1. Nimakere ku Matayo 7:13, 14, wan ceke wan’i woth i ayi ma kani?

WAN ceke wan’i woth. Kaka ma wabecidho i ie utie ng’om ma nyen ma wabikwo i ie i the bimobim mi mer pa Yehova. Ku bang’ ceng’ wabeii niwotho i yo m’ubeterowa i kwone. Ento calu ma Yesu wacu, yone likili man saa moko wotho i ie bedo tek. (Som Matayo 7:13, 14.) Bende, watie dhanu ma waleng’ ungo, uketho saa moko tiendwa kier kud i yoje.​—Gal. 6:1.

2. Wabiweco iwi lembang’o i thiwiwec maeni? (Nen bende sanduku “ Jwigiri konyowa nitimo alokaloka.”)

² Ka wamito wamedara niwotho i yo ma likili ma terojo i kwo, ukwayu wabed ayika nitimo alokaloka i paru, i pidoic man i timo mwa. Jakwenda Paulo uketho cwiny Jukristu mi Korinto nia gimediri “nitimo alokaloka.” (2 Kor. 13:11) Juk maeno pire tie tek iwa bende. I thiwiwec maeni, wabineno kite ma Biblia copo konyo kowa nitimo alokaloka, man kite ma Jukristu ma giteng’ini i tipo gicopo konyo kowa niwotho i yo ma terojo i kwo. Wabiweco bende iwi gin ma copo ketho woro telowic ma dilo pa Yehova ubemio copo bedo tek iwa. Wabineno kite ma jwigiri copo konyo kowa nitimo alokaloka i kwo mwa, m’umbe nibayu anyong’a mwa ma watimo ko ni Yehova.

3. Lembe pa Mungu copo konyowa nenedi?

³ Etie yot ungo ning’io i paru mwa man kite ma wawinjara ko. Kum adunde en e jabombi, man wacopo ng’eyo ngo nia ebetelo wiwa nitimo lembe ma ber kunoke ma rac. (Yer. 17:9) Etie yot “niwondara giwa.” (Yak. 1:22) Pieno, ukwayu watii ku Lembe pa Mungu pi ning’iyara giwa. Lembe pa Mungu ketho wang’eyo gin m’upondo i iwa, niwacu “pidoic ku lembapora mir  adunde” mwa. (Ebr. 4:12, 13) Lembe pa Mungu ubedo ve masini mi odiyath (X-ray), ma konyo nineno gin m’upondo i jaratwoyo. Re umito wabed ku jwigiri pi nitio ku juk ma wanwang’u i Biblia kunoke ma wabenwang’u i bang’ dhanu ma Mungu uketho utel wiwa.

4. Ang’o m’unyutho nia ubimo Saul udoko jakuhaya?

⁴ Lapor p’ubimo Saul ubenyutho iwa lembe ma copo wok ka wambe ku jwigiri. Kuhaya pa Saul uketho eyio ngo nia etie ku yeny mi timo alokaloka. (Zab. 36:1, 2; Hab. 2:4) Lembuno unen kamaleng’ kinde m’ecidh enyotho Juamaleki. Yehova ular umio ire telowic pi gin m’ukwayu etim, ento eworo ngo dwand Yehova. Bende, kinde ma jabila Samuel upenje iwi lembe m’etimo, eyio ngo racu pare, ento ecero bang’e, man ecaku loko kosane iwi jumange. (1 Sam. 15:13-24) I wang’e de elar etimo lembe ma rom. (1 Sam. 13:10-14) Lembe ma rac utie nia, eweko kuhaya umondo i adundene. Ewilo ngo paru pare, uketho Yehova umio ire matira man emaye cen ku ker.

5. Lapor pa Saul ubemio iwa ponji ma kani?

⁵ Lapor pa Saul copo ketho wapenjara kumae: ‘Kan abesomo juk moko i Lembe pa Mungu, nyo abed asayu yo mi cero bang’a? Nyo abed aparu nia lembene rac ungo akeca? Kunoke nyo abed aloko racu mi lembe m’atimo iwi jumange?’ Ka wadwoko wang’ penji m’eno nia eyo, mito wanen nia watimo alokaloka i paru mwa. Kan ungo, wabidoko jukuhaya man wabinyotho winjiri mwa ku Yehova.​—Yak. 4:6.

