1. Σο κα ντελ-αμέν ζορ κάνα νιωθίνασα κορκορέ ή κάνα τασαβένα-αμέν ο προβλήματα; (Ψαλμός 118:​5-7)

ΝΙΩΣΑΛΕΝ ποτές κορκορέ, ότι νανέ πασέ τουμέντε καέκ για τι βοηθίνελ-τουμέν τι νταϊντίνεν εκ πρόβλημας; Μπουτ τζενέ νιωσάλε αντικάς, ντα αντρέ ανταλέντε ισί μπουτ υπηρέτες ι Ιεχωβάσκε-ντα. (1 Βασ. 19:​14) Άμα κα αβέλ-πες τουμένγκε-ντα ανταβά, ανέν τουμαρέ γκοντιάτε ο λάφια ι Ιεχωβάσκε: «Ποτές να κα μουκχάβ-τουτ ντα ποτές να κα παρατίναβ-τουτ». Οτθάρ μπορίνασα τι βακεράς με σιγουριά: «Ο Ιεχωβά ισί μο βοηθός· να κα νταράβ». (Εβρ. 13:5, 6) Ο απόστολος Παύλος γραφιντάς ανταλά λάφια ι Χριστιανόνγκε σο τζουβντιόνας κι Ιουδαία περίπου κο 61 Κ.Χ. Οντουλά σο βακερντάς ανένα αμαρέ γκοντιάτε ο λάφια σο ισί κο εδάφια Ψαλμός 118:​5-7.​—Διαβάνεν.

2. Σο κα ντικχάς ανταλέ μαθημάστε, ντα σόσκε;

² Σαρ ο ψαλμωδός, ο Παύλος-ντα τζανέλας ότι ο Ιεχωβά ισινέ λέσκο Βοηθός σόσκε βοηθιντάας-λες μπουτ φαρ. Για παράδειγμας, περίπου κο 58 Κ.Χ., ο Παύλος κερντάς εκ επικίνδυνος ταξίδι εκχέ φουρτουνιασμέ ντεριαβάτε. (Πράξ. 27:4, 15, 20) Οντουλέ ταξιδίστε ντα κο μπρεσά πριν ανταλέσταρ, ο Ιεχωβά σικαντάς μπουτέ τροπόντζαρ ότι ισινέ Βοηθός ι Παυλόσκο. Κα ντικχάς τριν ανταλένταρ. Βοηθιντάς-λες αντράλ κατά Ιησούς ντα κατά άγγελοι, αντράλ κατά τζενέ σο κερένας κουμάντος ντα αντράλ κατά πφραλά ντα κατά πφενιά. Ανταλά πράγματα σο κα ντικχάς κατά Παυλόσκι ζωή, κα κερέν-αμέν τι μπαριαράς αμαρί μπέσα κο λάφι σο ντινάς ο Ντεβέλ ότι κα βοηθίνελ αμέν-ντα κάνα μανγκάσα λέσταρ βοήθεια.

3. Σο μπορεί τι σκεφτιντάς ο Παύλος, ντα σόσκε;

³ Ο Παύλος μανγκέλας βοήθεια. Περίπου κο 56 Κ.Χ., μπουτ τζενέ νικαντέ-λες ζορίσαρ αβρί κατά ναός κι Ιερουσαλήμ για τι μουνταρέν-λες. Ο γιαβέρ ντιβές, κάνα γκερντέ ι Παυλός κο Σάνχεδριν, χάνικ ατζέκ ντα λέσκε ντουσμάνια κα μουνταρένας-λες. (Πράξ. 21:​30-32· 22:​30· 23:​6-10) Αζομάν, ο Παύλος μπορεί τι σκεφτιντάς: “Καμπόρ ατζέκ κα νταϊντίναβ;”

4. Σαρ βοηθιντάς ο Ιεχωβά ι Παυλός αντράλ κατά Ιησούς;

⁴ Σαρ βοηθίντιλο ο Παύλος; Ι ιράτ σοράν κατά ντιβές σο ασταρντέ ι Παυλός, «ο Κύριος», ο Ιησούς, γκιλό πασέ λέστε ντα βακερντάς: «Μα ντάρα! Επειδή σαρ κερέσα λάφι μάνγκε κι Ιερουσαλήμ καζόμ πιο μπουτ ντα πιο λατσσές αβέλα-πες, αντικάς πρέπει τι κερές κι Ρώμη-ντα». (Πράξ. 23:​11) Ανταβά λάφι ντινάς μπουτ ζορ ι Παυλός! Ο Ιησούς ισαρντάς ι Παυλός ι εργόσκε σο κερντάας κι Ιερουσαλήμ. Ντα ντινάς-λες πο λάφι ότι κα τζάλας κι Ρώμη, ντα κα κερέλας οτθέ-ντα έργος. Κάνα ασουντάς-λες ανταβά, ο Παύλος πρέπει τι νιωσάλο αρακχαντό σαρ εκ χουρντό πι νταντέσκε αγκαλιάτε.

