1. Ro Matius 7:13, 14 ya, koisya kofrur marandan ḇe moḇ sairi?

KOKAM koisya kofrur marandan, isoine marandan ḇe dunya babo Allah Yahwe ḇyeasas kwar ya. Ras nakam, kosewar fa kombran pdef ro nyan ḇera ḇe kankenem ine. Mboi raris Yesus ikofen kwar na, nyan ani ifyos ma samwsen fa kombran ro na. (Wasya Matius 7:13, 14.) Oso wer ido, koma konapes ḇa kaker, inja napyan fa kombran ḇe nyan ḇesasar.​—Gal. 6:1.

2. Rosai monda nari kawos ro farkarkor ine ya? (Mam “ Sne Ḇerun Fyaduru Ko fa Kombran Sasar Ḇa.”)

² Imbe kombran pdef ro nyan ḇefyos ido, fandun fa kofadwer nyan kakara, rari, ma kenem koḇena. Manwawan Paulus danun ḇe naek srar ḇero Korintus sya fa ’sifrur fararwei pdef’. (2 Kor. 13:11, NW) Wos anun anine kyur ḇe ko kako. Nari kawos ro farkarkor ine, moḇsa Wos Refo nafnoḇek ko fa kofrur fararwei ma moḇsa naek srar ḇefasnai nyan ḇepyum kwar sya sifnoḇek ko fa kombran pdef ro nyan kankenem ya. Na kawos kako, rosai ḇewar fa fafisu ono samswen fa koso akurfasnai ro Yahwe organisasi Ḇyedi, ma rariso sne ḇerun nafnoḇek ko fa kofrur fararwei mboi koryaḇ pdef ro fararmyan ḇe Yahwe I.

3. Rariso Wos Refo nafnoḇek ko rai?

³ Imbe kofawi kaku roi ḇero swaruser ma kosnesna, nama roi ḇepyan risya ḇa. Sne koḇena bisa nafrowes ko, nafrur samswen ko fa kofawi kaku rosai nari kofrur kaku ya. (Yer. 17:9) Kakara ḇesasar na kako bisa nakyaren ko. (Yak. 1:22) Inja fandun fa kobuk Wos Refo fa kobukikukeḇ kosnesna, kukro Allah wos Ḇyena nafnoḇek ko fa komambir kakara ma roi ḇedif sne koḇena.  (Ibr. 4:12, 13) Refo ima imnis ra robebor ḇaido mesin dokter sya sbukimam baken koḇena ḇero do ya. Ḇape fafisu kosmai wos ro Refo ḇekur ḇeri ḇe ko ḇaido ro snonggaku Allah ryem sya, fandun fa kofasnai sne ḇerun. Rarirya, nari kosmai payamyum.

4. Rariso kofawi Raja Saul ima snon ḇeararer diri?

⁴ Raja Saul fawar ḇyena nfasnai ḇe ko moḇsa na koḇerai rofyor kofasnai sne ḇerun ḇa. Saul ima dararer i, iso ḇefnai fa imewer ikofen kaku fandun fa fyadwer kakara ma kenem ḇyena. (Mz. 36:1, 2; Hab. 2:4) Ine nfasnai kaku fafisu Yahwe ikofenbos ḇe i rosai fandun fa ifrur ya rofyor kyafyo snonggaku Amalek sya kwar. Ḇape, Saul isouser na ḇa. Ma rofyor Nabi Samuel isonek i, Saul imewer ikofen kaku ifrur sasar kwar. Isyadi wer, Saul doḇe roi ifrur na nama sasar ḇeba naisya ḇa ma byuk sasar ḇe kawasa sya ḇo doḇe siso ḇewan i. (1 Sam. 15:13-24) Ro swaf ḇepon ya, Saul fyasnai isouser ḇa kwar. (1 Sam. 13:10-14) Ḇeḇye ḇa kaku wer, Saul myam monda ararer nasur ro sneri. Imewer fyadwer kakara ḇyena. Inja Yahwe pyampum i.

5. Rosai kofarkor ro Saul fawar ḇyena?

⁵ Komewer kararer ko raris Saul i. Inja ipyum fa kofuken manggunko: ’Rofyor yawasya wos swarapepen ro Refo, na yamewer yakara ine kyur ḇe aya ke? Yakara roi yafrur na naḇye ḇa manggun ḇa ke? Yabuk sasar ḇe snonggaku ḇese faro roi yafrur na ke?’ Kokarem imbo ido, fandun fa kofadwer nyan kakara koḇena. Oroḇa ido, Allah Yahwe na imewer koḇebati kuker I.​—Yak. 4:6.

