1. Бешимизға еғир күн чүшүп, өзүмизни ялғуз қалғандәк һис қилғанда, немә бизгә тәсәлли бериду? (Зәбур 118:5—7)

 БЕШИҢИЗҒА еғир күн чүшүп, йениңизда ярдәм беридиған һечким йоқ өзүңизни ялғуз һис қилған вақтиңиз болғанму? Нурғун адәмләр, шу җүмлидин Йәһваниң садиқ хизмәтчилириму шундақ һис қилған (Пад. 1-яз. 19:14). Әгәр шундақ әһвалға чүшүп қалсиңиз, Йәһваниң «сени һәргиз қалдурмаймән һәм сени һечқачан ташлимаймән», дегән вәдисини әстин чиқармаң. Шуңа, биз ишәнч билән: «Йәһва — мениң Ярдәмчимдур, қорқмаймән»,— дәп ейталаймиз (Ибр. 13:5, 6). Әлчи Паул бу сөзләрни милади 61-жили Йәһудийәдики етиқатдашлириға язған. Униң бу сөзлири Зәбур язғучисиниң сөзлирини есимизгә салиду (Зәбур 118:5—7ни оқуң).

2. Бу мақалидә биз немини көрүп чиқимиз вә немә үчүн?

² Зәбур язғучиға охшаш, әлчи Паулму һаятидиму Йәһваниң өзигә Ярдәмчи екәнлигини билгән. Мәсилән, у Ибранийларға хәт йезиштин икки жил илгири, деңизда сәпәр қилғанда, хәтәрлик боран-чапқунға учриған (Әлч. 27:4, 15, 20). Сәпәр қилиштин авал вә сәпәр җәриянидә, Йәһва униңға һәрхил усуллар арқилиқ Ярдәмчи екәнлигини көрсәткән. Һазир бу усулларниң үчини көрүп чиқимиз. Йәһва Худа униңға Әйса һәм пәриштиләр, бәзи һоқуқдар адәмләр вә етиқатдашлар арқилиқ ярдәм бәргән. Әлчи Паул һаятида бешидин кәчүргән әшу вақиәләрни көрүп чиқиш Худаниң дуалиримизға җавап беридиғанлиғи һәққидә қилған вәдисигә болған ишәнчимизни мустәһкәмләшкә ярдәм бериду.

3. Паул немә һәққидә әнсиригән вә немә үчүн?

³ Паул ярдәмгә муһтаҗ болған. Тәхминән милади 56-жили бир топ адәмләр Паулни Йерусалимдики мәркизий ибадәтханидин сөрәп чиқип, өлтүрүшкә урунған. Әтиси Паулни Алий кеңәшниң алдиға елип кәлгәндә, уни дүшмәнлири у яқ бу яққа тартип парчә-парчә қиливәткили тас қалған (Әлч. 21:30—32; 22:30; 23:6—10). Дәл шу пәйттә, Паул бәлким мундақ әнсиригән: «Бундақ һақарәтләргә қанчә узақ вақит чидалаймән?»

4. Йәһва Һәзрити Әйса арқилиқ Паулға қандақ ярдәм бәргән?

⁴ Әлчи Паул қандақ ярдәмгә еришкән? Тутқун қилинған кәчтә Паулниң алдида Һәзрити Әйса пәйда болуп: «Ғәйрәтлик бол! Йерусалимда мән тоғрилиқ сән қандақ асаслиқ гува бәргән болсаң, Римдиму шундақ гувалиқ қилишиң керәк»,— дегән еди (Әлч. 23:11). Немә дегән дәл вақтида берилгән илһам,-һә! Әйса Паулни Йерусалимда гувалиқ бәргини үчүн махтиған. У әлчи Паулға Рим шәһиригә аман-есән йетип келип, шу йәрдиму гувалиқ берисән, дәп вәдә бәргән. Паул бундақ капаләтни алғандин кейин, өзини чоқум дадисиниң қучиғида олтурған кичик балидәк һис қилған.

5. Йәһва пәриштә арқилиқ Паулға қандақ ярдәм бәргән? (Муқавидики рәсимгә қараң.)

