1. Domu bani Mateus 7:13, 14, mase ihatahon anggo hita songon ibagas pardalanan?

BOI ihatahon ganup hita ibagas pardalanan hu hagoluhan sadokah ni dokahni. Halani ai, bai ganup ari maningon marusaha ma hita totap setia mangidangi Jahowa ase dapot hita hagoluhan ai. Tapi songon na ihatahon Jesus, sompit do dalan ai janah sipata lang urah idalani. (Basa Mateus 7:13, 14.) Leganni ai, halani hita lang gokan dear ra do gabe manirpang hita hun dalan ai.​—Gal. 6:1.

2. Aha ma na laho iulas hita bani artikel on? (Tonggor ma kotak “ Martoruh ni Uhur ma Sanggah Mardalan i Dalan hu Hagoluhan”.)

² Bani abad na parlobei iojur apostel Paulus do ase kuria Korint ra ‘ipatorsa’ atap mambahen hamubahon. (2 Kor. 13:11) Sonai homa sonari on, maningon ra do hita mambahen hamubahon ibagas uhur, pingkiran, ampa parlahounta, ase totap hita i dalan hu hagoluhan ai. Bani artikel on, holi iulas hita ma sonaha Bibel mangurupi hita mangkorjahon ai. Dob ai, iulas hita homa sonaha hasomanta sahaporsayaon na gabe siusihan boi mangurupi hita totap i dalan hu hagoluhan. Leganni ai, iulas hita ma aha do sipata na mambahen lang urah mangihutkon tugah-tugah humbani organisasi ni Naibata. Na parpudi iulas hita ma mase maningon ipatuduh hita toruh ni uhur ase boi hita marmalas ni uhur mambahen hamubahon.

3. Sonaha Bibel boi mangurupi hita?

³ Ra do lang urah mamareksa uhur ampa pingkiranta. Mase? Halani sipaoto-oto do uhur ni jolma janah ra do iboan hita hu dalan na salah. (Jer. 17:9) Halani ai, ra do  gabe ioto-otoi hita dirinta. (Jak. 1:22) Jadi, maningon igunahon hita ma Bibel laho mamareksa ‘sura-sura ampa pingkiranta’. (Heb. 4:12, 13) Songon mesin rontgen na boi mangidah ronsi hubagas angkulanta, sonai ma homa Bibel boi mambotoh aha do sasintongni na ibagas uhur ampa pingkiranta. Tapi maningon martoruh ni uhur do hita ase boi mandalankon podah ni Bibel atap podah humbani hasoman i kuria.

4. Hunja ibotoh hita anggo si Saul ai halak na gijang maruhur?

⁴ Humbani pangalaman ni Raja Saul taridah ma sonaha do ujungni anggo lang martoruh ni uhur hita. Gabe gijang do uhur ni si Saul janah lang ra mambahen hamubahon. (Ps. 36:2, 3; Hab. 2:4) Taridah do on sanggah ipatugah Jahowa aha na maningon ibahen ia dobkonsi italuhon ia halak Amalek, lang idalankon ia ai. Sanggah ipinsang nabi Samuel ia, lang ra ia mangaku salah. Ibahen do sidalianni janah isalahkon do homa halak na legan. (1 Sam. 15:13-24) Paima ai pe, ongga do homa si Saul mambahen hasalahan sisonai. (1 Sam. 13:10-14) Halani totap gijang uhurni janah lang ra mambahen hamubahon, gabe lang marosuh Jahowa mangidahsi.

5. Parlajaran aha ma na dapot hita humbani pangalaman ni si Saul?

⁵ Tontu lang ra hita maniru si Saul. Halani ai maningon ipareksa hita ma dirinta. Sungkun ma: ‘Sanggah dong podah ni Bibel na sosok bangku, ai hubahen do sidalianku? Ai dong do ibagas uhurhu lang pala salah na hubahen ai? Ai husalahkon do halak na legan?’ Anggo eak do balosmu bani sungkun-sungkun ai, maningon marusaha ma ham mambahen hamubahon ni uhur ampa pingkiran. Anggo lang ibahen ham sonai, gabe maseda ma parhasomananmu pakon Jahowa.​—Jak. 4:6.

