1. Salmo 118:5 al 7-pi nishca shinaca ¿ñucanchijlla cashcata sintirijpi, llaquicunahuan cajpica imataj ayudanga?

¿MAIPICA problemacunahuan cashpaca ñucanchijlla cashcatachu sintirishcanchij? Ñaupa tiempopi Diosta sirvijcunapish cashna shinami sintirircacuna (1 Reyes 19:14). Cashna sintirishpaca Jehová Dios ima nishcatami yuyarina canchij. Paica: “Cantaca manataj shitashachu, manataj cungarishachu” ninmi. Chaimantami tucui shunguhuan: “Jatun Diosca ñucata ayudajmi. Pipish ñucata imata ruranataca, mana manchanichu” ni tucunchij (Hebreos 13:5, 6). Huata 61 punllacunapimi apóstol Pabloca Judea llajtapi causaj Jesusta catijcunamanca cai shimicunata quillcarca. Salmo 118:5-7 ta quillcaj runapish ‘Diosmi ñucahuan. Paica ñucata ayudajmi can’ nishpami escribirca (Salmo 118:5-7 ta liyipai).

2. a) ¿Cai yachaipica imatataj yachashun? b) ¿Imamantataj caita yachanaca importante can?

² Salmota quillcaj runa shinallatajmi apóstol Pabloca Jehová Dios paita ayudanata alli yacharca. Por ejemplo, huata 58-pimi Pabloca barcopi shuj sinchi viajeta rurarca (Hechos 27:4, 15, 20). Chai viajepipish shujtaj viajecunapipish Diosca Pablotaca tucui layami ayudarca. Cai yachaipimi Yaya Dios Pablota ima shinalla ayudashcata ricushun. Shinallataj Jehová Dios Pablota ayudangapajca Jesusta, angelcunata, autoridadta charijcunata, paipaj huauqui panicunatapish ima shina utilizashcatami ricushun. Pablota ima shina Dios ayudashcata ricushpami ñucanchijtapish ayudanata crishun.

3. a) ¿Apóstol Pabloca imatataj tapurishcanga? b) ¿Pabloca imamantashi chashna nishpa tapurirca?

³ Huata 56 punllacunapimi achca gentecunaca Pablota japishpa Taita Diospaj huasimanta canllaman sirijta aisashpa  huañuchinata munarcacuna. Cayandij punllaca Pablotaca mandajcunapaj ñaupajmanmi pusharcacuna. Chaimi paipaj contracunaca paitaca mana alli tratashpa ñutuchinata munarcacuna (Hechos 21:30-32; 22:30; 23:6-10). Chaipica Pabloca, “¿cai llaquicunataca ima horascamataj charisha?” nishpami tapurishcanga. Paica pi ayudachunmi minishtirca.

4. ¿Jehová Diosca Pablotaca ima shinataj Jesushuan ayudarca?

⁴ ¿Jesusca ima shinataj Pablotaca ayudarca? Pablota carcelpi churangapaj japishca qꞌuipami Jesús chai tuta ricurishpa Pablotaca cashna nirca: “Pablo, ama manchaichu. Ima shinami cai Jerusalenpi ñucamanta huillacungui, chashnallatajmi Romapipish huillana cangui” nirca (Hechos 23:11). Pablo alli huillaicunata Jerusalenpi huillashcamantami Jesusca felicitarca. Shinallataj: ‘Roma llajtamanpish sano, allimi chayangui. Chaipipish huillanguimi’ nircami. Pabloca caita uyashpaca achcatami animarishcanga. Paica shuj Yaya paipaj huahuata rigrapi ugllashpa apacujta shinami sintirishcanga.

5. ¿Jehová Diosca Pablotaca ima shinataj shuj angelhuan ayudarca? (Página 1-pi tiyaj fotota ricui).

⁵ ¿Pabloca ima shujtaj llaquicunahuantaj chꞌimbapurarca? Jerusalenpi llaquita charishca ishqui huatacuna qꞌuipaca apóstol Pabloca Italiamanmi shuj barcopi ricurca. Barcopi ricujpimi ñapish achca tamya, sinchi huaira ricurirca. Chai barcopi ricuj gentecunaca ‘cunantajca huañushunmi’ nishpami yuyarcacuna. Pero Pabloca mana manchaita charircachu. Paica barcopi rijcunamanca: “Ñucaca Taita Diospaj cashpa paipajta ruraj cajpimi, Taita Diosca cunan tuta paipaj angelta cacharca. Chai angelmi ñucataca: ‘Pablo, ama manchaichu. Canca Cesarpajman chayanatajmi cangui. Canmantaca tucui canhuan rijcunatami Taita Diosca, huañuimanta quishpichisha ninmi’” nircami. Jesusman nishca layallatajmi Jehová Diosca shuj angelhuanpish Pablotaca cai shimicunata nishpa animarca. Jehová nishca shinami Pabloca Roma llajtaman chayarca (Hechos 27:20-25; 28:16).