5. Σαρ βοηθιντάς ο Ιεχωβά ι Παυλός αντράλ εκχέ αγγελόσταρ; (Ντικχέν ι φωτογραφία κι ανγκλαϊνί σελίδα)

⁵ Καλά γιαβερά δυσκολίες τθερέλας ο Παύλος; Περίπου ντούι μπρεσά σοράν οντουλένταρ σο αβιλέ-πες κι Ιερουσαλήμ, ο Παύλος ισινέ εκχέ καραβίστε σο τζάλας κι Ιταλία κάνα αβιλί εκ φουρτούνα. Ισινέ αζόμ μπαρί σο σαρέ αμντισάλε ότι κα μερένας. Όμως, ο Παύλος να νταρασάλο. Σόσκε; Βακερντάς οντουλένγκε σο ισινέ κο καράβι: «Ανταγιά ιράτ εκ άγγελος ι Ντεβλέσκο, οντουλέσκο σο ισί μο Κύριος ντα οντουλέσκο σο υπηρετίναβα αβιλό πασέ μάντε ντα βακερντάς: “Μα ντάρα, Παύλο. Πρέπει τι κερές λάφι ανγκλάλ κο Καίσαρας· ντα ο Ντεβέλ μάξους τούκε κα σώνελ σαρέ οντουλέν σο ισί κο καράβι τούσαρ”». Ο Ιεχωβά μπουτσσαντάς εκχέ αγγελός για τι βακερέλ πάλι ο λάφια σο βακερντάς ι Παυλόσκε πιο τζανγκλέ αντράλ κατά Ιησούς. Ντα μπαγιά, ο Παύλος γκιλό κι Ρώμη.​—Πράξ. 27:​20-25· 28:16.

6. Καβά λάφι σο βακερντάς ο Ιησούς ντέλα-αμέν ζορ, ντα σόσκε;

⁶ Σαρ βοηθίντιβασα αμέν; Ο Ιησούς κα βοηθίνελ-αμέν, σαρ βοηθιντάς ι Παυλός-ντα. Για παράδειγμας, ο Ιησούς βακερέλα σαρέ οντουλένγκε σο τζάνα παλά-λέστε: «Με ισινόμ τουμέντζαρ σαρέ ο ντιβεσά μέχρι κο τέλος ανταλέ ντουνιάσκο». (Ματθ. 28:​20) Ο λάφια ι Ιησούσκε πφερένα-αμέν ζορ. Σόσκε; Επειδή μερικά ντιβεσά ισί μπουτ δύσκολα για τι νταϊντίνας-λεν. Για παράδειγμας, κάνα μερέλα αμένταρ εκ τζενό σο μανγκάσα-λες, αμαρί ντουκχ να ατσσικιαρέλα σάντε χάνικ ντιβεσά. Μπορεί  τι ατσσικιαρέλ μπουτ μπρεσά. Γιαβερά τθερένα δυσκολίες σόσκε ισί πφουρέ. Γιαβερά πάλι νακχένα δύσκολα ντιβεσά σόσκε τθερένα κατάθλιψη. Όμως, αρακχάσα ι ζορ για τι συνεχίνας σόσκε τζανάσα ότι ο Ιησούς ισί αμέντζαρ «σαρέ ο ντιβεσά», ατζέ-ντα ο πιο δύσκολα ντιβεσά αμαρέ ζωγιάκε.​—Ματθ. 11:​28-30.

7. Σαρ βοηθίνελα-αμέν ο Ιεχωβά αντιβές σαρ βακερέλα ο εδάφιος Αποκάλυψη 14:6;

⁷ Ο Λάφι ι Ντεβλέσκο ντέλα-αμέν ι σιγουριά ότι ο Ιεχωβά βοηθίνελα-αμέν αντράλ κατά άγγελοι. (Εβρ. 1:7, 14) Για παράδειγμας, ο άγγελοι βοηθίνενα-αμέν κάνα βακεράσα ο «λατσσέ αμπέρια ι Βασιλειάκε» τζενένγκε “σαρέ κατά τθεμά, κατά φυλές ντα κατά τσσιμπά”.​—Ματθ. 24:​13, 14· διαβάνεν Αποκάλυψη 14:6.

