1. Folem Matiu 7:13, 14, ?from wanem yumi save talem se yumi stap wokbaot long wan rod?

YUMI evriwan i stap wokbaot long wan rod. Mo yumi stap wokbaot blong kasem laef long niufala wol, aninit long rul blong Jehova we i gat lav. Evri dei, yumi traem blong folem rod ya we i go long laef. Be olsem we Jisas i talem, rod ya i smol mo i strong, mo samtaem i had blong folem rod ya. (Ridim Matiu 7:13, 14.) Yumi no stret gud olgeta, taswe i isi nomo blong yumi gowe long rod ya.—Gal. 6:1.

2. ?Bambae yumi tokbaot wanem long stadi ya? (Yu luk bokis ya tu “ Tingting Daon i Halpem Yumi Blong Jenisim Ol Step Blong Yumi.”)

² Sipos yumi wantem stap long smol rod ya we i strong, yumi mas rere blong jenisim ol tingting, fasin, mo aksen blong yumi. Aposol Pol i enkarejem ol Kristin long Korin se oli mas gohed blong “stretem tingting blong” olgeta. (2 Kor. 13:11) Advaes ya i kam long yumi tu. Long stadi ya, bambae yumi tokbaot olsem wanem Baebol i save halpem yumi blong jenisim ol step blong yumi, mo olsem wanem ol fren we oli bigman long spirit oli save halpem yumi blong stap long rod blong laef. Mo tu, bambae yumi luk se wetaem maet i had blong folem ol daereksen we i kam long oganaesesen blong Jehova. Bambae yumi luk se tingting daon i save halpem yumi blong jenisim rod blong yumi mo long semtaem, yumi no lusum glad long wok blong Jehova.

3. ?Tok blong God i save halpem yu olsem wanem?

³ I had blong yumi jekem prapa tingting mo filing blong yumi. ?From wanem? From we hat blong yumi i save giaman long yumi, taswe i had blong save samting we hem i stap pusum yumi blong mekem. (Jer. 17:9) I isi nomo blong ol “giaman” tingting blong yumi oli trikim yumi. (Jem. 1:22) Taswe,  yumi mas yusum Baebol blong jekem yumi bakegen. Tok blong God i soem samting we i stap long hat blong yumi, “ol tingting mo ol plan we i stap long hat blong” yumi. (Hib. 4:12, 13) Yumi save talem se Tok blong God i wok olsem wan eksre masin, i givhan long yumi blong luk samting we i stap insaed long yumi. Be yumi mas gat tingting daon, sipos yumi wantem se ol advaes blong Baebol o blong olgeta we oli lidim yumi, i halpem yumi.

4. ?Wanem i soem se King Sol i kam praod?

⁴ Eksampol blong King Sol i soem samting we i hapen, taem yumi no gat tingting daon. Sol i kam praod tumas, nao hem i no wantem luksave se hem i mas jenisim ol tingting mo aksen blong hem. (Sam 36:1, 2; Hab. 2:4) Yumi luk samting ya taem Jehova i talemaot klia samting we Sol i mas mekem, afta we hem i winim ol man Amalek. Be Sol i no obei long Jehova. Mo taem profet Samuel i tok long hem, Sol i no wantem luksave mastik blong hem. Be hem i traem blong mekem eskius from aksen blong hem mo i blemem ol narafala. (1 Saml. 15:13-24) Smoltaem taem bifo long hemia, Sol i bin soem finis fasin ya. (1 Saml. 13:10-14) Sore tumas, hem i letem hat blong hem i kam praod. Hem i no jenisim tingting blong hem, ale Jehova i stretem hem mo i sakemaot hem.

5. ?Yumi save lanem wanem long eksampol blong Sol?

⁵ Sipos yumi no wantem kam olsem Sol, i gud yumi askem yumi wan se: ‘?Taem mi ridim advaes long Baebol, mi stap mekem eskius from ol tingting blong mi? ?Taem mi no obei, mi stap mekem olsem se i no wan impoten samting? ?Mi stap blemem ol narafala from aksen blong mi?’ Sipos ansa blong yumi i yes, yumi mas stretem tingting mo fasin blong yumi. Sipos no, hat blong yumi i save kam flas gogo Jehova bambae i no moa wantem se yumi fren blong hem.—Jem. 4:6.