6. a) ¿Jesusca ñucanchijta animangapajca imatataj nirca? b) ¿Imamantataj chai shimicunaca ñucanchijta animan?

⁶ ¿Jesusca ima shinataj ñucanchijtaca ayudan? Pablo shinallatajmi ñucanchijpish Jesuspaj ayudata chasquinchij. Por ejemplo, Jesusca paipaj catijcunamanca: “Cai pacha tucuringacamami, tucui punllacuna ñucaca cancunahuan casha” nircami (Mateo 28:20). Cai shimicunaca ¿imamantataj ñucanchijtaca achcata animan? Tucuicunami huaquinpica achca llaquicunata charinchij. Por ejemplo, shuj cꞌuyashca familia huañujpica  achca huatacunatami llaquilla sintirinchij. Mana shuj punllallata chashna sintirinchijchu. Maijan huauqui panicunaca mayorlla tucushcamantami sinchi llaquicunataca chꞌimbapurancuna. Cutin, shujtajcunaca depresión ungüita charishcamantami sinchi punllacunata charincuna. Chashna llaquicunata charishpapish Jesús “tucui” punllacuna ñucanchijta ayudanata yuyarishcamantami ñaupajman catinchij (Mateo 11:28-30).

7. Apocalipsis 14:6-pi nishca shinaca ¿Jehová Diosca ima shinataj ayudan?

⁷ Bibliapica Jehová Diosca ñucanchijta ayudangapajca angelcunata utilizashcatami huillan (Hebreos 1:7, 14). Por ejemplo, angelcunaca Diospaj Gobiernomanta alli huillaicunataca “tucui llajtacunaman, chꞌican chꞌican aillucunaman, chꞌican chꞌican rimaicunaman” huillachunmi ayudan (Mateo 24:13, 14; Apocalipsis 14:6-ta liyipai).

8. ¿Jehová Diosca Pablotaca ima shinataj autoridadcunahuan ayudarca?

⁸ ¿Pabloca ima ayudatataj chasquirca? Ña ricushca shinaca huata 56-pimi Jesusca Pablotaca Romamanmi chayangui nirca. Jerusalenmanta huaquin judiocunaca Pablota huañuchisha nishpami shuj trampata churasha nircacuna. Romamanta soldadocunata mandaj Claudio Lisiasca Pablota huañuchisha nijta yachaj chayashpami paita ayudarca. Chai ratomi mandaj Claudioca achca soldadocunata Pablota cuidachun mandarca. Soldadocunaca Pablotaca Cesarea llajtacamami cuidashpa rircacuna. Cesarea llajtaca Jerusalenmantaca 105 kilometrocunamanta carupimi saquirirca. Cesarea llajtapica mandaj Felixca Pablotaca Herodes mandashpa tiyana huasipi churashpami soldadocunata cuidachun mandarca. Chashnami Pabloca paita huañuchisha nijcunamanta quishpirishca carca (Hechos 23:12-35).

9. ¿Mandaj Festoca ima shinataj Pablota ayudarca?

⁹ Huata 58-pica Pabloca Cesarea llajtallapitajmi prezu carca. Mandaj Félix llujshijpica Cesarea llajtapica Festomi mandai callarirca. Chaimi judiocunaca mandaj Festotaca Jerusalenpi Pablota juzgangapaj cachapai nishpa rogarcacuna. Pero Festoca Pablota judiocuna Jerusalenman pushajpi ñanpi chapashpa huañuchinata yuyarinacucushcatami yachaj chayarca. Chaimantami Pablota pushachunca mana saquirca (Hechos 24:27–25:5).

10. ¿Mandaj César juzgachun Pablo mañajpica Festoca imatataj rurarca?

¹⁰ Asha punllacuna qꞌuipaca Pablotaca Cesarea llajtapimi juzgarcacuna. Mandaj Festoca judiocunapaj ñaupajpi alli ricurisha nishpami Pablotaca: “¿Jerusalenman risha ninguichu canta imallata juchachicushcata chaipi tapungapaj?” nishpa tapurca. Pabloca pai Jerusalenman rijpi chaipi paita huañuchinataca allimi yacharca. Shinallataj paipaj causaita quishpichingapaj, Roma llajtapi huillashpa catingapajca imata rurana cashcatapish allimi yacharca. Chaimi Pabloca: “Ñucataca Cesartaj alli tapuchun ninimi” nirca. Festoca paita consejajcunahuan parlanacushca qꞌuipaca Pablotaca, ‘canllatajmi César ñucata tapuchun nircangui. Chaimantami cunanca chaiman rina cangui’ nircami. Mandaj Festoca Pablota Romaman cachashpaca judiocuna ama llaquichichunmi ayudarca (Hechos 25:6-12).

