1. Матфей 7:13, 14-лӧ болзо, бис кандый јолло барып јадыс?

БИС ончобыс јӱрӱмниҥ јолыла барып јадыс. Бу јол Кудайдыҥ Каандыгы башкаратан јаҥы телекейге апарып јат. Бу јолло бис кажы ла кӱн барып јадыс. Је Иисустыҥ айтканыла бу јол чичке, оныла барарга кӱч. (Матфей 7:13, 14 кычырыгар.) Бу јолдоҥ толо кеминде эмезистеҥ улам, тӱрген чыга берердеҥ айабазыс (Гал. 6:1).

2. Бу јӧрмӧлдӧ бис нени шӱӱжерис? (« Јобош болзоос, солынарга јеҥил болор» деген рамканы кӧрӱгер.)

² Јӱрӱмниҥ чичке јолында артарга, биске бойыстыҥ санаабысты, кӧрӱмисти ле кылык-јаҥысты солыырга белен болор керек. Апостол Павел Коринфтеги христиандарга: «Толо кемине једигер» — деп айткан (2 Кор. 13:11). Бу сӧстӧр биске де келижип јат. Бу јӧрмӧлдӧ, биске солынарга Агару Бичик ле кӧгӱзи тереҥ најылар канайып болужып турганы шӱӱжилер. Анайда ок Иегованыҥ организациязыныҥ башкартуларыла јӱрерге, кезикте кӱч болуп турганы кӧрӱлер. Је бис јобош болзоос, солынарга јеҥил болор ло оноҥ ло ары Кудайга иштеерге сӱӱнчисти јылыйтпазыс.

3. Кудайдыҥ Сӧзи биске канайып болужат?

³ Бис кезикте бойыстыҥ санааларысты, сезимдеристи јетире оҥдобой јадыс. Нениҥ учун дезе јӱрек тӧгӱнчи, кезикте ол јастыра неме айдып берет (Иер. 17:9). Оноҥ улам бис бойысты «мекелеп» саладыс (Иак. 1:22). Оныҥ учун јӱрегиске тӧгӱндетпеске, Кудайдыҥ Сӧзин  кычырар керек. Ол јӱрегистеги тереҥ сезимдеристи, санааларысты ӱзе ачып берер аргалу (Евр. 4:12, 13). Оны рентген эдип турган аппаратка тӱҥдештирерге јараар. Бу аппарат кӧскӧ кӧрӱнбей турганын кӧргӱзип јат. Је Кудайдыҥ Сӧзиндеги јӧптӧрди ле организацияныҥ айтканын тузаланарга, јобош болор керек.

4. Саулдыҥ бийиркек болуп калганы недеҥ кӧрӱнет?

⁴ Јобош болбозоос бисле не болуп каларын Саул каанныҥ теми кӧргӱзет. Ол бойыныҥ јастыразын алынарга кӱӱнзебеген (Сар. 36:1, 2; Авв. 2:4). Саулдыҥ андый кылыгы Кудайдыҥ айтканын бӱдӱрбегенинеҥ кӧрӱнет. Ого амаликитяндарла јуулашкан кийнинеҥ нени эдетенин Иегова јап-јарт айдып берген. А Саул дезе оны укпай, бойыныҥ санаазыла эткен. Оноҥ судурчы Самуил да ого јастыразын айдып берерде, Саул бурузын алынбай, бойын актанып, ӧскӧ улусты бурулап јат (1 Сам. 15:13—24). Саулдыҥ мындый кылыгы мынаҥ да озо кӧрӱнип туратан (1 Сам. 13:10—14). Ол бойыныҥ јӱрегин солыбаганынаҥ улам мындый јастыралар эткен. Оныҥ да учун Иегова Саулды алкабай барган.

5. Бис Саулдыҥ теминеҥ неге ӱренедис?

⁵ Бис Саулга тӱҥей болорго кӱӱнзебей јадыс. Оныҥ учун Агару Бичикти кычырып јатсагар, бойыгарга мындый сурактар беригер: «Агару Бичикти кычырып јадала, бойыма солынатан јӧп кӧрӱп ийзем, капшай ла актанып јадым ба? Мен Агару Бичиктиҥ айтканыла этпезем јаман ла неме болбос деп сананадым ба? Бойымныҥ јастырамда капшай ла ӧскӧ улусты бурулайдым ба?» Бу сурактардыҥ бирӱзине ле «эйе» деп каруу берген болзоор, слерге санаагарды солыыр керек. Оноҥ башка, јӱрегис бийиркенип калза, Иегова биске најы болбос (Иак. 4:6).