6. Tokbaot olsem wanem King Deved i defren long King Sol.

⁶ Makem olsem wanem King Deved i defren long King Sol. Deved i lavem “loa blong Jehova.” (Sam 1:1-3) Deved i save se Jehova i sevem olgeta we tingting blong olgeta i stap daon, be i agensem ol man we oli praod. (2 Saml. 22:28) Taswe Deved i letem loa blong God i stretem tingting blong hem. Hem i raetem se: “Bambae mi presem Jehova we i stap givim advaes long mi. Long naet tu, ol tingting blong mi we oli haed, oli stap stretem mi.”—Sam 16:7.

7. ?Bambae yumi mekem wanem sipos yumi gat tingting daon?

⁷ Sipos yumi gat tingting daon, bambae yumi letem Tok blong God i stretem ol rong tingting blong yumi, bifo we oli lidim yumi blong mekem rong aksen. Tok blong God bambae i olsem wan voes we i talem long yumi se: “Hemia rod. Yufala i folem.” Bambae hem i givim woning taem yumi gowe long rod, nao yumi go long lef o long raet. (Aes. 30:21) I gud yumi lesin long Jehova, from we hemia bambae i givhan long yumi long plante samting. (Aes. 48:17) Eksampol, bambae yumi no sem from we narafala i mas stretem yumi. Mo yumi save kam klosap moa long Jehova, from we yumi luksave se hem i tritim yumi olsem wan pikinini we hem i lavem tumas.—Hib. 12:7.

8. Folem Jemes 1:22-25, ?olsem wanem yumi save yusum Tok blong God olsem wan mira?

⁸ Tok blong God i save kam olsem wan mira long yumi. (Ridim Jemes 1:22-25.) Bighaf blong yumi i lukluk long mira evri moning, bifo we yumi aot long haos. Long rod ya, yumi save luk sipos yumi mas stretem eni samting bifo we ol narafala oli luk yumi. Long sem fasin, taem yumi ridim Baebol evri dei, bambae yumi luk sam rod we yumi save folem blong stretem tingting mo fasin blong yumi. Plante Kristin oli faenem se taem oli ridim vas blong dei evri moning bifo we oli aot long haos, hemia  i givhan bigwan long olgeta. Oli letem samting we oli ridim i gat paoa long tingting blong olgeta. Biaen, long fuldei ya, oli traem faenem rod blong mekem advaes ya blong Baebol i wok. Mo tu, yumi mas gat fasin ya blong stadi oltaem, mo blong ridim mo tingting dip long Tok blong God evri dei. Maet yumi luk se hemia i wan simpol samting nomo, be hem i wan long ol impoten samting we i save halpem yumi blong stap long smol rod ya blong laef.

9. ?Wetaem maet wan fren i mas stretem yu?

⁹ ?I hapen finis we yu stat blong wokbaot long wan rod we i lidim yu yu gowe long Jehova? (Sam 73:2, 3) Sipos wan fren we i bigman long spirit, i no fraet blong stretem yu, ?yu yu lesin mo yu folem advaes blong hem? Sipos yes, yu mekem i stret, mo i sua se yu glad tumas we fren blong yu i givim woning long yu.—Prov. 1:5.

10. ?Yu mas mekem wanem sipos wan fren i stretem yu?

