulangula gumona lamba dia luholo elu?’

4. Luholo lutshi Yehowa wakuatesele Phaula mu njila ya Yesu?

⁴ Luholo lutshi Yesu wakuatesele Phaula? Gungima dia gukuatewa gua Phaula mu phipha, “Fumu” Yesu wamaganele gutuama dienji, wamuwambelele egi: ‘Khala nu gikhesa! Handaga gifua luholo walongesele ndaga jidi gungutadila ame gu Yelusalema, udi naye nji gujilongesa gu Roma.’ (Makal. 23:11) Mbimbi eji jiamuhanele diago gikhesa! Yesu washimanele Phaula luholo walongesele gu Yelusalema. Walayele Phaula egi mbawuya mu ubambi gu Roma ha gulongesa luko guene. Gungima dia gumuwambela ndaga eji, Phaula wadivuile mu ubambi gifua luholo mona wana gudivua mu ubambi ha mago a sh’enji.

5. Luholo lutshi Yehowa wakuatesele Phaula mu njila ya anjelo? (Tala gifuanesa holu dia gizula.)

⁵ Malamba atshi ako mupostolo Phaula watagenele nawo? Hehi nu ivo mbadi gungima dia gutagana nu ndaga eji gu Yelusalema, Phaula wanginyile mu masuwa ha guya gu Italie. Guene atagenele nu gikudi giakola. Enya masuwa nu athu akhalele muya nawo atangijile egi amufua gawo. Uvi Phaula gavuilego woma. Mukunda natshi? Wawambelele athu akhalele nawo egi: “Mu phipha eyi muanjelo wa Nzambi, Fumi’ami ngana kombelela nu ngana tshitshila mudimo wa gijila wamagana gutuama diami, wanguwambela egi: ‘Phaula, ukhadigo nu woma. Aye udi naye gumagana gutuama dia Sezale. Tala! Nzambi wahuluisa mionyo ya athu agasue adi nu aye mu masuwa.’” Yehowa watumile muanjelo wenji ha guzuela luko mbimbi jiadiangele guzuela Yesu ha guhana Phaula gikhesa. Gungima, Phaula wayile gu Roma gifua luholo Yehowa wamulayele.—Makal. 27:20-25; 28:16.

6. Laji ditshi dia Yesu diajiya gutuhana ngolo? Mukunda natshi?

⁶ Luholo lutshi Yesu wana gutukuatesa? Yesu mbawutukuatesa gifua luholo luakuatesele muene Phaula. Ha gufezegesa, Yesu walayele athu agasue ana gubua alandudi enji egi: ‘Mbangukhala n’enu masugu agasue uu nu gu gisugishilo gia mavu awa.’ (Mat. 28:20)  Mbimbi jiazuelele Yesu jiana gutuhana diago ngolo. Mukunda natshi? Handaga masugu ako, yana khala lamba gudi esue ha gukolesela. Ha gufezegesa, gula muthu tuana guzumba wafua, tuana khala nu gikenene giavula masugu avula. Ndaga yene yana gutusagesa diago. Athu ako ana tagana nu lamba gula abua athu agukola. Luko, athu ako ana kata misongo ya matangi (dépression). Uvi, tuana heta ngolo handaga tuana jiya egi Yesu wana khala nu esue ‘masugu agasue,’ ikhale mu masugu awa a lamba.—Mat. 11:28-30.

7. Ha gutadila Yatuwuwe 14:6, luholo lutshi Yehowa wana gutukuatesa mangino?

⁷ Mbimbi ya Nzambi idi gutuwambela egi Yehowa wana gutukuatesa mu njila ya anjelo enji. (Heb. 1:7, 14) Ha gufezegesa, anjelo ana gutukuatesa nu ana gututuameza tangua tuana longesa “lukuma luabonga lua Ufumu” gudi athu a ‘ifutshi yagasue, iphuta yagasue nu mazuelelo agasue.’—Mat. 24:13, 14; tanga Yatuwuwe 14:6.

