1. Pakayni Matay 7:13,14, hano romakatay kita i cecay lalan han ko sowal?

KAHACECAY tamdaw romakatay kita i cecay lalan, o kahiceraan i o mikowanan no Kawas a faelohay hekal. To romiˈamiˈad romakatay kita to sakaˈorip a lalan, malecad o sowal ni Yis, kincoay koniya lalan, pasangaray rakaten no latekay. (ˈOsien ko Matay 7:13, 14.) Samanen cowa kalefot, madoloay kita miliyas toniya lalan.—Kalatiya 6:1.

2. Oniya lalakaw wa milengo to maanan? (Nengnengen ko sapatongal lalakaw ‘ O Misapoeneray Padamaay Kitaanan a Misalof.’)

² Ano sapadotocaw kita romakat i sakaˈorip a kincoay lalan, o mamakahi kita a misalof to harateng, waywayan ato demak noniyah. Pakalalokan no tarokos ko Korintoay a Krisciyang padotoc ‘micada to pisalof.’ (2 Korinto 13:11) Oniya limoˈot matatodongay saka dademaken i tireng ita. Oniya lalakaw wa milengo sasamaan ko Fangcalay Cudad padama kitanan misalof, o matenesay a widang wa samaan padama kitaanan padotoc a romakat to sakaˈorip a lalan. Wa minengnengho kita itini masamanay pakayraan, sapidofdofaw to sakayat no likakawa cowa ko madoloay no latekay. Roma i, oniya lalakaw wa milengo o misapoeneray a capeling sasamaan padama kitaanan a mifalic, hanaca padotoc lipahak a midoko ci Yihofaan.

3. O Kimad no Kawas wa samaan padama kitaanan?

³ Saka cipinangaw kita to harateng ato nafalocoˈan no niyah cowa ko madoloay, samanen misafakofakoay ko falocoˈ ita, pasangaray mihapinang to o maanan ko misaalian no niyah,  madoloay ‘miharateng to mararaway a milipalaw to niyah.’ (Yakop 1:22; Yirimiya 17:9) Mihaenay, palinien ita ko Fangcalay Cudad a cipinang to niyah, mihapinang to ‘harateng no falocoˈ ato mihalakaan.’ (Hipray 4:12, 13) O Kimad no Kawas malecaday to X kowang, ngaˈayay padama kitaanan mihapinang to masamanay tamdaw ko niyah. Kawra, misaaliay kita to misapoeneray, ngaˈ makahi micada to pakayniyan no Kawas i Fangcalay Cudad anca minilnilan Ningra a tamdaw mihadak to limoˈot, hanaca milifok to haepoc.

4. Samaan kita mihapinag to misatakaraway ci Sawlo hani?

⁴ O tinakoan ni Sawlo mitadtaday, ano caka pisapoener ko tamdaw sasamaan ko hateloc. Misatakaraway ci Sawlo, cowa kakahi mihai to fafalicen ko harateng ato waywayan no niyah. (ˈOlic 36:1, 2; Hapakuk 2:4) Kinacecayay, ihkalan ni Yihofa pasowal ci Sawlo ano malowid ko Amalik tamdaw sasamaan ko demak, kawra cowa pidofdof cingra ci Yihofaan. Tiya toroˈen ni Samuil ko raraw ningra i, cowa pihai cingra, mikilimayho to saˈading toniyah a sowal, cowa ka samaan ko demak sanay miharateng, milolohayho to tao. (1 Samuil 15:13-24) ˈAyaw nonini iraayto ko mahaenay a waywayan ni Sawlo. (1 Samuil 13:10-14) Misatakaraway ko falocoˈ ningra, cowa kakahi misalof to harateng noniyah, telocto mirikecan ni Yihofa cingra, cowato pihayda cingranan.

5. Mikitini ci Sawloan wa mananam ita ko maanan sapasifanaˈ?

⁵ Mikitini ci Sawloan minanam, ngaˈayay kita miharateng: “Ano maˈosi ako ko limoˈot no Fangcalay Cudad i, wa mikilim to saˈading toniyah han? Miharateng kako ano caka pidofdof to limoˈot no Fangcalay Cudad cowa ka samaan han? Wa miloloh kako to tao han? Toniya pakayraan ano iraay ko pasangaray ita, wa misalof to harateng ato waywayan no niyah, ano eca i, wa misatakaraw kita malo ecato ko widang ni Yihofa kita alatek.—Yakop 4:6.