6. Rosai iḇese ro Raja Saul ma Raja Daud i?

⁶ Komam kada Raja Saul ima iḇese kaku ro Raja Daud i. Daud ima imarisen kaku faro ”Yahwe sasoser Ḇyena”. (Mz. 1:1-3) Daud ifawi Yahwe byuk fasaspar faro snonggaku ḇena sne ḇerun mboi pyampum snonggaku ḇeararer sya. (2 Sam. 22:28) Inja Daud ḇye Allah sasoser Ḇyena fa nfadwer nyan kakara ḇyena. Fyas ḇo doḇe, ”Nari yasandik Yahwe, ḇebuk wos ananun ḇe aya. Ro roḇ ya kako kakara yena dori isonek aya.”​—Mz. 16:7.

7. Kona sne ḇerun ido, rosa nari kofrur ya?

⁷ Kona sne ḇerun ido, nari komarisen Allah Wos Ḇyena nafnoḇek ko fa kofadwer nyan kakara koḇena fyor kofrur sasar ḇaim. Ine imnis ra korower Allah mkarem Ḇyeja ḇeyoḇe, ”Nyan ya isoine. Wambran ro dine.” Allah Wos Ḇyena nbuk swarapepen ḇe ko fafisu imbe kombran sasar ḇe bar rasar ḇaido bar raku. (Yes. 30:21) Korower Yahwe ido, na nun payamyum ḇe manggunko. (Yes. 48:17) Imnis raris, rofyor snonggaku ḇese sisonek ko, na kopok komai ḇa. Ma kofanam syadi ḇe Yahwe I kukro kofawi ima imnis kma ḇesaswar ḇeswar kaku ko.​—Ibr. 12:7.

8. Imnis wos ro Yakobus 1:22-25, moḇsa komam Allah Wos Ḇyena raris kansinai rai?

⁸ Allah Wos Ḇyena imnis ra kansinai. (Wasya Yakobus 1:22-25.) Kosasyar ro arwo ḇaim ido, na komam komgasna ro kansinai. Inja, na kofawi roi ono naisya fandun fa kofrur na fa namnis kaḇer ke roḇa. Rarirya kako, kowasya Refo ras ḇe ras ido, insape na kofawi nyan kakara ma kenem koḇena fandun fa kofadwer na. Ḇebor sya sismai payamyum kwar kukro sra sifrur fararur sena ḇaim, siwasya ḇepon mnuk ro Refo faro ras ani. Simarisen roi siwasya na nfara kakara sena. Mura, ro ras anya ḇesiper sisewar fa siso anun ro Refo na. Oso wer ido, fandun fa kofarkor ma kokarauser Allah Wos Ḇyena  ras ḇe ras. Rya ine roi ḇemanggenem ḇa, mboi ine fyandun kaku insama nafnoḇek ko fa kombran pdef ro nyan ḇefyos ḇeyun ḇe kankenem ya.

9. Rosai ḇefrur fa naek ḇaido srar oso byuk wos anun ḇe Au?

⁹ Fafisu oso wafrur roi ḇefnai fa binggwan ro Yahwe I ke? (Mz. 73:2, 3) Naek ḇaido srar ḇefasnai kenem ḇepyum oso byuk wos anun ḇe Au ido, rwower ma waso na ke? Wafrur na ido ima roi ḇepyum nairi. Na wakofen kasumasa kaku kukro bati Bedi byuk swarapepen ḇe Au kwar.​—Ams. 1:5.