8. Luholo lutshi Yehowa wakuatesele Phaula mu njila ya fumu wa masuta?

⁸ Ukuateshi wa luholo lutshi Phaula wahetele? Mu givo 56 gia Tangua Dietu, Yesu wawambelele Phaula ha guya Roma. Uvi, enya Yuda ako a gu Yelusalema ayile giphungi ha guluisa Phaula nu ha gumushiya. Tangua Fumu wa masuta a enya Roma Claude Lysias wajiyile ndaga yene, wakuatesele Phaula hagula amushiyigo. Mu tangua diene, Claude watumile Phaula ha guya gu Sezalea. Wamuhanele masuta avula ha gumubamba. Atshitshile ba kilometre hehi nu 105 sendese gu Yelusalema uu nu gu Sezalea. Tangua ahetele guene, Guvelenele Felix wazuelele egi Phaula ‘udi naye gubambewa mu inzo ya Helode.’ Enya Yuda akambele gushiya Phaula akhalelego luko nu luholo lua gumushiya.—Makal. 23:12-35.

9. Luholo lutshi Guvelenele Festus wakuatesele Phaula?

⁹ Ivo mbadi gungima, hakhalele Phaula yowu genji mu bologo gu Sezalea, guvelenele Festus wahinganele Felix. Enya Yuda atogele Festus ha gutuma Phaula gu Yelusalema hagula amusophese, uvi Festus watunyile. Yajiya gukhala egi guvelenele wajiyile egi enya Yuda ‘ayile giphungi ha guluisa Phaula nu ha gumushiya mu njila.’—Makal. 24:27–25:5.

10. Mvutu itshi Guvelenele Festus wahanele tangua Phaula wamutogele ha guya musophesewa gudi Sezale?

¹⁰ Gungima Phaula walanduile gutagana nu malamba gu Sezalea. Luholo Festus watshiginyile “gusuanguluisa enya Yuda,” wahudile Phaula egi: ‘Aye watshigina gukanduga gu Yelusalema ha gusophesewa guene gutuama diami ba?’ Phaula wakhalele mujiya egi wajiya gushiyiwa gu Yelusalema. Wakhalele nji mujiya ndaga ya gutshita ha guhuluisa monyo wenji hagula aye gu Roma ha gulandula gulongesa. Wazuelele egi: ‘Ame ngudi mutoga ha guya gudi Sezale!’ Gungima dia guya giphungi nu mangambi enji, Festus wawambelele Phaula egi: “Aye watoga ha guya gudi Sezale, udi muya gudi Sezale.” Desizio dia Festus diahuluishile Phaula gudi mbalagaji jienji. Mu tangua diene, Phaula wayile gu Roma. Wakhalele gualeha nu enya Yuda anyi akhalele mukamba gumushiya.—Makal. 25:6-12.

11. Yajiya gukhala egi mbimbi jitshi jia gikhesa jiasonegele Yeshaya Phaula watangijile?

¹¹ Tangua Phaula wakhalele munengena ha gusendesa vuayaje yenji ha guya gu Italie, yajiya gukhala watangijile ndaga yazuelele profete Yeshaya mukunda nu mbalagaji jia Yehowa egi: ‘Ndenu giphungi gienu, uvi mbagibingigo! Zuelenu ndaga muatshigina, uvi mbayikalegewago, handaga Nzambi udi nu esue!’ (Yesh. 8:10) Phaula wakhalele mujiya egi Nzambi mbawumukuatesa nu mbawumuhana ngolo ha gubinga malamba akhalele naye gumubuila.

12. Luholo lutshi Julius wakalegele Phaula ndaga? Yajiya gukhala egi Phaula wakotelesele itshi?

 ¹² Mu givo 58 gia Tangua Dietu, Phaula wasendesele vuayaje yenji ha guya gu Italie. Luholo wakhalele muenya bologo, suta dimoshi dia gu Roma jina dienji Julius diakhalele gumutalela. Mu tangua diene, Julius wakhalele nu ufumu wa gusagesa Phaula nga wa gumutshitshila ndaga nu gisemo giagasue. Luholo lutshi Julius wakalegele ufumu wenji? Mu lusugu lualanduile, tangua ahetele ha mbungu ya thomo, “Julius wakalegele Phaula ndaga nu gisemo giagasue, wamuhanele njila ya guya gudi mafuta enji.” Gungima, Julius wahuluishile nji Phaula. Luholo lutshi? Masuta akhalele mutshigina gushiya enya bologo agasue akhalele mu masuwa, uvi Julius waakangele njila. Mukunda natshi? Handaga “watshiginyine guhuluisa Phaula.” Yajiya gukhala Phaula wakotelesele egi Yehowa wakalegele fumu wa masuta ha gumukuatesa nu ha gumubamba.—Makal. 27:1-3, 42-44.

