1. Sigun sa Mateo 7:13, 14, taano ta masasabi niyato na nasa pagbiyahe kita?

GABOS kita nasa pagbiyahe. An satong destinasyon, o pasuhan, iyo an mabuhay sa bagong kinaban na nasa irarom kan mamumuton na pamamahala ni Jehova. Kada aldaw, pinagmamaigutan niyatong maglakaw sa dalan na pasiring sa buhay. Pero arog kan sinabi ni Jesus, an dalan na iyan piot asin kun minsan masakit lakawan. (Basahon an Mateo 7:13, 14.) Bako kitang perpekto, asin madali sana kitang maparayo sa dalan na iyan.—Gal. 6:1.

2. Ano an pag-uulayan niyato sa artikulong ini? (Hilingon man an kahon na “ An Kapakumbabaan Nakakatabang sa Sato na Baguhon an Satong Lakad.”)

² Kun gusto niyatong magdanay sa piot na dalan pasiring sa buhay, dapat na andam kitang gumibo nin mga pagbabago sa satong kaisipan, ugali, asin paggawi. Dinagka ni apostol Pablo an mga Kristiyano sa Corinto na padagos na “gumibo nin kinakaipuhan na mga pagbabago.” (2 Cor. 13:11) An konsehong iyan aplikado man sa sato. Sa artikulong ini, pag-uulayan niyato kun paano kita matatabangan kan Bibliya na baguhon an satong lakad asin kun paano kita matatabangan nin maygurang na mga amigo na magdanay sa dalan pasiring sa buhay. Pag-uulayan ta man kun ano an puwedeng makapadipisil sa sato na sunudon an paggiya na itinatao kan organisasyon ni Jehova. Aaramon ta kun paano makakatabang sa sato an kapakumbabaan na baguhon an satong direksiyon na dai naiwawara an satong kaugmahan sa paglilingkod ki Jehova.

3. Paano ka matatabangan kan Tataramon nin Diyos?

³ Bakong madali para sa sato na siyasaton an satong mga kaisipan asin namamatian. Mapandaya an satong puso, kaya tibaad madipisilan kitang maaraman kun sain kita kaiyan dinadara. (Jer. 17:9) Pasil sanang madaya ta an satong sadiri nin “salang pangangatanusan.”  (Sant. 1:22) Kaya dapat niyatong gamiton an Tataramon nin Diyos sa pagsiyasat sa satong sadiri. Ihinahayag kan Tataramon nin Diyos kun siisay talaga kita, an kauruiraruming “mga pangangatanusan saka an mga intensiyon” kan satong puso. (Heb. 4:12, 13) An Tataramon nin Diyos garo man sana X-ray machine na tinatabangan kitang mahiling kun ano an nasa laog ta. Pero dapat na magin mapakumbaba kita para makinabang sa konseho na itinatao sato kan Bibliya o kan mga representante nin Diyos.

4. Paano ta nasabi na nagin mapalangkaw si Hading Saul?

⁴ Ipinapahiling kan halimbawa ni Hading Saul an puwedeng mangyari kun bako kitang mapakumbaba. Sa sobrang kapalangkawan ni Saul, dai niya inadmitir dawa sa sadiri niya na kaipuhan niyang baguhon an saiyang mga kaisipan asin paggawi. (Sal. 36:1, 2; Hab. 2:4) Risang-risa iyan kan tawan ni Jehova si Saul nin espesipikong instruksiyon kun ano an dapat niyang gibuhon pagkatapos daugon an mga Amalekita. Pero dai sinunod ni Saul si Jehova. Asin kan kumprontaron siya ni propeta Samuel manungod digdi, dai inako ni Saul an saiyang sala. Imbes, pinurbaran niyang ipangatanusan an saiyang ginibo paagi sa pagpasadit sa mga konsekwensiya kan saiyang pagsuway asin paagi sa pagbasol sa iba. (1 Sam. 15:13-24) Bago nangyari ini, nagpahiling na si Saul nin arog kaiyan na ugali. (1 Sam. 13:10-14) Nakakamundo ta tinugutan niyang magin mapalangkaw an saiyang puso. Dai niya itinanos an saiyang kaisipan, kaya sinaway siya ni Jehova asin isinikwal.