6. Ci Tafiti aci Sawlo o maanan ko kasasiromaan?

⁶ Hongti ci Tafiti cowa kalecad to Hongti ci Sawloan, sowal no Fangcalay Cudad ci Tafiti ‘maolahay to sarikec ni Yihofa.’ (ˈOlic 1:1-3) Mafanaˈay ci Tafiti milidongay ci Yihofa to misapoeneray a tamdaw, misaˈadaay to misatakaraway tamdaw. (2 Samuil 22:28) Mihaenay, makahiyay ci Tafiti mitoor to sarikec no Kawas a misalof to harateng noniyah, sanay cingra: ‘Pakahemeken ako ci Yihofa, samanen palimoˈotay Cingra takowanan. To lafii, misalofay ko falocoˈ ako takowanan.’—ˈOlic 16:7.

7. Ano misapoener kita wa samaan ko pidemak?

⁷ Ano misapoeneray kita, ˈayaw no mararaw ko demak wa mitoor to Kimad no Kawas a misalof to harateng no niyah. Ano pasiwili pasiwanan a miliyas kita, mihadakay to sarikec ko Fangcalay Cudad a pasowal: ‘O moecelay a lalan konini, romakat kamo toniya lalan o matatodongay.’ (Isaya 30:21) Midofdof kita ci Yihofaan, wa adihay ko haepoc. (Isaya 48:17) Tinakoen, ano micada kita to pisalof no tao cowato ko mamakesem ko falocoˈ. Wa pakayni tahatinako to sano Wamaay a kaolah ni Yihofa kitaanan a matongal ko piingid Cingranan.—Hipray 12:7.

8. Yakop 1:22-25 patinakoan ko Kimad no Kawas to dadingoan. Sasamaan kita misaka dademak toniya dadingoan hani?

⁸ O Kimad no Kawas malecaday o dadingoan. (ˈOsien ko Yakop 1:22-25.) Mahadak to papacem midingoayho ko tamdaw, mihaen ˈayaw no maˈaraw no tao kita i, wa mahapinang ita icowaay ko sasalofen no niyah. Malecaday, ano miasip kita to Fangcalay Cudad to romiˈamiˈad i, wa ngaˈay mahapinang to misaaliyay to sasalofen ko harateng ato waywayan hokira. ˈAlomanay tamdaw ˈayaw no masadak to papacem miasipay to pakaromiˈaday a sinael,  midotim to maasipay a sinael, hanaca misaˈicel misaka dademak to limoˈot no Kimad no Kawas. Roma i, to romiˈamiˈad wa miasip ato midotim kita to Kimad no Kawas, tengilen konini hato madoloay alatek, kawra tada kalimlaan, samanen o papadama konini kitaanan materek i sakaˈorip a kincoay a lalan.

9. Misaaliay kiso to widang hacowa a misalof kisowanan hani?

⁹ Na midemakay kiso to maanan a demakan, mangata miliyas to moecelay a lalan han? (ˈOlic 73:2, 3) Satimolo saan ko widang iso palimoˈot kisowanan i, midoedoan iso a misaka dademak han? Ano iraay i, tada ngaˈayay ko demak iso, madeng miakoˈiday kiso to sapatalipaˈelal noniya widang tisowanan.—Taneng 1:5.

10. Ano micada kiso to pisalof no widang, sasamaan ko demak hani?

¹⁰ Sowal no Fangcalay Cudad: “Ngaˈayay ko pipakasemer no widang iso to falocoˈ iso a misalof.” (Taneng 27:6) O maanan ko tatodong noniya sowal hani? Haratengen ko cecay sapatinako. Mamitaˈlif kiso to lalan, adihayay ko paliding, nanengneng sanay kiso to soci, cowa pinengneng to lalan. Tiya mamitaˈlif kiso to lalan i, micepetan no widang kiso, mitengteng kisowanan. Misaˈicelay cingra micepet, telocto maalimay ko kamay iso. Kawra mihaen cingra to demak, cowato ka songtol no paliding kiso. Soˈlin pinaay romiˈad adada a maalim ko kamay iso, madeng cowa ko mamaketer kiso tora widang. Wa miakoˈid kiso to pilidong ningra to ˈorip iso. Malecaday, ano mitoroˈ ko widang iso misafelitay ko waywayan iso to moecelay palinian no Kawas, madokaˈan nanay kiso alatek. Kawra aka maketer to widang, mihaen to demak cowa ko citanengay. (Patnakay 7:9) Samanen misatimoloay ko widang iso mitoroˈ to raraw iso o aakoˈiden iso cingra.