6. Kenyuth tung’ tung’ m’utie i kind ubimo Saul kud ubimo Daudi.

⁶ Kenen tung’ tung’ m’utie i kind ubimo Saul kud ubimo Daudi m’udok ucamu ker kakare. Daudi umaru “cik pa Yehova”. (Zab. 1:1-3) Eng’eyo nia Yehova bodho ju ma jwigiri man egut ni jukuhaya. (2 Sam. 22:28) Eno uketho Daudi uweko cik pa Mungu uwil paru pare. Ekiewo kumae: “Abimio mugisa ni Yehova m’umio ira lembapora; eyo adundena ponja i nindo mi diewor.”​—Zab. 16:7.

7. Wabitim’ang’o tek wa tie dhanu ma wajwigara?

⁷ Tek watie dhanu ma wajwigara, wabiweko Lembe pa Mungu utwiny paru mwa ma fodi wamondo ngo i timo ma rac. Lembe pa Mungu bibedo ve dwal m’uwacu iwa kumae: “[Yo ni e], wuwoth i ie.” Ebipoyowa tek tiendwa ubekier yor acam kunoke yor acwic. (Isa. 30:21) Ka wawinjo dwand Yehova, wabinwang’u bero i yo ma tung’ tung’ dupa. (Isa. 48:17) Ku lapor, lewic bimakuwa ngo tek ng’atu moko ubetwinyowa. Kindwa bidoko ceng’ini ku Yehova pilembe wang’eyo nia ebedieng’ piwa calu wego dieng’ pi nyathin pare m’emaru.​—Ebr. 12:7.

8. Calu m’ugorere i Yakobo 1:22-25, Lembe pa Mungu utie iwa ve kieu nenedi?

⁸ Lembe pa Mungu tie iwa ve kieu. (Som Yakobo 1:22-25.) Ju mapol m’i kindwa i wang’ niwok kud i pacu migi, gilar gineno wang’gi i kieu kunoke maraya. Eno ketho waneno ka nyo gin moko nuti m’ukwayu wayik i kumwa ma fodi jumange unenowa ngo. Kumeno bende, ka wabesomo Biblia ku bang’ ceng’, wabineno alokaloka ma waromo timo i paru man i pidoic mwa. Dhanu dupa ginwang’u nia etie ber nisomo giragora ma ku bang’ ceng’ nja kugweno i wang’ niweko pacu migi. Giweko lembe ma gisomone utel wi paru migi. Man cing’ nica duu, gineno ayi ma gicopo tio ko ku juk mi Lembe pa Mungu ma gisomo i kwo migi. M’umedo maeno, mito wabed ku ng’iyo mi somo man mi nyamu i Lembe pa Mungu ku bang’ ceng’. Eno copo nen iwa ni gin ma yot, re etie acel m’i kind lembe ma pigi tek ma wacopo timo kara wawoth i yo ma likili ma terojo i kwo.

9. Jarimbi copo mio iri juk i saa ma kani?

⁹ Nyo saa moko idaru wotho i yo m’ugam ucweli nicaku coro bor ku Yehova? (Zab. 73:2, 3) Ka jarimbi moko m’uteng’ini i tipo umio iri juk pi lembene, nyo itio ku jukne? Ka eyo, ng’ei nia itimo lembe ma ber, man m’umbe jiji, itie ku foyofoc pi juk m’emio iri.​—Rie. 1:5.

10. Icopo tim’ang’o ka jarimbi moko umio iri juk?

¹⁰ Lembe pa Mungu uwacu kumae: “Lero pa jarimo en e mandha; ento cwiolimb pa jadegi e dupa m’usagu.” (Rie. 27:6) Thelembe mi wec maeni tie ang’o? Wakemak lapor moko: Kepar nia icungo imito ikadh ndaki moko ma mutukari uberingo lee i ie, re iketho wii zoo i kum dio telefon peri, icaku bedagu tiendi man ibemondo i ndaki m’umbe ting’o wii malu. E ipoi ma jarimbi moko umaku boti, eteli man evudhi idok ku ng’ei i dhu ndaki. Eteli ma tek uketho boti wil, re lembe m’etimo pio pio ubodhi uketho mutukari ugudi ngo. Kadok boti m’uwil biremi pi nindo m’ulwar de, nyo ibikece nia etimi raci? Ungo! Ento ibifoye pi kony m’ekonyi ko. Kumeno bende, ka jarimbi moko ujuki nia wec kunoke timo peri moko urombo ngo ku cik mir ukungu mi Biblia, ku kwong’a lembene copo timi rac. Ento kud ikece pi lembene. Kum kan ikece, ebibedo iri ni lemkasegu. (Ekl. 7:9) Tung’ ku maeno, foye pi tegocwiny pare m’enyutho ko iri lembene.