⁵ Паул йәнә қандақ қийинчилиқларни бешидин өткүзгән? Йерусалимда йүз бәргән мошу вақиәләрдин тәхминән икки жил өткәндин кейин, Паул Италияға қарап йолға чиққан кемидә болған. Кемә шиддәтлик боран-чапқунға учриғанда, кемичиләр вә йолувчилар һәммиси өлидиған болдуқ, дәп ойлиған. Бирақ Паул немә үчүн қорқмиған? У кемидики кишиләрниң һәммисигә мундақ ейтқан: «Мән мәнсүп болған һәм муқәддәс хизмәт атқуруватқан Худаниң пәриштиси мошу кечидә алдимда туруп: “Паул, қорқма. Сән қәйсәр алдида турушиң керәк, шуңлашқа Худа сениң билән үзүватқанларниму саңа соға қилди”,— деди». Йәһва әлчи Паулға Әйса арқилиқ бурун ейтқан вәдисини қайтилаш үчүн пәриштидин пайдиланған. Йәһва вәдә бәргәндәк, Паул Римға йетип кәлгән (Әлч. 27:20—25; 28:16)

6. Әйсаниң бәргән қайси вәдиси бизгә күч-мәдәт бериду вә немә үчүн?

⁶ Биз қандақ ярдәмгә еришимиз? Әйса Паулни қоллап-қувәтлигәндәк, бизниму қоллап-қувәтләйду. Мәсилән, Әйса әгәшкүчилиригә мундақ вәдә бериду: «Мошу дуния қурулумиси аяқлашқичә, барлиқ күнләрдә мән силәр билән болумән» (Мәт. 28:20). Немә үчүн Әйсаниң сөзлири бизгә күч-мәдәт бериду? Чүнки бәзи күнләрни  бешимиздин өткүзүш еғир келиду. Мәсилән, йеқинлиримиз өлүп кәткәндә, биз бир нәччә күнла әмәс, бирқанчә жилларғичә қайғу-һәсрәт чекидиғандимиз. Башқилар болса, қерилиқ сәвәплик еғир күнләрни баштин өткүзүшкә тоғра келиду. Йәнә бәзиләр чүшкүнлүккә чүшүп, еғир күнләргә дуч келиду. Шундақ болсиму, биз Әйсаниң «барлиқ күнләрдә», шу җүмлидин һаятимиздики қаранғулуқ қаплиған күнләрдә «мән силәр билән болумән» дегән сөзлиридин өзүмизгә күч-мәдәт тапимиз (Мәт. 11:28—30).

7. Вәһий 14:6-айәткә асасән, бүгүнки күндә Йәһва Худа бизгә қандақ ярдәм бериду?

⁷ Худа Сөзи бизни Йәһваниң Өз пәриштилири арқилиқ ярдәм беридиғанлиғиға ишәндүриду (Ибр. 1:7, 14). Мәсилән, «һәртүрлүк милләт, қәбилә, тил вә хәлиқләргә» «Падишалиқ һәққидики мошу хуш хәвәрни» йәткүзүшимиз үчүн пәриштиләр бизни қоллап-қувәтләйду вә йол-йоруқ бериду (Мәт. 24:13, 14; Вәһий 14:6ни оқуң).

8. Йәһва һоқуқдар адәмләр арқилиқ Паулға қандақ ярдәм бәргән?

⁸ Әлчи Паул қандақ ярдәмгә еришкән? Милади 56-жили Әйса әлчи Паулни Рим шәһиригә баридиғанлиғиға ишәндүргән. Амма бәзи йәһудийлар униңға туюқсиз һуҗум қилип, өлтүрмәкчи болған еди. Рим қошунниң командани Клавдиюс Лисияс буни билип, Паулни қутулдуруп қелишиға һәрикәт қилған. Узун өтмәй, у Паулни нурғун әскәрләрниң һимайисидә Йерусалимдин 105 километр җирақлиқтики Қәйсәрия шәһиригә әвәткән. Шу йәрдә валий Феликс Паулни «Һиродниң сарийидики әскәрләрниң күзитишигә тапшурушни буйриди». Шуңа, Паулни өлтүрмәкчи болған йәһудийлар униңға қол тәккүзәлмигән еди (Әлч. 23:12—35).