11. ¿Pabloca Isaías quillcashcapi yuyashpaca ima shinataj animarishcanga?

¹¹ Pabloca Italiaman ringapaj shuyacushpaca profeta Isaías Diosta mana cazujcunaman ima advirtishcatami yuyarirca. Isaías 8:10-pica: “Imalla ruranacunata yuyarinacucuichijllatagari. Chaicunatapish chingachishcami  canga. Alli parlanacucuichijllatagari, chaipish yangallami canga. Diosca ñucanchijhuanmari” ninmi. Pabloca pai charigrishca pruebacunata ahuantachun Jehová Dios ayudanata yachashpaca paica animarishcangami.

12. a) ¿Julioca ima shinataj Pablotaca tratarca? b) ¿Pabloca Julio paita ayudashcata ricushpaca imatataj cuentata curca?

¹² Pablotaca Italiamanmi pusharcacuna. Chaiman Pablota pushangapajca soldadocunata mandaj Julio shutitami cuidachun churarca. Cai mandajca autoridadta charishcamantami Pablotaca alli o mana alli tratai tucurca. Pero ¿cai mandajca ima shinataj Pablotaca tratarca? Cayandij punllaca Sidonman chayashpaca Julioca Pablota achcata llaquishpami, paipaj amigocuna paiman imallatapish cuchun nishpa ricugrichun saquirca. Asha tiempo qꞌuipaca barcopi viajacujpimi barcoca dañarirca. Chaimi soldadocunaca prezu cajcuna ama maita richun huañuchisha nircacuna. Pero Julioca prezu cajcunata huañuchichunca mana saquircachu. Pabloca Julio ima shina ayudajta ricushpami Jehová Dios paita ayudacushcata cuentata curca (Hechos 27:1-3, 42-44).

13. ¿Jehová Diosca ñucanchijtaca ima shinataj autoridadta charijcunahuan ayudan?

¹³ ¿Jehová Diosca ima shinataj ñucanchijta ayudan? Jehová Diosca paipaj munaita pajtachingapajca autoridadta charijcunahuanmi paipaj espíritu santohuan pai munashcata rurai tucun. Rey Salomonca: “Jatun mandajpaj shungutaca, Mandaj Diosmi paipaj maquipi charicun. Uchilla larcacunapi yacuta chaupij shina, pai munashcatami rurachin” nircami (Proverbios 21:1). ¿Salomón nishca shimicunaca imatataj nisha nin? Runacunaca yacuta maiman apangapajca jatun larcacunatami rurancuna. Chashnallatajmi Diosca paipaj munaita pajtachingapajca autoridadta charijcunapaj yuyaicunata cambiai tucun. Jehová Diosca imapish paipaj munaihuan de acuerdo cajpica paipaj espíritu santohuanmi autoridadcunapaj shunguta, yuyaitapish cambiai tucun. Chaimi chai autoridadta charijcunaca Diosta sirvijcunata ayudanata decidishcacuna (Esdras 7:21, 25, 26-ta ricui).

14. Hechos 12:5-pi nishca shinaca ¿picunallamantataj Jehová Diosta mañana canchij?

¹⁴ ¿Ñucanchijca imatataj rurai tucunchij? Jehová Diosta sirvingapaj autoridadta charijcuna jarcaicunata churajpica paicunamantami Diosta mañai tucunchij (1 Timoteo 2:1, 2; Nehemías 1:11). Apostolcuna causashca punllacunapi shinallatajmi ñucanchijpish huauqui panicunamanta Yaya Diosta mañana canchij (Hechos 12:5-ta liyipai; Hebreos 13:3). Shinallataj ñucanchijpish  carcelpi caj huauqui panicunata guardiacuna alli cuidachunmi Diosta mañai tucunchij. Chashnami soldadocunata mandaj Julio shina shujtajcunata llaquishpa tratangacuna (Hechos 27:3).

15, 16. ¿Jehová Diosca Pablotaca ima shinataj Aristarcohuan, Lucashuan ayudarca?

¹⁵ ¿Jehová Diosca ima shinataj Pablotaca ayudarca? Pablo Romaman viajacujpica Jehová Diosca paita ayudachunmi huauqui panicunata utilizarca. Pablota ima shina ayudashcata ricushun.