11. Ang’o ma copo ketho ng’atini kwero juk ma jarimbe ubemio ire?

¹¹ Ang’o ma copo ketho ng’atini kwero juk ma jarimbe ubemio ire ? Kuhaya. Jukuhaya gimaru giwinj lembe ma wok mit i ithgi. ‘Gibayu ithgi woko kum lemandha.’ (2 Tim. 4:3, 4) Giparu nia gimbe ku yeny mi kony, pilembe giwacu ya giriek kunoke pigi tek nisagu jumange. Jakwenda Paulo ukiewo kumae: “Tek ng’atu moko ie wacu ya en e m’e en, ma en ke . . . e gin moko ngo, meca ewondre gire.” (Gal. 6:3) Ubimo Suleman ukoro lembuno ma ber. Ekiewo kumae: “Jalawobi ma jacan ma riek de e ber ma sagu ubimo m’uti ma jakasegu, m’ung’eyo ngo maram ejol ko juk kendo.”​—Ekl. 4:13.

12. Lapor pa jakwenda Petro ma jukiewo pire i Jugalatia 2:11-14 ubemio iwa ponji ma kani?

¹² Kenen lapor ma ber ma jakwenda Petro uweko iwa kinde ma Paulo ujuke ngbeng’ i wang’ dhanu. (Som Jugalatia 2:11-14.) Nwang’u Petro copo keco Paulo pir ayi m’emio ko ire juk man pi kaka m’ejuke i ie i vut dhanu. Ento Petro ubino ng’atu ma riek. Ejolo jukne man ekeco ngo Paulo. I ng’eye, edok elwong’o Paulo nia “umegwa ma jamer.”​—2 Pet. 3:15.

13. Ukwayu walar wang’ei lembang’o ka wabecimio juk ni ng’atu moko?

¹³ Kan inwang’u nia ukwayu imii juk ni jarimbi moko, lembang’o m’ukwayu ilar ing’ei? I wang’ niweco kude, kelar ipenjiri kumae: ‘Eni acibedo ngo ‘pwe nisagu’ mukero?’ (Ekl. 7:16) Dhanu ma gitie pwe nikadhu mukero, gipoko lembe iwi juwagi ku paru migi gigi, ento ungo ku cik mir ukungu pa Yehova, man wang’ mapol kisa bedo mbe i igi. Kan ipenjiri ku kit penji maeno, man inwang’u nia ukwayu asu iwec kude kokoro, nyuth ire peko pare terere, man tii ku penji ma copo ketho epoi i kum racu m’etimo. Nen nia lembe m’ibeyero ujengere iwi giragora mi Biblia, man ng’ei bende nia in ungo re m’itie japoklembe pa jarimbi, ento poko lembe tie pa Yehova. (Rum. 14:10) Wek rieko mi Lembe pa Mungu re m’utel wii, man bed ku kisa i kum dhanu calu Yesu. (Rie. 3:5; Mat. 12:20) Pilembe Yehova bitio kudwa i kite marom ku ma wan bende watio ko ku jumange.​—Yak. 2:13.

14. Dilo pa Mungu ubeponjowa nenedi tin?

¹⁴ Yehova ubetelo wiwa wawoth i yo mi kwo nikadhu kud i thenge mi ng’om mi dilo pare, ma tin ubeponjowa nikadhu kud i video, girasoma, man coko m’ubekonyowa kara watii ku juk ma nwang’ere i Lembe pa Mungu. Ponji maeno pigi tie tek, pilembe gijengiri iwi giragora mi Biblia. Pi nimaku yub kara tic mi rweyo lembanyong’a utimere ma ber, Guriri m’utelowic bejengere iwi telowic mi tipo ma leng’. Kadok kumeno de, re asu edok eneno ka nyo mito etim alokaloka mange i yub m’elar emaku. Pirang’o? Pilembe “ayi ng’om maeni [ubelokere],” man dilo pa Mungu de ucikere nitimo alokaloka nimakere ku lembe m’ubewilere.​—1 Kor. 7:31.