10. Rosai na wafrur kaku rofyor bati oso byuk wos anun ḇe Au?

¹⁰ Refo nbuk swarapepen ḇe ko radine: ”Par-par bati oso ifrur ḇe ko nfasnai soasuser ḇyena.” (Ams. 27:6) Wos nane kyur kaku faro? Kokarapan wos sarḇer ine: Ausya betelfon ḇo imbe wambranuk sampak na ḇe bar ya, mboi oto ḇefrar sya sibore. Mam ḇe bar rasar ma raku oḇa ḇo wambran pdef. Mura, bati oso damkepen ḇramin Bedi ḇo pyawsar Au fa wakren ḇe nyan andire. Inja, bramsi moḇ duf anya nadufe. Ifrur radine ḇa ido, na oto ya ifrar pum Au. Na bramsi isyur kaker isof ro ras riḇeso, mboi wamsor bati Bedi kukro pyawsar Au kwar ke? Na oroḇa! Ḇape wakofen kasumasa kaku ḇe i. Rarirya kako, rofyor naek ḇaido srar oso byuk wos anun ḇe ko kukro roi kawos ḇaido kofrur na nasrow ḇa kuker Wos Refo ido, randak ya na kosnesna naduf. Ḇape kofafayaf awer kukro nari nun payamyum ḇe ko ḇa. (Pkh. 7:9) Kaku ya, kokofen kasumasa kukro byuk swarapapen ḇe ko kwar.

11. Rosai na ḇefnai fa snonggaku oso imewer ryower wos anun ro bati ḇyedi?

¹¹ Rosai na ḇefnai fa snonggaku oso imewer ryower wos anun ro bati ḇesawarwar ya? Ararer. Snonggaku ḇeararer simarisen monda siso manggunsi marisen sena. Simewer srower roi ḇekaku ya. (2 Tim. 4:3, 4) Skara siso ḇefawinanem syadi, inja sfandun wos anun ro snonggaku ḇesesya ḇa. Ḇape Manwawan Paulus doḇe, ”Snar rofyor snon oso kyara iso ḇesyadiya, mboi ḇyerarirya ḇaido, ikada ḇyeankar mankundi.” (Gal. 6:3) Raja Salomo doḇe, ”Ḇepyum syadi ya roma babo ḇesaḇarar mboi ifawinanem ro raja ḇesinan kwar mboi ifawi roi oḇa, ḇemewer ḇerower wos swarapepen.”​—Pkh. 4:13.

12. Ro fawar ḇero Galatia 2:11-14 ya, rosai kofarkor ro Manwawan Petrus i?

¹² Komam kada, Manwawan Petrus fyasnai nyan ḇepyum rofyor Manwawan Paulus isonek i ro ḇarpon kawasa sya. (Wasya Galatia 2:11-14.) Petrus imbe imsor ido bisa ḇae, kukro Paulus isonek i ro ḇarpon snonggaku ḇebor sya. Ḇape Petrus fyasnai fawinanem. Imsor Paulus i ḇa mboi imarisen ryower wos swarapepen byuk ḇe i na. Ḇarpur ya dap Paulus i ḇe ”naek koswar ani”.​—2 Ptr. 3:15.

13. Kobuk wos sonek ḇe snonggaku ḇese ḇaim ido, rosai kokara ḇepon ya?

¹³ Kwara imbe buk wos anun ḇe bati Bedi ido, rosai fandun fa waswarepen na? Wawos ḇaim ido, kwarapan resari, ’Yakara aya iso ḇekaku syadi ke?’ (Pkh. 7:16) Snonggaku ḇekara ima kyaku syadi na ḇyemankara snonggaku ḇese raris Yahwe kakara Ḇyena ḇa mboi imnis roi manggundi kyara na. Dakfasnai sawarwar oḇa. Kwara kwar mboi fandun kaku fa wawos ḇe bati Bedi ido, wakofen snai sasar ḇyena  ma wafuken asuser fa wafnoḇek i insama ifawi ifrur sasar kwar. Iḇye kada wos wakofen na neknam ro Refo, ma waswarepen nwa hak fa ḇemankara i ḇa mboi imbe wafnoḇek i fa ifawi moḇsa Yahwe myam roi ifrur kwar na. (Rm. 14:10) Buk fawinanem ḇero Refo na. Rofyor buk wos anun ḇe ḇesesya, fasnai sawarwar raris Yesus i. (Ams. 3:5; Mat. 12:20) Rosai ḇefnai fa wafrur radiri? Kukro Yahwe nari ifrur pyum ko raris moḇ kofrur pyum snonggaku ḇesesya raya.​—Yak. 2:13.