¹⁶ Pablopaj alli amigocuna Aristarco y Lucasca Romamanmi compañanata decidircacuna. * Bibliapica Jesusca Aristarcota, Lucastaca Romamanmi chayanguichij nishcaca mana maipi ricurinchu. Pero paicunaca Romaman chayanata mana yachashpapish Pablota compañangapajmi tucuita rurarcacuna. Jatun tamya, huaira jatarijpimi Pabloca barcopi rijcunamanca: “Taita Diosca huañuimanta quishpichisha ninmi” nirca. Aristarco, Lucasca Cesareapimi barcopi llujshircacuna. Jehová Diosca cai ishqui huauquicunatami Pablota ayudachunca utilizarca. Chaita ricushpami Pabloca Yaya Diostaca shungumanta agradicishcanga (Hechos 27:1, 2, 20-25).

17. ¿Jehová Diosca huauqui panicunahuanca ima shinataj Pablotaca ayudarca?

¹⁷ Pablo viajacushpaca huauqui panicunapaj ayudatami chasquirca. Por ejemplo, Sidón llajtaman chayashpaca soldadocunata mandaj Julioca Pablotaca paipaj amigocunata visitachunmi saquirca. Shinallataj cai huauqui panicuna Pablota cuidachunmi saquirca. Asha punllacuna qꞌuipaca Pablo paipaj compañerocunaca Puteoli llajtamanmi chayarcacuna. Chaipi causaj huauqui panicunaca canchis punllacunata caipi saquiripaichij nishpami rogarcacuna. Huauqui panicuna Pablota, paita compañajcunata atindicujpica Pabloca animachij experienciacunata parlajpimi paicunaca achcata cushicushcanga (Hechos 15:2, 3-ta ricui). Paicunata visitashca  qꞌuipaca Pablopish, paita compañajcunapish viajashpami catircacuna (Hechos 27:3; 28:13, 14).

18. a) ¿Pabloca imamantataj Diostaca agradicirca? b) ¿Pabloca imamantataj animarishca sintirirca?

¹⁸ Pabloca Romaman ricushpaca quimsa huatacuna huashaman huauqui panicunapaj imata quillcashcatami yuyarishcanga. Pabloca paicunataca: ‘Achca huatacuna ñaupajmanmi cancunata ricuna yuyailla cani’ nircami (Romanos 15:23). Pero Pabloca prezushca Romaman chayanataca mana yuyarcachu. Paica Romaman chayashpaca huauqui panicuna paita shuyacujta ricushpami achcata animarishcanga. Taita Diosta pagui nishpami achcata animarirca (Hechos 28:15). ¿Imamantataj Diostaca pagui nirca? Jehová Dios huauqui panicunahuan paita ayudacushcatami cuentata curca.

19. 1 Pedro 4:10-pi nishca shinaca ¿Jehová Diosca llaquilla cajcunataca ima shinataj ñucanchijhuan ayudan?

¹⁹ ¿Ñucanchijca imatataj rurai tucunchij? Congregacionpi caj huauqui panicunapi yuyashun. ¿Maijancunaca ima ungüitachu charincuna? ¿Ima problemahuanchu chꞌimbapuracuncuna? ¿Paicunapaj cꞌuyashca familiacunachu huañushca? Shuj huauqui o shuj pani cashna laya llaquicunata chꞌimbapuracujta yachaj chayashpaca paicunaman cushichij shimicunahuan animangapaj, imata rurashpa ayudangapajmi Jehová Diostaca mañana canchij. Chashnami paicuna ayudachun minishticuj rato animota cushun (1 Pedro 4:10-ta liyipai). * Chashna ayudajpica paicunaca Dios cusha nishcacunapimi cutin confiangacuna. Diosca: “Cantaca manataj shitashachu, manataj cungarishachu” ninmi. ¿Paicuna Diospi confiajpica manachu ñucanchijpish cushilla sintirishun?

20. ¿Imamantataj “Jatun Diosca ñucata ayudajmi” ni tucunchij?

²⁰ Pablo, paipaj amigocuna shinallatajmi ñucanchijpish problemacunata charinchij. Llaquicunata charishpapish Jehová ayudanata yachashpami mana manchanchij. Diosca paipaj Churihuan, paipaj angelcunahuanmi ñucanchijtaca ayudai tucun. Shinallataj paica paipaj munaihuan de acuerdo cajpica autoridadta charijcunahuanmi ayudai tucun. Yayitu Diosca ñucanchijta ayudangapajpish shujtaj huauqui panicuna ayudana munaita charichunca paipaj espíritu santotami cun. Achcacunami Dios chashna ayudajtaca yachanchij. Chaimanta Pablo shinami ñucanchijpish, “Jatun Diosca ñucata ayudajmi. Pipish ñucata imata ruranataca, mana manchanichu” ni tucunchij (Hebreos 13:6).