6. Давид Саулга кӧрӧ кандый кижи болгон?

⁶ Саулга кӧрӧ Давид чек башка кижи болгон. Ол «Иегованыҥ јасагын» сӱӱген (Сар. 1:1—3). Давид Иегованы «јобош улуска болужып турган, је бийиркек улуска удурлажып турган» деп билер болгон (2 Сам. 22:28). Оныҥ учун бойыныҥ јастыразын кӧрӱп ле ийзе, капшай ла солынарга албаданып туратан. Керек дезе ол мындый сӧстӧр айткан: «Меге јӧп берип турган Иегова Кудайга алкыш-быйаным јетсин. Оныҥ јӧптӧри тӱн аразында да јажытту сезимдеримди тӱзедип јат» (Сар. 16:7).

7. Јобош болгоныстаҥ кандый туза бар?

⁷ Бис јобош болзоос, санаабысты јастыра керектер эткелегистеҥ озо солыырыс. Кудайдыҥ Сӧзин кычырып турзаас, ол биске кийнистеҥ мынайып айдып тургандый билдирер: «Бу јол, бу јолло барыгар» (Иса. 30:21). А бу дезе, јастыра керектер этпеске болужар. Иегованыҥ сӧзин угуп јӱрери сӱреен тузалу (Иса. 48:17). Темдектезе, бис бойысты ла уйатка тӱжӱретен керектер этпей јадыс. Анайда ок Иегова бисти бойыныҥ балазын чылап сӱӱп турган деп кӧрӱп турзаас, ого јууктап каладыс (Евр. 12:7).

8. Иаков 1:22—25-ле болзо, Агару Бичикти нениҥ учун кӱскӱге тӱҥейлеерге јараар?

⁸ Кудайдыҥ Сӧзи кӱскӱге тӱҥей. (Иаков 1:22—25 кычырыгар.) Кӧп саба улус эртен тура айылдаҥ чыгардаҥ озо кӱскӱленип јат. Анайып олор кайда-нени тӱзедетенин, улус кӧргӧлӧктӧҥ озо, тӱзедип алат. А Кудайдыҥ Сӧзин кычырып турзаас, кажы јанынаҥ тӱзединетенин база кӧрӱп ийедис. Кӧп ака-эјелерге  кӱнниҥ ӱлгерин эртен тура кычырарга јарап јат. Анайып олор кычырганын кӱн туркунына шӱӱп сананып, тузаланып јат. Анайда ок Агару Бичикти кажы ла кӱн кычырып, шӱӱп сананып турар керек. Айдарга јеҥил ошкош, је бу јогынаҥ јӱрӱмге апарып јаткан чичке јолдо артып болбозыс.

9. Најыбыс бисти нениҥ учун тӱзедип јат?

⁹ Слер качан бирде јастырып, кӧгӱс јанынаҥ уйадаганаар ба? (Сар. 73:2, 3). Ол ӧйдӧ најыгар слерге јӧп берерде, оныҥ сӧзин укканаар ба? Эйе болзо, најыгар слерди тӱзеткени учун ого быйанду болбойыгар? Нениҥ учун дезе ол слерди ӧйинде тӱзетпеген болзо, Иеговала колбулараар чек ӱрелип калар эди (Укаа 1:5).

10. Најыбыс бисти тӱзедип турза, нениҥ учун ачынбас керек?