13. Luholo lutshi Yehowa wajiya gukalegela mafumu a leta?

¹³ Ukuateshi utshi tuana heta? Yehowa wajiya gukalegela nyuma yenji ha gutuma mafumu a leta ha gutagenesa mafelela enji mu gudivua nu gutshigina guenji. Fumu Solomo wasonegele egi: ‘Mutshima wa fumu udi gifua meya ha mago a Yehowa. Wana guatuameza fundo diatshigina muene.’ (Ish. 21:1) Mbimbi eji jidi mukotelesa itshi? Athu ajiya gubula njila ya meya ha guatuameza fundo didi mutshigina ene. Luholo lumoshi nji, Yehowa wajiya gukalegela nyuma yenji ha gutuameza matangi a mafumu ha gutshita ndaga mu gudivua nu gutshigina guenji. Ngenyi, mafumu a leta ajiya guzula badesizio mukunda nu gubonga gua akombeledi a Nzambi.—Fuanesa nu Ezela 7:21, 25, 26.

14. Ha gutadila Makalegelo 12:5 mukunda nu akuatshi tuajiya gukombelela?

¹⁴ Itshi tudi naye gutshita? Tuajiya gukombelela ‘mukunda nu mafumu nu athu agasue adi nu ufumu’ ha guzula badesizio ajiya gutukuatesa ha gulongesa lukuma luabonga nu ha guya mu gudibungisa gua mu hungu. (1 Tim. 2:1, 2; Neh. 1:11) Luholo lumoshi nu Aklisto a mu siekle ya thomo, esue nji tudi naye gukombelela Nzambi muavula mukunda nu aphangi’etu adi mu bologo. (Tanga Makalegelo 12:5; Heb. 13:3) Luko, tuajiya gukombelela mukunda nu abambi a bologo adi nu ginemo gia gubamba aphangi’etu adi mu bologo. Tuajiya gutoga Yehowa ha gutuameza matangi a mafumu a leta ha gutshitshila aphangi’etu adi mu bologo ndaga nu gisemo giagasue gifua muakalegele Julius.

15-16. Luholo lutshi Yehowa wakuatesele Phaula mu njila ya Aristarke nu Luka?

¹⁵ Ukuateshi wa luholo lutshi Phaula wahetele? Hakhalele Phaula mu vuayaje yenji ha guya gu Roma, Yehowa wamukuatesele iphungu yavula mu njila ya aphangi’enji Aklisto. Henyaha tuzuelelenu ifezegeselo yene.

¹⁶ Mafuta mbadi a gujinginyina a mupostolo Phaula, Aristarke nu Luka, azudile desizio dia guya n’enji gu Roma. * Aristarke nu Luka ahagele lujingu luawo mu gingonza, handaga Biblia yanago guzuela egi Yesu waalayele egi mbaaheta mu ubambi gu Roma. Uvi adihanele ha guya nu Phaula ha gumukuatesa. Phamba gungima ajile mujiya tangua akhalele mu vuayaje egi mbaakhala mu ubambi. Gungima, tangua Aristarke nu Luka akhalele mu masuwa ha guya gu Sezalea, idi naye gukhala egi Phaula wakombelele Yehowa nu mutshima umoshi, ha gumuhana mersi mukunda nu ukuateshi wahetele muene mu njila ya aphangi Aklisto awa mbadi a gikhesa.—Makal. 27:1, 2, 20-25.