8. Σαρ χρησιμοποιηντάς ο Ιεχωβά εκχέ τζενές σο κερέλας κουμάντος κο στρατός για τι βοηθίνελ ι Παυλός;

⁸ Σαρ βοηθίντιλο ο Παύλος; Κο μπρες 56 Κ.Χ., ο Ιησούς βακερντάς ι Παυλόσκε ότι κα τζάλας κι Ρώμη. Όμως, μερικοί Ιουδαίοι κι Ιερουσαλήμ κανονιντέ τι μπεσέν λέσκε κο ντρομ ντα τι μουνταρέν-λες. Κάνα ο Κλαύδιος Λυσίας σο ισινέ Ρωμαίος ντα κερέλας κουμάντος κο στρατός, σικλιλό σο μανγκένας τι κερέν ι Παυλόσκε, βοηθιντάς-λες. Χωρίς τι χασαρέλ χρόνος, ο Κλαύδιος βακερντάς μπουτέ στρατιωτένγκε τι αρακχαβέν ι Παυλός ντα τι γκερέν-λες κι Καισάρεια σο ισινέ περίπου 105 χιλιόμετρα κατά Ιερουσαλήμ. Οτθέ, ο κυβερνήτης Φήλικας «βακερντάς τι αρακχαβέν [ι Παυλός] κο παλάτι κι Ηρωδίσκο». Ο Ιουδαίοι σο μανγκένας τι μουνταρέν ι Παυλός ναστί κερένας λέσκε ζιάνι οτθέ.​—Πράξ. 23:​12-35.

9. Σαρ βοηθιντάς ο κυβερνήτης Φήστος ι Παυλός;

⁹ Ντούι μπρεσά πιο σοράν, ο Παύλος ισινέ ατζέ φυλακή κι Καισάρεια. Σοράν κατά Φήλικας αβιλό κυβερνήτης ο Φήστος. Ο Ιουδαίοι μολίνενας ι Φηστός τι ανέλ ι Παυλός κι Ιερουσαλήμ για τι δικάντιβελ, αλλά ο Φήστος να μανγκλάς. Μπορεί τι τζανέλας ότι ο Ιουδαίοι «μανγκένας τι μπεσέν λέσκε κο ντρομ ντα τι μουνταρέν-λες».​—Πράξ. 24:​27–25:5.

10. Σο κερντάς ο κυβερνήτης Φήστος κάνα ο Παύλος μανγκλάς τι δικάντιβελ κατά Καίσαρας;

¹⁰ Σοράν, η δίκη ι Παυλόσκι αβιλί-πες κι Καισάρεια. Επειδή ο Φήστος «μανγκέλας τι ντικχέν-λες λατσσιμάσαρ ο Ιουδαίοι», πουτσλάς ι Παυλός: «Μανγκέσα τι αβές κι Ιερουσαλήμ ντα τι δικάντιβες οτθέ ανγκλά-μάντε;» Ο Παύλος τζανέλας ότι μπορεί τι μουνταρένας-λες κι Ιερουσαλήμ. Επίσης, τζανέλας σο έπρεπε τι κερέλ για τι σώνελ πι ζωή. Έπρεπε τι τζαλ κι Ρώμη ντα τι συνεχίνελ τι κερέλ έργος. Βακερντάς: «Ο Καίσαρας μανγκάβα τι ασουνέλ-μαν!» Ο Φήστος κερντάς λάφι ι γκοντιαβέρ τζενέντζαρ σο τθερέλας πασέ πέστε ντα βακερντάς ι Παυλόσκε: «Τον Καίσαρα ντινάν βίκος, κο Καίσαρας κα τζας». Η απόφαση σο λιντάς ο Φήστος σωντάς ι Παυλός λέσκε ντουσμανίνταρ. Χάνικ πιο σοράν, ο Παύλος κα αβέλας κι Ρώμη​—ντουρ κατά Ιουδαίοι σο μανγκένας τι μουνταρέν-λες.​—Πράξ. 25:​6-12.