9. Валий Фестус Паулға қандақ ярдәм бәргән?

⁹ Милади 58-жили Паул Қәйсәрия шәһиридә техи қамақта еди. Феликсниң орниға Фестус валий болған. Йәһудийлар валий Фестустин әлчи Паулниң Йерусалимдики сот қилинишини сориған. Лекин Фестус бу өтүнүшни рәт қилған. Бәлким валий уларниң Паулни «йолда өлтүрүши үчүн һуҗумни» планлиғанлиғини билгән (Әлч. 24:27—25:5).

10. Паул қәйсәргә мураҗиәт қилимән дегәндә, валий Фестус қандақ җавап қайтурған?

¹⁰ Кейинирәк Паулни Қәйсәриядә сотлиған. Фестус йәһудийларниң көңлидин чиқишни халиғач, Паулдин: «Йерусалимға берип, шу йәрдә мошу әйипләр бойичә мениң алдимда сотлинишни халамсән?»— дәп сориған. Паул Йерусалимда өлтүрүлүш мүмкинлигини билгән. У йәнә аман қелиш үчүн немә қилалайдиғанлиғини, йәни Рим шәһиригә берип, вәз қилишни давамлаштуридиғанлиғини билгән. У: «Қәйсәргә мураҗиәт қилимән!»— деди. Фестус өзиниң мәслиһәтчилири билән сөзлишип, кейин Паулға: «Қәйсәргә мураҗиәт қиламсән — қәйсәргә һәм барисән!»— деди. Фестусниң Римға әвәтиш қарари Паулни дүшмәнлиридин қоғдап қалған. Узун өтмәй, Паул Римда болуп, уни өлтүрмәкчи болған йәһудийларниң қолидин аман қалған (Әлч. 25:6—12).

11. Йәшаяниң ейтқан қайси сөзлири Паулни ойландуруп қойғанлиғи мүмкин?

¹¹ Паул Италиягә сәпәргә чиқишини күтүватқанда, Йәшая пәйғәмбәрниң Йәһва Худаға қарши чиққучиларға бәргән агаһландуруши тоғрилиқ ойлиған болуши мүмкин. У мундақ язған: «Пиланиңларни түзивериңлар, у бекарға кетиду; Мәслиһәтиңларни қиливериңлар, уму ақмайду; Сәвәви — Иммануел!» (Йәшая 8:10). Әлчи Паул Худа униңға ярдәм  беридиғанлиғини билгән вә бу униң алдидики синақларға қәтъий бәрдашлиқ бериш ирадисини чоқум күчәйткән.

12. Юлиюс Паулға қандақ муамилә қилған вә нәтиҗидә Паул немини көрүп йәткән болуши мүмкин?

¹² Милади 58-жили Паул Италиягә сәпәр қилишни башлиған. У мәһбус сүпитидә, Рим қошуниниң Юлиюс исимлиқ йүзбешиниң қол астида болған. Шу күндин башлап Паулниң һаяти Юлиюсниң қолида болған. У Паулға қандақ муамилә қилған? Әтиси улар биринчи деңиз портиға келип тохтиғанда, Юлиюс «Паулға меһрибанларчә қарап, достлириниң униңға ғәмхорлуқ көрситиши үчүн, уларниң йениға беришни рухсәт қилди». Кейинәрәк Юлиюс Паулниң һаятини сақлап қалған еди. Қандақ қилип? Әскәрләр кемидики һәммә мәһбусларни өлтүрүветәйли дегәндә, Юлиюс уларни қутулдурувалған. Немә үчүн? У: «Паулни қутқузушни халап, уларни ойлиғинидин қайтурди». Бәлким Паул Йәһваниң мошу меһрибан йүзбешини ишлитип, өзини қоғдап қалғанлиғини көрүп йәткән (Әлч. 27:1—3, 42—44).

13. Йәһва һоқуқдарларни қандақ ишлитиши мүмкин?