5. Ano an manunudan ta sa halimbawa ni Saul?

⁵ Tanganing makanuod sa halimbawa ni Saul, marahay na haputon niyato an satong sadiri: ‘Pag may nababasa akong konseho sa Tataramon nin Diyos, nagdadahilan daw ako para dai iaplikar iyan? Iniisip ko daw na bako man talagang maraot an ginigibo ko? Ibinabasol ko daw sa iba an mga ginigibo ko?’ Kun iyo an simbag ta sa arin man sa mga hapot na iyan, dapat niyatong baguhon an satong kaisipan asin ugali. Kun dai, puwedeng magin mapalangkaw na marhay an satong puso kaya dai na kita ibibilang ni Jehova na amigo niya.—Sant. 4:6.

6. Ano an pagkakaiba ni Hading Saul asin ni Hading David?

⁶ Risahon an pagkakaiba ni Hading Saul asin kan kasalida niyang si Hading David na namumuot sa ‘katugunan ni Jehova.’ (Sal. 1:1-3) Aram ni David na iliniligtas ni Jehova an mga mapakumbaba pero habo niya sa mga mapalangkaw. (2 Sam. 22:28) Kaya tinugutan ni David an katugunan nin Diyos na baguhon an saiyang kaisipan. Isinurat niya: “Uumawon ko si Jehova, na nagsasadol sa sako. Dawa sa banggi, itinatanos ako kan kauruiraruming mga kaisipan ko.”—Sal. 16:7, NWT.

7. Ano an gigibuhon ta kun mapakumbaba kita?

⁷ Kun mapakumbaba kita, tutugutan ta an Tataramon nin Diyos na itanos an satong salang kaisipan bago pa iyan sumagkod sa salang gibo. An Tataramon nin Diyos magigin garo sarong boses na nagsasabi sato: ‘Iyo ini an dalan. Lakaw kamo diyan.’ Papatanidan kita kaiyan pag napaparayo na kita sa dalan—kun nagsusuki na kita pawala o patuo. (Isa. 30:21) Kun nagdadangog kita ki Jehova, makikinabang kita sa dakul na paagi. (Isa. 48:17) Halimbawa, malilikayan ta na makamati nin pagkasupog na itinanos kita kan iba. Asin mas mapaparani kita ki Jehova huling narerealisar ta na tinatratar niya kita bilang namumutan na aki.—Heb. 12:7.

8. Siring kan sinambit sa Santiago 1:22-25, paano niyato puwedeng gamiton bilang salming an Tataramon nin Diyos?

⁸ An Tataramon nin Diyos puwedeng magin siring sa salming. (Basahon an Santiago 1:22-25.) Kadaklan sa sato nananalming kada aga bago maghali sa harong. Paagi kaiyan, mahihiling ta kun may kaipuhan kitang pakarhayon bago kita mahiling kan iba. Sa kaagid na paagi, pag binabasa ta an Bibliya kada aldaw, nahihiling ta an mga kaipuhan tang baguhon sa satong mga kaisipan asin ugali. Napatunayan nin dakul na nakakatabang sa sainda an pagbasa kada aga kan  teksto kan aldaw bago maghali sa harong. Hinuhurop-hurop ninda an saindang nababasa, asin sa bilog na aldaw naghahanap sinda nin mga paagi na maiaplikar an konseho hali sa Tataramon nin Diyos. Apuwera kaiyan, dapat na igwa kita nin rutina sa pag-adal na diyan kaiba an pagbasa asin paghurop-hurop kan Tataramon nin Diyos kada aldaw. Garo simpleng bagay lang iyan, pero saro iyan sa pinakaimportanteng magigibo ta na makakatabang sa sato na magdanay sa piot na dalan pasiring sa buhay.

9. Taano ta tibaad kaipuhan kang itanos nin sarong amigo?

⁹ Nangyari na daw saimo na an dalan na linalakawan mo parayo na palan ki Jehova? (Sal. 73:2, 3) Kun kusog-buot kang itinanos nin sarong maygurang na amigo, nagdangog ka daw sa saiya asin inaplikar an sadol niya? Kun iyo, tama an ginibo mo, asin siguradong ipinagpapasalamat mo na pinatanidan ka kan amigo mo.—Tal. 1:5.