¹⁰ Tok blong God i rimaenem yumi se: “Wan fren i save givim kil long yu from we hem i stap tru long yu.” (Prov. 27:6) ?Tok ya i minim wanem? Tingbaot pijatok ya: Yu yu wantem krosem rod, be i gat plante trak long rod ya, mo long semtaem yu stap toktok long fon. Ale yu step i go long rod. Be stret long taem ya, wan fren i holemtaet han blong yu mo i pulumbak yu yu kam long saed blong rod. Hem i holemtaet han blong yu strong tumas, ale i gat mak long han blong yu, be aksen blong hem i mekem se trak i no bangem yu. Nating se han blong yu i soa blong plante dei, ?be bambae yu kros se fren ya i pulumbak yu? !Nogat! Bambae yu glad tumas long help blong hem. Long sem fasin, sipos wan fren i givim woning se ol toktok mo aksen blong yu oli no laenap wetem ol stret rul blong God, maet long stat yu harem nogud. Be yu no mas tingting nogud long advaes blong hem, o kros long hem. Hemia i krangke. (Pri. 7:9) I gud yu glad se fren ya i no fraet blong toktok.

11. ?Wanem i save mekem se wan man i sakemaot gudfala advaes blong wan fren?

¹¹ ?Wanem i save mekem se wan man i sakemaot gudfala advaes blong wan fren we i gat lav? Fasin praod. Ol man we oli praod, oli laekem we man i “switim sora blong olgeta.” Oli “tanem baksaed long trutok.” (2 Tim. 4:3, 4) Oli ting se oli waes mo oli impoten moa long ol narafala, mo se oli no nidim advaes. Be aposol Pol i raetem se: “Sipos wan man i stap ting se, ‘Mi mi wan man ya,’ be hem i nating nomo, hem i stap giaman nomo long hem.” (Gal. 6:3) King Solomon i tokbaot samting ya long sot tok nomo, se: “Wan pikinini we i pua be i waes, hem i gud moa i bitim wan king we i olfala be i stupid, mo we i no moa gat gudfala tingting blong lesin long woning.”—Pri. 4:13.

12. ?Yumi lanem wanem long eksampol blong Pita, long Galesia 2:11-14?

¹² Makem eksampol we Pita i soem, taem Pol i stretem hem long fes blong ol narafala. (Ridim Galesia 2:11-14.) Sipos Pita i wantem, hem i save kros long Pol from wei blong hem blong toktok, mo ples we hem i jusum blong tok long hem. Be Pita i waes. Hem i akseptem advaes mo i no tingting nogud long Pol. Defren olgeta, sam yia biaen, hem i tokbaot Pol se i wan “gudfala brata.”—2 Pita 3:15.

13. ?Wanem ol poen we yumi mas tingbaot taem yumi givim advaes long narafala?

¹³ ?Wanem sam poen we yu mas tingbaot sipos yu wantem givim advaes long wan fren? Bifo we yu go luk hem, i gud yu askem yu wan se: ‘?Mi mi wantem mekem olsem from we mi “stret bitim mak”?’ (Pri. 7:16) Wan man we i stret bitim mak, hem i stap jajem ol narafala. Hem i no mekem folem ol stret rul blong Jehova, be folem prapa rul blong hem, mo  maet hem i no gat sore tu. Sipos yu jekem gud tingting blong yu, be yu stil wantem blong toktok long fren blong yu, i gud yu faenemaot stret problem blong hem, mo yu yusum ol kwestin we bambae i pulum hem blong i talemaot tingting blong hem, hemia i save halpem hem blong i luksave mastik blong hem. Meksua se ol toktok blong yu i stanap long Baebol, mo rimemba se fren blong yu i mas talemaot poen blong hem long Jehova, be i no long yu. (Rom 14:10) Yu mas dipen long waes we i stap long Tok blong God, mo taem yu stap givim advaes, yu mas sore long fren ya olsem we Jisas i mekem. (Prov. 3:5; Mat. 12:20) ?From wanem? From we Jehova bambae i mekem long yumi stret olsem we yumi mekem long narafala.—Jem. 2:13.

14. ?Oganaesesen blong God i givim wanem long yumi?

¹⁴ Jehova i yusum pat blong oganaesesen blong hem long wol ya, blong lidim yumi long rod blong laef. Oganaesesen ya i givim ol video, ol buk, mo ol miting, blong halpem yumi evriwan blong folem ol advaes long Baebol. Yumi save trastem ol save ya from we oli stanap long Baebol. Hed Kampani i dipen long tabu spirit, taem hem i mas mekem desisen long fasin blong wok blong prij. Be yet, Hed Kampani i jekem desisen blong hem oltaem long fasin ya blong oganaesem wok. ?From wanem? From we ‘wol ya i stap jenis,’ mo oganaesesen blong God i mas jenis folem ol niu situesen.—1 Kor. 7:31.