11. O roma tamdaw hano cowa ka kahi micada to limoˈot no widang hani?

¹¹ O roma tamdaw cowa ka kahi micada to mikitiniay i olah no widang mihadakan a limoˈot. Misamanay? Samanen misatakaraway. O misatakaraway a tamdaw maolahay ‘mitengil to ngaˈayay a sowal,’ ‘cowa ka pitengil to soˈlinay kimad.’ (2 Timoti 4:3, 4) Pakidemay ko pinengneng to harateng no niyah, anca mikikakaay ko niyah to tao saan miharateng. Kawra, sowal no tarokos ci Pawlo: “Ano caay ko tadamaanay a tamdaw, o tadamaanay kako ano saan ko cima i, o misafanaˈay cingra to tireng.” (Kalatiya 6:3) Sowal ni Solomon tada matatodongay, sowal ningra: ‘O manikaway citanengay a kapah, ikakaay to matoˈasto caay pilayap to pisalof no tao maapaay a hongti.’—Patnakay 4:13.

12. Sowal no Kalatiya 2:11-14 salofen ni Pawlo ci Pitiro i kaˈayaw no ˈalomanay tamdaw i, patirengay ci Pitiro to maanan ngaˈayay taˈarawan hani?

¹² Haratengen, tiya salofen ni Pawlo ci Pitiro i kaˈayaw no ˈalomanay tamdaw i, patirengay to maanan ngaˈayay taˈarawan ita. (ˈOsien ko Kalatiya 2:11-14.) Ci Pitiro cowa ka pakayni pakayraan ni Pawlo ato kitiraan mihadak to limoˈot a maketer ci Pawloan, tada citanengay cingra, micadaay to limoˈot, cowa kaˈinteh ko falocoˈ ci Pawloan, ikor panganganan ningra ci Pawlo to ‘kaolahan a salikaka.’—2 Pitiro 3:15.

13. Ano mamihadak to limoˈot i, haharatengen ko manan hani?

¹³ Harateng iso misaaliyay to mamihadak to sasalof i widang i, haharatengen ko maanan hani? ˈAyaw no mamihadak to limoˈot i, haratengen: ‘“Pakinaliyay ko saali” ako hokira?’ (Patnakay 7:16) Pakinaliyay ko saali a tamdaw tano niyah a palinian ko sapisawkit to tao, cowa ka tano palinian ni Yihofa, hanaca cowa ka sidaˈit ko waywayan ningra alatek. Maharek misinanot i, ano kamayan ira ko harateng iso sapihadakaw to limoˈot, ihkalen a mitoroˈ ko  pasangaray no widang, dotoc saka dademaken ko salicay mikayat cingranan, padama cingranan mihapinang icowaay ko raraw no niyah. Ora sowal iso salalangien ko Fangcalay Cudad, miharatengho awaay ko fadangalan iso misawkit to widang. Kawra ngaˈayay padamaen iso cingra mihapinang, samanay ko harateng ni Yihofa to nano demak ningra. (Loma 14:10) Ano mihadak to limoˈot i sakadademaken ko Kimad no Kawas, todongen ci Yis paihkal to siniˈadaay. (Taneng 3:5; Matay 12:20) Misamanay hani? Samanen ano samanay kita micada to tao, wa mihaen ko picada ni Yihofa kitaanan.—Yakop 2:13.

14. Pakayniyan no likakawa no Kawas i maanan a padama kitanan hani?

¹⁴ Itini saka tahadaˈoc no ˈorip a lalan, misaka dademakan ni Yihofa ko fafekangay no sera a likakawa Ningra a mikayat kitaanan. Pakayniyan no likakawa i ika, masakenaay mitepangan ato saˈopo padama kitaanan mitoor to limoˈot no Fangcalay Cudad a midemak. O minanaman ita a lalakaw mikitiniay i Fangcalay Cudad, ngaˈayay tadiˈecen. Roma i, o malohemay malitengay i congpo makalimay tano sangaˈayay a pakayraan milaheci to mitosilay a tayal. Ano mamisaˈosi cangra toniya demak i, mitadiˈecay to sadama no fangcalay saocor. Soˈlin mahaen, o malohemay malitengay i congpo marariday milomal to misaˈosiyan i salakat, mihapinang to iraay ko sasalofen hokira. Misamanay hani? Samanen ‘padotocay mafalic ko pakayraan noniya hekal,’ palecaday a misalof ko likakawan no Kawas to safaelohay a pakayraan.—1 Korinto 7:31.