¹³ Биз қандақ ярдәмгә еришимиз? Йәһваниң Униң ирадисигә мас кәлгәндә, У муқәддәс роһи арқилиқ һоқуқдар кишиләргә тәсир қилиду. Улар Худаниң хаһиши бойичә иш қилиду. Сулайман падиша мундақ язған: «Падишаниң жүриги кәби сулар еқинидәк Йәһва Худаниң қолида. У уни халиған тәрәпләргә әвәтишкә қабилдур» (Пәнд н. 21:1). Бу һекмәтлик сөз немини билдүриду? Адәмләр ериқ суйини уларниң планиға мас келидиған йөнилишкә башлаш үчүн өстәңләрни колалайду. Шуниңға охшаш, Йәһва Өз роһини ишлитип һоқуқдарларниң ой-пикирлирини Униң ирадисигә мас йөнилишкә буралайду. Шундақ вәзийәткә дуч кәлгәндә, һоқуқдарларниң қәлбидә Худа хәлқи үчүн пайдилиқ қарар чиқириш истиги пәйда болиду (Әзра 7:21, 25, 26ни селиштуруң).

14. Әлчиләр 12:5-айәткә асасланғанда, ким үчүн дуа қилалаймиз?

¹⁴ Биз немә қилалаймиз? «Падишалар вә барлиқ мәртивилик әмәлдарлар» һаятимизға вә вәз хизмитимизгә тәсир қилидиған қарарларни чиқарғанда, улар үчүн дуа қилалаймиз (Тим. 1-х. 2:1, 2; Нәһ. 1:11). Биринчи әсирдики мәсиһийләргә охшаш, бизму түрмигә қамалған қериндашлар үчүн җан-дилимиз билән Худаға дуа қилимиз (Әлчиләр 12:5ни оқуң; Ибр. 13:3). Шундақла йәнә түрмидә олтарған қериндашлиримиз үстидин назарәт қилғанлар үчүнму дуа қилалаймиз. Йүзбеши Юлиюсқа охшаш һоқуқдарларниң көңлиму түрмидә олтарған етиқатдашлиримизға «меһрибанларчә»  муамилә қилишқа майил болуши үчүн, Йәһвадин дуада уларниң ой-пикирлиригә тәсир қилишни соралаймиз (Әлч. 27:3).

15, 16. Йәһва Аристархус билән Луқа арқилиқ Паулға қандақ ярдәм бәргән?

¹⁵ Биз қандақ ярдәмгә еришимиз? Әлчи Паул Рим сәпири үстидә Йәһва Худа униңға ярдәм бериш үчүн пат-пат етиқатдашларни қолланған. Бирнәччә мисалларни көрүп чиқайли.

¹⁶ Паулниң икки садиқ достлири Аристархус билән Луқа, униң билән биргә Римға беришни қарар қилған b. Һәтта уларға Әйса өзи уларниң Римғичә аман-есән йетип беришини вәдә қилмиған болсиму, улар бу хәтәрлик сәпәрдә Паул билән биллә болушни халиған. Уларниң һаяти аман қалидиғанлиғини пәқәт сәпәр давамида билгән. Шуңа Қәйсәриядә Аристархус билән Луқа кемигә олтарғанда, Паул бу икки җасарәтлик етиқатдишиниң қилған ярдими үчүн миннәтдарлиғини билдүрүп, Йәһваға улар һәққидә сәмимий дуа қилған болуши мүмкин (Әлч. 27:1, 2, 20—25).

17. Йәһва етиқатдашлар арқилиқ Паулға қандақ ярдәм бәргән?