15. ?Wanem samting we i no isi, we sam pablisa oli fesem?

¹⁵ I sua se yumi kwik blong akseptem ol niufala save long saed blong wan Baebol tijing o wan rul long saed blong ol gudfala fasin. ?Be wanem riaksen blong yumi taem oganaesesen blong God i mekem wan jenis we i afektem laef blong yumi? Eksampol, long ol yia we i jes pas, praes blong bildim ol haos wosip mo blong mentenem olgeta, i go antap bigwan. Taswe Hed Kampani i givim instraksen se plante kongregesen oli mas yusum sem Haos Kingdom nomo. Jenis ya i mekem se sam kongregesen oli joen i kam wan nomo, mo oli salemaot sam Haos Kingdom. Mo mane we oli sevem, oli yusum blong bildim ol Haos Kingdom long ol eria we i nidim moa. Sipos yu yu laef long wan eria we oli salemaot sam Haos Kingdom, mo sam kongregesen oli joen i kam wan, maet yu harem se i had blong lan long niufala jenis ya.  Naoia sam pablisa oli mas travel i go longwe moa blong joen long ol miting. Sam narafala oli luk we oli salemaot wan Haos Kingdom we oli bin wok had blong bildim o mentenem. Maet oli filim se oli bin westem taem mo paoa blong olgeta nomo. Nating se i olsem, oli akseptem niufala plan ya, mo yumi talem bigfala tangkiu long olgeta from.

16. ?Olsem wanem bambae yumi holemtaet glad sipos yumi folem advaes blong Kolosi 3:23, 24?

¹⁶ Bambae yumi holemtaet glad sipos yumi tingbaot se yumi stap wok blong Jehova, mo se hem nao i stap lidim oganaesesen blong hem. (Ridim Kolosi 3:23, 24.) King Deved i soem wan gudfala eksampol, taem i givim presen mane blong bildim tempol. Hem i talem se: “?Mi wetem ol man blong mi, mifala i hu blong mifala i givim ol ofring olsem? Evri samting oli kamaot long yu, mo mifala i stap givim long yu ol samting we oli kamaot long prapa han blong yu nomo.” (1 Kron. 29:14) Taem yumi givim presen mane, yumi tu yumi givim samting we i kamaot long prapa han blong Hem nomo. Nating se i olsem, Jehova i glad tumas long taem, paoa, mo mane we yumi givim blong sapotem wok we hem i wantem se i gohed.—2 Kor. 9:7.

17. ?From wanem tingting blong yu i no mas foldaon sipos yu mas jenisim ol step blong yu?

¹⁷ Blong stap long smol rod ya blong laef, yumi evriwan i mas folemgud ol step blong Jisas. (1 Pita 2:21) Tingting blong yu i no mas foldaon sipos yu luk se yu mas jenisim ol step blong yu. Maet hemia i wan gudfala saen, i soem se yu wantem tumas blong folem daereksen blong Jehova. Yumi no stret gud olgeta, taswe yumi mas rimemba se Jehova i no ekspektem se yumi mas folem eksampol blong Jisas long fasin we i stret gud.

18. ?Yumi mas mekem wanem blong kasem ples we yumi wantem kasem?

¹⁸ I gud yumi evriwan i putum tingting blong yumi i stap long fiuja, mo yumi rere blong stretem ol tingting, fasin, mo aksen blong yumi. (Prov. 4:25; Luk 9:62) Yumi gohed blong gat tingting daon, yumi “gohed blong stap glad, mo [yumi] gohed blong stretem tingting blong [yumi].” (2 Kor. 13:11) Sipos yumi mekem olsem, “God ya we i God blong lav mo pis, bambae i stap wetem [yumi].” Nao bambae yumi enjoem wokbaot blong yumi, mo bambae yumi kasem ples we yumi wantem kasem.