15. Copo kwayere nia jurwei lembanyong’a moko ging’ii kud alokaloka ma kani?

¹⁵ Saa ma ka dilo pa Mungu bemio iwa telowic iwi lembe mi kurajo, kunoke der ma nyen iwi nyang’ mwa iwi giragora moko, wajolo lembene yot yot man watio kude. Dong’ wabitim’ang’o ka dilo pa Mungu umaku yub m’ubedo kud adwogi iwi lembe mange mi kwo mwa ke? Ku lapor, i oro m’ubed ukadhu, junwang’u nia giedo mi Udi Ker ku udi mange mi theokrasi man yiko kumgi, ucamu wend sente ma lee. Pieno, Guriri m’utelowic umaku yub nia kacopere, mito cokiri ma dupa gitii ku Ot Ker acel. Lembuno uketho judiko cokiri ma dupa ni acel, man Udi Ker moko ke julworogi alwora zoo. Sentene jugwoko pi nikonyo giedo mi Udi Ker kaka mange ma yeny utie lee i ie. Tek ibekwo i kabedo ma julworo ie udi Ker kunoke ka ma judiko ie cokiri dupa ni acel, ecopo bedo iri lembe ma yot ungo ning’iyo kud alokaloka ma nyen maeno. Eno uketho pi nicidho i coko, jurwei lembanyong’a moko giwotho pi saa m’ulwar. Jumange ma gigam gidikiri i tic ma tek mi giero udi Kerne man mi yiko kumgi, gicopo penjiri nia pirang’o julworogi. Gicopo nwang’u nia ve gibayu saa migi man kero migi mananu. Re asu giyio alokaloka ma nyen maeno, man giromo ku foyofoc.

16. Juk ma nwang’ere i Jukolosai 3:23, 24, copo konyowa nenedi nibedo asu kud anyong’a?

¹⁶ Ka wapoi nia tic ceke ma wabetimo wabetimogi ni Yehova, man nia en re m’ebetelo wi dilo pare, eno biketho wabibedo asu kud anyong’a. (Som Jukolosai 3:23, 24.) Ubimo Daudi uweko iwa lapor ma ber pi lembuno kinde  m’ebino coko dhu sente mi giero hekalu. Ewacu kumae: “An a ng’a, man dhanu para en e ang’o, ma nia wacopo thiero ku wagi berocwiny ma kumeni? Kum gin ceke ai i beng’i, man wamio iri kum gin ma peri giri.” (1 Kei. 29:14) Wan bende, kinde ma wabemio giramia ni Yehova, eca nwang’u wabemio de gin m’uai kud i bang’e gire. Re kadok kumeno de, anyong’a nege pi saa, kero, man jukupiny mwa ma watio ko pi tic pare.​—2 Kor. 9:7.

17. Pirang’o ukwayu ngo cwinyi utur nitimo alokaloka i kwo peri?

¹⁷ Pi niwotho i yo ma likili ma terojo i kwo, mito wan ceke walub lapor pa Yesu. (1 Pet. 2:21) Cwinyi kud utur, kan inwang’u nia ukwayu itim alokaloka moko i kwo peri. Eno bibedo lembe ma ber iri, pilembe eno ubenyutho nia imito ilub telowic pa Yehova. Poi nia Yehova ung’eyo nia waleng’ ungo, pieno, ecopo kwayu ngo nia walub ba tiend Yesu ma lembe moko kud ukier iwa ki, kadok nyanok de.

18. Ukwayu watim ang’o kara watund i kum lembakeca mwa?

¹⁸ Dong’ wek wan ceke waketh wiwa i kum nindo m’ubino man wabed ayika nitimo alokaloka i paru, i kura, man i timo mwa. (Rie. 4:25; Lk. 9:62) Wek wan ceke wabed mol, wamedara nibedo kud anyong’a, “nitimo alokaloka.” (2 Kor. 13:11) Tek watimo kumeno, “Mungu mi mer ku kwiocwiny de bibedo [kudwa].” Eno bikonyowa ngo kende kende niwotho woth mwa nitundo cil i ng’om ma nyen, ento bende ebikonyowa niwotho wothne kud anyong’a.