¹⁷ Мошу сәпәр җәриянида Паулниң етиқатдашлири униңға бирнәччә қетим ярдәм бәргән. Мәсилән, кемә Сидон шәһиридики портқа келип тохтиғанда, Юлиюс Паулға «достлириниң униңға ғәмхорлуқ көрситиши үчүн, уларниң йениға беришни рухсәт қилди». Кейинәрәк Паул икки һәмраси билән Путеол шәһиридә етиқатдашларни тапқан вә қериндашлар уларни йәттә күн шу йәрдә туруп қелишқа тәклип қилған. Етиқатдашлар Паул вә икки һәмрасини меһман қилип, уларниң еһтияҗлирини қанаәтләндүргән. Паул болса, бу қериндашларға илһамландуридиған сөзләрни ейтип бәргәндә, улар шат-хорамлиққа чөмгән (Әлчиләр 15:2, 3ни селиштуруң). Шу илһам беридиған зиярәттин кейин, Паул вә икки һәмраси сәпирини давамлаштурған (Әлч. 27:3; 28:13, 14).

18. Паулни Худаға шүкүр ейтишқа вә ғәйрәтлик болушқа немә дәвәт қилған?

 ¹⁸ Римға кетип барғанда, Паул үч жил бурун Римдики җамаәткә язған хети һәққидә ойлиған болуши мүмкин: «Нәччә жил бойи силәргә келишни интайин халиған едим» (Рим. 15:23). Амма у Римға мәһбус сүпитидә келишини хиялиға кәлтүрәлмигән еди. Паул Римдики қериндашлириниң уни қарши елиш үчүн йолда күтүп турғанлиғини көрүп, қанчилик илһам алғанлиғини тәсәввур қилип көрүңа! «Уларни көрүп Паул Худаға шүкүр ейтти һәм илһамланди» (Әлч. 28:15). Уларниң шу йәрдә болғанлиғи үчүн Паулниң Худаға шүкүр ейтқиниға диққәт ағдуруң. Немә үчүн? Чүнки у Йәһва Худа етиқатдашлири арқилиқ униңға йәнә ярдәм бәргәнлигини көргән.

19. Петрусниң 1-хети 4:10-айитидә йезилғандәк, Йәһва муһтаҗларға биз арқилиқ қандақ ярдәм берәләйду?

¹⁹ Биз немә қилалаймиз? Сиз җамаитиңиздә тәбиий апәт түпәйли қийинчилиқларни тартиватқан, ағриватқан яки башқа қийин әһвалиға дуч келиватқан қериндашларни биләмсиз? Йә болмиса, улар йеқинлиридин айрилип қалғанду. Әгәр биз бирсиниң ярдәмгә муһтаҗ екәнлигини билсәк, Йәһва Худадин униңға бир яхши сөзни ейтишқа яки ишни қилишқа ярдәм сорисақ болиду. Гәп-сөзлиримиз вә иш-һәрикәтлиримиз қериндашлиримиз дәл муһтаҗ вақитта уларға илһам-мәдәт бериши мүмкин (Петрусниң 1-хети 4:10ни оқуң) c. Биз ярдәм бәргән қериндашлар Йәһваниң: «Сени һәргиз қалдурмаймән һәм сени һечқачан ташлимаймән» дегән вәдисигә қайтидин толуқ ишәнч бағлалайду. Бу вәдә сизни бәкму хошал қилиду шундақ әмәсму!

20. Немә үчүн «Йәһва — мениң Ярдәмчимдур» дәп ишәшлик ейталаймиз?

²⁰ Паул вә униң һәмралириға охшаш, биз һаят сәпиримиздә, еғир күнләрни баштин өткүзимиз. Шуниң билән бир вақитта, Йәһва биз билән болғачқа, биз җасарәтлик болалайдиғанлиғимизни билимиз. Әйса вә пәриштиләр арқилиқ Худа бизгә ярдәм бериду. Шуниңдәк йәнә Униң ирадисигә мас болса, Йәһва һоқуқдарлар арқилиқ бизгә ярдәм берәләйду. Нурғунлиримиз Йәһва Худа муқәддәс роһ арқилиқ хизмәтчилириниң жүригигә тәсир қилип, улар башқа хизмәтчилиригә ярдәм бәргәнлигини өз көзүмиз билән көрдуқ. Шуңа Паулға охшаш бизму: «Йәһва — мениң Ярдәмчимдур, қорқмаймән. Адәм балиси маңа немә қилалисун?»— дәп ишәшлик ейталаймиз (Ибр. 13:6).