14. Rosai Raryur Naek Ḇefarkin sfasos kwar ḇe ko na?

¹⁴ Yahwe fyarkin ko ro nyan ḇeyun ḇe kankenem roro Raryur Naek Ḇefarkin sya. Sfasos kwar vidio, syap-syap na, ma munara sarawrow ḇefnoḇek ko fa koso akurfasnai ro Refo na. Nane kam neknam kaku ro Refo. Fafisu Raryur Naek Ḇefarkin sbuk akurfasnai ḇekur moḇsa kofrur fararur ḇaḇebaryas ya rai, siso farkankin ro rur ḇesren ya. Imbape Raryur Naek Ḇefarkin ansine na smam kaker fararwei naisya fandun fa sifrur ke roḇa. Rosai ḇefnai fa sifrur radiri? Snar roi ḇeḇejadi ro dunya ine nfadadwer ker.​—1 Kor. 7:31.

15. Samswen rosai naek srar ono sismai ya?

¹⁵ Rofyor Raryur Naek Ḇefarkin sikofenḇair fawawi ḇebabo ro Refo ḇaido akurfasnai ḇekur kenem koḇena, komarisen na ma kosouser na ḇeri. Mboi Raryur Naek Ḇefarkin sifrur fararwei ḇekyaren kaku kankenem koḇena ido na rariso? Raris taun riḇeso ḇarpur ine, kumpan sisasyar na fa sfaduru moḇ kobukiari ro na nek kaku. Inja Raryur Naek Ḇefarkin sor insama sidang riḇeḇeso bisa sepake kayam Balai Karajan oser monda. Eḇedari sidang ḇeḇeso siryur fa seoser ma sboḇ Balai Karajan sena. Farsarser pipi siryur na sbuk na fa sbukiḇawes Balai Karajan ḇebabo ro moḇ ḇefandun syadi. Ausya ḇarek ro moḇ Balai Karajan sboḇ na kwar ido, imbude na samswen fa waso fararwei nane. Naek srar ono sisya sra binggwan kaku fa siso fananjur ari. Ḇesesya wer sfararur marḇak kwar fa sḇawes Balai Karajan anna, inja sifakfuken rosai ḇefnai fa sboḇ na wer. Skara ḇo soḇe oras ma samambraḇ sena nadawer  monda. Ḇape siso pdef fasasos ḇebabo ine ma komarisen kobuk wos mananen ḇe si.

16. Rariso kosouser wos anun ḇero Kolose 3:23, 24 ido, na nafrur fa koryaḇ pdef rai?

¹⁶ Nari koryaḇ pdef rofyor koswarepen koisya kofararur faro Yahwe I ma isya fyarkin organisasi Ḇyedi. (Wasya Kolose 3:23, 24.) Raja Daud fyasnai nyan ḇepyum kuker byuk farsarser kumpan faro ḇaḇawes bait. Ikofen, ”Mansei aya ine ma mansei er yedi, isof nggosyus fa nggobuk farsarser kuker sne ḇemarisen ḇeradine? Roi nakam ndramuma ro Au, ma rosai nggobuk ḇe Au na ndrama ro ḇramin Bansuya.” (1 Taw. 29:14) Rofyor kobuk farsarser, kobuk kako ḇe Yahwe I rosai byuk kwar ḇe ko na. Inja, Yahwe na imarisen fafisu myam kobuk oras, samambraḇ, ma pipi koḇena fa kosaramper fararur Ḇyena.​—2 Kor. 9:7.

17. Rosai ḇefnai fa besanekar awer rofyor fandun kaker fa wafrur fararwei?

¹⁷ Fandun fa koso mnis Yesus nyan ḇyena insama kombran pdef ro nyan ḇefyos ḇeyun ḇe kankenem. (1 Ptr. 2:21) Imbude fandun kaker fa kofrur fararwei, mboi koḇesanekar awer. Nane nfasnai kosewar kwar fa koso akurfasnai Yahwe byuk na. Koswarepen Allah Yahwe ifawi koinema snonggaku ḇenapes ḇa siko, inja ipok dor ko fa komnis kaku raris Yesus i ḇa.

18. Rosai na kofrur kaku insama kora kofyafer ro dunya babo ya?

¹⁸ Iḇye kada komam ḇe ḇarpon ma komarisen kofrur fararwei ro kakara, rari, ma kenem koḇena. (Ams. 4:25; Luk. 9:62) Kona sne ḇerun ido, nari koryaḇ, kofrur fararwei pdef ma ”Allah ḇesaswar syadi ma ḇeḇeknam aski ani nari ryowus [ko]”. (2 Kor. 13:11) Nari kofyafer ro dunya babo monda ḇa, mboi fafisu ine kako kofrur marandan koḇenane kuker marisen.