6. Sonaha pambahenan ni si Daud legan pakon si Saul?

⁶ Tapi anggo Raja Daud, lang sarupa ia pakon si Saul. Holong do uhur ni si Daud bani “titah ni Jahowa”. (Ps. 1:1-3) Ia mambotoh ipaluah Jahowa do halak na toruh maruhur janah ipatoruh do na gijang maruhur. (2 Sam. 22:28) Halani ai ra do si Daud mambahen hamubahon ni uhur ampa pingkiran, domu bani titah ni Jahowa. Ia mangkatahon, “Pujionku do Jahowa, na mamodahi ahu, age borngin iajari [pusu-pusungku] do ahu.”​—Ps. 16:7.

7. Anggo toruh maruhur hita, aha ma na ibahen hita?

⁷ Anggo halak na toruh maruhur hita, tontu ra do hita mambahen hamubahon janah mangihutkon podah ni Bibel. Hata ni Naibata usih songon sora na mangkatahon, “On ma dalan, dalani ma ai!” Jadi, mintor ipasingat do hita porini laho manimbil hu siamun atap pe hu sambilou. (Jes. 30:21) Anggo ra hita manangihon Jahowa, gabe martuah ma goluhta. (Jes. 48:17) Umpamani, halani dear parlahounta, lang porlu be ipasingat halak hita. Lambin orot ma parhasomananta pakon Jahowa halani ibotoh hita podah-Ni ai patuduhkon parduli do Ia banta, usih songon bapa na parduli bani niombahni.​—Heb. 12:7.

8. Domu bani Jakobus 1:22-25, sonaha hita manggunahon Hata ni Naibata songon sormin?

⁸ Usih songon sormin do homa Hata ni Naibata ai. (Basa Jakobus 1:22-25.) Somalni paima kaluar hun rumah, gati do hita markaca laho mangidah atap adong do na porlu ipajenges. Sonai homa Bibel, sanggah ibasa hita ai, gabe ibotoh hita ma  aha do na porlu ipadear ibagas uhur ampa pingkiranta. Jadi, bahat do halak na rosuh mambasa ayat harian bai sogod ni ari ase boi irimangi sidea ayat ai, janah ibotoh ma sonaha mandalankon ai bani ari ai. Leganni ai, maningon ibasa anjaha irimangi hita do homa Bibel bai ganup ari. Anggo ibahen hita sonai gabe iurupi ma hita totap mardalan i dalan hu hagoluhan.

9. Aha do ra na mambahen dong hasoman na mamodahi ham?

⁹ Ai ongga do manimbil langkahmu na mambahen ham lambin mandaoh humbani Jahowa? (Ps. 73:2, 3) Porini dong hasoman sahaporsayaon na mamodahi ham, ai ra do ham mandalankon podahni ai? Anggo ra ham mandalankon ai, domma dear ai. On patuduhkon ihargai ham do sipasingat humbani hasomanmu ai.​—Pod. 1:5.

10. Aha do na maningon bahenonmu anggo dong hasoman na mamodahi ham?

¹⁰ Bani Bibel ihatahon, “Ugah halani lonsing-lonsing ni huan-kuan, holong do ai.” (Pod. 27:6) Aha do artini ai? Bayangkon ma situasi on: Ham sihol menyebrang. Tapi halani sibuk marhenpon, lang ipardiateihon ham dong motor na montas ijai. Jadi sanggah mardalan ham, mintor gogoh ma isintak hasomanmu tanganmu ase ulang itabrak motor ham. Ra do gabe borit tanganmu ronsi piga-piga ari halani gogoh isintak ia tanganmu ai. Ai manggila do ham hu bani? Tontu lang. Tapi martarima kasih do ham. Sonai ma homa sanggah dong hasoman na mamodahi ham halani adong parsahap atap parlahoumu na lang madear. Ra do mungkahni maborit uhurmu. Tapi ulang ma igilai ham ia halani ipodahi ham. Anggo ibahen ham sonai, doskon halak na oto do ai. (Par. 7:9) Tapi, martarima kasih ma hu bani halani domma barani ia patugahkon ai bamu.