¹⁰ Кудайдыҥ Сӧзинде: «Сӱӱген најы јастырабысты айдып берет» — деп айдылат (Укаа 27:6). Бу сӧстӧрди оҥдоорго, мындый тем кӧрӱп ийектер. Темдектезе, слер јаан јол кечерге јадаар. Кечерге ле јадараарда, најыгар слерди колоордоҥ тудуп, кайра тартып јат. Нениҥ учун дезе слер јолды телефондӧӧн кӧрӧлӧ кечерге јаткан болгоноор. Мынаҥ улам колыгар кӧгӧрӧлӧ, ооруп турган болзын. Је слер најыгарга ачынараар ба? Јок эмей. Нениҥ учун дезе најыгар эмес болзо, слер машинаныҥ алдына кирер эдеер. Анайып ла најыс бисти кӧгӱс јанынаҥ тӱзедип турза, биске озо баштап оору, ол эмезе ачу болордоҥ айабас. Је мында бир де ачынар неме јок (Эккл. 7:9). Карын оныҥ слерди ӧйинде тӱзеткенине быйанду болугар.

11. Најыбыстыҥ јӧбин бис недеҥ улам укпастаҥ айабазыс?

¹¹ Бис бийиркек болзоос, најыбыстыҥ јӧбин алынбастаҥ айабазыс. Бийиркек кижи јӱк бойына јарап турган немени угат (2 Тим. 4:3, 4). Андый кижи бойыныҥ санаазында тыҥ кижи болуп јат. Је апостол Павелдиҥ айтканыла болзо, бойын тыҥ деп бодогон кижи бойы ла бойын тӧгӱндеп јат (Гал. 6:3). А Соломон каан дезе мындый сӧстӧр айткан: «Јажы јаан да болзо, је тӱзедӱни алынбас тенек каан болгончо, јокту-јойу, је ойгор уул болзо торт» (Эккл. 4:13).

12. Галаттарга 2:11—14-тӧ бичилген Петрдыҥ теминеҥ бис неге ӱренедис?

¹² Эмди Павелдиҥ Петрды тӱзеткенин эске алынып ийектер. Павел Петрды канча улус кӧзинче кату сӧстӧр айдып тӱзеткен. (Галаттарга 2:11—14 кычырыгар.) Је Петр ого бир де ачынбаган, нениҥ учун дезе ол ойгор кижи болгон. Петрдыҥ ачынбаганын оныҥ самаразынаҥ кӧрӧдис. Анда «сӱӱген Павел карындажыс» деген сӧстӧр бар (2 Петр 3:15).

13. Најыгардыҥ јастыразын айдып берерге турган болзогор, слерге нени ундыбас керек?

¹³ Најыгардыҥ јастыразын айдып берерге турган болзогор, слерге нени ундыбас керек? Бойыгардаҥ сурагар: «Мен ӧткӱре билееркебей турум ба?» (Эккл. 7:16). «Ӧйинеҥ ӧткӱре билееркек» кижи улусты килебей јат. Ол улусты Кудайдыҥ нормаларыла эмес, је бойыныҥ нормаларыла тӱзедип јат. Је слер најыгарга јастыразын тӱҥей ле айдарга турган болзогор, берген јӧбигер Агару Бичикке тӧзӧлӧнзин. Најыгар неде јастырып турганын айдып беригер. Оныҥ кийнинде, ого бойыныҥ јастыразын оҥдоп аларга болужатан сурактар  беригер. Ол бойыныҥ јастыралары учун слердиҥ алдыгарда эмес, је Иегованыҥ алдына бурулу деп ундыбагар (Рим. 14:10, ЈК 2003). Бойыгардыҥ оҥдомолоорго эмес, је Кудайдыҥ Сӧзине иженигер. Бого ло коштой, Иисус чылап улуска јалакай баштанар керек деп ундыбагар (Укаа 3:5; Матф. 12:20). Нениҥ учун дезе слер улуска канайып баштанараар, Кудай слерге анайып ла баштанар (Иак. 2:13).

14. Кудайдыҥ организациязы бисти канайып башкарат?

¹⁴ Иегова бисти јӱрӱмниҥ јолыла апарарга, јердеги организациязын тузаланып јат. Ол биске башкартуларды бичиктер, видеолор ло јуунныҥ туштажулары ажыра берет. Бу ончо немелер биске библиялык принциптерди тузаланарга болужат. Бу материалдарга бир де алаҥзыбай бӱдерге јараар. Нениҥ учун дезе олор ӱзе Кудайдыҥ Сӧзине тӧзӧлӧнӧт. Анайда ок Башкару јӧпкӧ јарлаар ишке башкартулар белетеерге, Кудайдыҥ агару тыны болужып јат. Андый да болзо, олор бу башкартуларды бир эмеш ӧйдӧҥ солып јат. Нениҥ учун дезе Агару Бичикте айдылганыла, бу телекей капшай солынып турган. А башкартулар дезе, солынган айалгаларга келижип турар учурлу (1 Кор. 7:31).