11. Καλά λάφια σο βακερντάας ο Ησαΐας μπορεί τι ντινέ ζορ ι Παυλός;

¹¹ Καζόμ ο Παύλος μπεσέλας τι τζαλ κι Ιταλία, μπορεί τι νακχλέ λέσκε γκοντιάταρ ο λάφια σο βακερντάας ο προφήτης Ησαΐας οντουλέ τζενένγκε σο τζάνας κόντρα κο Ιεχωβά: «Κανονίνεν σο τι κερέν, αλλά να κα αβέλ-πες! Βακερέν σο μανγκένα, αλλά να κα τζαλ λατσσές, σόσκε ο Ντεβέλ ισί αμέντζαρ!» (Ησ. 8:​10) Ο Παύλος τζανέλας ότι ο Ντεβέλ κα βοηθίνελας-λες, ντα ανταβά πρέπει τι ντινάς-λες ζορ τι νταϊντίνελ ο δυσκολίες σο κα αβένας.

12. Σαρ συμπεριφερισάλο ο Ιούλιος ι Παυλόσκε, ντα σο μπορεί τι αγαντάς ο Παύλος ανταλέσταρ;

¹² Κο 58 Κ.Χ., ο Παύλος αρχισάλο πο ταξίδι κάρινγκ κι Ιταλία. Εκ Ρωμαίος σο κερέλας  κουμάντος κο στρατός, ο Ιούλιος, αρακχαβέλας ι Παυλός σο ισινέ φυλακισμέ. Οντουλέσκε, ο Ιούλιος μπορίνελας είτε τι τσσιντικιαρέλ μπουτ πράγματα ι Παυλός είτε τι σικαβέλ λέσκε λατσσιπέ. Σο κερντάς ο Ιούλιος; Ο γιαβέρ ντιβές, κάνα ερεσλέ, «ο Ιούλιος σικαντάς λατσσιπέ κο Παύλος ντα μουκχλάς-λες τι τζαλ πι αμαλέντε». Πιο σοράν, ο Ιούλιος σωντάς ι ζωή ι Παυλόσκι. Σαρ; Ο στρατιώτες μανγκένας τι μουνταρέν σαρέ ι φυλακισμέ τζενέν σο ισινέ κο καράβι, αλλά ο Ιούλιος τσσιναντάς-λεν. Σόσκε; «Μανγκέλας τι ατσσικιαρέλ τζουβντό ι Παυλός σο-ντα τι αβέλας-πες». Ο Παύλος μπορεί τι αγαντάς ότι ο Ιεχωβά χρησιμοποιήνελας οντουλέ τζενές για τι βοηθίνελ-λες ντα για τι αρακχαβέλ-λες.​—Πράξ. 27:​1-3, 42-44.

13. Σαρ μπορεί τι χρησιμοποιήνελ ο Ιεχωβά τζενέν σο κερένα κουμάντος;

¹³ Σαρ βοηθίντιβασα αμέν; Για τι κερέλ ο Ιεχωβά οντουβά σο τθερέλα πι γκοντιάτε, μπορεί τι χρησιμοποιήνελ πο ζουρανό άγιος πνεύμας για τι τσσίντελ τζενέν σο κερένα κουμάντος τι κερέν οντουβά σο μανγκέλα. Ο βασιλιάς Σολομών γραφιντάς: «Ο γκι ι βασιλιάσκο ισί σαρ λενιά κο βας κι Ιεχωβάσκο. Γκερέλα-λες κάι μανγκέλα Βοβ». (Παρ. 21:1) Σο μανγκέλα τι βακερέλ ανταγιά παροιμία; Ο τζενέ μπορίνενα τι χαντζουβέν εκ χαντάκι για τι γκερέν οτθέ σο μανγκένα ο πανί. Αντικάς ο Ιεχωβά-ντα αντράλ πι πνευμάσταρ μπορίνελα τι γκερέλ, σαρ τι βακεράας, ι γκοντί οντουλένγκι σο κερένα κουμάντος οτθέ σο μανγκέλα βοβ. Κάνα κερέλα-λες ανταβά, ο τζενέ σο κερένα κουμάντος λένα αποφάσεις σο κερένα λατσσιπέ κι Ιεχωβάσκο λαός.​—Ντικχέν Έσδρας 7:​21, 25, 26.