10. Ano an dapat mong gibuhon kun itanos ka nin sarong amigo?

¹⁰ Ipinapagirumdom sa sato kan Tataramon nin Diyos: “An mga lugad hali sa sarong amigo maimbod.” (Tal. 27:6, NWT) Paano iyan totoo? Mangnuhon an ilustrasyon na ini: Ipamugtak na mabalyo ka sa sarong tinampo na kadakul nin nag-aaging awto. Dahil sige mong cellphone, nagtungtong ka na sa tinampo na dai lamang naghihiling-hiling. Marahay na sana ta kinaptan kan amigo mo an takyag mo dangan binutong ka pagilid. Talagang higot su pagkakapot niya kaya nagralata an takyag mo, pero dahil sa alistong paghiro niya, dai ka nabunggo nin awto. Magkulog man nin nagkapirang aldaw an takyag mo, maaanggot ka daw na binutong ka kan saimong amigo? Siguradong dai! Mapasalamat ka sa tabang niya. Sa kaagid na paagi, kun patanidan ka nin sarong amigo na an saimong pagtaram o paggawi bakong kauyon kan matanos na mga pamantayan nin Diyos, tibaad makulgan ka sa primero. Pero dai ikauyam an konseho, ni magkulog an buot. Kamangmangan iyan. (Par. 7:9) Imbes, magin mapagpasalamat dahil nagkusog-buot siyang sabihan ka.

11. Ano an puwedeng magin dahilan na dai akuon nin saro an marahay na konseho nin sarong amigo?

¹¹ Ano an puwedeng magin dahilan na dai akuon nin saro an marahay na konseho nin sarong mamumuton na amigo? An kapalangkawan. Gusto nin mga mapalangkaw na ‘kinikitik an saindang mga talinga. Minapundo sinda sa pagdangog sa katotoohan.’ (2 Tim. 4:3, 4) Sobra an pagpapahalaga ninda sa saindang sadiri saka opinyon. Alagad, isinurat ni apostol Pablo: “Kun an siisay man nag-iisip na siya importante atang bako man, pigdadaya niya an saiyang sadiri.” (Gal. 6:3) Magayunon an pagkasabi manungod diyan ni Hading Solomon. Sinabi niya: ‘Mas marahay an sarong hoben na dukha alagad madunong kisa sarong gurang nang hadi alagad mangmang asin habo nang [maghimati sa patanid].’—Par. 4:13, An Marahay na Bareta Biblia.

12. Ano an manunudan niyato sa halimbawa ni apostol Pedro na nakarekord sa Galacia 2:11-14?

¹² Mangnuhon an halimbawa ni apostol Pedro kan itanos siya ni apostol Pablo sa atubangan kan iba. (Basahon an Galacia 2:11-14.) Puwede kutang naanggot si Pedro sa sinabi ni Pablo dahil sa paagi nin pagkonseho asin kun sain iyan sinabi. Pero madunong si Pedro. Inako niya an konseho asin dai naghinanakit ki Pablo. Imbes, kan huri inapod niya si Pablo na sarong ‘namumutan na tugang.’—2 Ped. 3:15.

13. Anong mga punto an dapat niyatong isaisip pag nagtatao nin konseho?

¹³ Kun sa hiling mo kaipuhan mong tawan nin konseho an sarong amigo, anong mga punto an dapat mong isaisip? Bago mo siya kaulayon, haputon an sadiri, ‘Nagigin “sobra kamatanos” daw ako?’ (Par. 7:16, NWT) An sarong tawo na sobra kamatanos hinuhusgaran an iba, bako base sa pamantayan ni Jehova kundi base sa sadiri niyang pamantayan, asin posibleng marhay na bako siya gayong mahihirakon. Pagkatapos mong siyasaton an saimong sadiri asin sa hiling mo kaipuhan  mo man giraray kaulayon an amigo mo, aramon kun ano talaga an problema asin gumamit nin punto de vistang mga hapot para tabangan an amigo mo na marealisar an saiyang sala. Siguraduhon na basado sa Kasuratan an sasabihon mo, na ginigirumdom na an amigo mo maninimbag bako saimo, kundi ki Jehova. (Roma 14:10) Gamiton an kadunungan na nasa Tataramon nin Diyos, asin pag nagtatao nin konseho, arugon an pagmalasakit ni Jesus. (Tal. 3:5; Mat. 12:20) Taano? Huling tatrataron kita ni Jehova sa kaparehong paagi na tinatratar ta an iba.—Sant. 2:13.

14. Ano an itinatao sato kan organisasyon nin Diyos?

¹⁴ Ginigiyahan kita ni Jehova sa dalan pasiring sa buhay paagi sa daganon na kabtang kan saiyang organisasyon, na nagtatao nin mga video, publikasyon, asin pagtiripon na nakakatabang sa sato gabos na iaplikar an konseho na yaon sa Tataramon nin Diyos. An mga materyal na iyan nakabasar nanggad sa Kasuratan. Pag nagdedesisyon kun paano pinakamarahay na maisasagibo an gibuhon na paghuhulit, an Namamahalang Grupo nagsasarig sa banal na espiritu. Dawa siring, regular na ineebalwar kan Namamahalang Grupo an mga desisyon kaiyan manungod sa pagkaorganisar kan gibuhon. Taano? Huling “an mga eksena sa kinaban na ini nagbabago,” asin dapat na mag-adjust an organisasyon nin Diyos sa bagong mga kamugtakan.—1 Cor. 7:31.