15. Кезик јуундарда кандый солынталар болгон?

¹⁵ Бистиҥ организация кандый бир ӱредӱлерди јаҥыдаҥ јартаза эмезе нравственный сурактарда солынталар этсе, бис оны алынып јадыс. Је кезик солынталардаҥ улам бистиҥ айалгабыс солынып јатса, оны алынып турганыс па? Темдектезе, калганчы јылдарда Каандыктыҥ Тураларын тударга ла олорды обслуживать эдерге коркышту баалу боло берген. Оныҥ учун Башкару јӧп кезик јуундарды бириктирип ийеле, Каандыктыҥ Тураларыныҥ кезигин садып ийген. А ол акча Каандыктыҥ Туралары јетпей турган јерлерде тузаланылган. Мындый солынталардаҥ улам, кезик ака-эјелерге јуунныҥ туштажуларына барарга ыраак болуп калган. А Каандыктыҥ Туразын тударында турушкан ака-эјелер: «Тегин јерге канча кире ӧйисти ле ийде-кӱчисти бердис» —  деп сананган болор. Је андый да болзо, ӱзе јуундар андый солынталарды алынып турган. Бис олорды мактап јадыс.

16. Колоссыдагыларга 3:23, 24 биске сӱӱнчини јылыйтпаска канайып болужат?

¹⁶ Бис ӱзе ле немени Иеговага эдип турганыс деп ундыбай турзаас, сӱӱнчисти јылыйтпазыс. Организациядагы солынталарды Иегова эдип турган эмей. (Колоссыдагыларга 3:23, 24 кычырыгар.) Алдында ӧйлӧрдӧ, ӧргӧӧни тударга јаан берӱлер эткен Давид каан мынайып айткан: «Мен кем андый, мениҥ албатым кем — бисте мынайып бойыстыҥ кӱӱнистеҥ болуш јетирер кӱчис бар беди? Бар немени Сен бергеҥ, колыҥнаҥ алганысты Сеге кайра бередис» (1 Лет. 29:14). Оныҥ учун бис те Иегованаҥ ла алган немени ого кайра берип турган эмейис. Је Иегова бистиҥ акту кӱӱнистеҥ берген ӧйисти, ийде-кӱчисти, ӧскӧ дӧ немелеристи сӱреен баалап јат (2 Кор. 9:7).

17. Слерге тӱзедилер керек деп кӧрӱп турзагар, нениҥ учун ӧйинеҥ ӧткӱре санааркабас керек?

¹⁷ Јӱрӱмге апарып јаткан јолло барарга, Иисустыҥ изиле чике барар керек (1 Петр 2:21). Је слер оныҥ изиле чике јӱрӱп болбой турган болзогор, тыҥ санааркабагар. Јастырагарды кӧрӱп турганаар, карын Иеговага сӧсуккур болорго турганаарды кӧргӱзип јат. Иегова бисти толо кеминде эмес деп оҥдоп јат. Бис чек ле Иисус чылап бир де јастырбай јӱрерис деп, ол сакыбай јат.

18. Ӱргӱлји јӱрӱмге једерге нени эдер керек?

¹⁸ Айдарда, јӱрӱмге апарып јаткан јолдоҥ качан да бурыбагар. Ичкери кӧрӱгер! Бойыгардыҥ санаагарды, кӧрӱмигерди, кылык-јаҥыгарды оноҥ ло ары солыырга белен болугар (Укаа 4:25; Лука 9:62). Анайда ок солынарга јобош болугар. Јаантайын сӱӱнип јӱригер! Ол тушта «сӱӱштиҥ ле амырдыҥ Кудайы слерле кожо болор» (2 Кор. 13:11). Анайып слер јӱк ле амадугарга јединип алараар эмес, је ӱргӱлји јӱрӱмге апарып јаткан чичке јолдо сӱӱнчилӱ јӱререер.