14. Κάσκε μπορίνασα τι κεράς προσευχή σαρ βακερέλα ο εδάφιος Πράξεις 12:5;

¹⁴ Σο μπορίνασα τι κεράς αμέν; Τι κεράς προσευχή «οντουλένγκε σο ισί βασιλιάδες ντα σαρέ οντουλένγκε σο κερένα κουμάντος» κάνα ανταλά τζενέ λένα αποφάσεις σο επηρεάνενα αμαρί ζωή ντα αμαρό έργος. (1 Τιμ. 2:1, 2· Νεεμ. 1:​11) Σαρ κερντέ ο πρώτοι Χριστιανοί, αντικάς αμέν-ντα κεράσα προσευχή αντράλ αμαρέ γκίσταρ κο Ντεβέλ αμαρέ πφραλένγκε ντα πφενίνγκε σο ισί κι φυλακή. (Διαβάνεν Πράξεις 12:5· Εβρ. 13:3) Επίσης, μπορίνασα τι κεράς προσευχή οντουλένγκε σο αρακχαβένα-λεν κο φυλακές. Μπορίνασα τι μολίνας ι Ιεχωβάς τι τσσουβέλ κι γκοντί ασακέ τζενένγκι τι κερέν οντουβά σο κερντάας ο Ιούλιος ντα τι “σικαβέν λατσσιπέ” αμαρέ πφραλένγκε ντα πφενίνγκε σο ισί κι φυλακή.​—Πράξ. 27:3.

15, 16. Σαρ βοηθιντάς ο Ιεχωβά ι Παυλός αντράλ κατά Αρίσταρχος ντα κατά Λουκάς;

¹⁵ Σαρ βοηθίντιλο ο Παύλος; Καζόμ τζάλας κάρινγκ κι Ρώμη, ο Παύλος λιντάς  μπουτ φαρ βοήθεια κατά Ιεχωβά αντράλ κατά πφραλά. Για τι ντικχάς μερικά παραδείγματα.

¹⁶ Ντούι πιστά αμαλά ι Παυλόσκε, ο Αρίσταρχος ντα ο Λουκάς, μανγκλέ τι τζαν λέσαρ κι Ρώμη. * Τσσουντέ σε κίνδυνος πουμαρί ζωή για τι αβέν γιεκ ι Παυλόσαρ, παρόλο σο ντικχίντιβελα ότι ο Ιησούς να βακερντάς λένγκε ότι κα ερεσένας κι Ρώμη. Πιο σοράν, κάνα ασταρντάς-λεν η φουρτούνα, σικλιλέ ότι να κα μερένας. Οτθάρ, κάνα ο Αρίσταρχος ντα ο Λουκάς τσσουντέ-πες κο καράβι για τι νασέν κατά Καισάρεια, ο Παύλος μάλλον κερντάς προσευχή αντράλ πι γκίσταρ κο Ιεχωβά ντα βακερντάς λέσκε ευχαριστώ σο βοηθιντάς-λες αντράλ ανταλέ ντουέ μπίνταρανε πφραλένταρ.​—Πράξ. 27:1, 2, 20-25.

17. Σαρ βοηθιντάς ο Ιεχωβά ι Παυλός αντράλ κατά πφραλά;

¹⁷ Κο ταξίδι, ο Παύλος λιντάς μπουτ φαρ βοήθεια κατά πφραλά. Για παράδειγμας, κο λιμάνι κι Σιδώνα, ο Ιούλιος μουκχλάς ι Παυλός «τι τζαλ πι αμαλέντε για τι φροντίνεν-λες». Σοράν, κο Ποτίολοι, ο Παύλος ντα λέσκε αμαλά “αρακχλέ πφραλέν σο μολιντέ-λεν τι μπεσέν λέντζαρ εφτά ντιβεσά”. Καζόμ ο Χριστιανοί ανταλέ τθανέντε φροντίνενας ο ανάγκες ι Παυλόσκε ντα λέσκε αμαλένγκε, ο Παύλος σίγουρα ντινάς μπαρί χαρά οντουλέ πφραλέντε σο φιλοξενίνενας-λες κάνα βακερέλας λένγκε εμπειρίες σο ντινέ-λεν ζορ. (Ντικχέν Πράξεις 15:2, 3) Αφού ντικχλέ ι πφραλέν ντα λιντέ ζορ, ο Παύλος ντα λέσκε αμαλά συνεχιντέ πουμαρό ταξίδι.​—Πράξ. 27:3· 28:​13, 14.