15. Anong kadipisilan an napaatubang sa nagkapirang parahayag?

¹⁵ Siguradong sinusunod ta tulos an itinatao satong basado sa Bibliyang paggiya may koneksiyon sa mga doktrina o pamantayan sa moral. Pero ano an reaksiyon ta pag an ginibong pagbabago kan organisasyon nin Diyos nakakaapektar sa ibang aspekto kan satong buhay? Halimbawa, sa nakaagi pa sanang mga taon, grabe an ilinangkaw kan gastos sa pagtugdok asin pagmentenar kan mga lugar nin pagsamba. Kaya nagtao nin instruksiyon an Namamahalang Grupo na lubos na gamiton an mga Kingdom Hall. Huli sa pagbabagong ini, may mga kongregasyon na pinagsaro asin may mga Kingdom Hall na ipinabakal. An pondong nakukua diyan ginagamit para makatabang sa pagtugdok nin mga hall sa mga lugar na pinakakaipuhan iyan. Kun nakaistar ka sa lugar na an mga hall ipinapabakal asin an mga kongregasyon pinagsaro, tibaad madipisilan kang mag-adjust sa bagong mga kamugtakan. May mga parahayag na kaipuhan na ngunyan na magbiyahe nin mas harayo para makaatender sa mga pagtiripon. An iba na nagpagal sa pagtugdok o pagmentenar nin sarong Kingdom Hall tibaad mag-isip  kun taano ta ipinapabakal na iyan ngunyan. Tibaad mamatian ninda na nasayang sana an panahon saka pagpapagal ninda. Dawa arog kaiyan, nakikikooperar sinda sa bagong areglong ini asin dapat sindang komendaran.

16. Paano an pag-aplikar sa sadol na nasa Colosas 3:23, 24 makakatabang sa sato na mapagdanay an satong kaugmahan?

¹⁶ Mapagdadanay ta an satong kaugmahan kun gigirumdumon niyato na nagtatrabaho kita ki Jehova asin na ginigiyahan niya an saiyang organisasyon. (Basahon an Colosas 3:23, 24.) Nagpahiling nin marahay na halimbawa si Hading David kan magdonar siya nin pondo para itugdok an templo. Sinabi niya: “Siisay man ako asin siisay man an sakong banwaan para magtao nin mga gikan-sa-buot na dulot na arog kaini? Huling hali sa saimo an gabos na bagay, asin an mga itinao mi sa saimo hali man sana sa saimo.” (1 Cron. 29:14, NWT) Siring man, pag nagdodonar kita, an itinatao ta hali man sana ki Jehova. Dawa arog kaiyan, pinapahalagahan ni Jehova an panahon, kusog, asin mga pagsadiri na idinodonar ta para suportaran an gibuhon na gusto niyang maisagibo.—2 Cor. 9:7.

17. Taano ta dai ka dapat pangluyahan nin buot kun kaipuhan mong baguhon an saimong lakad?

¹⁷ Para magdanay sa piot na dalan pasiring sa buhay, gabos kita dapat na maingat na sundan an mga lakad ni Jesus. (1 Ped. 2:21) Kun marealisar mo na kaipuhan mong baguhon an saimong lakad, dai pangluyahan nin buot. An totoo tibaad marahay na indikasyon iyan, na nagpaparisa na sensitibo ka sa paggiya ni Jehova. Tandaan na aram ni Jehova na bako kitang perpekto, kaya dai niya linalauman na perpekto tang maaarog an halimbawa ni Jesus.

18. Ano an dapat tang gibuhon tanganing maabot an satong pasuhan?

¹⁸ Lugod na gabos kita magpokus sa puturo asin magin andam na gumibo nin mga pagbabago sa satong kaisipan, ugali, asin paggawi. (Tal. 4:25; Luc. 9:62) Magdanay kitang mapakumbaba, “padagos [na] mag-ugma, [asin] gumibo nin kinakaipuhan na mga pagbabago.” (2 Cor. 13:11) Kun gigibuhon ta iyan, “an Diyos nin pagkamuot asin nin katuninungan maantabay sa [sato].” Asin dai lang kita makakaabot sa satong destinasyon kundi ikakaugma ta man an pagbiyahe.