11. Aha do na mambahen sasahalak lang ra manjalo podah humbani hasomanni?

¹¹ Aha do na mambahen sasahalak lang ra manjalo podah humbani hasomanni? Gijang ni uhur. Halak na gijang uhurni sihol “mambogei na mantin-mantin tangaron” dassa. Lang ra sidea manangar “hasintongan”. (2 Tim. 4:3, 4) Pangahapni lang porlu ia ipodahi halani ninuhurni pentaran do ia marimbangkon halak na legan. Tapi nini si Paulus, “Anggo ipajuntul-juntul halak dirini, hape aha pe lang ia, na paoto-otohon dirini do ai.” (Gal. 6:3) Ai do homa na ihatahon Raja Salamo. Ia mangkatahon, ‘Dearan do sada parana na miskin, tapi na maruhur, humbani sada raja na matua, tapi na oto anjaha na so ra ipalumba.’​—Par. 4:13.

12. Humbani Galatia 2:11-14, aha ma na boi iparlajari hita humbani si Petrus?

¹² Pardiateihon ma aha na boi iparlajari hita humbani apostel Petrus sanggah ipasingat si Paulus ia i lobei ni buei halak. (Basa Galatia 2:11-14.) Boi do gabe borit uhurni halani karas do sipasingat na ibere si Paulus ai, janah ihatahon do ai i lobei ni buei halak. Tapi halak na maruhur do si Petrus ai. Ijalo ia do sipasingat ai janah lang mardomdom ia bani si Paulus. Bani suratni isobut ia do si Paulus ‘hasoman haholonganni’.​—2 Ptr. 3:15.

13. Aha do na maningon idingat ham sanggah mamodahi hasoman?

¹³ Anggo sihol ham mamodahi hasomanmu, aha ma na maningon idingat ham? Paima ipodahi ham ia, sungkun ma dirimu, ‘Ai halak na “mapintortu” do ahu?’ (Par. 7:16) Sahalak na mapintortu lang mangihutkon pingkiran ni Jahowa  sanggah ia mamodahi, tapi mangihutkon pingkiranni sandiri do. Janah lang homa maridop ni uhur ia. Tapi, anggo domma ipareksa ham alasanmu laho mamodahisi, janah pangahapmu memang porlu do ia ipodahi, gunahon ma sungkun-sungkun ase iarusi ia aha do salahni. Dingat ma sedo hak-mu manguhumi ia. Tapi urupi ma ia laho mangarusi sonaha pangahap ni Jahowa mangidah pambahenanni na lepak ai. (Rom 14:10) Jadi, sanggah mamodahi hasoman ham, marpangunsandeian ma bani Hata ni Naibata. Anjaha tiru ma idop ni uhur ni Jesus. (Pod. 3:5; Mat. 12:20) Mase? Halani sonaha pambahenanta bani hasoman, sonai do homa na ibahen Jahowa hubanta.​—Jak. 2:13.

14. Aha do na ipasirsir organisasi ni Naibata hubanta?

¹⁴ Marhitei organisasi ni Naibata na i tanoh on, iurupi do hita ase totap mardalan i dalan hu hagoluhan. Buei do ipasirsir video, publikasi, ampa acara partumpuan ase ibotoh hita sonaha mandalankon Hata ni Naibata. Maronjolan humbani Bibel do ganup pangajarion ai. Sanggah Pangurus Pusat mamingkirhon cara na dear laho mambobahon horja parambilanonta, iihutkon sidea do panogu-noguan ni tonduy na pansing sanggah laho mambahen haputusan. Anjaha totap do ipareksa sidea sonaha do hasilni haputusan na dob ibahen ai. Mase? Halani “laho salpu do ruhut ni dunia on”. Jadi maningon torus ma organisasi mambahen penyesuaian.​—1 Kor. 7:31.