15. Pakyani i roma salikaka, o maanan kafalic pasangaray misalof alatek?

¹⁵ Ano ira ko faelohay pitadtad no likakawa no Kawas to sinael, anca mihadak to sakayat padama kitanan mitoor to palinian no Kawas, madeng o mamakahi kita a micada. Kawra, o pisalof no likakawa ano mamifiyor to kaˈorip ita i, samaan ko harateng ita hani? Tinakoen, macakatay ko sapipatireng ato sapitomadaw to kasaˈopoan a payci, mansa misaˈosi ko malohemay malitengay i congpo, cecay Hongti Kitakit kasaˈopoan adihay ko kasakopang a misaka dademak. Mihaenay, pakakadepan no likakawa ko pina kasakopang, pacakayayho to pina kasaˈopoan. Mihaen, ngaˈayay saka dademaken ko payci i misaaliay a pala paitireng to kasaˈopoan. Itini kilac iso, ano papacakayen  ko kasaˈopoan, pakakadepen ko roma kasakopang, pasangaren kiso a misalof toniya kafalic alatek. O roma mitosilay tatayra i maraayay a pala mirienang to saˈopo. O roma tamdaw na mirienangay patireng ato mitomadaw to roma kasaˈopoan, cowa ka fanaˈ cangra hano pacakayen koniya kasaˈopoan anini, anca harateng nangra malakisaway ko mihadakan no niyah a toki ato ˈicel. Kawra, kamayan cangra micada toniya faelohay limasmas, tada papakahemeken cangra!

16. Midofdof to limoˈot i Kolosay 3:23, 24, samanay padama kitanan padotoc a lipahak hani?

¹⁶ Sapadotocaw a lipahak, haharatengen ita, o kihcod a demak ita pakayniyay ci Yihofaan, hanaca mikayatan Ningra ko likakawa Ningra. (ˈOsien ko Kolosay 3:23, 24.) Patirengay ci Tafiti to ngaˈayay taˈarawan. Tiya pakayni fangcalay sefi a pakiyaho cingra i, sanay: “Awaay ko maan aca a sapacakat ako ato finawlan ako i Tisowanan. Nawhani o nano Miso a nipafelian ko polong no maamaan niyam a maemin. O pipatikol aca niyam i Tisowanan to nano Miso a maamaan.” (1 Rayray 29:14) Ano pakiyaho kita i, o patikolay ci Yihofaan to sapafeli Ningra kitanan a dafong. Kawra pakayni kita ci Yihofaan a matayal mihadak to toki, ˈicel ato dafong, o papakahemek Cingranan!—2 Korinto 9:7.

17. Ano mahapinangay iso iraay ko sasalofen no niyah, hano aka matoled hani?

¹⁷ Sapadotocaw materek i sakatahadaˈoc no ˈorip kincoay a lalan i, o polong a tamdaw wa mikelec a mikotod to pasaripaˈan ni Yis. (1 Pitiro 2:21) Ano mahapinangay iso iraay ko sasalofen no niyah, aka matoled, paihkalay kiso to sapidofdofaw to limoˈot ni Yihofa. Haharatengen ci Yihofa cowa pakidem ko saali kitaanan, cowa pisaali Cingra kitanan anini malecadto ci Yisan a malo malefotay.

18. Sakatahiraaw i kahiceraan, mamidemak kita to maanan hani?

¹⁸ Nanay kita maemin misamacay to noikoran a hatokel, makahi misalof to harateng ato waywayan no niyah. (Taneng 4:25; Luka 9:62) Papadotoc misapoener, ‘padotoc a lipahak, micada to sasalof.’ (2 Korinto 13:11) Mihaen ko demak ita, ta mikapot i kitaanan ko “ciolahay ato parihadayay a Kawas.” Mihaen, cowa ko katahira aca i kahiceraan, wa kadofah ko lipahak toniya lalan.