18. Σο κερντάς ι Παυλός τι ευχαριστίνελ ι Ντεβλές ντα τι λελ ζορ;

¹⁸ Καζόμ ο Παύλος τζάλας πφιριντός κάρινγκ κι Ρώμη, μάλλον σκεφτίνελας ο λάφια σο γραφιντάας τριν μπρεσά πιο τζανγκλέ οντουλέ κχανγκιριάκε: «Μπουτ μπρεσά ακανά, μπεσάβα σαρ σαρ τι αβάβ τουμέντε». (Ρωμ. 15:​23) Να νακχλόας λέσκε γκοντιάταρ όμως ότι κα τζάλας οτθέ φυλακισμέ. Καζόμ ζορ λιντάς κάνα ντικχλάς ότι κάποια πφραλά κατά Ρώμη μπεκλεντίνενας κο ντρομ για τι χαιρετίνεν-λες! «Μόλις ο Παύλος  ντικχλάς-λεν, ευχαριστιντάς ι Ντεβλές ντα λιντάς θάρρος». (Πράξ. 28:​15) Ο Παύλος ευχαριστιντάς ι Ντεβλές σο ντικχλάς ι πφραλέν. Σόσκε; Επειδή ντικχλάς ατζέκ εκ φαρ ι Ιεχωβάς τι βοηθίνελ-λες αντράλ κατά πφραλά.

19. Σαρ μπορίνελα ο Ιεχωβά τι χρησιμοποιήνελ-αμέν για τι βοηθίνελ οντουλέν σο τθερένα ανάγκη σαρ βακερέλα ο εδάφιος 1 Πέτρου 4:10;

¹⁹ Σο μπορίνασα τι κεράς αμέν; Τζανένα πφραλέν ή πφενίν τουμαρέ κχανγκιριάτε σο νακχένα δύσκολα επειδή ισί νασφαλέ ή επειδή τθερένα γιαβερά προβλήματα; Μήπως μουλό λένταρ εκ τζενό σο μανγκένας μπουτ; Άμα σικλιλάμ ότι εκ τζενό μανγκέλα βοήθεια, μπορίνασα τι μανγκάς κατά Ιεχωβά τι βοηθίνελ-αμέν τι βακεράς ή τι κεράς κάτι σο κα σικαβέλ αγάπη ντα λατσσιπέ. Οντουλά σο βακεράσα ντα κεράσα μπορεί τι ντεν ακριβώς οντιά ζορ σο τθερέλα ανάγκη αμαρό πφραλ ή αμαρί πφεν. (Διαβάνεν 1 Πέτρου 4:​10) * Άμα κα βοηθίνας-λεν, ίσως τι πακιάν πάλι ότι ισί λένγκε-ντα ακαβά λάφι ι Ιεχωβάσκο: «Ποτές να κα μουκχάβ-τουτ ντα ποτές να κα παρατίναβ-τουτ». Να κα ντέλας-τουμέν χαρά ανταβά;

20. Σόσκε μπορίνασα τι βακεράς με σιγουριά: «Ο Ιεχωβά ισί μο βοηθός»;

²⁰ Σαρ ο Παύλος ντα λέσκε αμαλά, αντικάς αμέν-ντα νακχάσα μπουτ προβλήματα αμαρέ ζωγιάτε. Όμως, τζανάσα ότι μπορίνασα τι αβάς μπίνταρανε σόσκε ο Ιεχωβά ισί αμέντζαρ. Βοβ ντέλα-αμέν βοήθεια αντράλ κατά Ιησούς ντα κατά άγγελοι. Επίσης, για τι κερέλ ο Ιεχωβά οντουβά σο τθερέλα πι γκοντιάτε, κα βοηθίνελ-αμέν αντράλ τζενένταρ σο κερένα κουμάντος. Ντα σαρ ντικχλέ-λες πουμαρέ ζωγιάτε μπουτ αμένταρ, ο Ιεχωβά, αντράλ πι άγιε πνευμάσταρ, κερέλα πι υπηρετόν τι βοηθίνεν πουμαρέ πφραλέν ντα πφενίν. Οτθάρ, σαρ ο Παύλος, αντικάς αμέν-ντα τθεράσα μπουτ λόγους τι βακεράς με σιγουριά: «Ο Ιεχωβά ισί μο βοηθός· να κα νταράβ. Σο μπορίνενα τι κερέν-μαν ο τζενέ;»​—Εβρ. 13:6.