17. Luholo lutshi Yehowa wakuatesele Phaula mu njila ya aphangi’enji a Aklisto?

¹⁷ Hakhalele Phaula mu vuayaje yenji, aphangi a mu hungu amukuatesele muavula. Ha gufezegesa, tangua ahetele gu mbungu ya Sidona, Julius wahanele Phaula njila ‘ha guya gudi mafut’enji hagula amukuatese.’ Gungima, tangua ahetele gu dimbo dia Phuzole, Phaula nu mafuta enji ‘asangele aphangi, a atogele ha gukhala nawo masugu sambadi.’ Tangua Aklisto a mu membo ene akhalele muyamba Phaula nu mafut’enji ha gutagenesa nzala jiawo, idi naye gukhala egi Phaula wakhalele mukuatesa aphangi ene ha gukhala nu gusuanguluga mu njila ya ba eksperianse enji a gikhesa. (Fuanesa nu Makal. 15:2, 3.) Gungima dia guheta gikhesa gudi aphangi, Phaula nu mafut’enji a mudimo alanduile vuayaje yawo.—Makal. 27:3; 28:13, 14.

18. Itshi yatumine Phaula ha guhana Nzambi mersi nu ha guheta gikhesa?

¹⁸ Hakhalele muya mupostolo Phaula gu Roma, idi naye gukhala egi watangijile ndaga  jiasonegele muene Aklisto a gu Roma ivo thathu gutuama egi: ‘Ngudi gale nu ivo yavula, ngana khala nu uhote ha guza gumitala.’ (Lomo 15:23) Uvi gakhalelego mutangiza egi tangua mbadiheta muene guene, mbawumbiwa mu bologo. Idi naye gukhala egi tangua aphangi a gu Roma ayile gumutagana mu njila, Phaula wahetele diago gikhesa! ‘Tangua Phaula waamonele, wahanele Nzambi mersi, wahetele gikhesa.’ (Makal. 28:15) Phaula wahanele Nzambi mersi tangua diamonele muene aphangi. Mukunda natshi? Handaga Phaula wakotelesele egi Yehowa wamukuatesele mu njila ya aphangi Aklisto.

19. Ha gutadila 1 Phetelo 4:10, luholo lutshi Yehowa wajiya gutukadigila ha gukuatesa aphangi adi nu funu ya ukuateshi?

¹⁹ Itshi tudi naye gutshita? Udi mujiya aphangi a mu hungu dienu adi gudisagesa mukunda nu misongo nga malamba ako ba? Nga ndo, yajiya gukhala afuishi muthu akhalele muzumba muavula. Gula tuajiya egi phangi mumoshi udi nu funu ya ukuateshi, tuajiya gutoga Yehowa atukuatese ha guzuela nga gumutshitshila ndaga imoshi nu guzumba guagasue. Tudi naye guzuela nga gutshita ndaga jidi muhana phangi muene gikhesa. (Tanga 1 Phetelo 4:10.) Gula tudi guakuatesa, ajiya gusha luko gutshigina gu laji dia Yehowa didi muzuela egi: ‘Ame mbangugubembigo nga hazonda, mbangugutunyigo nga hazonda.’ Ndaga yene mbayituhana diago gusuanguluga.

20. Mukunda natshi tuajiya guzuela nu gutshigina guagasue egi: ‘Yehowa udi mukuateshi wami’?

²⁰ Gifua mupostolo Phaula nu mafut’enji a mudimo, esue nji tuajiya gutagana nu malamba akola mu monyo wetu. Mu tangua diene, tuajiya guheta gikhesa handaga tudi mujiya egi Yehowa udi nu esue. Yehowa wana gutukuatesa mu njila ya Yesu nu anjelo enji. Luko, gula ndaga yene idi gudivua nu felela dienji, Yehowa wajiya gutukuatesa mu njila ya mafumu a leta. Athu avula mukatshi dietu, tuana gumona luholo Yehowa wana kalegela nyuma yenji ha gutuma akombeledi enji ha gukuatesa aphangi awo a Aklisto. Hene, gifua muazuelele Phaula, esue nji tudi nu ndaga jidi gututuma ha guzuela nu gutshigina guagasue egi: ‘Yehowa udi mukuateshi wami, ngajiyilego guvua woma. Itshi muthu wajiya gungutshita?’—Heb. 13:6.