15. Mase sipata lang urah mangihutkon aturan?

¹⁵ Sipata, ra do ipatangkas organisasi pasal ajaran ni Bibel, atap ibere podah pasal sonaha marparlahou na madear. Tontu iihutkon hita do ai. Tapi sonaha porini lang urah iahap hita mandalankon pangaturan na ibahen organisasi? Umpamani, baru-baru on lambin tambah do duit na ihaporluhon laho pajongjongkon ampa mangurus Balei Harajaon. Halani ai ibahen Pangurus Pusat ma pangaturan ase sada Balei Harajaon igunahon piga-piga kuria. Halani ai, dong ma kuria na ipasada janah dong homa Balei Harajaon  na ijual. Ipakei ma duitni ai laho pajongjongkon Balei Harajaon i ianan na lobih mamorluhon. Ambit Balei Harajaon na ijual ai dong i daerahmu, ra do iahap ham lang urah mangihutkon pangaturan ai. Ra do gabe adong parbarita na lambin daoh pardalananni hu partumpuan. Ra do adong na mangahap soya-soya ma sidea dihut pajongjongkon Balei Harajaon, hape ujungni ijual do ai. Hassi pe sonai, totap do iihutkon sidea pangaturan ni organisasi. Patut do sidea ipuji halani ai.

16. Sonaha podah bani Kolosse 3:23, 24 boi mangurupi hita totap marmalas ni uhur?

¹⁶ Gabe marmalas ni uhur do hita anggo idingat hita aha pe na ihorjahon hita ibagas pangidangion, bani Jahowa do ai. Janah idingat hita homa Ia do na manogu-nogu organisasi-Ni. (Basa Kolosse 3:23, 24.) Tiru hita ma si Daud na ringgas mambere sumbangan laho pajongjongkon rumah panumbahan. Nini do, “Ise ma ahu, anjaha aha ma bangsangkin, ase boi hanami margugu humbani nionjar ni uhur sonin? Ai marharorohan hun Bamu do ganup, anjaha na humbani tangan-Mu in do na binerenami in Bamu.” (1 Kron. 29:14) Humbani Jahowa do harorohan ni sumbangan aha pe na ibere hita. Hassi pe sonai malas do uhur-Ni anggo igunahon hita panorang, gogoh, ampa artanta laho mangurupi horja ibagas organisasi.​—2 Kor. 9:7.

17. Mase lang pala maretek ni uhur hita sanggah ibotoh hita dong na porlu iubah ibagas uhur ampa pingkiranta?

¹⁷ Ase boi totap i dalan hu hagoluhan, maningon itiru hita do Jesus. (1 Ptr. 2:21) Anggo ibotoh hita dong na porlu iubah ibagas uhur ampa pingkiranta, ulang ma hita maretek ni uhur. Sasintongni ai patuduhkon sihol do uhurta mangihutkon aturan ni Jahowa. Dingat ma, ibotoh Jahowa do anggo hita jolma na lang gokan dear. Jadi iarusi Ia do lang tarbahen hita dos songon na ibahen Jesus.

18. Aha ma na maningon ibahen hita ase mandapot hagoluhan?

¹⁸ Jadi, sai totap ma hita mangkawah hu lobei. Sirsir ma hita mambahen hamubahon ibagas uhur, pingkiran, ampa parlahounta. (Pod. 4:25; Luk. 9:62) Tongtong ma patuduhkon toruh ni uhur, janah ‘marmalas ni uhur ma hita sanggah ipatorsa’. (2 Kor. 13:11) Anggo ibahen hita sonai, “ihasomani Naibata parholong anjaha pardamei in ma [hita]”. Anjaha iurupi Ia ma hita ase marmalas ni uhur sonari, janah bereon-Ni ma holi hagoluhan i dunia na baru.